آآآآآآي راسي

ثمّا زوز أخبار ولّا زوز بونيات كليتهم وأنا نقرا في البلوغات التوانسة. وأنا مازّلت جديد هوني و نقرى على بعضو ما يهمنيش.. لا يقلّقني سبّان لا بهامة لا حتّى تصويرة روجي لومار. سامحوني عالكلمة خوكم تر..ة باردة. وإخّر حاجة تسخنها الميزيريا متاع العرب و دمّارهم. أوّلًا على خاطرني من السّويد :)، ثانيًا على خاطر ماللّي صغير و نحنا من نكسة إل نكسة و من نكبة إل نكبة و حالنا ما تعجبش، ثالثًا نعرف إاللّي نحنا حالنا ماهيش باش تتحسّن و ماناش نعملو في شيء باش نحسّنوها عاد ما دام البارتي مخسورة باز و الحكم مشري ...عاد علاش الواحد يحرق دمّو ويقعد يندب و يندّد و يستنكر... تي ماهو يكرم لحيتو بيدو ويكسّح قلبو و يعمل مولى الدّار موش هوني. عالأقل كيف ما ينجّمش يصلّح ما يزيدش يبلبز....

عاد البونية الأولى كليتها و أنا نقرا في "إسلاميكا" التدوينة إسمها

"54 % des arabes sont favorables aux attentats terroristes en Algérie !"

خوك ترهوجت وطلعلي الدم أمّا بما أنّي مستانس بالإنحطاط و التّخلّف متاعنا قلت و برّا 2500 كربي فرحانين بلّي ثمّة عرب كانوا قاعدين ياخي قتلوهم عرب أخرين ....شنيّة المشكل؟؟ الرّيق هذا ماهو متاعنا ومستانسين بيه عندنا مدّة و زيد ستاتيستيكمون مايعني شيء إلّا إلّي أنّو ثمّة 2500 نذل متخلّف دخلوا للموقع متاع الجزيرة نهارتها. عاد بدّلت السّاعة بساعة أخرى وكمّلت الدّورة متاعي في البلوغات المزيانة لين غدرتني التدوينة هاذي عند "الناقد" و إسمها "في اخر تقرير للالكسو:100 مليون عربي أمي؟؟؟؟؟ " هوني عاد وخّر وخّر ظهر البهيم حاشاكم وفى...معناها يا بو قلب كيف تاخذ 3 عرب بالزهر ثمّة واحد منهم مايعرفش يقرا...هاذا الكف الأول... .آهي المشطة : المعدّل في العالم 18% .... زيد دماغ "في تزايد مستمر" ....خمسة و سبعين مليون أقل من 45 سنة...الحاصيلو كفْ يهز كفْ يجيب. ولّيت نحس في روحي كيف الدّينار بو دورو .....تذكّرت عاد الدّوبل زيرو إلّي حالّين القنوات الفضائية ساعات يعلّمونا الشطيح و ساعات الإيمان....و تذكّرت الشّعارات الرّنّانة متاع الكلنا شعب واحد و مصير واحد....و الهم و الميزيريا و هبطت عليّا الكآبة و جاني الرّدّان حاشى من يتصنّت...و ما نعرفش علاش أوّل حاجة جات إل بالي....إلّي هوما ال2500 حقير إلّي فرحانين باالّي صار في دزاير...... يعرفوا يقراو.....

ما نعرفش علاش الحكاية هاذي فدّدتني و عملت فيّا يمكن على خاطر الكلام هاذا معناه إلّي باش يجي نهار و ماعادش ثمّة كلافيي كيف إلّي نكتب عليه أنا توّا وباش يجي نهار يحطّونا في محميّات كيما الزّنديانات و باش يجي نهار و 2500 حقير يولّيو يحكموا في 100 مليون جاهل....

وإلّا يمكن على خاطر و أنا خارج مالخدمة نهارتها (هذا الكل قريتو وأنا نخدم ... من السّويد أما عندي عرق عربي:) ) ...ثمّا واحد صاحبي مسلم إفريقي أمّا ما يحكيش بالعربي قالّي كإنّوا عامل بالعاني باش يكمّل على مرمّتي:

...You know you 're lucky....Iwish i can speak arabic