jeudi 26 juin 2008

الدّوانة التّدوينيّة

ثمّة حاجة إل توّا ما فهمتها قد ما كسّرت راسي و خدّمت المادّة الشّخمة .... توّا كي تعمل أصدقاء إفتراضيّين حاجة حلوّة حتّى كي تبدى ما عندكش الإيمايل متاعهم تبدى عامل جو ع البوستوات متاعهم و التعاليق الشي إلّي يخلّيك تحب تتعرّف عليهم و تشوفهم هذا الكلّو معقول إلّي ما فهمتوش هو كي تعمل أعداء إفتراضيّين شنوّه الكيف إلّي فيها ما نعرفش أمّا أبارامون ثمّة نوع مالجّو ما فهمتوش...معناها تمشي لبلوغ متاع واحد بالذمّة باش تقلّو راني نكرهك و ما نهضّمكش و ما ذابيّا ما نراكش...عبارة مشيت شريت جريدة تكرهها و غصّبت على روحك باش تقراها و من بعّد خذيت الكار و مشيت إل دار الصّحافي و سبّيتو...هو لا محالة لهنا أسهل أمّا هذا ما يمنعش إلّي ما نفهمش علاش الدّوانة.... في الدّنيا كي تكره واحد لله في سبيل الله تلقاك ماذابيك ما تراش وجهو موش تتعرّضلو كل يوم باش تسبّو الحاصل ما فهمتش... بالله كان فيها برشا جو هكّا و حفّالي فسّرولي خلّي نتفرهدو معاكم
على خاطر إل تو ما نجّمت نكره هاش تي تي بي.إيندراشكون.بلوغسبوط.كوم...إنّجّم نكره عبد أمّا بلوغ هاذي تكنولوجيا صعيبة على مخّي... زيد على هذا شنيّة الآفاق المستقبليّة متاع علاقة عداوة إفتراضيّة...نعملو ميتاب في بطحا و نكسّرو جداقات بعضنا؟؟ نعطيو لبعضنا الإم إس إن و نكمّلو نسبّو بعضنا راس راس؟؟ ما فهمتش كان ثمّة حاجة بالله ضوّيونا
البوسط ما عندو حتّى علاقة بحكاية المسلمين برشا و المسلمين شويّة و إلّي موش مسلمين بالكل...بركا الفوفعة إلّي تحلّت خلّاتني نخمّم في الحكاية...تعرفوني عادة نموت ع الفوفعة أمّا الفوفعة هاذي مانّجّمش نشارك فيها على خاطر الدّين حاجة شخصيّة ما عندها حتّى علاقة بالشّأن العام... و ما نّجّمش نجي إنّاقش حتّى حد في معتقداتو حتّى كي يبدى يسبّلي في ديني....نسكن عند واحد سيخي و عندهم إحتفال بانتصارهم ع المسلمين مانيش باش نجي نقلّو بطّل باش تحترم دين أولاد حومتي...تي الحاصيلو الحكاية مصاتت مالمعاودة ...هاو شوفو شكون أكبر متضرّر ملّي قاعد يصير في النّقاش هذا...لا حزب الدّيك لا حزب الله المتضرّر الوحيد هو الدّين إلّي العباد الكل قاعدة تشولق فيه كان تخلّيوه حاجة شخصيّة و ما تبنيوش عليه سياسة و لا تحالفات و لا حملات حتّى حد ماهو باش يدور بساحتو حتّى النّاس إلّي في بالها اتدافع عليه عن حسن نيّة و هي تزيد تغرّق فيه.

15 commentaires:

HNANI a dit…

صباح الخير يا وجه الخير
ما سبزمك اتغيب باش ما تحرمناش من هالكلام الرزين ولّي فرهد علي هالصباح
أيا نهارك طيّب

