سمك و طاراطور

بعيدا عن السياسة،  و بما إنّو قلنا خلّي الجماعة ينصرفو في صمت بكل رشاقة و من غير شماتة و لا إحتفالات بما أنّهم فضيحتنا خلّي نسترو على رواحنا،  نعطيكم اليوم الروسات متاع الصّوص إلّي اللّبنانيين و السّوريين و الشرق بصيفة عامّة ياكلوها مع الحوت و إلّي إسمها ( و روسكم يا رجال و يا نسا من غير بلادة و ركاكة و لا رميان معنى ) إسمها الطّراطور و ما عندكم علاش تحلّفوني و كان تعرفو شكون لبناني إسئلوه.

هو باش يورّيك الإختلاف في الذوق بين الشعوب و إلّي راجع لبرشا حاجات مالجغرافيا للتّاريخ، نحنا ما عنّاش الصّوص هاذي و ما تركبش في مخاخنا بالرّغم إخواننا في لبنان ما يجيش عندهم سمك من غير طاراطور... و الحكاية هاذي عيينا نفسّروا فيها لبعض النّاس و شي النّافع ربّي يحبّوا يهزّوا مالجابية متاع الخليج و يصبّوا في الخابية متاعنا و يحبّوا شاشيّة أردوغان على الرّاس هذا و ما حبّوش يفهمو إلّي كل بلاد و أرطالها. 

هوما دايور اللبنانيين في الخدمة كانو كل نهار جمعة ( نهار الحوت في المونو)يجيوني ويْن الطّاراطور حبيبي و شو مافيه طاراطور و أنا عملتلهم أنواع الصّوص طارطار  الكل إلّي نعرفهم و شي .... في الإخّر قلت ننتصر أو ننتصر و لقيتها. 

عاد يلزمك : 

كوب طحينة ( و النبي محمد سيريو من غير رميان معنى)

ماء حسب الكونسيستانس إلّي تحبها ( من نص كوب إلى كوب)

قارص

ثوم

ملح

أكهو عاد ساهلة برشا تشد تحل الطحينة في الما و القارص و تخلط معاهم الثوم و الملح. حتّى تطلعلك خلطة كي متاع الحمص اللبناني من غير حُمُّص ( موش بالعاني راني جبدت عالحمص ) و اللبنانيين يأكلوها مع الحوت إلّي ينجّم يكون مقلي و إلّافي الفور وكان ما عندكش فكرة كيفاش تقلي السمك موش مشكل ، تبعني مليح : شوف فلسة تشبّه لهاذي عالأورديناتور متاعك

تره ...إنزل عليها بلڤدا.... إرتحنا 

 و نورمالمون زادة يكون معاهم روز و سلاطة... و ساعات يعدّيو بيها الفلافل زادة إلّي يمكن نحنا نعرفوهم بإسم الطّعمية نظرا لمشاهدتنا المفرطة للمسلسلات المصرية. 

الحاصل ما نتصوّرش كان خير مالتسطيرة و إلّا الصّوص طماطم مع الحوت أمّا لتبديل الجو بنينة و بالأخص إذا تحطها على طاولة متاع كمية أو مزّة مع أنواع صوص اخرين .... صحّة و بالشفا

و يحبّوا يهزّوا البطولة....

البطولة : ماحلاها كلمة يموتو عليها البشر الفانين،  دايور في العصور القديمة كان البطل في العادة نص رب و ساعات يقرب للربوبة 

و إلّا يخالطهم و حتّى كان ما وصلش لهذا في حياتو فإنّو من بعّد ما يتوكّل يولّي شبه رب و يقعد ذكرو موجود و يتناقلوه العباد. وقَعَدت حكاية البطولة حكاية شبه ميتافيزيقية حتّى للعصور الحديثة و بالرّغم الدوافع المتعدّدة بسيكولوجيا و اجتماعيا للعمل البطولي فإنّو أنا مانيش باش نحكي عليهم / بالرغم من علاقتهم بموضوع التخنتيبة هاذي/ و ذلك لعدّة أسباب أولها أنّو التّدوينة بطبيعتها باش تكون رزينة و ركيكة و كان نزيد نحكي عالشقيقة البسيكولوجية و الرقيقة السوسيولوجيّة فإنّي باش نشبع دعا شر و ثانيها و لَعَلَّه أهمّها وجود الڤوڤل / إلّي من قوّتو أحفادنا نهار آخر باش يتصوّرو أنّو هو خلق السماوات و الأرض و ما بينهما/ الحاصل نقعدو ميسالش في البطولة و دوافعها العادية و الإحساس بيها من البطل نفسو . 

ثمّة عاد البطل المغامر إلّي يسيّب ناسو و يمشي يرمي روحو في إخّر الدنيا  و الثّمن في العادة الرهبة من المجهول و الوحدة و الخوف من المرض و الموت في بلاصة بعيدة و غياب الإستقرار  و هذا في أغلب الحالات ثمن باهض لِلنَّاس العاديّة لكن البطل المغامر يحس هالحاجات هاذي و يتعدّاها و ما تقلّقوش.... يحس بالخوف و يفكّر كيف النّاس الكل في الثّمن أمّا وقتها يقرّر باش ينده توفى الأحاسيس هاذي و تبدى المغامرة و يجيها وقت و توفى كان نجح و حكى حكايتو يخلص ثاني و مثلّث في عملو البطولي بنظرات الناس و إعجابهم و الإستغراب و البهتة في عينيها كي يبدا يحكيلهم عالبلايص الغريبة إلّي مشالها و زيد على هذا الأبطال هاذم كيما السندباد و القراصنة متاع الكاريبي يدبّرو عادة مرشانة.

كيف كيف زادة البطل الوطني إلّي يضحّي يروحو في سبيل المجموعة و يقاوم استعمار و إلّا دكتاتور بالحرب و إلّا بالكلام و إلّا بالكتيبة و تلقى عامة الناس معجبة بشجاعتو و تضحيتو. الثمن إلّي دفعو يمكن الخوف كل ليلة من هدّة الحاكم و كثير من التمزبيل و يمكن في بعض الأحيان الإعتداء بالعنف لكن كيف كيف وقت إلّي يبدا في نضالو يخاف كيف الناس الكل و حتّى يترعب / و عنّا بعض الأمثلة على تأثير هالرعب هذا على أعصاب البعض من هلوسة و أمراض نفسية/  و يجي وقت الإحساس بالبطولة و نظرة الإعجاب حتّى من عند الناس إلّي ما عملتش كيفو و يبدا حاسس أنّو أنقذ بلاد كاملة حتّى كان هوما خرشيين و ما يثمرش فيهم و حتّى كان ما وصلش للهدف متاعو إحساسو بأنّو أحسن من برشا ناس ساكتة و خاضعة يعوّضو على الثمن إلّي دفعو و كان وصل فإنّو عندو بلعة خالصة من الشعب لمدة ثلاثة سنين في بعض القصورات و إلّا رخصة متاع حانة مطعم عند الاستقلال.

كيف كيف البطل الإجتماعي إلّي يدخل مثلا للبحر الهايج باش يمنّع إنسان باش يغرق يحس بالخوف و يبدا يحسب في نفس الحسابات متاع أي واحد فينا لكن في اللحظة إلّي ما عادش ساقيه تمس في القاعة ما عادش يحس بالثمن إلّي دفعو و كان خرج فإنّو يلقى صعوبة باش ما يحسّش إلّي هو عمل حاجة كبيرة في حين كان على قاب قوسين أو أدنى باش يخاف و يقعد يتفرج عالشط كيما أغلب الناس. 

يبقى هالناس العاديّة هاذي إلّي تعجب بالأبطال الخارقين إلّي في بعض الأحيان بطولتهم تتلخص في بونطو في ماتش دربي، يقومو كل صباح لمدّة ستين عام في بعض الأحيان و يمشيو يخدمو في خدم متعبة و مقلقة و تطلُّع الرُّوح و يربّيو صغار و يصبرو على دلالهم و يحملو الذِّلَّ من عند العرف و يخافو لا ما يلحقوش و الصّباح إلّي من بعدو يعاودو نفس الحكاية و يعاودو يدفعو ثمن العمل البطولي متاع البارح اليوم و يعاودو يدفعوه غدوة في البرد و في السخانة من غير ما يحسّو بحتّى طرف إعجاب من عند الناس و إلّا بأنّهم خير من غيرهم و إلّا شادّين علينا السّما لا تطيح.... و يزيدو فوق هذا يجيو يسمعو وسخ وذنيهم من عند بعض الأبطال كيفاش ماهمش في مستوى تضحياتهم و شجاعتهم و كيفاش هوما قعدو ما سافروش و ما عرفوش و ما شافوش و كيفاش هوما كانو يمشيو للشعبة و انتخبو النهضة و كيفاش مشاكل البلاد الكل منهم و كيفاش عمرهم ما منّعو حد من حريقة و إلّا من غريقة و كيفاش ما كتبوش الشعر و ما عملوش فيلم و ما حلّوش بلوغ و ما عندهمش كونت تويتر .... في الإخّر بالرغم إلّي نفد من الشعبوية و الدمغجة و نخبوي شويّة أمّا البطولة و مهما تكلّفت عليك شجاعة و وضوح رؤية و مبادئ ما توصلش في بطولة السيد إلّي عدّا عمرو يخدم خلّاص في الإس إن تي و ربّى اولادو و فمّو ساكت و كان عندو انخراط في التجمع وانتخب النهضة مرتين و هو متقاعد و حاير شكون باش ينتخب توّا بين الرياحي و الحامدي..... و شكرًا 

في يوم ما سأصبح إنسان

واحد كان يجيب مالإخّر و يصارح روحو و ينقّص من الكلام الفارغ. الحكاية الكل واضحة تعيّط يا بابا يامّي. غير  الكلّنا ماللّوّل هربت بينا فرسة و إلّا ثورة و كل واحد شاف في التّبلبيزة إلّي صارت  ليلتو و حلم حياتو و هذا في حد ذاتو موش عيب و يصير في أحسن العائلات. إلّي شاف فيها إنتصار للقيم الفردية متاع الحرّيّة و العدالة و إلّي شاف فيها نتيجة رجوع التّديّن و معرفة ربّي و إلّي شاف فيها الثورة المانعرفش شنيّة متاع البروليتاريا و إلّي شاف فيها كمشة همل و رعاع يعملوا في الفوضى و باش يهزّوا البلاد للهاوية.

