Rien à ajouter

N'est-il pas honteux que les fanatiques aient du zèle et que les sages n'en aient pas ?

Voltaire

إيكو...نفاق

موش عدّاونا في الأحد الرّياضي الجمعة هاذي... ماهو جاونا جماعة لبيب و ربطو رواحهم في الكماين و وقفو الخدمة...هو راهو الحفاظ على البيئة باهي أمّا زادة قطع الأعناق و لا قطع الأرزاق... نشجّع ڤرين بيس على خدمتها في العالم الكل أمّا اللّعب موش بعشانا ...برّا دافع على حقوق الجرذ البوتسواني و إلّا الكوالا الأسترالي أمّا إبعد عليّ خلّيني نخدم على روحي...قالّو سكّر المشروع...ناس حاطّة مليارات و نقابات كاملة تحلّت و خاصّة خاصّة أنا نخدم غادي و قالّو سكّر المشروع... تو نفسّدو النّاس الكل برامجنا على خاطر كمشة ڤوش كافيار ربطو رواحهم في كميون.هو زيد عندي شويّة سؤالات شبيهم ماجاوش في الشّتا؟؟؟ ماهم تقابلو أوباما و هاربر في شتا عمناول؟؟ و إلّا باردة عليهم الدّنيا؟؟ كيفاش وصلو لهنا لإخّر الدّنيا؟؟ جاو على ساقيهم ؟؟ ماهم جاو في كرهبة و إلّا أي حاجة تخدم بالإسونس؟؟؟ كان يسكّرو المشاريع هاذم النّاس منين باش تاكل ؟؟الحاصل ما ناقصين كان ڤرين بيس توّا. ..طير ماحلى فراڤك

يتعلّط

ماحلى ليالي إشبيلية

و صوت الڤيتارة و الوتر

آآآآآنا حبيبتي جميلة

نشكي هواها للقمر

إحم... إحم... عاد كلمة اليوم اليوم و هي بيناتنا هذاكة علاش إسمها كلمة اليوم على خاطرها اليوم مانعرفش كان جيت كتبتها البارح نولّي نقول كلمة اليوم البارح و إلّي هي حاجة ما تجيش بالكل.

عاد كلمة اليوم هي يتعلّط و هو كيما تشوفو فعل على وزن تفعّل معناها الجذر متاعو يجي علط إلّي ما عندي ليها حتّى تفسير لا بالعربي لا بالدّارجة لا بالسّوري...معناها هاذي ما يطلع كان واحد قاعد رايض على روحو و نورمالمون ڤالڤ زادة على خاطر سينون آش لزّو يطلّع في الكلام و شاف واحد يعمل في حاجة موش متاعو و ما يڤدّهاش و غلّب عليه ياخي إستنبطلو الكلمة هاذي باش يبرّد على قلبو.

و فعلا في بعض الحالات ما ثمّة كان الكلمة هاذي تأدّي المعنى و تصوّر محاولة البعض القيام بأعمال لا تتناسب البتّة مع إمكانيّاتهم المحدودة و هذا يخلّيهم تكركيرة قدّام النّاس و يضحّك عليهم خلق ربّي و المعنى هوني يستقيم أكثر كي يكون المتعلّط يعمل في حاجات صعيبة عليه و يزيد فوق هذا يشدّ صحيح و ما يفكّش معناها الكلمة هاذي فيها برشا معاني مخلّطة واحد ما يعرفش حدود إمكانيّاتو و مضروب في روحو شويّة و راسو كاسح و مايفكّش و ما يهداش. أوّل مثل يجيني إل مخّي هو كلب ينبح على طيّارة لهنا واضح إلّي الكلب يتعلط على بدنو و البارتي قويّة ياسر عليه. ينجّم يكون كلب بحر يتزعبن على فكرون زادة لهنا الكلب بحر ما عندو حتّى فكرة قدّاشو بعيد عالتّلفزة.

