فكرة لتونس / أفكار سياسيّة

ها ها ها ها... جيناهاشي،... توّا حبّيت نخلّيها للإخّر بلكل و نحكي ع الأفكار الرّياضيّة و الثقافيّة إلخ ...من بعّد جيت نشوف نلقى إذا نفضّو هالمشاكل هذي النّاس الكل تولّي تفكّر عام أثناش سبعة أيّام على سبعة... و تولّي زايدة حكاية الحوار مع الشباب... و زيد الحقّ متاع ربّي فدّيت من الأفكار...ثرنتها الحكاية موش ساهلة و كركر شلاكتك و جيب فكرة...يلزمها عباد متفرّغة للشّي هذا كيما النّوّاب و إلّا الوزراء في البلدان المتقدّمة.

عاد الأفكار السّياسيّة........ملّا عملة وعملتها في روحي....ينعلبو هالحوار مع الشّباب... تي ماهو واحد كان رايض على روحو....يبداشي زادة واحد يكتب و يتلفّت وراه...بالرّغم راهو أقرب مركز أمن بعيد عليّ ما يقارب ثمانية آلاف كيلوماتر...أمّا شكون يعرف ع الدّنيا ؟؟...والقدر باهي

باهي آهي أفكاري و بكلّ براءة و كان ثمّة حاجة هكّا و إلّا هكّا قولولي تو انّحّيها ....وخيّان رانا ....و ينعلبو الأفكار قدّام وجوه الرّجال.

حسب فكرتي المتواضعة و إلّ انّجّم نبدّلها كان قلّقت واحد مالأخيّان الدّساترة و إلّا المعارضين.... الأحزاب في وضعها الحالي المعترف بيها و الغير معترف بيها ما تعطي حتّى أمل في حياة سياسيّة تعدّديّة كي يبداشي من بعّد خمسين سنة...على خاطر التّعريف متاع حزب سياسي الملخّص متاعو إلّي هوما جماعة متاع عباد عاديّين يتلمّو مع بعضهم باش يوصلو للحكم...آب آ ب ملّا تعريف يهزّ للحبس...أمّا هذاكة هو التّعريف متاع حزب سياسي...كيف نجيو نثبّتو نلقاو عنّا في الوقت الحالي حزب واحد يشبّه شويّا للتّعريف متاع حزب سياسي... و هو إلّي قاعد يربح ديما... ماغير ما ندخلو في التّفاصيل المحرجة على خاطر نحبّ نروّح إل تونس في يوم من الأيّام.... الأحزاب الأخرين المعترف بيهم و إلّي موش معترف بيهم بالرّغم من المجهودات متاعهم بعاد ياسر على الحكم و إلّا حتّى على رئاسة البلديّة... ساعات حتّى توصل تشكّ.... ياخي بالرّسمي يحبّوا يحكمو؟؟ يحكيو بجدّهم.... ثمّا جماعة يكتبو في الشّعر و ثمّا جماعة لاهين في العراق وفلسطين و ثمّا جماعة يخرّجو في الفتاوي...بالطّبيعة لهنا ثمّة شويّا مبالغة أمّا الوضعيّة حسب ما نشوفها كمواطن بعيد عالسّبّورة تضهر إلّي الجّماعة ملمومين على حكايات أخرى غير الهدف متاع حزب سياسي إلّي هو الوصول إلى الحكم... هو بالرّسمي الهدف متاع الأحزاب السّياسيّة في بلادنا كيف تقولو هكّا يولّي يخوّف و يشبّه إل جريمة تهديد أمن الدّولة بالرّغم إلّي هذا هو تعريف متاع أي حزب سياسي في الدّنيا

ما غير ما نطوّلها ياسر باش نسلك مع العباد الكلّ آهي الفكرة إلّي تضهرلي أقرب للواقع و بالأخصّ أقلّ تكاليف و أقلّ مشاكل و أقلّ و جيعة راس...انّجّمو في جمعة تولّي عنّا تعدّديّة في تونس... توّا الحزب الحاكم كان حزب قومي ومن بعّد إشتراكي و من بعّد ليبيرالي ومن بعّد تبّع الطّريق الثّالث و توّا ما نعرفش فاش يتبّع بالضبط.... معناها هو أصلا ما عندوش إديولوجيّة معيّنة و يتأقلم مع الموضة السّياسيّة في العالم و في تونس و مع أفكار العباد إلّي تسيّر فيه...تنجّمو تقولو إلّي هذا الكل ماكياج و حل الصّرة تلقى خيط أمّا الفكرة ما عندهاش علاقة بالتّفاصيل هاذم... التّجمّع ( ما أقل حيايا قلتها في الأخّر) كإنّو دولة معناها في بعض الأحيان ما تنجّمش تفرز الهياكل متاعو من الهياكل متاع الدّولة....كي تجي تشوف تلقى معناها أيّ منافسة متاع معارضة بالطّرق التّقليديّة متاع الإنتخابات و إلّا الهروب البرّة و غيرو... ما توصّلش... و بما أنّو حوار متاع شباب و الشّباب باش يحاول يحلّ مشكلة هالتّركة إلّي خلّيتوهالو ما غير تبلبيز و حبوسات و أمنستي أنرناسيونال تنبّر... يا أخي إقسم العزى على زوز... وإلّا حتّى على ثلاثة... آش كان عليه ياأخي... ماهو هو الحزب إلّي جاب الإستقلال و إلّي عمل التّغيير خلّي يكمّل مزيّتو و يعمل التّعدّديّة... هو بالجّهامة متاعو ينجّم يعمل حتّى أربعة أحزاب محترمين... ما نعرفش قدّاش عدد المنخرطين بالضبط أمّا يضهرلي فيه عالأقلّ شطر تونس و شويّة موتة... علاش تكسير الرّاس و العباد تتفرّج فينا و شوهة و عدّاونا في فرانس دو و الرّاي أونو....أنا حسب رايي إقسموه إل زوز حزب ليبيرالي و حزب إشتراكي ....و إلّا لثلاثة كان تحبّو... عنّا برشا عباد يحبّوا يقيمو فيها الآذان أعملولهم حزب محافظ و إلّا حتّى إسلامي
هو إنت تصوّر الجّو في مجلس النّوّاب...التّجمّع الدّستوري اللّيبيرالي من شيرة و التّجمّع الإشتراكي الدّستوري من شيرة و التجمّع الإسلامي الدّستوري من شيرة أخرى و يبداو يناقشو في حكاية الكنام و الله تحفل موش نورمال