و من بعّد بدى الكلام الكلام الكلام الكلام ليل مع صباح أحكي هرّ تكلّم وتوتوت وتوتوت وتوتوت آهو تلافز آهو إذاعات آهو فايسبوك آهو تويتر آهو غنايات راب آهو مدوّنات كلمة بجنب كلمة بجنب كلمة كل كلمة منهم مزيانة و كي تحطهم بحذا بعضهم ماعادش يقولوا شي. إسهال متاع كلمات أحكي و رد بالك تسكت فسّر و أوصف و خبّر و تصاور و فيديوات و مؤامرات و ندوات و شعر و نثر. و مات الأوّل و زاد الكلام و مات الثّاني و باقي نحكيو و ماتوا ثمانية و مازلنا وتوتوت. دوب ما يركح اللّعب شويّة و نبداو باش نخمّموا شويّة هكّة بيننا و بين رواحنا و إلّا يعنبوا التخمام موش لازم حتّى باش نتنفّسوا  و إلّا نبلّوا ريقنا و نشوفوا  آش يزيدنا و آش ينقصنا و إلّا باش نقولوا آش فمّة هذا الكل فاش قام طرطاف موزيكا الباي تنده و برّا كلمة بجنب كلمة بجنب كلمة و ترجع النمنامة.

باهي فين وصلنا من بعّد ثلاثة سنين و برشا كلام. فمّة ناس يقفّفوا للحاكم و هاذم ولّاو أنواع تبدّلت الدّنيا قبل إلّي كان يقفّف كان يلوّج في حنيّك و يحب يصنع روحو في رخصة متاع تاكسيفون لواج شهادة فقر و إلّا منصب توّا ولّاو أنواع 

ثمّة إلّي يقفّف لله في سبيل الله، مهما الحاكم الخوانجي يعمل فإنّو معاه على خاطر مادامو خوانجي فهو باش يعمل الباهي و يطبّق الدولة الإسلامية و عدل ربّي و حكم ربّي علينا حتّى كان على عينيه حتّى لتو ما هبطوا كان وعد ربّي علينا فإنّوا الأخ هذا واثق و متهنّي إلّي الحل الوحيد في الدنيا هاذي هو الخوانجيّة حتّى لوكان يخرجلوا حسن البنّا بيدو و يقلّو يا بوها و راس الحنينة راني غلطت و ما جبتش فيها حكاية الإسلام هو الحل.

و ثمّة إلّي يقفّف على خاطروا ذكي برشا موش ذكي هكّاكة و برّا ذكيّ برشا أكثر من الناس العاديين هذا يشوف في المؤامرات و التخطيطات متاع الجينيرالات و الدولة العميقة و أصحاب رؤوس الأموال و السفارات بسهولة تامّة و يفسّرهملك في ستاتو فايسبوك و يشوف فيهم الكل يتآمروا على الحاكم الحالي. و هو بالطبيعة يدافع عليه موش على خاطروا قفّاف أمّا على خاطروا ذكي برشا و زيد حقّاني برشا.

 وثمّة بالطبيعة إلّي موش كي يبدا فرعون في الحكم فإنّوا الله ينصر من صبح خلّيه يدوّر الدّولاب و يشوف أمورو.

و فمّة ناس ضد الحاكم  

فيهم إلّي متيقر من وضعو قبل و توّا و هاذم خشب المحرقة و إلّا فحم الكانون ديما في فم المدفع و مطالبهم إقتصادية بالأساس.

و فيهم إلّي متقلّق على المحيط متاعو و كيفاش الخوانجية باش يفسّدولو منظر البلاد و كيفاش هو تونسي و لخرين مايعرفش منين جاو و يلزمهم يخرجوا مالبلاد باش تتفرهد و يحطّولوا ناس تشبّهلو في البلايص الكل و هذا مشكلتو موش مع الحاكم أمّا مع أتباعو الكل و ينجّم يردّك من أتباع الحاكم في لحظة لو ما وافقتوش على آراؤو القريبة برشا من هتلر و موسوليني.  على فكرة الجماعة هاذم فيهم برشا نسا من فئة عمرية و اجتماعية معيّنة / معيّنة ما عندها حتّى علاقة بتعيين الخيط في الإبرة / 

و هاذم الكل يتكلّموا و يتكلّموا و يسبّوا في بعضهم  و يحكيوا و زيدهم الجماعة إلّي عايشين في عالم المثل و الجمال و يقولوا للسلفيين يا كخّة يا عنيف و يقول للبوليس يا كخّة يا عنيف و يقول للخوانجي يا رجعي و للمعارض يا زلم يا فلول و يحكي و يبرطاجي و يتكلّم.

و هي مالإخّر كان واحد يسكت لحظة شنيّة الحكاية الكل عندك حكومة فاشلة و حركة النّهضة كوادرها غير مؤهّلة لتسيير حتّى حانوت عطريّة. و الأهم من هذا قيادييها مشتبه فيهم في قضايا متاع إغتيالات و تمويل غير قانوني هذا وحدو يكفي باش حتّى أكبر مؤيديها يتخلاو عليها. لكن مازالو يتكلموا

البلاد فيها عصابات إجرامية تدور سميوهم كيما تحبوا سلفيين، حماية الثورة، مافيا، ثورة مضادة هذومة فيهم حل واحد الجيش و الشرطة مهما كانوا فاسدين. البشرية مازالت ما لقاتش حل آخر للعصابات المسلحة غير تفويض باستعمال العنف للحكومة و يوفى. و بالمناسبة العنف متاع العصابات هاذي نتحمّلوا مسؤوليتو كمجتمع كلنا ماهمش أفغان و ما جاوش من ليبيا و لا من دزاير هاذم توانسة نتيجة تربية و تعليم و ثقافة تونسية و كان سيادتكم حفظكم الله ما عندكمش فكرة على أجواء العنف / إلّي يتراوح من شديد إلى فظيع/ إلّي يتربّاو فيهم التّوانسة في حي بوهلال و إلّا حي التضامن و إلّا حتّى الأحياء  إلّي زعمة متوسّطة من عنف لفظي و عنف تجاه المرأة و عنف تجاه الأطفال و المسنّين فإنّكم ما تتعذروش بجهلكم و هذا إلّي تشوفوا فيه اليوم نتيجة حتميّة لعدم المشاركة  و الإنخراط في النهوض بالحالة /الحليلة/ متاع التّوانسة الأخرين سواء كان بالعمل الجمعياتي أو على الأقل بدفع الضرائب / و انتوما الطبة و المحامين يديكلاريو في الشهر الفلوس إلّي يصوّروها في نهار/. 

هيّا آهو أنا زادة طحت فيها كلام كلام كلام.

 شوف المبادئ متاع الحقوق و الحرّيات الفرديّة يا تمّن بيهم للنّاس الكل يا ما تمّنّش بيهم. و إذا كانك تمّن بيهم للنّاس الكلّ  ما تنجّمش تكون خوانجي و ما تنجّمش تكون مع العقوبات الجماعية سواء على التجمعيين و إلّا عالخوانجية و أخيرا مع دولة حتّى فاسدة ثمّة أمل إِنّك تصلّح المؤسسات و الأجهزة باش تولّي في يوم من الأيّام تحمي الحقوق و الحريات. من غير دولة و إلّا بدولة غنّوشية فإنك عايش من غير أمل في حبّك

أحلى نساء في المجرة

هو بين العسل إلّي يقطّر عالفيسبوك الحداثي إلّي يتمعشق مع النساء بلوغة حب لا يرى الشمس و كاينّو النسا كائنات فضائية باش يجيبولنا الديموقراطية و الحقوق الفردية من كوكب آخر و بين لوغة الحقرة و التحسيس بالذنب و التقزيم إلّي يتسومم بيها الفايسبوك الخوانجي كيما مكمّلة و مكرّمة من اربعطاش قرن كاينّها طفل صغير يفلّموا عليه و هي تلقاها قارية كتب قد ماهوما كليكاو لايك على تصويرة مرشد مونبليزير.

بين هذا و هذاكة قعدت هكاكة حتّى لين ضهرلي باش نخنتب بوست. في العادة كنت ديما نسيّب في العسل وقت إلّي كان فال و مازلت عالعهد و نخمّم إلّي المرا هي الكل في الكل و أي حاجة دون المساواة التامة مع الرّاجل هي إهانة للمرا و للرّاجل في ألفين و ثلطّاش و زيد يعطيكم دودة محلاكم  بالرّغم إلّي واحد مع العرس و الصّغار عندو ألف سبب و سبب باش يبدّل آراؤو هاذي و يصبح سلفي / نفدلك نفدلك / . عاد بما أنّوا العسل كثر قلت فرصة باش نفضّوا شويّة مسائل عالقة :

الأربعة معضلات الأولى هنّ سهام بادي، محرزيّة العبيدي، بن توميّة و آ مال المثلوثي . بالله علاش آش عملنالكم؟ نعرف قرون من عدم المساواة و كذا و الأمور تأثّر عالمخ و الحبال الصوتية أمّا لها الدرجة؟؟

المعضلة الخامسة النسا إلّي شبعوا سب في أمينة فيمن و من بعّد يتفوخروا بالطاهر الحداد. أوّلا إلّي عملوا الطاهر الحداد في وقتو صدم المجتمع أكثر ملّي عملتّوا أمينة. ثانيا التحركات هاذي متاع حطّان المجتمع أمام الأمر الواقع ياسر ناجعة و فعّالة شوفوا كيفاش حطوكم أمام الأمر الواقع في حكاية النقاب من وقت الزين بالرغم إلّي كان مرفوض من أغلب المجتمع وقتها. الفرق إلّي هوما كانوا شجعان و جماعتهم دافعوا عليهم و ساندوهم. انتوما تخلّيتوا عالطفلة باش تعملوا زعمة  صورة متاع نسا حداثيات أمّا عندهم خطوط حمراء و نسيتو إلّي عند الخوانجية و ما شابههم و للأسف أغلب المجتمع ما دامكم حداثيات ما دامكم ما تعجبوش و ما يرضاو عليكم كان ما تسكتوا

المعضلة السادسة التخرنين هاذي احقاقا للحق انترناسيونال موش كان انتوما كيما الكلام في عشرة مواضيع مختلفة فرد وقت .

المعضلة السابعة ستار أكاديمي و ما شابهها من البرامج الحولة. 