واضح لهنا إلّي بخلاف بعض العباد إلّي عندهم شويّة تخلف ذهني و شويّة ركاكة و إلّي للأسف عددهم ماشي و يزيد، حالة التّعلّط ع البدن عند العباد العاديّين تكون حالة عابرة على خاطر أنا ما نقلّك و إنتي ما يخفاك ماناش الكلّنا كيف كيف في الدّنيا هاذي معناها واحد تلقاه ينجّم ينڤّز مالثّاني طاق و ما يجرالو شي في حين كان إنتي تتعلّط على بدنك و تعملها تو تمشي ريش نعام. لذا فإنّو العبد العادي في بعض الحالات الله أعلم بيه يحبّ يجرّب حاجات قويّة عليه يا إمّا جهلًا و إلّا غرورًا و يحبّ يعمل حاجات كيما عباد أخرين و ترصّيلو يعاني من بعّد.

باش نزيد نوضّح علاش ماناش كيف كيف / كيف كيف في الحقوق و الواجبات و هاك اللّوغة أمّا موش في الإمكانيّات/ مثلاً ثمّة عباد تبدا مختصّة في حاجة معيّنة و تبدا أمورهم واضحة و مصلّي عالنّبي عليهم يقومو يدخلو في دومانات أخرى فركة و عود حطب و يولّيو يتعلّطو والعياذ بالله.و ثمّة عباد أقلّ إمكانيّات من هكّة و يبداو عسل الدّنيا كي يبداو ساكتين دوب ما يحلّو أفّامهم مساكن يولّيو يتعلطو كيف ما قال درا شكون أقعد ساكت ثمّة بوسيبيليتي تكون بهيم خير ما تتكلّم و يتأكّدو النّاس الكل إلّي إنتي بهيم و ثمّة ما أتعس اللّطف ثمّة شكون حتّى كي يتنفّس يتعلّط على بدنو الله غالب موش معطيلو حتّى باش يكون كائن حي بدائي صعيبة عليه

.
يقول القايل منين واحد يبدا يتعلط؟؟ كلّ واحد و كيفاش مثلا

نانسي عجرم كي تشطح و حتّى كي تغنّي غنايات ساهلة اللّه مصلّي عالنّبي عليها كي تقوم تغنّي في الطّربيّات فإنّها تتعلّط.
الشّيخ كهفان كي يبدا يحكي في الأخلاق و العبادات و السّير فإنّو ماحلاه ماحلاه و كي يقوم يحكيلي على علم الفلك والطب فإنّو يتعلّط.
الكوّارجي كي يبدا يدريبل و يمركي يبدا يعبر كي يولّي يعطي في دروس في الأخلاق فإنّو يتعلّط
هيّا ما عادش بكري عليّ كمّلو اللّيستة وحّدكم
حبيبتي سمرة

زادت جمالها التّاتو الحمرا

فضّة بيرسينغها تلمع في الصّرّة

نشكي هواها للقمر

Papaver somniferum

Je ne me suis jamais posé de questions à propos du prix maudique du pied à terre que je loue ici. C'est vrai je rentre rarement ici et le propriétaire indien est très gentil. Donc pas de quoi être suspicieux. Mais voilà que plusieurs personnes m'affirment que mon jardin est plein d'opium :) Je ne m'y connait pas en stupéfiants. En tout cas pas ce genre là. Mais là c'est la troisième personne qui m¸'affirme que c'est de l'opium. Wikipédia aussi affirme la même chose. Il est temps de déménager de Calcutta. Ijik lébla ya ghafel :)) Comme quoi, même si tu essayes de faire autrement que tes voisins de quartier qui sont en Italie et en France, le sort ironique et farceur peut s'arranger et te mettre dans la même situation..... et le pire ça n'étonnera personne ni ici ni là-bas :).

تقثم؟؟؟

نتذكّر وقت إكتشفت الجرايد التّونسيّة إلّي تحكي بالفرنسي بهّتوني في الوقت هذاكة قدّاشهم مختلفين ع الجرايد التّوانسة إلّي تحكي بالعربي و نتذكّر يمكن كانت من أوّل المرّات إلّي حسّيت فيها بالظّلم موش قاعد نسخّف فيكم راهو أمّا المرّات الأولانين إلّي تحسّ بيهم بالظّلم عندهم نكهة سبيسيال بما أنّو من بعّد تستانس و يولّي ماعادش يحوك فيك. نقول حسّيت بالظّلم موش عليّ أنا أمّا على أغلبيّة العباد إلّي دايرة بيّا و تقرى كان في الجرايد بالعربي و يتشكّاو من مستواها إلّي موش مساعدهم بالطّبيعة أنا بمخّ متاع وليّد صغير منّي بديت نحسّ في روحي ديجا متفوّق عليهم و نحسّ في قلة العدل في العالم هذا

