jeudi 18 février 2010

شهوة صبيّة

أسكت على روحك هاك معايا *****رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

نجيبلك وذنين القاضي *****و معاهم بوليس مكتّف
و نبطّل الأحد الرّياضي *****و نسكّر فمّي كي نبرتف
ما نحكيشي مع الولايا *****و ما نشلوشّي منّا و منّا

أسكت على روحك هاك معايا *****رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

نذوّقك حليب الوزّة *****و كوكتالات العالم جملة
و نستنبطلك شرب معزّة *****يشيّخ و ما يعملشي ثملة
فودكا دمعتها جراية *****ليم و عصرة غلّة جنّة

أسكت على روحك هاك معايا***** رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

مالكمية نعملّك بازار***** بارد و ملذّذ و سخون
سلايط غريك و سيزار *****و ما تخمّمشي في الماعون
عندي مانقلّك إيجا حذايا *****غمّض عينك ذوق البنّة

أسكت على روحك هاك معايا *****رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

نصنّفلك شي عجب *****مقارن و كساكس و روز
يعطيهملك كان الرب***** ما ثمّاش منهم زوز
دلال و شهاوي الصّبايا***** روساتهم و حرفتهم عنّا

أسكت على روحك هاك معايا***** رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

علّوش بايت في الفور***** مفوّح هندي يذوب في الفم
و من تحت مسلان الثّور***** ستاك فرشك وسطو دم
بجنبو صوص مالهمالايا *****تحنّن الحما ع الكنّة

أسكت على روحك هاك معايا***** رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

كانك أنتيباتيك***** و طلعت عاملة ريجيم
نطيّبلك الدّياتيتيك *****و نعملّك الخضرة بالسّتيم
نشريلك ميزان و مرايا ***** و نقعد عاقل نستنّى

أسكت على روحك هاك معايا *****رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

هاذي ماهيشي غناية *****و ماهوشي بلڤاسم بوڤنّة
و ماهيشي الهوى هوايا *****و ماهيشي هيليلّيري يامنّة
هذا لخنّارك دوايا *****و شويّة من بهاراتي بالرّنة

أسكت على روحك هاك معايا *****رولاكسي إرتاح و إتهنّى
تبعني و إتخبّى ورايا ***** نجيبلك كل ما تتمنى

samedi 13 février 2010

بالعربي

تذكّر موعدا مهمًّا فترك الحاسوب ساخطا على البلاد و الحبس و الحجب و الفقر و التّخلّف و حمد الله على أنّه بعيد بعد السّماء على الأرض و "لا عين ترى ولا قلب يوجع". و إن كان هذا الموعد غير مهمّ بالمرّة لكنّ أغلب السّرديّات تبدأ بموعد مهم أو بنفث دخان سيجارة. كان موعدا عاديا مع بعض الرفاق من السكان الأصليين وعدوه بمفاجأة ستعجبه و ستذهله إن ذهب معهم في جولتهم لبيع بعض بضائعهم الممنوعة فقبل على مضض إذ كان يفضّل الذّهاب معهم للصّيد أين يستطيع إفراز القليل من الأدرينالين بوضع لقبه كبطل الدّورة الغذائيّة على هذا الكوكب في الميزان أمام منافسين يصل وزنهم عشرة أضعاف وزنه في حين أن بيع بضائعهم الممنوعة عمل روتيني في هذه الغابات أين لا توجد شرطة و لا جيش فالملكة بعيدة في قصرها و الرّبّ عال في سمائه.
قضوا ساعات طوال في الطواف على حرفاءٍ يحاولون نسيان فراغ الثلوج البيضاء بسراب الغبار الأبيض و تبادل الشتائم بلغات مختلفة و كان بين شتيمتين يتأمّل الغابات الشاسعة و يتذكّر قول مكتشف شمال هذه القارّة بأنّ هذه الأرض أعطاها الرب لقابيل عقابا له ثمّ يتمنّى لو كان له أخ ليقتله فيعاقبه الرّبّ بأرض كهذه يجري من تحتها البترول و اليورانيوم و الألماس.
وصل الرّكب إلى منزل أشبه بكوخ في مكان لم يصله من قبل و دخل أحد رفاقه بالبضاعة و خرج بقنّينة فيها شيء كالزّيت و قال له هذه مفاجأتك و الساكن هنا يقول أنّ فيها شفاء من كل داء وهو حسب تقديرنا من نفس بلادك نظر إلى الزجاجة حيث كان مكتوبا زيت حبّة البركة و ودّ لو ضربهم بها لكنّه فضّل الحياد نظرا لتحمّسهم لهذه الفكرة و تضامنا مع هذا المدمن اللذي إستطاع أن يقايض سلعة وطنيّة مقابل بضاعة باهضة الثّمن.
قضى طريق العودة ينظر لرفاقه المتحمّسين لهذا الإكتشاف العظيم كما تحمس جدودهم لمقايضة الخمر و المرايا مقابل الفرو الثّمين و يرمق الزّجاجة بنظرات فيها مزيج من الدهشة و السّخط و هو يردّد في قرارة نفسه