المعضلة الثامنة كي تبداو تقولو الرجال بيهم و عليهم و ما فيهمش أمان تذكّروا إلّي الموسيو كي يعمل حاجة من ورا ظهر المادام في العادة يعملها مع مرا أخرى في بالها إلّي هو معرّس. لذا فشويّة تواضع :) بالطبيعة تقعد عملة ماسطة و ساقطة أمّا ماهيش عملتو وحدو ثمّة مرا مساهمة في العملة.و في أغلب الأحيان يولّي فيه العسل كي يبدا مرتبط. 

المعضلة التاسعة إلّي تسمّيوهم عاهرات أرجل من برشا نسا و رجال و ماختاروش الخدمة هاذيكة و حتّى كان اختاروها فإنّوا المجتمع برجالو النظاف بنساه الشريفات طالب الصنعة هاذيكة. و ما يستاهلوش الشماتة لكن يستاهلوا التعاطف و الحماية و إلا عالأقل الإعانة.

المعضلة العاشرة و الأخيرة / موش على خاطر وفاو المعضلات ، على خاطر وقت نوم و برّا /  علاش بالرغم مشاكلكم الكل الدنيا من غيركم متسواش ؟؟ :)

التّيّاس

اليوم باش نحكيو على كلمة قديمة و يمكن ماعادش مستعملة برشا ملّي عملنا مجلّة الأحوال الشخصيّة و ولّى العرس و الطّلاق منظّمين بقوانين و أوراق موش بكلمة من عند سي السيّد... عاد بما أنّو الوقت صعيب و ما تعرفش عالدّنيا و بما أنّكم أغلبكم من جماعة عنقني و العياذ بالله فإنّي قرّرت باش نسنّسكم شويّة ببعض التراث إلّي ممكن ياسر يرجع في القريب العاجل كيما التعزير و الجلد و الرجم و قصولو يدّو جات صالحة للطّنبور و الشكارة والبحر و غيرو.

عاد قلنا الكلمة هاذي هي التّيّاس. تعرفو إلّي في الشّرع إذا طلّقت مرا ثلاثة مرّات فإنّو مشات عليك و ماعادش تنجّم تاخذها مرّة أخرى إلّا إذا خذات راجل آخر  و طلّقتو و من بعّد تنجّم تاخوها... يمكن راك تتساءل كيفي شكون هالهايشة البكمة إلّي يوصل يعرّس و يطلّق ثلاثة مرّات و مازال موش مثبّت يا لندرا يعاود ياخوها نفس المرا المرّة الرّابعة لعلّ و عسى المرّة هاذي تخطف و يتهنّى معاها و شكون هالسّيّدة الفاضلة إلّي طلّقها نفس الرّاجل ثلاثة مرّات و مازالت تحب ترجعلو... الجواب إلّي حكاية الطلاق كانت ساهلة ياسر معناها يجي صاحبك يقلّك هيّا نمشيو للقهوة تقلّو تي بالحرام لا مشيتها و من بعّد يمرجك تمشي معاه مرتك تصبح مطلّقة و يلزمك تعاود تعرّس ماللّوّل جديد حتّى كانها ما فيبالهاش بحكاية القهوة و صاحبك و ماهيش حاضرة عال حكاية جملة... معناها في قالب طرح شكبّة تنجّم تطلّق نساك الأربعة / ماهو قلتلكم يلزمكم تستانسو/ قبل ما تقوّس و قبل ما ترقد يلزمك تعاود تعرّس سينون تبات في بيت الصّالة وإلّا كان تحب الرّيسك ينجّمو يعدّيوهالك زنى و طرح رجم في ملعب الشاذلي زويتن... الحاصل ثالث طلاق ماعادش تنجّم تعرّس و لهنا يجي دور التّيّاس إلّي يعرّس بالمرا و يعاود يطلّقها باش ينجّم راجلها الأوّل يعاود ياخذها.... و الكلمة أصلها بالعربيّة التّيس على خاطر الرسول صلّى الله عليه و سلّم شبّه هالزّوج بالتّيس المستعار و نهى عالزّواج هذا... و نحنا في تونس نعيّطولو تيّاس.....عاد المسلمين و بالرغم من النهي متاع الرسول ساعة ساعة و كي المرا تطلق ثلاثة مرّات  و ماعادش بيها وين و يلزمها ترجع يمشيو يتصرّفو في تيّاس عالعينين زعمة زعمة قدّام النّاس و أهوكة يضهرو يخافو ربّي و ماكم بديتو تعرفو و تشوفو في الشي على عينيكم المظاهر في الحكايات هاذي أهم من المبادئ حجّة حتّى لوكان بالمعارف و إلا بإستغلال النفوذ خير من القعاد  هكّاكة و آش جاب مكّة لباردو... 

في تونس التّيّاس يختاروه عادةٍ بوهالي باش يضمنوه ما يهربش بالمرا و حتّى باش ما يحاولش يخدّم مخّو عليها في المدّة إلّي تبدا تحت ذمّتو /  إيه إيه تحت ذمّتو يلزمكم تستانسو باش ما تتصدموش/ أهوكة عاد يشوفو المقرعش متاع الحومة و يمدّولو مرشانة زوز شهود و عدول و يعطيوه المرا من غدوة يجيبو العدول و يطلّق و يا ناس ما كان باس....و النّاس تبدا في بالها و تتلّف و يقلّك فلان تيّسو بيه... بالنسبة ليكم انتوما ما ثمّاش حتّى مثال صار قدّامكم إلّا متاع الواد سيّد الشّغّال و موش واضح ياسر على خاطرو تيّاس طلع حلّوف و دار عليهم.... باش نوضّحو الكلمة أقرب مثال هو مثال رئيس الجمهورية .... ماهو حزب المدّبيّة مازّالت عندو ثقافة التّتييس و يعرف المداخل هاذي و آداب النّكاح و غيرو عاد أي واحد يعرف يقرأ ينجٌم يقلّك إلّي الشّيخ راشد مطلّق الجمهورية و الديموقراطية بالحرام بالثلاثة ملّي هو صغير والأمور هاذي كاتبها بالعربية الركيكة متاعو و مستعرف بيها... كي جات اربعطاش جانفي و ولّات الحكاية  انتخابات و ديموقراطيّة و دستور حلات في عينو الجمهوريّة و شاف فيها بوادر متاع جمهورية بنت عايلة و لابسة كيما الجمهورية الإيرانية و الا حتّى السودانيّة...أمّا هو يعرف و الناس تعرف إلّي هو مطلّقها بالثلاثة وبالشّرع و بالقوانين الكل و بالخمسميات دين و حتّى باللّوجيك هي حرام عليه ... آش باش يعمل آش باش بعمل مشى للمقرعش متاع الحومة  و عطاهالو و حطّلو جماعتو في حزبو باش يعسّو عليه في صورة ما يخدّمشي مخّو و يمدّ يدّو باش يجس و إلًا يمس ... و من بعّد ما توفى المدّة يرجّعلو المرا و يا ناس ما كان باس ... هذا أوضح مثال متاع تتييس و كيفاش يتيّسو بواحد بوهالي على خاطر تنجّم تتيّس بواحد موش بوهالي أمّا بمقابل كيما برشا  سياسيين و صحافيين و محللين و الأمثلة كثيرة في العامين الإخّرين ...

هذه كلمة اليوم و نشوفها مهمّة في الوقت هذا على خاطر التّتييس قبل ما يرجع للعلاقات الزوجية قريبا رجع على المستوى السياسي حيث حزب يتيّس بحزب آخر و برئيسو و بمكتبو السياسي و يمكن يمكن زادة جيش يتيّس بالأحزاب الكل .و في الحالتين الحاجة المتأكّدة ثمّة برشا نكاح للجمهورية و التّيّاسة باش يقعدلهم كان الخزي كي هوما في الحكم و من بعّد العذاب الأليم.

علاه مشرولة خاتمة

ثمّة برشا توانسة يمكن تتصوّر إلّي التّخنتيبة هاذي فيها تطييح قيمة للتّوانسة و إلّا كيف ما يقولو جلد الذّات و ثمّة ناس تتصوّر إلّي موش هذا مشكلنا و مشكلنا حزب معيّن أمّا حسب رايي التّصوّرات هاذي فيها برشا تخلويض على خاطر تحت نظام حكم ديموقراطي النّاس الكل مسؤولة بالقوي على النّاس إلّي تم إنتخابها و الناس الكل مسؤولة على فضح أي تفكير مشرول.
الدّيموقراطيّة ماهيش حاجة ساهلة حتّى في البلايص إلّي تضهرلنا ياسر قويّة ...علاش هو حتّى في الدّيموقراطيات العتيقة / بطولة باب سويقة/ و إلّي عندها تقاليد مرسّخة في الدّومان هذا تلقى عندهم نوع من التّشرويل جاي من تاريخهم و طريقة تفكيرهم... و بما أنّو كل شعب عندو تشرويلو أوّل خطوة هي توضيح التشرويل في فكرنا و سلوكنا السياسي كتوانسة إلّي هوما خاصّين بينا .
أهوكة في الأربعة تدوينات هاذم ثمّة محاولة متاع حصر شويّة تشرويل موجود في مخاخنا و في سلوكنا في تاريخنا و في واقعنا اليوم و محاولة تفسيرهم بفرضيّة إلّي نحنا عمرنا ما إمّنّا بحاجة إسمها ديموقراطيّة على خاطر العمليّة هاذي يلزمها تصير عاجلا و إلّا آجلا باش نهار من نهارات إنّجّمو نخدمو على تدخيل الإيمان بالدّيموقراطيّة /كأحسن طريقة موجودة اليوم للحكم/ في أمخاخنا.
بالطّبيعة الفرضيّة هاذي تنجّم تورّينا إلّي هالشّكر و التّبندير لقيم الدّيموقراطيّة و تطبيل الحكومة و المعارضة ليها ماهي إلّا لمّوضة على خاطر ما تنجّمش تلتزم بسلوك ديموقراطي و إنتي أصلا ما تمّنش بيه... قلت المرّة الأخرى إلّي سلوك التّوانسة غير أخلاقي من وجهة نظر ديموقراطيّة أمّا كي تجي تشوف التّوانسة مايشوفوش فيه حاجة عيب الشي إلّي يخلّيهم مايراوش علاش باش يبدّلوه.
نتذكّر عزيزي و هو كيف رجال الجيل هذاكة مايتكلموش برشا كي سمع بي نحكي عالبوليتيك عيّطلي و يمكن مالمرّات القلائل إلّي حكى فيهم معايا ديراكت قالّي بالكلمة ماتربح منها كان دعا الشر و حكالي حكاية زرڨ عيونه و كيفاش مات على جرّاية وحدو بالرّغم مالنّفوذ إلّي وصلّو بطريقة حقيرة/ عند عزيزي اليوسفي و مقاوم فرنسا و المستقيل نهائيّا مالسياسة التونسيّة منبعّد الإستقلال/ ...هالحكاية القصيرة فيها برشا عبر على طريقة تخمامنا الباهي و المشرول... وقتها أقنعني موش صعيب على خاطر هاربة بي فرسة و كلامو فيه برشا صحيح أمّا اليوم يضهرلي إلّي أمثال زرڨ عيونه إلّي هوما توانسة كيفنا هوما النّتيجة الحتميّة لتفكير عزيزي إلّي يضهر أخلاقي ياسر/و ديني زادة عدم الخروج على أولي الأمر حكاية قوية عند السّنّة/ أمّا ديموقراطيًّا فهو غير أخلاقي و كارثة و ديموقراطيًّا الكلنا نتحملو دعا الشر مع الحاكم.
كان باش نزيدو نخمّمو باش نوصلو للبلاصة إلّي يلزمها رجال سياسة عالميدان يكمّلو الباقي...على خاطر لكل مقام مقال كيف ما يقولو و الحكايات هاذي تنجّم تبدا ورا الكلافيي أمّا ما تتواصل كان على عين المكان زنقة زنقة دار دار