3amrouch a dit…

يا دوعاجي
ماهيش حكاية احزاب المرة هاذي
هذا تفوريخ على قاعدة كبيرة
لحكاية ومافيها انو فمى شكون عدى لبارح و"هو مجهول" يدور على الناس ويحكيلهم في الحكاية
قال شنوة اسمع ياالي ما سمعتش راهو صار ووقع وراي لحكاية فيها وعلاها.
فمى عبادمن خير حتى ماتثبت حطت نص متاع واحد منشورفي موقع الاوان من غير ماتثبت في صحة لخبر
انا ما قلت شي قلت يا ناس ثبتو شوية كان فمى شكون جاءكم بخبر وهذي ابسط حاجة قبل ما تحط خبر تثبت منو صحيح ولا لا موش هكه سي دوعاجي؟؟
تتذكرش حكاية الي مات في جبنيانة وناس تكتب وجزيرة تحكي ومنبع مفمى شي ولاتش لعباد حاشمة وتعتذر؟
يعمل هكه هاجت لعباد تقليش متخبين في تركينة ولات ياالي بيك يالي عليك الخ الخ
شخصيا حطيت نص زادة لشخص يفند مزاعم المدعو وليد حمام وفقط
مانراش علاش ماتنجمش تم الامور بهدوء والنقاش يتم دون عصبية

عاشور الناجي a dit…

:))

لن أعلق على أصل الموضوع فقد كتبت عنه لكن أخشى يا دوعاجي أن تكون الصداقات و لحظات السعادة الإفتراضية وهمية

لكن العداء و الألم حقيقيان

ثمة من يعتقد و في صلب عقيدته أن من واجبه و من حقه أمرك بالمعروف كما يراه هو و من واجبه و حقه منعك عن المنكر كما يراه

فإن اعتبر ما تكتبه منكرا قام بسبك و اهانتك شخصيا ربماطهر مجتمع المدونات منك و من أمثالك


هؤلاء غارقون في مرض اسمه توهم امتلاك الحق

توهم أنهم يجاهدون و ينصرون الله و سينصرهم
منطق المرتزقة
و الغزو
و التجارة

الخيمة و الصحراء

تحياتي

Bel Malwene a dit…

الله يرحم ولديك يا دوعاجي في هالكلام ... راهي خرجت من خشومنا هالحكاية ... يا ناس سيبونا فكّو علينا ... الزّح الواحد طيرولو حتى نفحت التدوين ... سيبونا من حكاية الدين يهديكم ... راهي حكاية أكثر شخصية منها ما فماش !!! ... لا تنجم تسب و تسخط و لا تنجم تدافع و تعمل حملة لنصرة الدين... راهي حكاية 100 في 100 شخصية ... تعبد ربي و إلا تعبد حتى دبوزة قزوز بو ليترا ونص وإلا ما تعبد حتى شيء !!! اش مدخل العباد لخرى تقوم تحكيلهم على معتقداتك و تعمل في حملة نصرة وإلا تسب فيهم وإلا تسبلهم فالي يمنو بيه ... لا ينفعك و لا ينفعهم ... هيا سيبونا يرحم والديكم ... راهو فما حكايات أهم بياسر من هالخنار انجمو نحكيو فيهم من غير ما يوصلونا لهالحرب الأهلية ... و يزيدو يقدمو بينا ما يرجعوناش لتالي

Gouverneur de Normalland a dit…

الى الدوعاجي

أنا شخصيا عجبتني ياسر فكرة الميت اب في البطاحي و كل واحد عندوا الحق في سلسلة و سكينة و الا خنجر ...فكرة بالرسمي هايلة و يولي ميتين اب مش ميت اب

الى عماد الناجي عاشور

بالله نقص مالكذب عيني عينك ...

تقول
"ثمة من يعتقد و في صلب عقيدته أن من واجبه و من حقه أمرك بالمعروف كما يراه هو و من واجبه و حقه منعك عن المنكر كما يراه"ههه

هو الامر بالمعروف و النهي (النهي مش المنع ) عن المنكر وهذا في اطار نصح المؤمن لأخيه المؤمن و مش الزام( وقلت هنا أخيه ...يعني فما علاقة طيبة بيناتهم)

و أما غير المؤمن فمن شاء فليؤمن و من شاء فليكفر

تحياتي

عاشور الناجي a dit…

@gouverneur

باقي عقلية المؤامرة ؟

ما عليناش

أنا أولا ما كذبتش

و ثانيا لو كان سكت راك حجيت أقرى آخر فقرة هنا

http://exmouslem.blogspot.com/2008/06/blog-post_8410.html

Sosso a dit…

Ya dou3aji ya sadiqi wa7dik rak berrasmi aqwa 5abir fel 7azza we akbar 7akim blougousferi, tu te souviens de 7akim al aqzem ??

brastos a dit…

وحدك يا دوعاجي .. اما ظاهرلي من البوست هاذا باش تدخل لطمبك الفوفعه

:)

كلمة الفوفعه جديده عليّ .. شخت عليها :):)

Bachbouch a dit…

Ech 9awlek fil k3iba ta3li9 hetha illi jeni dernierement?

