الحزّة الجّوينيّة...على أسس علميّة

نبداو بتعريف المصطلحات...إلّي هي أوّل حاجة في أيّ حكاية "جدّيّة"...باش العباد تعرفك فاش قاعد تحكي...و ما تستنتجش هي آش تحب ... اللّهمّ إلّا إذا نحبّوا نخلّيوهم على عماهم باش مبعّد نقولو لا موش هذا إلّي قصدتو و إنتوما ما فهمتونيش

تعريف المصطلحات : الحزّة الجّوينيّة وتعرف أيضا في بعض الدّراسات الجادّة بالحزّة الباجيّة وهي نوع من الحزّة (نوع من التّدخّلات

لفضّ النّزاعات) الغير المحايدة معناها تبدى تقول يا جماعة صليو على النّبيّ و راكم وخيّان وتبدى تضرب في واحد من أطراف النّزاع بالبونية و تمدّ للطّرف الآخر بطرا (نوع من الأسلحة البيضاء) و إلّا لام (شفرة حادّة

الحزّة الجّوينيّة ممارسة سياسيّة معروفة في الأحياء الشعبيّة و في العلاقات الدّوليّة...عاد موضوع السّاعة كيفيّة إستغلال الحزّة الجوينيّة في النقاشات...توّا كيف تبدى المواطنين العاديّين يحكيوا ع العلماندراشنيّة... ونجي نعمل تدخّل مهما كانت فكرتي و نعطيه صبغة علميّة ( و إلّا بورشادة و إلّا الواعر)...حاجة هايلة ياسر... ونحنا في حالة التّمهميش متاعنا مستحقّين للأفكار الكلّ..أمّا إذا الحكاية علميّة معناها محايدة وموضوعيّة على قدرالإمكان، تبدى من نوع الحزّة الجّوينيّة ماذا بينا إنّحّيوا منها الصّبغة العلميّة و نخرّجوها كرأي متاع مواطن عاديّ...وتولّي معناها نقاش آراء...على خاطر التّنظير في العلوم السّياسيّة (و في كلّ العلوم الإنسانيّة) أصلاً فيه إشكاليّة متاع موضوعيّة...و هذا موضوع ساهل أمّا يتقال بلوغة صعيبة هكّا باش زعمة إنتي نعملو شويّة إستعراض عضلات و نبرّروا السّنوات إلّي هرّينا فيهم سراولنا على مقاعد الدّراسة...هو معناها التّنظير في العلوم الإنسانيّة فيه مشكلة مربوطة بيه تقول إنتي متاع محايدة...خلّي عاد كيف تبدى الحكاية على الدّين و على العلمانيّة في تونس...و تبدى الحكاية سخونة و فيها أبعاد سياسيّة مصيريّة و مستعجلة...عاد إلّي يجي يقلّي صلّيو ع النّبي و راكم وخيّان و راهم ماهمش بهايم ياسر و يلزمكم تقراوا حساب الأوضاع في المنطقة و تعرفوا إلّي أحنا ديننا موش كيف الأديان الأخرين...و يقلّي هانا نتناااا.....ااا.....قشوا...نقلّوا هذا تعريف الحزّة الجوينيّة

ما نتصوّرش إلّي الموضوع فيه سوء نيّة...و أطراف النّقاش تعمل في السّياسة...أمّا هاذي بيت صابون و الزّلق فيها برشا...و كلّ واحد يلزمو يكون مسؤول على الكلام إلّي يقول فيه...و ما يجيش يكبّ سعد واحد من المتنازلين و يقلّوا قاعد نعمل في تحليل سياسي...يا خويا هو موضوع متاع مشروع مجتمع و مشروع دولة و تجي تقول كيفاش آرائك السّياسيّة تأثّر ع النّقاش...بالطّبيعة...واحد ليبرال (ما شبّها الكلمة بالفرانسي و إلّا بالأنقليزية تذكّرك بالحرّيّة و المبادرة الفرديّة و ما أخيبها بالعربي تذكّرك بالعمالة و الخيانة) باش يحامي على الحرّيّة الفرديّة و بالتّالي العلمابليّة...واحد إشتراكي ( كيف كيف بالسّوري تفكّرك بالمساواة في الحظوظ و بالعربي في التّعاضديّات) باش يحامي على الدّولة و دورها المحايد في المجال الدّيني و بالتّالي على العلماهيّة...واحد محافظ (هاذي بالعكس ماخيبها بالسّوري تذكّرك بالتّراجع على المكتسبات و ماحلاها بالعربي تذكّرك بالعادات و التّقاليد) باش يحامي على الخصوصيّات متاع المجتمع و بالتّالي باش يكون ضد العلكانيّة...إلخ...إلخ...و واحد محلّل سياسي يعمل تحليل للّي قاعد يصير ماغير يبدى ينظّر و يعطي في أعداد للعباد...معناها يلاحظ...

نتناقشوا أمّا النّقاش ما بين واحد يقلّك على أفكارو و برنامجو و واحد مايقلّكش على حتّى شي وواحد يقلّك قاعد نحلّل يضهرلي غيرعادل...معناها واحد يعمل في السّياسة ومتحمّل مسؤوليّتو و واحد يعمل في السّياسة و موش متحمّل مسؤوليّتو و واحد يعمل في السّياسة و يقلّك قاعد نحلّل....

هو أنا قلت ما نتصوّرش إلّي ثمّة سوء نيّة وبلحق المحلّل يحب يحلّل أمّا، اللّه غالب الموضوعيّة تحضرو تغيب، و المناقش إلّي متحمّل مسؤوليّتو يعطي في رأيو السّياسي كمواطن يعبّر على رؤيتو للمجتمع و الدّولة، والمناقش إلّي موش متحمّل مسؤوليّتو كيف كيف يعبّر على رؤيتو أمّا مسكين رؤيتو مازّالت ماهيش واضحة و ما ثمّة حتّى قائد رأي محترم نظّرلها إلى حد الآن....

على خاطر كان ثمّة شكون في بالو إلّي هو قاعد يعمل في البوليتيك لهنا ...سامحني فيه قاعد يحرث في البحر

هيّا سيدي آهو حمّه غنّى:)...بالرّغم إلّي حمّه يؤمن، في الحكايات هاذي و في الحكايات هاذي بركا، بالقاعدة القمقومة إلّي تقول

إذا لقيت أعمى زيد كِبُّو........ماكش باش تكون أرحِم مِنْ رَبُّو