P.S: Ces réflexions sont largement inspirées dans la forme d'un article canadien paru dans les années soixante :)

علاه مشرولة الباب الثاني

II

باش ما نبحروش هات ماللّوّل نقول شنيّة نقصد بالديموقراطيّة هو أكثر تعريف معروف هو حكم الشعب للشعب لصالح الشعب... و هذا مضبّب شويّة و موش واضح التّعريف إلّي يعجبني أكثر هو '' هي طريقة حكم عباد أحرار تمشي بأحزاب منظمة تحاول بطرق مختلفة تحقيق غاية مشتركة الأحزاب هاذم يتفاهمو على قواعد تخلّي الحزب إلّي عندو الأغلبيّة يمارس الحكم بشرط أنّو يتخلّى على الحكم كي طرق أو أفكار حزب آخر تولّي عندها أغلبيّة عند النّاخبين''... الغاية المشتركة هي الصّالح العام / عبارة شرولناها هي الأخرى و ماعادش عندها حتّى معنى و يضهرلي التشليك بدا بالتّرجمة متاعها أنا نحبّذ كلمة الخير العام و إلّا الفائدة العامّة و إلّا الرّفاهة العامّة/ هالخير العام إنجّم يختلفو عليه العباد أمّا حسب رايي / و راي عباد أقوى منّي ببرشا/ يلزمو يتضمّن حاجتين لازمين لمواصلة السّيستام الدّيموقراطي الحرّيّة و العدالة... القيمتين هاذم يلزمو يكونو جزء من الرّفاهة العامّة إلّي تجري وراها الأحزاب الكل على خاطرهم من أهم الحاجات اللّازمة لتحويل الأقلّيّة إلى أغلبيّة سياسيّة.

نرجعو لموضوعنا... تواصل التشرويل متاع السلوك و الفكر السياسي بعد الإستقلال الحزب الحاكم واصل محاولة السّيطرة على المجتمع بالطّرق إلّي ورّيناها قبل القوّة والإمتيازات والهويّة و لهنا نخبة الحزب الحاكم تقلّك الشّعب موش واعي و واجبي باش نجيبو للثنيّة بالطّرق الكل باش نواصل خدمتي متاع تكوين الدّولة الحديثة و الشعب يقلّك هاذيكة هي البوليتيك و هذا شايع برشا عند الشعب التّونسي البوليتيك تتلز عادة باش تعملها تجنبا لبطش الحاكم و إلّا بحثا عالإمتيازات وإلّا في حالات تهديد وجودك و هويّتك / وقت الإستعمار مثلا/ و قعدو الإثنين يشرولو في الفكر و السلوك السياسي حتّى وصّلوه للحضيض ورينا في الأعوام الإخّرة حتّى النّخبة الحاكمة ماعادش تبرّر في أفعالها المشينة و ولّى السّلوك السّياسي متاعها مخزي حتّى بالنّسبة للشعب التّونسي و إلّي هو يرضى عادة باش ما جا...
إنّجّمو نحكيو عالمعارضة ونبيّنو بنفس الطّريقة إنتماءها لنفس المنظومة متاع الفكر السياسي المشرول / أغلبيّة المعارضة قعدت في الفكر على خاطر السّلوك ماوصلولوش في الوقت هذاكة/ التّيّارات الإسلاميّة أغلبها كان واضح في الثمانينات الديموقراطية وسيلة باش يعملو دولة إسلاميّة و عند أكثر القاعدة متاعهم مازالت الفكرة هاذي موجودة... العروبيّة الأمثلة متاعهم معروفة و عمرهم ما نقدوهم و بعدو عليهم / عندي و عند برشا عباد أخرين الهواوجية أو الهويين أي كل تفكير سياسي مبني على أساس هوياتي عندو مالمان مشكلة تخلّيه صعيب برشا يكون ديموقراطي يعني تنجّم تفسّرها تقريبا نظريا و التّجربة متاع الدّنيا كل يوم تثبتها/ أقصى اليسار الموجود وقتها في تونس أغلبو ما يركبش إيديولوجيا مع ا لديموقراطيّة و الأمثلة في التّاريخ برشا.. وكان لاحظتو إلّي عندهم شعبيّة هوما الزوز تيارات الهواوجيّة موش بالزهر التفكير و السلوك السياسي المشرول هذاكة إلّي يركب معاه... يلزمك تقلّو إلّي هويّتو مهدّدة باش يركّز معاك تحكيلو على الدّيموقراطيّة كوسيلة لتحقيق الخير العام مايسمعك حد.
آش قعد قعدو كعبتين و كعبة و أغلبهم إختارو باش يحمّلو المسؤوليّة الكل للحاكم وهو صحيح يتحمل مسؤوليّة كبيرة أمّا موش وحدو و الكعبتين و كعبة في عوض يخدمو على تبديل العقليّات علّقو مشإكل العالم الكل عالحاكم كاينّو جبناه بالبرّة في حين هو النتيجة الحتميّة للبيئة متاعنا معناها صنع تونسي ميا في الميا.
في الإطار هذا قعدت فكرة النّظام مربوطة بالقوّة و الفلوس عند الشعب و ماعندها حتّى علاقة برغبة الأغلبيّة.
بالطّبيعة كي صارت الثّورة و الكلنا تصوّرنا و إلّا حبّينا نتصوّرو إلّي هي تغيّر في السّلوك و الفكر السّياسي متاع الشعب آشون لقينا ع الميدان و عندو شعبيّة باش يحقق هالدّيموقراطيّة و نولّيو نتحكمو كناس أحرار و نتداولو عالسّلطة كيف أندادنا ؟ نفس هالمعارضين إلّي كانو موجودين قبل نهار أربعطاش و نفس الشعب ... يمكن كان باش نخرّجو التصريحات إلّي سمعناهم من عند السياسيين و الشعب في العام لخّر و إلّي يسمعهم أي ديموقراطي يبدا يندب نعبّيو موسوعة هذا من غير ما نحكيو على السلوك السياسي من كسكروتات و عطر جاردور و تحالفات و صفقات إلّي تواصل بنفس النسق متاع قبل أربعطاش جانفي كان موش أكثر... نفس عدم الإيمان بالديموقراطية من الشعب إلّي يرضى يصوت موش على خاطرو يرى في صوتو طريقة ناجعة لممارسة سيادتو لكن يرى فيه طريقة باش يدبّر كسكروت و إلّا باش يبزنس طفلة و إلّا سلاح باش يفرض رايو على غيرو و إلّا حتّى ساعات باش يدخل للجنّة.
يعني ما ثماش شك /عالأقل عندي أنا/ إلّي التّفكير و السّلوك السّياسي متاع التّونسي كان و لا يزال غير أخلاقي كان باش نحكيو من وجهة نظر ديموقراطيّة و ما تبدّل فيه شي و مازّلنا للّحظة هاذي يلزمنا نتعلّمو مع بعضنا الأبجديات متاع الديموقراطيّة.
هيّا بديت نقلق نختمو المرّة الجاية