.
حتّى في أخبار الكورة ثمّة فرق بين الجرايد بالسّوري و الجرايد بالعربي الأخبار الثّقافيّة ما ثمّاش مقارنة أكثرشي من الإعلانات كان تحبّ تلقى موبل و إلّا حاجة تصلح الجرايد بالسّوري تقضي خير. و من أوّل الدّنيا إلّي عندو المعلومات الصّحيحة هذاكة إلّي يعبر و يسلكها.

من بعّد كي تكبر تزيد تفهم إلّي العباد إلّي تقرى في الجرايد السّوري و العربي ما ثمّاش فرق كبير بيناتهم و يتقابلو كل يوم و ينجّمو يكونو صحاب و ينجّمو يكونو أنساب و حتّى راسين في شاشيّة و متاع الجرايد السّوري قليل فين يضوّي لمتاع الجرايد العربي و كيف كيف متاع العربي جامي يلوّج على الجودة النّسبيّة إلّي في الجرايد بالسّوري

.
من بعّد كي تجي تخمّم تلقى نفس الحكاية قاعدة تتعاود من أوّل الدّنيا قبل كانو إلّي يعرفو يقراو و يكتبو و إلّا إلّي يسافرو و يحفظو هوما عندهم المعلومات و الحكاية هاذي قعدت لمدّة قرون سلطة معنويّة و ساعات فعليّة للّي عندو المعلومة. و يمكن هذاكة علاش صعب تنحيتها حتّى من طرف الجيل إلّي يقرى في الجرايد بالسّوري و يرسّخ في ديموقراطيّة التّعليم. حتّى الجيل هذاكة إستحفض /يمكن حتّى من غير ما يشعر/ بشويّة سلطة معنويّة و فعليّة بعدم مشاركتو للمعلومة

.
يقول القايل آش مدخّلني في هالمداخل أنا توّا ؟؟ و آش لزّني نحكي في حكاية حولة كيف هاذي؟؟ الحكاية جات لبالي من بعّد ما حلّيت كونت فايسبوك ثاني بإسم البروفيل متاع البلوغر متاعي...و إلّي هي بين قوسين تجربة فاشلة و مهمشتلي محاسيسي و بعثرتلي طرف الأفكار إلّي عندي و النّورونة إلّا إثنين إلّي كنت نفيّس بيهم ع الخلق دخلو بعضهم...مثلا إذا باش تبدّل ستاتوس تولّي تخمّم نبدّلو في الكونت الأوّل و إلّا الثّاني ؟؟ الحاصل تحسّ روحك قريب تولّي مهبول بالضبط و تولّي ما عادش تستعملهم الزّوز... أمّا الفازة هاذي فيها عفسة حلوّة ياسر هي إلّي ذكّرتني بموضوع الجرايد السّوري و العربي... الأصحاب متاع العالم الإفتراضي بالرّغم ما يبعدوش برشا نتصوّر إجتماعيّا و إقتصاديّا عالأصحاب الواقعيّين عندهم منفذ للمعلومة أكبر بياسر من الأخرين و المعلومات المتداولة بيناتهم خير ببرشا من المعلومات إلّي تسركل بين الأخرين. يقول القايل علاش ما تخلطش المعلومات هاذي من غادي لغادي خاصّة و نحنا في عصر الشّارينغ و عدد التّوانسة على الفايسبوك موش برشا؟؟ زعمة العباد إلّي نعرفهم موش مهتمّين بالمواضيع الموجودة ع الأنترنات ؟؟ و إلّا المشكلة في المستويات و كلّ قدير و قدرو؟؟؟

