ما نْحِبّش نْعرّس

توّا فكّيتوشي عليّ!!! ياسيدي ما عينيش!!! ما نحبّش !!! ما نّجمش!!! ما نقدرش!!!ما....ش!!!

بالله توّا الفاميليا كيف يبداو يخرننوا النّهار الكل في راك ماعادش صغير في وقيّت في نحبوا نفرحوا بيك تنجّم تتفهّم موقفهم و تقول قلبهم عليك و يحبّوا يتهنّاو عليك و آك اللّوغة...

مادموازيل مازّلت كيف تعرّفت عليها وتبدا تغنّيلك على ماخذة و على مستقبل نورمال البنات في العالم الكل يحبّوا يعرّسوا و يستنّاو ملّي تتحل عينيهم في لو برنس شارمون (إمّالا باربي و بلانش ناج علاش عملوهم ماهو باش البنات متاع العالم الكل ينفخولك راسك بهالحكاية)....

صحابك إلّي عمرهم كامل ضد الإرتباط و ضد التّعاقد، دوب ما يطيح على قراقبو ويهز الخبزة قاطو و يمشي يخطب من غدوة يحطلك الديسك متاع الهنا باهي و إلى متى فرش بو بلاصة و سهّلها تسهال و مازّلت كان إنتِ... ميسالش مسكين هو تكعبرتلو و ما يحبّش تتكعبرلو وحدو والرّبطة مع الجماعة خلاعة

أمّا هذا تاكسيست هنداوي تبدا تحكي معاه باش تقصّر الثّنيّة يقوم يقلّك راهو طريقك مسدود مسدود و لكان ما تعرّسش في أقرب وقت باش تقعد عمرك كامل تشهق ما تلحق و ماك باش تعمل شيء في حياتك هاذي قالتلهم أسكتوا توّا ناقصك أنا تفوّل عليّ وتزيد تجبدلي في حكاية سمعتها عشرة مرّات الجمعة هاذي برك...تقولش عليّ نحكي مع عم الطّاهر التّاكسيست كيف يجي يعمل شيشة في القهوة.

توّا العالم الكل ولاّو متفاهمين عالعزّاب من كامل الجنسيّات باش يدخلوهم القفص الذّهبي؟؟؟...حتّى كان جا مسلم نقولو يحبّك تملك نصف دينك و تريض...زعمة الدّار باعثينهولي باش يزيد يمرجني.

ياجماعة...يا جماعة راهو النّاس كانت تعرّس بكري على خاطر كانوا يعيشوا شويّة...معدّل الأعمار في أوائل القرن الفارط ( ملّا أنا وملّا جملة كتبتها :) خلّي نعاودها معدّل الأعمار في أوائل القرن الفارط كان بين الأربعين و الخمسة و أربعين معناها كيف يعرّسوا عمرهم عشرين يعيشوا مع بعضهم كان عشرين سنة ...توّا معدّل الأعمار فوق السّبعين معناها تعرّس عمرك ثلاثين مازّلت باش تعيش مع نفس الإنسان أربعين سنة ....علاش إمّالا النّاس ولّات تطلّق برشا؟؟؟موش على خاطر ناس قبل يحِبّوا أكثر و يعاشروا أكثر ولّا ناس توّا ماهمش قد المسؤوليّة...لا على خاطر قبل كانوا ما يخلطوش باش يقلقوا من بعضهم

و زيد يا سي التّاكسيست ما نعرفش في الهند شنيّة ظروفكم أمّا نحنا ما تكمّل تقرا كان في الخمسة و عشرين وما تلم زوز دورو كان في الثلاثين هذا كانك مزهار و حاذق

و زيد على هذا و دونو نسا توا موش كيف نسا قبل...يقعدو مع النسا الأخرين و يتلهاو بالكوجينة و آش ما جا يرضيهم توا تحبّك شادّلها وجهها و تبشبش بيها و تخرّجها معاك و تدخّلها معاك و تعملو ديزاكتيفيتي مع بعضكم...يا سيدي أنا كان في تونس نحب نلعب الأدواس لين تسكّر القهوة و نحب نكوّر نهار الأحد و نحب نمشي للستاد و هاذوما ديزاكتيفيتي تسمع فيهم وسخ وذنيك وماتنجّمش تشارك فيهم مرتك و كان البرّة من تونس نحب ساكي على ظهري و فين يطيح اللّيل نبات ونحب نخرج عقاب اللّيل نتفرّج في خلق ربّي و أكتيفيتي كيما هاذي منافية لكل أنثى تحب تعرّس وتجيب صغار.

إيّييياه ملّا تفرهيدة...هيّا تبقاو على خير