علاه مشرولة؟ الباب الأوّل

I

يضهرلي الشّعب التّونسي هو الشّعب الوحيد في العالم إلّي عدّى مدّة قرن و نصف يتحكحك مع الفكرة متاع الدّيموقراطيّة من غير ما ينجّم يوصل يطبّقها حتّى مدّة نصف ساعة.
طول التّاريخ متاع تونس السّيطرة على كامل التّراب متاع البلاد عمرها ما كانت كاملة لمدّة طويلة يقولو حتّى إلّي الحسينيين ما وصلولها إلّى في أوّل القرن تسعطاش و يضهرلي ما كانتش سيادة بالمعنى متاع اليوم بما أنّو القبائل ديما موش راكحتلهم... إنّجّمو نشوفو يعني الدّولة حتّى بمفهومها الإستبدادي ماهيش فكرة مقبولة من عند القبائل إلّي كانت عايشة على التّراب التّونسي من أوّل الدّنيا من وقت قرطاج و روما نعرفو إلّي الخيّالة النّوميديّة بدّلت الولاء متاعها برشا مرّات في الحروب البونيقيّة و في عهد روما و إلّا العهد الإسلامي ماركحوش لمدّة طويلة لحتّى حاكم و مع جيّان بني هلال و بني سليم كانت تشخر زادت بف و الولاء متاع القبايل هاذي كان يا بالقوّة يا بالإمتيازات بالقرب من الحاكم يا بالوازع الدّيني و إلّا العرقي... بالطّبيعة موضوعنا متاع التّفكير و السّلوك السّياسي متاعنا مربوط بشكل كبير بتاريخنا هذا حتّى إنّو ما إنّجموش نفصلو تدخيل التّفكير الدّيموقراطي بإحتشام في نصف القرن تسعطاش بالموجود في مخاخ التّوانسة وقتها.
عاد وقتها عملو عهد الأمان و الدّستور و مجلس يعيّنو الباي عمرها ماكانت حاجة مطلوبة من عند التّوانسة كانت أفكار متاع مماليك قارين البرّا و تحت ضغط و إلّا عالأقل الإستحسان متاع الفرنسيس و الطلاين و الأنڨليز.. حتّى النّخبة الحاكمة تضهر كاينّها ما هيش مقتنعة ميا في الميا بالتّفكير الدّيموقراطي و تعمل فيه متاع عندكشي عندي يعني الدّيموقراطيّة ماهيش غاية في حد ذاتها هي مجعولة باش تقوّي الدّولة باش تنجّم تنافس الأوروبّيّين هذا مثلا عند خير الدّين أمّا عند الباي فإنّو كاينّو بالسّيف عليه دزّوه الفرنسيس و ماخذة في الخاطر في جماعتو...المشكل عند الشعب الأفكار هاذي جات كاينّها مصيبة جات مع الزّيادة في الضرايب و جابت المساوات مع اليهود و النّصارى و جابتلهم كرفي متاع الهبوط للعآصمة كي يحب يستينف بالطبيعة الأعيان ما عجبتهمش زادة تنقيص من النفوذ و غيرو...
المضحك أنّو الدّستور و البرلمان باش يوليو مطلب شعبي مع حزب الدّستور و الدّستور الجديد...تقلّي شنيّة إلّي يضحّك في الحكاية إلّي يضحّك هو إنّو كيما العادة الدّيموقراطيّة ما كانتش مطلوبة في حدّ ذاتها كنظام ينجّم يضمن الحرّيّة و العدالة لكن كانت مطلوبة لتحقيق الإستقلال... هو مانيش مهبول باش نقلّك إلّي الإستقلال خايب أمّا موضوعنا هنا هو تشرويل الفكر و السّلوك السّياسي يعني حتّى كان أحنا من أوّل العرب إلّي عملو دستور في نص القرن تسعطاش و علّقناه وحّدنا منبعّد أربعة سنين و رجعنا نطالبو بيه في الحركة الوطنيّة فإنّو عمرنا ما طالبنا بيه عن إقتناع أنّو نظام معقول باش نتفاهمو بيه بين بعضنا.... و الأهم في الحكاية أنّنا في الأوّل رفضناه على خاطرو تهديد لمصالحنا و لهويّتنا و من بعّد ولّينا نطالبو بيه لمصالحنا و لهويّتنا...
و من الواضح حتّى للّي يتفرّج من بعيد إنّو المطالب السّياسيّة للحزب الدّستوري القديم و من قبلو حركة الشباب ما كانتش شعبيّة ياسر و الإلتفاف حول مطالبو في أحداث الجلّاز إنّجّمو نتصوّرو إلّي هو كان على خاطر مسّ الفرنسيس و الطّلاين من مقدّسات التّوانسة و الغبينة إلّي حسّوها من جرّة إحتلال ليبيا و زيد مقتل طفل صغير من طرف واحد طلياني يعني التّوانسة إلتفّو نسبيّا حول الحركة الوطنيّة بواعز ديني و قومي و رفضا للمستعمر و مطالب الدستور القديم قعدت مطالب نخبويّة.
العبقريّة متاع الدستور الجديد و الإتّحاد تمثّلت في تفييق الشعب على روحو و تشريكو في مقاومة الإستعمار و تفعيل العصيان المدني و حتّى المقاومة المسلّحة من غير شك النّخبة متاع وقتها كانت واعية بالقيم متاع الحرّيّة و العدالة و تعرف دور النّظام الدّيموقراطي في ترسيخها لكن العبقريّة متاعها خلّاتها تفهم إلّي تفييق الشّعب يكون أسهل بإستعمال الهويّة : الدّين ساعات و القوميّة ساعات و إيقاظ الحس الوطني ساعات... و في هاذي إنّجّمو نقولو بورڨيبة أبدع المؤتمر الأوفخاريستي و حكاية المجنّسين و إلى آخره..
ما نيش مركّز ياسر على دور المستعمر في تشرويل الفكر و السّلوك السّياسي متاع التّوانسة على خاطرو بديهي و واضح من مواصلة إعطاء الإمتيازات و إستعمال القوّة و يمكن أهم حاجة هي تكريس إحتقار التّوانسة للدّيموقراطيّة كنظام جاي مالبرّة و إمّاليه لا يمّنو لا بحرّيّة لا عدالة... بالرّغم من هذا الحركة الوطنيّة تمكّنت من مواصلة رفع المطالب الأزليّة متاع دستور و برلمان وتدخيل فكرة جمهوريّة في مخ التّوانسة لكن ديما بأسلوب الغمّة و أسلوب اللّيقة تجيب يعني المطلب الشّعبي هو الإستقلال و كل واحد عندو فكرة في مخّو كيفاش...التّبرويلة هاذي تواصلت الأعوام الأولى من بعّد الإستقلال و بورڨيبة إستعمل كل شعبيتو و وهرة المجاهد الأكبر باش يعدّي حكايات كيما الأحوال الشّخصية و تحديث الدّولة /موش وحدو معاه جزء من النّخبة/ أمّا الحكاية كانت على ظهر جزء كبير مالتّوانسة كانو عندهم تصور آخر لتونس مستقلّة و فيسع فيسع دولة الإستقلال إلّي هي جمهوريّة و تستعمل في مؤسّسات تستعملهم أي ديموقراطيّة لقات روحها تتصرّف بإستبداد و تبرّر إلّي هو ظرفي و ضروري لبناء الدّولة و إختارت باش تستحفظ على روحها و على مشروعها الحداثي بإستعمال نفس المكوّنات المشرولة في التّفكير و السّلوك السّياسي عند التّونسي الإمتيازات القوّة و الوازع الدّيني أو القومي أو الوطني أو الثلاثة مع بعضهم... و سلّكتها بيهم بلڨدا من ناحية تركيز النّظام إلّي يقولولو هيبة الدّولة و إلّا الهدنة الإجتماعيّة لكن كانت عندو نتائج كارثيّة في مواصلة تشرويل الفكر و السّلوك السّياسي. الصّراع اليوسفي البورڨيبي لا يزّي عزّز إحتقار برشا توانسة للنّظام عامّة و للنّظام الجمهوري خاصّة بما أنّو ظهّر إلّي ماهوش مختلف على نظام الحماية و إلّا نظام الباي لا يزّي زاد رجّع الهويّة / دين و قومية و وطنيّة/ لقلب العمل السّياسي في حين هي حتّى لوكانت لازمة في عهد الإستعمار فإنّها بالتّأكيد تبيلكك في دولة تحب تبني نظام ديموقراطي و ولاّت مزايدة شكون تونسي أكثر و شكون عربي أكثر و شكون مسلم أكثر و ولّات تخوين و فلان بيّوع و فلان ماسوني و هذوكم ڨعار و هذوكم مدّبيّة و هذا يورّي إقتناع زوز أقوى سياسيين في البلاد في الوقت هذاكة بأهمّيّة حكاية الهويّة إلّي إستعملوها هوما ضد الإستعمار و بإفلاس الحس الدّيموقراطي عند الشّعب الكريم
ولّات حكاية حياة أو موت بين زوز أشخاص و زوز مشإريع ماهمش بعاد ياسر على بعضهم و بما أنّهم دافنينو مع بعضهم فإنّهم ما رشفوهاش لبعضهم و ترزينا في درا قدّاش من شهيد في بنزرت في إطار المزايدة هاذي غير الضحايا المباشرة في الصّراع هذا إلّي بالطّبيعة كانو أكثرهم يوسفيّة...يعني هوما بالرّغم إلّي قافزين و يعرفو قيمة النظام الديموقراطي كإخر ما وصلتلو الإنسانيّة في الحكاية متاع الأنظمة فإنّهم ما كانش عندهم ڨلب باش يطبقوه يمكن على خاطر عركة بين زوز شخصيّات قويين كيف ما يقولو بعض الناس و يمكن زادة على خاطر ما عندهمش ثقة في إقتناع الشعب بالدّيموقراطيّة و فضّلو تحويل الصّراع لمجال يسهل إستقطاب الجماهير و هو الهوية و الوطنية و غيرو.
يعني توّا من عهد الأمان للأعوام الأولى متاع الجمهوريّة الأولى الفكر و السّلوك السّياسي تحوّل من الحكم المطلق متاع ملك على شويّة قبايل إلى شبه جمهوريّة شعبها مغبون مدّة قرون و يرى في الدّيموقراطيّة كل شي إلّا وسيلة يحاول يحقق بيها قيم الحرّيّة و العدالة و السّعادة لروحو.... هاو الجزء الأول على خاطر كان باش نقعدو نثبتو إلّي التّوانسة تاريخيا ما إمّنوش بالدّيموقراطيّة و حتّى النّخب متاعها في طمبك المقاومة من أجل الحرّيّة و العدالة إستعملتها كأكسسوار فإنّو نعدّيو اللّيلة في تقعيد العود الجزء الثّاني نشوفو كيفاش عدم الإيمان بالدّيموقراطيّة تواصل حتّى لليوم / إيه من بعد أربعطاش جانفي/

