قرية السنافر

يا بوش يا وحيّد، جاي تحبي تحت من يمرد، يا حلّوفة... باهي هكّا توّا أهوكة فاقو بيك... علاش تطيّح في قدرك، ياخي تحسب فينا ما نفهموش... سيدي تاتا عندك نحنا جاي تحبّ تعدّي إستراتيجيتك الفاشلة على ظهورات المدوّنين إنت و السي اي آآآ...إمّالا!!!في بالنا بكل شي رانا ماناش نرضعو في صوابعنا... برّا دور بغافل.الأولاد برجوليّة أبدعتو فيها هاذي... الرّاجل عندو اندراش من هم جيش في شيرة بنزرت أمّا ما ناقصو كان المدوّنين باش ينجّح استراتيجيتو... معقول !!! سامحوني راهو ما عنديش ما نقول في ما يخص تمشيو و إلّا لا... الحكاية كل واحد يقرّر على روحو و إنشالله بالتّوفيق للنّاس الكل...أمّا حبّيت نقول حويجة بركة ع الإنفعالات متاعنا إلّي ما عندهاش حتّى علاقة بالواقع... معناتها هذوكم أشرار و هذوكم طيّبين و بوش موش ناس ملاح و ساقط و موش راجل... و أمريكا خايبة أمّا المجتمع المدني متاعها باهي... ياخي بالله علاش باش يكون ناس ملاح معاكم ياخي أنتوما انتخبتوه...معناها يظهرلي الكلنا نفهمو إلّي هو يلوّج في مصلحتو و نحنا كيف كيف و ما ثماش مشاعر و أحاسيس و ريق بارد في الحكاية و شر و خير... يمكن كان سهّل ربّي تو نحكيلكم على واحد صاحبي مشى في برنامج منظمتّو الإدارة الأمريكيّة جملة وحدة من عهد كينيدي و قعد يتنظم حتّى في عهد بوش أمّا توّا ما عنديش وقت... و الكلنا وقتها خممنا كيفكم و قلنا باش يتلهوثو ع الطفل... أمّا تنبزنا في الإخّر... الحاصيلو كنت ما ذابيّا نهر معاكم أمّا الظّروف ماهيش مواتية...ماهو المرّة الجّايّة كي تعرفوها باش تلحم قولولي نقعد ما نمشيش نخدم...خلّي واحد يتفرهد معاكم... أهوكا إلّي ماشين للمغرب ردّوا بالكم مالتّحليل في المرواح و إلّي قاعدين في تونس آهو حلقة متاع السّنافر ذكّرتوني فيها بالحكاية الحولة متاعكم :)). هي تشبّه للحكاية متاعنا و فيها قرية السّنافر و واحد شرّير شرشبيل و قطّوسو هرهور و بعث سنفورة باش يدخّل السّنافر بعضهم. عاد جو!! ثمّا السّنفور غضبان و السّنفور شاطر و السّنفور قويّ و حتّى بابا سنفور و كان تقعدو عاقلين تو كي تكمل الخدمة نحط الحلقة إلّي مبعّدها باش تعرفو آش صار في سنفورة...أمّا خسارة الدّنيا صعيبة و ما هيش صور

متحركة.