ـ التّجمّع الدّستوري اللّيبيرالي موش موافق على مشروع القانون على خاطرو يضرّ بمصالح الأطبّاء و يثقل كاهل الدّولة بمصاريف زايدة

ـ التّجمّع الإشتراكي الدّستوري يحبّ يبعث طبيب لكل مواطن بلاش و يخلّص الأطبّاء في ألفين و خمسطاش

ـ التجمّع الإسلامي الدّستوري يحبّ يمنع البيرّة و الدّخّان لتحسين صحّة المواطن و اللّه الشّافي

آش قولكم... إقسم الكازي و أهوكا حد ما عاد ينجّم يقول ما خلّاونيش نخدم و إلّا عملو فيّا و الدّولة ما تنجّمش تقول هانا عاطينهم كلّ شي و

هوما ما عرفوش كيفاش يتواصلو مع المواطن

هاذي الفكرة الأولى، الفكرة الثانية و الإخّرة، آه يزّيني مالرّيق هذا مانيش مستانس بيه، فكرتين و قصّ... عنّا مشكل مع الرّئاسة... توّا ثاني مرّة و إلّي يشدّ رئيس ما نحبّوش نخلّيوه يمشي ياخو الرّوترات متاعو كيف النّاس الكل و يرتاح و يعمل جو كيف النّاس الكل...بالطّبيعة كل واحد عندو السّبب متاعو باش يشدّ فيه صحيح ...و باللّه الجّماعة إلّي عندهم أنترنات و قراو و تثقّفو ما يبداوش ينومرو و يرميو في المعنى على خاطر عنّا مرا كبيرة في الحومة كانت تحب الرّئيس الأوّل يقعد على خاطر عينيه زرق و فدّت كيف تنحّى و من بعّد ولّات تحب الثّاني على خاطرو عندو وهرة... و هي عندها صوت كيفكم و كيفي.....بما أنّا نحبّو الرّؤساء و نربّيو عليهم الكبدة و ما نسيّبوهم إلّا ما نمرجوهم.... يا أخي أعمل نظام وزاري....و أحنا إذا طبّقنا الفكرة الأولى يولّي الوزير الأوّل من واحد من التّجمّعات إلّي ربح الإنتخابات التّشريعيّة والرّئيس ديما هو بيدو.... انّجّمو حتّى نطبّقو الحكاية على مراحل... خلّي الرّئيس لاهي بالدّاخليّة والدّفاع في المرحلة الأولى باش ما يقلقش....و الرّئيس إلّي من بعدو انّحّيولو الدّاخليّة و يقعد لاهي كان بالدّفاع... و إلّي من بعدو نخلّيوه شرفي كيف متاع إيطاليا و هكّاكة الرّئيس يقعد مدى الحياة و المرا الكبيرة إلّي في الحومة ما تتغشّش علينا.... أمّا حكاية الدّفاع نخلّيوهالو خير...شكون يعرف ع البلاوات الوزير الأوّل متاع التجمع الليبيرالي يضهرلو يولّي يحب يردّها تابعة أمريكيا و إلّا متاع الإشتراكي يولّي يحب يردّها تابعة فينيزويلا و إلّا ليبيا ... و إلّا متاع الإسلامي يولّي يحبّ يعمل آش من عملة... أهوكة يقعد يعس على ما ياتي

آهم زوز أفكار لتونس و كان تحبّو انّجّمو نجرّبوهم في دزاير و إلّا المغرب و نشوفو شنوّة يعطيو.... ما عنّا ما زاربنا... و كان عجبوكم بالله شاهي جائزة...شاهي هاك الهاتف النّقّال... راهم نطرولي البورطابل إخّر مرّة هبطت إل تونس

و شكرا و

...