vendredi 5 février 2010

يمشي و يجي

كان ثمّة شكون مازّال عندو الجهد و وسع البال و القابليّة للتّمرميد و برشا تفاؤل باش يخنتب يكمّل يخنتب أنا الأيّامات و من بعّد مديدة ماغير حاسوب / حلوّة حاسوب هاذي/ طارت النّفحة و إكتشفت إلّي الدّنيا ماغير تخنتيب و ما غير فايسبوك ماهيش دونيّة حتّى واحد يقول كان يزيد ينحّي التّاليفون و يرتاح مالجّوجمة.
حبّيت نقول كليمتين ماغير مقدّمات و ماغير تنظيم جوست هكّاكة حاجات جاو في مخّي و أنا في الخلا مابين الغابة و المتجمّد الشّمالي هاذي وقتها أوّل مرّة قرّاوهالي درت للّي بحذايا قتلو ديما يقرّيو فينا في حاجات ما تصلح لا للدّنيا لا للدّين شكون المهبول إلّي باش يمشي غادي؟/ هذا في فترة كانت أبعد بلاصة موجودة في مخّي تستحق تمشيلها هي ماناج محمد الخامس/ برّا يا زمان و إيجا يا زمان هاني غادي.
عاد ماغير حتّى ربط و لا نظام :

علاش كي يبدى في يدّك فرد النّاس الكل تبدى متربّية

ما ثمّاش حاجات مستحيلة ثمّة كان حاجات غالية يا فقراء

الجيل المولود في السبعينات في تونس إستنبط مفهوم جديد إنّجّمو نصدّروه للعالم الكل في الظروف المتأزّمة هاذي و هو مفهوم الماعنباليزم مثلا تجي تشوف تلقى المنظومة الأخلاقيّة متاع الجيل هذا فلكسيبل ياسر و تحترم كان مصالحو الشّخصيّة الضّيّقة و الضّيّقة جدّا برشا عالإخّر الوطنيّة متاعو شبه منعدمة إلّا في حالة وجود منافع مرتقبة ، المبادئ متاعو تتلخّص في يلزمني تلفزة بلازما في بيت الصّالة و ما نحبّش نتمرمد في الكيران و البرنامج متاعو يتمثّل في تي نورمال تو تسلك
.
شبيها المنڤالة كي تبدا هابطة في النص ساعة لولة مثلا مالتّسعة للتّسعة و نص تبدا تجري لف لف و كي تبدا طالعة مالتسعة و نص للعشرة ما توصل كان بالسّيف

أنا إنّجّم نقرا البلوغ متاع طارق من غير بروكسي يا زواولة البلوغ متاع طارق من أوّل البلوغات إلّي قريتها و قليل قليل في حياتي باش لقيت واحد أنا و إيّاه ما نخمّموش كيف كيف جملة وحدة وهذاكة علاش ديما نقرالو و باش نقعد نقرالو و بما أنّو عمّار ما عندو ما ينجّم يعمل في الحالة هاذي فإنّي شاهي نغنّيلو غناية متاع ستاد طلعها جيل الماعنباليزم و نغنّيها كان إل عمّار على خاطرها ما هيش محترمة و فيها ياسر ماتشيزم و فيها كلمتين/هذاكة علاش تعبّر برشا على إيديولوجيّة الماعنباليزم/ و هي تبدا ب جيبلو و توفى بوحدة مالعايلة و كان باش يقول عمّار إلّي ممنوع باش نحكي هكّة نعاود نقلّو جيبلو.... و كان يقول ياسر قلة تربية نعاود نقلّو جيبلو .... وكان باش يقول مستواك ياسر طايح فإنّو نقلّو
شكون عرفها الغناية؟؟
أحسن وسيلة باش تعدّي الوقت في الطّيّارة كي تبدا لحيتك هايجة تقوم كلّ درجين للتّواليت و إنتي عاقدها و تتفرّج في الريياكسيون متاع العباد
شكونهم جنود الخفاء و كي تقول عليهم يقعد إسمهم جنود الخفاء ؟
مازّال ثمّة شكون يتفرّج في الرّاي أونو؟؟ و كان ثمّة شكون يتفرّج بالله مازّالو يعدّيو في سوتّو فوتشي ؟؟

كي تبدى مولود في بلاد تنجّم تدخل فيها للحبس و إنتي ما عملت شي علاش ما تعملش حاجات تدخّل للحبس و تنجّم تصوّر فيها شويّة فلوس بما أنّو الرّيسك موجود هكّة و إلّا هكّة
على ذكر الحبس.... صحيح الحبس للرّجال أمّا المعاودة موش مليح / بدّلتها على خاطر برشا ولّى كلام خايب/
ما عاد نصدّق حتّى حد عندو فلوس و ما سرقشي وإلّا ما ورثشي
مرقة البطاطا أكثر ماكلة في العالم مافيها حتّى خيال و حتّى مجهود إذا مرتك و إلّا صاحبتك طيّبتلك مرقة بطاطا أعرفها راهي بدات تفدّ منّك و مالكوجينة...يرحم من سمّاها مرقة حطّاطة
هيّا يزّي و نقترح تبدّلو الإسم من بلوغوسفار تردّوه حي التّضامن

6 commentaires:

Moghrama a dit…

Excellent billet com dab Dou3aji, je trouve vraiment un plaisir à te lire!!Beaucoup de questions et de constations intéressantes en effet
P.S:3andi modda wené chedda fi mar9et elbatata:))))

ارابيكا a dit…

ههههههههههههههههههههههههههههههههه ما ابلدك وما ابلدك ونزيدك وحده ما ابلدك

ferrrrr a dit…

الدوعا، مرقة البطاطا راك غالط معاها، هي على الاقل لزتك بش تكتب عليها حويجة، معناها عندها حضور سخسية، التدوينة متاعك زادا


ما عادشي تهرب من حي التضامن وحل مشكلة الحاسوب، حلوة كلمة حاسوب

eddou3aji a dit…

@ moghrama :
:))) et est ce que le message de la mar9et batata a passe au pres de la personne concernee ??? :))

@ arabika :
na3ref mabladni mabladni mabladni :))
@ ferrrrr :
:) hak tla3t ma te7melch fi mar9et el batata :)) hia mouch 5ayeba barka mta3 tbalfit :))

brastos a dit…

تي وينك يا الدوعا :) :)
ضحّكتني بالدّموع على حكاية مرقة البطاطا
:):):):)
ايّه ماله حاسوبك و كمنجتك و حي التضامن بلاصه
هههه

Anonymous a dit…

ya si dou3eji, hani nestena fi appel, e7chem 3la rou7ek :)
w maxelt in3awed notlbek