علاه مشرولة؟

تاريخيًّا الشّعب التّونسي عمرو ما إمّن بالدّيموقراطيّة و المستعمرين عمرهم ما حبّو يعطيوهالو بالحق. هذايا السّاس إلّي من وقت خير الدّين حاولنا نبنيو بيه أشكال متاع حكم. على خاطر من وقتها و العباد فهمتها /و لو موش برشا/ إلّي كمشة قبايل و باي و محلّة و كمشة مشايخ ماهيش طريقة متاع حكم ناجعة و تجيب نتيجة. عاد لو كان هذا هو السّاس ما نبهتوش كان أي طريقة متاع حكم نجربوها حتّى لليوم ما تمشيش و تطلع موش هي.
الحكاية متاع اليوم هي نورمالمون تكتب عليها مقال سيريو و الحقيقة لازم واحد يعملها / واحد موش معناها أنا... على خاطرني بخيل و لا نحب نكتب بالعربي متاع الأخبار لا بالسّوري وزيد بالأخصّ مانحبّش نلوّج عالمراجع و نقعد نكتب فيهم، أمّا راهم موجودين للّي يحب يتعمّق في الموضوع وزيد إلّي أهمّ من هذا الكلّو كان باش نكتب بالرّسمي البلادة و الرّكاكة إلّي نسيّب فيها توّا بين القوسين هاذم لشكون باش نخلّيها... أمّا سيريوزمون الموضوع هذا موجود و كتبو فيها مفكّرين عرب و موش عرب أمّا نظرا لأهمّيتو في الوضع الرّاهن فإنّي قرّرت باش نعطي رايي على ما ياتي / هاني سكّرت القوس أمّا مجال البلادة و الرّكاكة ينجّم يتواصل حتّى آخر النّصّ... عاد نحب نخمّم مع إلّي خمّمو قبلي و قاعدين يخمّمو توّا في حكاية تفكيرنا و سلوكنا السّياسي كشعب منين جاي و شنيّة العوامل و الظّروف إلّي تخلّيه مشرول إلهالدّرجة... و العام الإخّر عطانا برشا مادّة /حاشا من يعدّي/ صالحة للنّظر و التحقيق كيف ما قال كلّي عندو صنبة قدّام الكنيسيّة / أضرب عندك آهو موش المراجع بركة خوذ حتّى الأدريسة/ هالسّلوك و التّفكير السّياسي كي نثبّتو في منابعو و الأحداث و الظروف إلّي جابتّو يوحيلي أنّو التّحوّل الدّيموقراطي ولّات حكاية مستعجلة و ضروريّة و أنّو الوفاق الوطني و المصلحة العليا للوطن و الميثاق بين الأحزاب و حتّى أقوى دستور في العالم ما يمنعش مواصلة تكسير كرايم النظام الدّيموقراطي كيما قبل طالما / وايوا على طالما... نحسّ في روحي كي المساكني كونتر المغرب/ طالما أغلبيّة الشّعب التّونسي ما تمّنّش بالدّيموقراطيّة و عدم الإيمان هذا يرجع إلى درجة كبيرة للمستعمرين إلّي بدرجات متفاتة عمرهم ما إمّنو إلّي الدّيموقراطيّة ممكنة مع الشّعب هذا و إلى نخب الإستقلال و إلّي من بعّدها إلّي كمّلت عطاتو تبرير لقلّة إهتمامو بالشّأن العام و المصلحة العامّة و خلّاتو يزيد يتيقّن إلّي هو عندو الحق كي يحتقر الأنظمة بجميع أنواعها و يحطّها الكل في فرد حكّة و يواصل في عدم ثيقتو في السّلط الكل حتّى لو كانت ديموقراطيّة.
هيّا آهي كيما تقول إنتي مقدّمة ماهو زعام نحنا في الطّاولة و الكراسي الباقي نكمّلوه كي يسهّل ربّي

scrat :)

Scrat ou le blogueur tunisien moyen :)

حمارنا حمارنا و الرأس يوجع

حمـــارنـــا، حمـــارنـــا، و الــــرأس يـــوجع
و أمّو صنعت له نقابا يعـــجــب
نقابا يعـــجــب، و شاشية حمـــراء
* * *
حمـــارنـــا، حمـــارنـــا، عندو مليون بطّال
و أمّو صنعت له قميصًا و قصّر سروال
مــن القصير سروال، نقابا يعـــجــب
و شاشية حمـــراء
* * *
حمـــارنـــا، حمـــارنـــا، كان فقيرا مفلسااااا
و امّو صنعت له من المدّبيّة مجلسااااا
مـن المدّبيّة مجلسا، من القصير سروال، نقابا يعجب و شاشية حمراء
* * *
حمـــارنـــا، حمـــارنـــا، ما عندوش فطور
و أمّو صنعت له من التّبلعيط دستور
من التّبلعيط دستور، من المدّبيّة مجلسا، من القصير سروال، نقابا يعجب و شاشية حمراء
******
حمارنا حمارنا ضربو بوليس بمشطة
و أمّو جابت له من الخليج كشطة
من الخليج كشطة، من التّبلعيط دستور، من المدّبيّة مجلسا، من القصير سروال، نقابا يعجب وشاشية حمراء

أين تسهر هذا المساء

نقدّم لك عزيزي القارئ نشرة عن أهم العروض الثقافيّة و التّرفيهيّة و الرّياضيّة مساء السّبت الخامس عشر من جويلية

.
في وزارة الدّاخليّة يتواصل العرض التّرفيهي التّربوي عن حياة الحنوشة و يحضى هذا العرض بترحيب كبير من النّقّاد خاصّة بعد إدماج فقرات جديدة مثل الحنش النّاطق الموجود في دهليز الدّاخليّة منذ شهر و سكاتش حنش لكن نقابي و غيرها من النّوادر عن حياة هذه الزّواحف اللّطيفة

في ساحة الحكومة بالقصبة يستأنف مهرجان الويستارن نشاطه في دورته الثالثة و هذه فرصة أخيرة لكل من تخلف عن الدّورتين السابقتين للمشاركة في ألعاب الرّوديو و الركوب على البقر و إلتقاط بعض الصّور في مسابقات تخطّي حواجز نقابة البوب و الهرب من الكوبويات في أزياء تنكّريّة مضحكة... كما تستطيعون مشاهدة مهرّجين يقلّدون شخصيّات تاريخيّة مثل لينين و جمال عبد النّاصر و حسن البنا وخاصة منصف ڤريمالدي في عرض يبرز فيه مهاراته الفائقة في تلقّي الضّربات في أزقّة المدينة العتيقة

.
في قصر قرطاج، لا تفوّتو فرصة مشاهدة المومياء النادرة اللّتي عثر عليها تحت متحف باردو حذو مجلس النوّاب

.
في مجلس المستشارين يتواصل عرض مسرحيّة /قصبة و نصبة و قرد يبيع و يشري/ و هي مسرحيّة هزليّة يشارك فيها إلى جانب الفكاهيين المعروفين نخبة من طبّالين الفرق الفولكلوريّة و راقصي الفرق الشعبيّة كالبوسعديّة و العيساويّة وغيرها

.
في داخل الجمهوريّة يتواصل عرض مسلسل الكواسر في حلقات جديدة في كامل دور الثقافة بولاية ڤفصة و ذلك بطلب من الجمهور

.
في ولاية سوسة يتمّ عرض فيلم /لا ثورة لا شي...آني قعدت ديما الثاني

/
في صفاقس يقدم ممثلو إتحاد الشغل عرض خداع بصري يتمثل في تحويل أرانب إلى ذئاب و نقابات إلى طرق صوفيّة يساهم في العرض بعض نقابيي الإذاعة الوطنيّة

.
في ولاية تطاوين لا تفوّتو فرصة حضور دروس مجانيّة في الكرم و حسن الضيافة خاصّة إن كنتم من سكّان العاصمة و لم تفوتو الفرصة في استغلال بعض الليبيين المنكوبين لكراء منازلكم بضعف الثمن

.
جل هذه الأنشطة يندرج في إطار تونس عاصمة تهريجية سنة أحداش بعد ألفين و ذلك حتّى حفل الإختتام الذي يتكوّن من جزئين الجزء الأوّل حزب لطيف من إحياء شيوخ الطرب و الجزء الثّاني عرض خاص بسيرك عمّار قد يتواصل لمدّة طويلة
عزيزي القارئ نتمنّى لك سهرة ممتعة