الحق الموضوع مبلبز و متشعّب أمّا إلّي ثابت هو ثمّة فرق كبير في الوصول للمعلومة و في التّكوين و ما ثمّاش مساواة في الحظوظ حتّى من بعّد نص قرن من التّعليم الإجباري. موش كيف إلّي عندهم مكتبة في دارهم ملّي هو صغير كيف إلّي ما كسب كتاب كان في أوّل شهريّة متاعو و تزيد الحكاية تكبر و إلّا ترجع كيف ما كانت قبل دمقرطة التّعليم كي تولّي اللّعبة بالأورديناتورات و الأنترنات و ما يتطلبوه من إمكانيّات مادّيّة و تقنيّة ماهياش في متناول نص العباد كان موش أكثر. كي نشوف مثلا صحابي في البلاد هاذي بالرّغم مستواهم التّعليمي المتوسّط لكن عندهم كونت فايس بوك فيه العباد إلّي عرفوهم ملّي كانو في الإبتدائي يشدّني الضّحك على خاطر خمسة و سبعين في الميا مالعباد إلّي قراو معايا في الإبتدائي في البلاد الأخرى يمكن يحبّلهم جيل و إلّا ثنين باش يعملو أورديناتو و أنترنات. بالطّبيعة كي نقارنو بين البلدان تولّي واضحة إلّي الحالة إلّي نعيشو فيها موش عاديّة بالكل. و موش نورمال إلّي يبدا عندك نخبة تتميّز كان بإحتكارها لتكوين محترم و إلّا بإتقان لوغة و إلّا بإمتلاكها لتقنية معيّنة. النّخبة لوجيكومون تتميّز بإمكانيّات فكريّة و إلّا

إبداعيّة متفوّقة عالباقي كونشي ما عملنا شي و قعدنا في وقت إلّي كان العلم و المعلومات حكر على طبقة أو عائلات معيّنة

.
يمكن هذاكة علاش التّكنولوجيّات الجديدة قاعدة تدخّل فينا بالسّيف توّا في عصر الشارينغ و المشاركة و "القثمان" و نحنا داخلين

بعضنا موش فاهمين كيفاش نسلّكوها. موش تقنيًّا و إلّا تكنولوجيّا هذاكة ساهل ياسر أمّا حطّت زوز /و إلّا يمكن أكثر/ أنواع متاع عباد عمرهم ما تلقّاو و عمرهم ما حكاو و يمكن حتّى ما يعرفوش بعضهم إلّي هوما موجودين حطّتهم فجأة يحكيو مع بعضهم و يتفاعلو مع بعضهم أون ديراكت. من ذلك إكتشاف لوغة الشّارع من بعض إلّي كانو عمرهم ما سمعوها و إكتشاف البعض الآخر لوجود توانسة يشربو في البارات و ثمّة إلّي إكتشف إلّي ثمّة توانسة متديّنين برشا وثمّة إلّي إكتشف إلّي ثمّة شكون يمشي يحط ميتين فرنك كل جمعة في مقام سيدي محرز و برشا حاجات أخرين. و هاذي البداية و مازال مازال على خاطر ثمّة برشا عباد باش يخلطو و مفاجآت تنتظر البعض و البعض الآخر.مثلا في البلوغوسفار ساعات تلقى واحد موش موافق على وجود واحد. موش موش موافق على فكرة من أفكارو.... لا لا ...على وجودو!!! بالرّغم إلّي هو تلقاه عندو في أصحابو و إلّا أقاربو عشرات كيفو علاش زعمة؟؟
أكثر حاجة تفرهد في عصر المعلومات و إقتصاد المعرفة هي سقوط القدسيّة إلّي كانت موجودة في المعلومة و ساعات في حاملها و هذا يخلق ساعات ردّة فعل عنيفة من "النخب" و ما شابهها. نتذكّر قبل كانو البانديّة بالمعنى القديم للباندي ما يتبلّاوش على واحد في إيدو كرطابة إلّي هي رمز متاع واحد متثقّف حتّى كان يبدا سنة خامسة صرف و نحو. زعمة قدر و موش متاع مشاكل. توّا الوقت غير الوقت و البانديّة الجدد يعرفو إلّي ثمّة قراية من قراية و يعرفو أنواع البورتابلوات إلّي ينطرو فيهم و يعرفو يباتشيو الريسابتور و برشا أمور أخرى.
يبقى السّؤال الوجودي إلّي يلزم العباد إلّي عندها المعلومات تجاوب عليه

:

تقثم؟؟؟
على خاطر مهآآآه ماعادش تقضي

يا حسرة

أحبابنا سيروا سيروا *** نغدوا إلى النّهر الجميل

أحبابنا سيروا سيروا *** ينحّي الكحّة في اللّيل