"koter el jahl idahhak barra ettakhef chwaya w zid raja3 belbahi w ija nakechna za3ma enta mnin tatla3 ????"

Elle n'a rien a part ca... Aucune idee de ce qu'elle parle, juste 7abbit tmeres sa liberte d'expression we tsibbna :)
C'etait une reponse a ce poste: http://blog.tunisien.org/?p=289#comments

3amrouch a dit…

شوف يا سي بلملوان ...عندك مدة تدخل في روحك وحد مجبدك وماجاء على حالك
ريض عيش خويا وخلينا بالقدر راهو عندي مدة نقدر فيك على خاطرك صاحب صحابي وصاحب ناس نحبهم برشة ويعزو عليا(كلندو،فري راس، ستوبر ولصة واسكيزا...)
مانيش باش نعاود كلامي مرة اخرى
ارجو ان تكون قد فهمتني

eddou3aji a dit…

@hnani
يا هناني يا غالية... وحدك...ربّي
يخلّيك لينا...تي أهوكا راي مع الجماعةالكل

@ 3amrouch
يا عمروش يا خويا ماهي الأعصاب تشنّجت من قبل عاد تولّي أيّ حكاية تضهر مشكلة...وسّعو بالكم و بدّلو السّاعة بساعة أخرى...أحكيلنا على شويّة جران كان ثمّة و للكعبة رب يحميها ههههه...أنا شخصيّا طفلة خرّجوها على حجاب و إلّا على خاطرها عريانة ما تجينيش غريبة...النّاس الكل تستغل في النفوذ متاعها من العسّاس و إنتي طالع.
@ belmalwene
ديجا الحكاية كارهها من قبل أنا و زيد هوني زدت كرهتها...هيّا تجي نعملو عركة إنتي دافع على دبّزة القزوز و أنا ندافع على أي دبّوزة أخرى ههههه و نحفّلوهاههههههه

@3achour
يا عاشور يا خويا تي شبيك متشائم....سعادة وهميّة و إلّا كحوليّة و إلّا إفتراضيّة وإلّا روحانيّة ماهي سعادة ههههههه...الكلّو باهي....الفايدة في الهنا...يا خويا أنقش على روحك كيف النّقشات متاع كي تبدى تحكي ع الدّين بالتّاريخ و غيرو و أخطانا من أسلوب الدّاعية الإسلامي و إلّا المبشّر المسيحي...عندك مواضيع حلوّة كيف ما تدخلش في الحروبات

@gouverneur
أهلا محافظ
ههههههه ميتين اب و اهوكه نفضّو المشاكل الكل بطريقة حضاريّة ههههه

@sosso:
الحزّة فونداشيون أمورها ماشية
الأيّامات و الفورماسيون متاعهم هايلة هههههه قلّي شكونو حكيم الأقزام؟؟ ما عرفتوش

@brastos
خاطي خوك يا براستوس ههههه بيناتهم هههههه هانا قاعدين ماحلانا ماحلانا

@bachbouch
أهلا بشبوش، إبداع هالكومونتار هههههه يا سر فتّقت مواهبها في حرّيّة التّبهبير ههههه عندها الحق كثر الجهل يضحّك هههه

Bachbouch a dit…

@3amrouch:
Rana w5ayen ya 5ouya 3amrouch... 3lech il ghoch?

weld houma 3arbi a dit…

يرحم فمّك يا دوعاجي .حتّانا هاذاكا ش قلت

Sosso a dit…

Ahoua 7akim al qazem ;-)
http://sanfouriyyet.blogspot.com/2008/06/pour-eddou3aji.html
Enjoy !

eddou3aji a dit…

@ weld houma 3arbi:
عيّشك يا خويا، القلب ع القلب، عنّا
برشا ما قرينالكش. تي فينك هالغيبة؟؟

@sosso : 9taltni bedho7k :)))