في المهموتة

حاسس ثمّة برشا غمّة في حكايات الثّورة... بالطّبيعة تنجّمو تقولو إلّي هاذيكة هي لبلاد و ما تبدّل شي أمّا موش نورمالمون ثورة نبداو ماللّوّل و نصفّيو النّيّة عالأقل العويّم الأوّل حتّى ماخذة في الخاطر في العباد إلّي تقصفت في أعمارها على صغر سنّها... ضاهرلي يبطى الجموع تمضّي عالكرسي و ماهامّها شي أنا واحد مالنّاس بديت نقتنع إلّي ثمّة جيل يلزمو يخرج للرّوترات باش إنّجّمو نبداو الثّورة...كان لاحضتو الجماعة متاع المعارضة إلّي دغّفهم صانع التغيير في سبعة و ثمانين الكلهم مازّالو هوني... و هاذومة كان جاو عندهم شويّة تواضع يعترفو بالفشل متاعهم... و يقولو رانا أمورنا تاعبة و ما نجّمناش رواحنا و كان ما جاتش العباد تيقرت مالظلم رانا قعدنا من حبس إل منفى و راهو ما سئل علينا حد...لازم شويّة صراحة ناس فاشلة و قاعدين نعاودو في نفس التّجربة بنفس الشّيّاب إلّي هاربين مع المطهّرين...برشا أظهرو حنكتهم السياسية فقط في تجنّبهم للسّجن و فشلو فشل ذريع في تعاملهم مع صانع ألعاب التغيير... و برشا أخرين مع كاريزمتهم القريبة برشا مالصفر أثبتو فشلهم حتّى في إختيار مجال نشاطهم إلّي ما يخفى على حد إلّي هوما أنفع للبلاد كان يختارويناضلو في منظمات حقوقيّة...هذايا لا محالة خيال علمي في بلاد المنظمات المهنيّة متاع القضاة و المحامين و النقابة المركزية يحبّو يكونو سلطة تشريعيّة مؤقتة قريب باش تلقى حزب بيّاعة المشموم و إلّا حزب الشّوّاشين الأحرار... بون خرجت عالموضوع أمّا حكاية إلّي النّاس الكل تحب تعمل السياسة مغلبة عليّ راهو العمل السياسي حق صحيح أمّا ماهوش واجب و أكثر من هكّة راهو كي تحل جمعيّة تعلّم العباد كيفاش تعمل سيرة ذاتيّة و كيفاش تلوّج على خدمة و إلّا كيفاش تعمل مطالب قروض لبانكة تنفع بلادك مليون مرّة أكثر...زادة كمحامي كي تعمل جمعيّة تفسّر فيها شنوّة معناها مواطنة و حقوق و حرّيّات للمفرخ فإنّك لا يزّي تنفع البلاد لايزّي ترتاح من دعا الشرّ إلّي يجيك مالبوليتيك. عاد الجيل إلّي أثبت الفشل متاعو في الحزب الحاكم و في المعارضة مازّال موجود بطريقة تفكير تجيبلي غرض الرّدّان و بإيديولوجيّات طايحة من كتب التّاريخ...يعني حتّى اللّوغة متاعهم إتّعبني عربيّة فصحى مدڤدڤة و زيد ما يتعدّى من كلمة إل كلمة إلّا ما يكون واحد كيفي عمل طلّة على تويتر و فايسبوك و تفرّج في إخّر بونطو متاع ميسي.... لا محالة ميسي يمركي ثلاثة و هوما مازّالو ما جاوبوش على سؤال... و الأتعس في الموضوع إلّي الجيل هذا حاشا صلّاحو / صلّاح و في السّياسة متاع تونس معناها عڤڤنة/ قاعد يعدّي في الخنن متاعو للأجيال إلّي منبعدو هذا مشكل في حد ذاتو على خاطر الأجيال إلّي من بعّد مازّالت ما عملتش راي خاصّة و أنّها عاشت صحراء سياسيّة مدّة ثلاثين سنا / من بعّد ما شفنا آش عنّا أحزاب إنّجّمو نقولو من حسن حظّهم/ بالطّبيعة الشباب متاع اليوم مطّلع شويّة علّي صاير في العالم و باش يجي نهار و يقطع مع الأفكار هاذي بما أنّها لا تصلح لا للدّنيا لا للدّين و إلّا فإنّو باش يكمّل في المنوال هذا و يجي نهار و ننقرضو.... الجيل هذا ع الراس و العين كوالدين و ككفاآت أمّا في السّياسة صفر آش خلّاهم باش يجيبو واحد يعطي الثقة للتّوانسة رجعو لواحد مولود في الثلاثينات من القرن إلّي فات... لذا بالله كانك مولود بين عام أربعين و عام سبعين براس والديك لا تترشّح لحتّى إنتخابات /صعيب شويّة لذا أمورنا ما تتريڤل إلّا من هنا إل عشرة عشرين سنا/ هاذي الغمّة الأولى و هي محاولة جيل السياسيين الفاشلين في الركوب على ثورة الشباب إلّي أي ملاحظ ينجّم يلاحظ /إيه إيه ملاحظ و يلاحظ/ إلّي إستعمال كلمة ديڤاج في كثير من الأحيان كان فيه شويّة متاع صراع أجيال و هذايا كان واضح حتّى قبل الثورة... طبعا ثمّة فشل متاع جيل و الشباب متيقّن إلّي هو باش يخلّص الفاتورة...الغمّة الثّانية هي إستنقاص دور البورجوازيّة الصّغيرة و الطّبقات المتوسّطة رغم إنّها هي إلّي شكّلت الفرق بين ڤفصة ألفين و ثمانية و سيدي بوزيد ألفين و عشرة و هاذي غمّة على خاطر المعارضة متلّفتْهم نظرا إلّي هي ما عندها ما تعطيهم و في بعض الأحيان هالطبقة تقلّقهم نظرا لنمط حياتها وإلّا لوجودها أصلا... شكون باش يستقطب هالطّبقة هاذي ؟؟؟ كان باش يقعدو العڤڤنة هاذم في المعارضة فإنّها الطّبقة هاذي بكل وزنها باش تمشي للأيادي المعروفة... لا محالة موش مشكل كبير في حد ذاتو لأنها العمليّة جوست باش تعطّل المسار الدّيموقراطي حتّى لين المعارضة تتعلّم تعمل سياسة و تنقّص مالتّيتّم و تعرف أنّو كي تعيّط أكثر ما تولّيش أقوى.... معناها زوز أطراف قاعدين يغمّوا فينا واحد بمحاولة تحييدها و إيهامنا إنها غير موجودة و واحد بإستقطابها على أساس أنّو هو الوحيد القادر على ذلك...السّياسة بطريقة الغمّة أثبتت فشلها مع واحد عندو شرعيّة تاريخيّة و واحد عندو جهاز بوليسي يعبر باش تنجح مع هالبعابص كبّار ؟؟؟؟ .

الفتى النظيف

أنا فتى الفايسبوك *** أفيّش كالسردوك
أقوم في الصباح *** نِخْليها باش نرتاح
أخبّل العينين *** لين تندبو الخدّيْن

و نبارتاجي الدّمّار *** و نحترف في الأخبار

''أزيدكم في العلم *** لين يرجع ''بكل حزم
عندها أستريح *** ندوّرها كورة و شطيح

كيف تصنع دكتاتورا ؟

ثمّة كلمات ولّيت نسمع فيهم كل يوم و بداو يعملولي في حالة إكتئاب كبير و كاينّها غابت السّكرة و حضرت المداينيّة و من بعّد ما كان الواحد شايخ بالوضع الجديد و ماذابيه يعنّق كل تونسي يعرضو بدا يرجع التّخلويض و تدريع الخلايق.
الكلمات هاذوما كيما كلمات عهد بن علي / موش على حاجة أمَا حبّيت نكتبلو إسمو في بلوغي المرّة الأولى بما أنو السونسور بالكلمات المفاتيح "المو كلي"' قالو تنحّات هههههه / كلمات من نوع الرّعاية الموصولة و العهد الجديد و غيرهم عملولهم باتش وبدّلوهم بالشعب العظيم و الشعب الحرّ و الثّورة المباركة. و هي كلمات فضفاضة و متاع ضربان لوغة و ما عندها حتّى معنى. و النّاس إلّي تستعمل فيهم تعاود في كلام سمعوه من عند عباد كانت تنفخ في صانع التّغيير و ولّات تنفخ في الشعب حتّى لين يسهّل ربّي في صانع تغيير جديد... و أكثر حاجة تقلّق في الكلام هذا هي تسكير اللّعب على الحرّيّة بالشويّة بالشّويّة اليوم ماعندكش الحق تتكلّم على الشّعب و الشّباب على خاطرهم أبطال و عظماء غدوة ماتتكلّمش على النّهضة و توفيق بن بريك و المرزوقي و غيرهم على خاطر دخلو للحبس في عهد الزّين وما تتكلّمش على الإتّحاد على خاطرو شارك في مسيرة أربعطاش جانفي و هكّاكة لين نصنعو مناخ حرّيّات يعمل الكيف.
بالرّغم ملّي بالرّسمي ولّيت ندزّ في أكتافي عالجنسيّات الأخرى الكل و خاصّة العرب إلّي يخدمو معايا فإنّو يلزم الرّمّانة متاع الشّعب العظيم هاذي تتفرّك باش ما يمشيش في بالنا إلّي ولّينا كيف السّويد و إلّا الجابون و أ مورنا في الجّبن و باش حتّى حد ما يبدا يهزّ و ينفض و يتكلّم بإسم الشّعب العظيم البطل الدّيموقراطي و الحرّ و المتشبّث بهويّتو و التّقدّمي و وووو....

تره باللّه ....الشّعب هذا فيه زوز ملاين منخرط في التّجمّع....أحّيّيت.... باهي نحّي الموتى و إلّي تشدّو بالسّيف آهو عالأقلّ مليون يا بو ڤلب هذا ثلث العباد إلّي بين الخمسطاش و الخمسة و ستّين سنة...
الشّعب هذا سكت ثلاثة و عشرين سنة حاشا كعبتين و كعبة على التعذيب في الحبوسات و على السّرقة متاع فلوسو و على و على و على
الشّعب هذا كان يصفّق لعنتريّات الڤذّافي في الثمانينات و صدّام في التّسعينات هاذم الزّوز إلّي ضربو شعوبهم بالصّوارخ ... و الشّي إلّي يضحّك إلّي عنّا بعثيّين في تونس اليوم
الشّعب هذا إلّي حتّى أنا / بما أنّي موش موضوعي بالكل على خاطرو شعبي هههه/ نتفوخر بيه ما تنجّمش تقارنو بالدّول المتقدّمة إلّي عندها أنظمة مريڤلة و تعمل الكيف على خاطر بعاد علينا برشا لكن الأتعس ما تنجّمش تقارنو حتّى بدول إفريقيّة هربت بينا في حكاية الدّيموقراطيّة و حقوق الإنسان.
هذا شعب ما يقراش كتب جملة ما يعرفش يشد الصّف و ما ياقفش في الضّو الأحمر باش عظيم ؟؟ تي حتّى بالجّهامة موش عظيم عشرة ملاين... قد حومة في الشّنوة.
الثورة المباركة هايلة أمّا ما زّالت... ما ثمّاش ثورة تصير في شهر الثّورة كانها بالحق من أجل الحرّيّة و الكرامة عمرها ما توفى تي نحنا باش نحبّو نخلطو للحد الأدنى/ معناها واحد كي يخرج في الصّباح يخدم ينجّم يضمن ما يتلهوثش عليه أمن الدّولة في الثنيّة و إلّا ما يمزبلوش بوليس و يضربو بكف/ عنّا آش و خمسين سنا نلهطو....لذا يضحّكوني إلّي يلوّجو في ضمانات للثورة ... بلدان عندها ميتين سنا تخدم على ضمانات للحرّيّة و الحقوق و يابوك تغفل شويّة هكّة في حرب و إلّا في محاربة إرهاب تلقى كمشة حرّيّات طارو و ترصّيلها تجري باش ترجّعهم. خلّي يا نحنا كاينّا فيسع تعبنا و برّا بالله أعملّي مجلس يضمنلي ثورتي هاني باش نوصل للقهوة و راجع. الحرّيّة و الكرامة قيم فرديّة ما تضمنها حتّى حكومة و موش كان يبدا فيها عمر بن الخطّاب و جيفرسون و لينكولن و روبسبيير و غاندي و مانديلّا عالبنك. يضمنها كان شعب يلتزم بالإستحفاظ عليها لكل واحد من أفرادو هاذي الباز و الباقي أمور تقنيّة. ...ثورة مباركة و إلّا لا تو نقلّك من هنا إل عشرين سنا...كان عشنا و الڤذافي ما دوّرهاش يقنبل فيكم...جاب ربّي ماعندوش قنبلة ذرّيّة العزى كونشي راهو شوشط الكوكب / و من بعّد يقولولي شبيه ما يخلّيوش العرب تعمل قنبلة نوويّة/ .
إيه عاد أكهو العباد إلّي تستعمل في العبارات هاذي تزوغبني و تخلّيني نتشائم الحمدولله كل شي على عينينا و شفنا الشعب تيقر مالظّلم و هاج على خاطر بائع متجوّل حرق روحو موش على خاطر راشدالغنّوشي منفي و موش على خاطر بن سدرين ما خلّاوهاش تعمل إذاعة و موش على خاطر المرزوقي و الشّابي و بن جعفر و إبراهيم.../و يمكن هذاكة إلّي فدّدهم و يحبّو يعملو مظاهرات يبداو هوما فيها أمّا ديزولي كاينّهم يعوّضو في اللّقطة إلّي فاتتهم واحد مالنّاس متفهّم شعورهم نهارة أربعطاش ماذابيّة تعاودوهولنا و نبدا حاضر على كثر ما غلّبت عليّ فازة بدّل مالمادّة كي كنت نبدا متعدّي قدّام الدّاخليّة/ و يضهرلي أقوى سبكتاكل ريتو في حياتي هو التدهشيرة متاع السّياسيّين التّوانسة الكل بالمعارضة بالحكومة القديمة و الجّديدة بالإتّحاد في الجمعة الأولى من بعّد هروب بن علي و خاصّة جماعة التّجمّع إلّي موش مستانسين يعبّرو على رايهم من غير قيود و من غير شكر لسيادتو
على فكرة الإتّحاد غلّب عليّ في ألفين و حداش و من بعّد اندرا قدّاش من فرصة من قبل الإستقلال إل توّة جاتو باش يريڤل أمورو مازّال ما حبش يفهم يا حزب يا نقابة الزّوز مع بعضهم جوجمة ليه و لينا و زاد ضيّع فرصة جديدة يحب يختار الحكومة مع الأحزاب و من بعّد يتفاوض معاها على حقوق الخدّامة و علاش ما يكمّلش يحلّ محكمة و يعمل ميليشيا زادة هو و أخطانا من وجيعة الرّاس. إنشالله يخلط على وخيّو التّجمّع و يحلّو اللّعب للتّعدّد النقابي فعليّا موش نظريّا.
إلّي مازّال باش يبدا جملتو بالشّعب التّونسي مانيش باش نكمّل نسمعو إلّي باش يحكي يقول حسب رايي و إلّا يحكيلي شنوّة الشّعب التّونسي متاعو باش يعمل للتّونسي.