يا دين الرّب يا دين الرّب *** فين نمشي نلقى العرب

vendredi 5 février 2010

يمشي و يجي

كان ثمّة شكون مازّال عندو الجهد و وسع البال و القابليّة للتّمرميد و برشا تفاؤل باش يخنتب يكمّل يخنتب أنا الأيّامات و من بعّد مديدة ماغير حاسوب / حلوّة حاسوب هاذي/ طارت النّفحة و إكتشفت إلّي الدّنيا ماغير تخنتيب و ما غير فايسبوك ماهيش دونيّة حتّى واحد يقول كان يزيد ينحّي التّاليفون و يرتاح مالجّوجمة.
حبّيت نقول كليمتين ماغير مقدّمات و ماغير تنظيم جوست هكّاكة حاجات جاو في مخّي و أنا في الخلا مابين الغابة و المتجمّد الشّمالي هاذي وقتها أوّل مرّة قرّاوهالي درت للّي بحذايا قتلو ديما يقرّيو فينا في حاجات ما تصلح لا للدّنيا لا للدّين شكون المهبول إلّي باش يمشي غادي؟/ هذا في فترة كانت أبعد بلاصة موجودة في مخّي تستحق تمشيلها هي ماناج محمد الخامس/ برّا يا زمان و إيجا يا زمان هاني غادي.
عاد ماغير حتّى ربط و لا نظام :

علاش كي يبدى في يدّك فرد النّاس الكل تبدى متربّية

ما ثمّاش حاجات مستحيلة ثمّة كان حاجات غالية يا فقراء

الجيل المولود في السبعينات في تونس إستنبط مفهوم جديد إنّجّمو نصدّروه للعالم الكل في الظروف المتأزّمة هاذي و هو مفهوم الماعنباليزم مثلا تجي تشوف تلقى المنظومة الأخلاقيّة متاع الجيل هذا فلكسيبل ياسر و تحترم كان مصالحو الشّخصيّة الضّيّقة و الضّيّقة جدّا برشا عالإخّر الوطنيّة متاعو شبه منعدمة إلّا في حالة وجود منافع مرتقبة ، المبادئ متاعو تتلخّص في يلزمني تلفزة بلازما في بيت الصّالة و ما نحبّش نتمرمد في الكيران و البرنامج متاعو يتمثّل في تي نورمال تو تسلك
.
شبيها المنڤالة كي تبدا هابطة في النص ساعة لولة مثلا مالتّسعة للتّسعة و نص تبدا تجري لف لف و كي تبدا طالعة مالتسعة و نص للعشرة ما توصل كان بالسّيف

أنا إنّجّم نقرا البلوغ متاع طارق من غير بروكسي يا زواولة البلوغ متاع طارق من أوّل البلوغات إلّي قريتها و قليل قليل في حياتي باش لقيت واحد أنا و إيّاه ما نخمّموش كيف كيف جملة وحدة وهذاكة علاش ديما نقرالو و باش نقعد نقرالو و بما أنّو عمّار ما عندو ما ينجّم يعمل في الحالة هاذي فإنّي شاهي نغنّيلو غناية متاع ستاد طلعها جيل الماعنباليزم و نغنّيها كان إل عمّار على خاطرها ما هيش محترمة و فيها ياسر ماتشيزم و فيها كلمتين/هذاكة علاش تعبّر برشا على إيديولوجيّة الماعنباليزم/ و هي تبدا ب جيبلو و توفى بوحدة مالعايلة و كان باش يقول عمّار إلّي ممنوع باش نحكي هكّة نعاود نقلّو جيبلو.... و كان يقول ياسر قلة تربية نعاود نقلّو جيبلو .... وكان باش يقول مستواك ياسر طايح فإنّو نقلّو
شكون عرفها الغناية؟؟
أحسن وسيلة باش تعدّي الوقت في الطّيّارة كي تبدا لحيتك هايجة تقوم كلّ درجين للتّواليت و إنتي عاقدها و تتفرّج في الريياكسيون متاع العباد
شكونهم جنود الخفاء و كي تقول عليهم يقعد إسمهم جنود الخفاء ؟
مازّال ثمّة شكون يتفرّج في الرّاي أونو؟؟ و كان ثمّة شكون يتفرّج بالله مازّالو يعدّيو في سوتّو فوتشي ؟؟

كي تبدى مولود في بلاد تنجّم تدخل فيها للحبس و إنتي ما عملت شي علاش ما تعملش حاجات تدخّل للحبس و تنجّم تصوّر فيها شويّة فلوس بما أنّو الرّيسك موجود هكّة و إلّا هكّة
على ذكر الحبس.... صحيح الحبس للرّجال أمّا المعاودة موش مليح / بدّلتها على خاطر برشا ولّى كلام خايب/
ما عاد نصدّق حتّى حد عندو فلوس و ما سرقشي وإلّا ما ورثشي
مرقة البطاطا أكثر ماكلة في العالم مافيها حتّى خيال و حتّى مجهود إذا مرتك و إلّا صاحبتك طيّبتلك مرقة بطاطا أعرفها راهي بدات تفدّ منّك و مالكوجينة...يرحم من سمّاها مرقة حطّاطة
هيّا يزّي و نقترح تبدّلو الإسم من بلوغوسفار تردّوه حي التّضامن