The puppet show

C'est bien de voir des professionnels a l'oeuvre. Who's pulling the strings? :) Wait and see.

الحجب يسيء إلى صورة بلادنا رسالة مفتوحة :))

Farzit ya lomima par Artiste-Tunisien

أرضى علينا يا الأمّيمة رانا مضامين
نستناو في العفو يجينا من ستة و سبعين
ناديت على ولفتي و لا بات تواجب ندايا
خزرت أمّيمتي و بكات و ڤالت نا نواجب ضنايا
إرضى علينا يا الأمّيمة رانا أولاد صغار
هيّا نتراضو يامّيمة و ننساو إلّي صار
إرضى علينا يا الأمّيمة رانا ديما أولادك
يا الأمّيمة يا عزيزة علينا الله يهلك حسّادك
يا تونس يا عزيزة علينا الله يهلك حسّادك

مانيفستو الزّبلة *

شعب صغير عندو حكاية طويلة مع الخوف الملجأ الطبيعي للخاسرين و إلّا المهزومين...الخوف من كل شي من التّبديل من البرّاني من روحو.... و كل ما يخسر و يخاف الناس إلّي تفهملها شويّة يا تشدّ البحر يا تبيع لآشكون زاد و يخلّيوه هاك الشّعب الصّغير في حجورات البولحية قبل و إلّا في حجورا ت جماعة الكساوي توّا عندهم العلم و اليقين و الأحباس حصريًّاو النّاس إلّي تفهملها شويّة هاذيكا الصّنعة من وقت سان أوغستان و من بعدو ابن خلدون وغيرهم.

 

في أرض الخوف هاذي زادو ورثو طبايع الشّيع و الملل الهاربة خايفة ترڤل من الشّرق تحب تبعد على مركز الخلافة أبداها من علّيسة و إنتي جايّ.... طبايع التّتليف و الغمّة و السّبّورة الكحلة...ما يلعّبهم حدّ في إستغلال و التّرافيك بالذّاكرة و تجميد اللّوجيك... كلّ دشرة كان موش كل عايلة عندها الوليّ الصّالح متاعها و الكلّهم من أحفاد هالإنسان الخارق للعادة هذا إلّي مستحيل بعابص الكبّار متاع توّا باش يعملو إلّي عملو هو.

شعب صغير كون مام حاول يمشي في ثنيّتو ويدبّر حنيّك مع الشّعوب الأخرى و يعمل لروحو ستيل مختلف شويّة على جيرانو أمّا قعد يمجّد في أيّ حاجة قديمة و حاقر روحو توّا و حاقر حتّى لوغتو و خدّامتو و غناهم و جوّهم...

قدّر الله ماشاء فعل...و هذاكة آش هزّت مغرفتنا كاينّو مسطّرلنا باش نقعدو برشا هكّاكة... أمّا ديما من خمسة آلاف سنا عنّا شكون يڤطّع الرّباط و يصعصع ع الوضع... حتّى المجتمع الفلوريطانش قبل الإخّر إلّي عملناه باش نسكّرو على رواحنا تسعة و تسعين في الميا عرب مسلمين سنّة على مذهب مالك ماشدّش ...الإخّراني متاع الكلّنا توانسة نحكيو بالعربي إسلامنا سامباتيك و أخلاقنا سياحيّة بدا يتفترش.... و طول هالمدّة هامش الحرّيّة يتحلّ شويّة و من بعّد يضياق و من بعّد يتحلّ.

الخروج و الدّخول حلّ بيبان متاع تخمام أخرى قبل كان الشّرق و باريس و الزّوز بدّلوننا شويّة أمّا إلّي يمشي و يقدّرلو العالي يرجع يستعمل هاك الوهرة و الكلمتين إلّي تعلّمهم باش يستبله هاك الشّعب الصّغير وقعد كي تطيح بين يديه كتيبة و إلّا حكاية متاع حرّيّة كاينّو يحكيولو على فيل يطير و إلّا دجاجة تزغرط.

اليوم باريس و الشّرق و أمريكيا و الشّنوة و الهند و السّند في بيت الصّالة.... تشغشيبة و ترهويجة صحيح أمّا نشوفو زادة في عباد تحلّ في جلغتها عيناني و تقول في إلّي في بالها و ماهيش بعوّات و ما تمسختش و لّات قرودة و إلّا حلالف ....عباد تقول في كلام كان نقولوه أحنا في قلوبنا نخافو لا يدڤدڤونا.

اليوم الحدود متاعنا حاجة أخرى... نخمّمو في حاجات إلّي قبلنا ما يعرفوش أصلا إلّي هي موجودة... العباد إلّي مازالت عايشة بالسيستام متاع العيشة القديم ماهيش باش تحلم أصلا بالحكايات إلي نحبّو نعملوهم خلّي عاد الحكايات إلّي نحلمو بيهم.

 

في الزبلة الفلقة و الأردوازة الحاجات إلّي جابوهملنا خلصو فيهم ثاني و مثلّث

 

أنواع الخوف (ماهمش ثلاثة أنواع سيدي خويا هههههه) نطيّشوهم في الزّبلة

الخوف من الأحكام المسبّقة، مالرّأي العام، مالإضطهاد، من فقدان بعض الإمتيازات و إلّا كلّها من إستنكار المجتمع للّي تفكّر فيه في الزّبلة

الخوف من النظام السائد من العدالة التّكركيرة في الزّبلة

الخوف من روحك من خوك مالميزيريا مالحاجات إلّي تنجّم تحلّ بيبان تبدّلنا في الزّبلة

 

هكّاكة تتحلّ قدّامنا بيبان غدوة و نستحفظو كان بالحاجات إلّي فيها بوتنسيال متاع تبديل...البوتنسيال هذا يتقاس بالعنف و المقاومة إلّي تقابلها الأفكار هاذي في المجتمع....كيما اليوم حفنة تدوينات قابلهم عنف كبير و مقص حالة تكرب هذا يحب يقول إلّي النّصوص هاذي فيها بوتنسيال متاع تبديلنا و نهارة إلّي تتلمّ الظّروف الأفكار هاذيكا إنّجّمو نعيشوها بالمنجد موش إفتراضيّا...من هنا إل وقتها واجبنا نستحفضو عليها و نكمّلو نبدّلو و نجيبو الجديد.

الماضي تفرض عليك وقتها تولدت ما ينجّمش يكون مقدّس من الإخّر عمرو ماكان يسالك حاجة.

مرض تضخيم الماضي و عباد الماضي و الحاجات و الأفكار إلّي عملوهم و ردّانهم من المستحيلات على العباد متاع اليوم صحيح ممكن مستحيل بالخزعبلات الأكاديميّة باش تعمل كوبيي كولي عليهم... أمّا بالنسبة للعبد إلّي يقرّر باش يكون عبد جديد في وقت جديد حاجة أوتوماتيك باش يعمل خير منهم.

 

Place a la magie!

 

*Inspiré et par bouts traduit du manifeste du refus global par Paul-Emile Borduas publié au Québec en 1948, en réaction à l'arbitraire des censeurs tunisiens.

كيخ كيخ

الكلوب و الإيتوال طاحو قبل المشماش السّنا

فيروس

أعلنت منظمة الصّحّة العالميّة عن إختفاء فيروس الإنفلونزا في ظروف غامضة و ذلك رغم المحاولات العديدة اللتي قامت بها للعثور على حالات جديدة قد يكون تسبّب فيها هذا الفيروس.
و تجدر الإشارة إلى أن آخر الإصابات بهذا الفيروس كانت قد سُجّلت في شمال إفريقيا قبل أن ينقرض بدون أيّ تفسير علميّ أو منطقيّ.
من جهة أخرى أكّدت وزارة الصّحّة في إحدى دول شمال إفريقيا إثر ضغط شديد من منظمة الصّحّة العالميّة على تعاملها مع الفيروسات الوطنيّة و الأجنبيّة بكامل الشّفافيّة و على أنّها لم تستعمل أيّة وسائل خاصّة في التّخلّص من هذا الفيروس.
وتأتي هذه التّصريحات على إثر تكاثر إشاعات تلمّح إلى إعتقال الفيروس في مكان غير معلوم و التّحقيق معه و إتّهامه بعدّة تهم منها بالإستقواء بفيروس أجنبي معروف بإسم أنفلوانزا الهاش واحد إن واحد و إستهداف شخصيّات عامّة و عائلاتها و التّآمر على أمن الدّولة.