vendredi 27 janvier 2012

علاه مشرولة؟

تاريخيًّا الشّعب التّونسي عمرو ما إمّن بالدّيموقراطيّة و المستعمرين عمرهم ما حبّو يعطيوهالو بالحق. هذايا السّاس إلّي من وقت خير الدّين حاولنا نبنيو بيه أشكال متاع حكم. على خاطر من وقتها و العباد فهمتها /و لو موش برشا/ إلّي كمشة قبايل و باي و محلّة و كمشة مشايخ ماهيش طريقة متاع حكم ناجعة و تجيب نتيجة. عاد لو كان هذا هو السّاس ما نبهتوش كان أي طريقة متاع حكم نجربوها حتّى لليوم ما تمشيش و تطلع موش هي.
الحكاية متاع اليوم هي نورمالمون تكتب عليها مقال سيريو و الحقيقة لازم واحد يعملها / واحد موش معناها أنا... على خاطرني بخيل و لا نحب نكتب بالعربي متاع الأخبار لا بالسّوري وزيد بالأخصّ مانحبّش نلوّج عالمراجع و نقعد نكتب فيهم، أمّا راهم موجودين للّي يحب يتعمّق في الموضوع وزيد إلّي أهمّ من هذا الكلّو كان باش نكتب بالرّسمي البلادة و الرّكاكة إلّي نسيّب فيها توّا بين القوسين هاذم لشكون باش نخلّيها... أمّا سيريوزمون الموضوع هذا موجود و كتبو فيها مفكّرين عرب و موش عرب أمّا نظرا لأهمّيتو في الوضع الرّاهن فإنّي قرّرت باش نعطي رايي على ما ياتي / هاني سكّرت القوس أمّا مجال البلادة و الرّكاكة ينجّم يتواصل حتّى آخر النّصّ... عاد نحب نخمّم مع إلّي خمّمو قبلي و قاعدين يخمّمو توّا في حكاية تفكيرنا و سلوكنا السّياسي كشعب منين جاي و شنيّة العوامل و الظّروف إلّي تخلّيه مشرول إلهالدّرجة... و العام الإخّر عطانا برشا مادّة /حاشا من يعدّي/ صالحة للنّظر و التحقيق كيف ما قال كلّي عندو صنبة قدّام الكنيسيّة / أضرب عندك آهو موش المراجع بركة خوذ حتّى الأدريسة/ هالسّلوك و التّفكير السّياسي كي نثبّتو في منابعو و الأحداث و الظروف إلّي جابتّو يوحيلي أنّو التّحوّل الدّيموقراطي ولّات حكاية مستعجلة و ضروريّة و أنّو الوفاق الوطني و المصلحة العليا للوطن و الميثاق بين الأحزاب و حتّى أقوى دستور في العالم ما يمنعش مواصلة تكسير كرايم النظام الدّيموقراطي كيما قبل طالما / وايوا على طالما... نحسّ في روحي كي المساكني كونتر المغرب/ طالما أغلبيّة الشّعب التّونسي ما تمّنّش بالدّيموقراطيّة و عدم الإيمان هذا يرجع إلى درجة كبيرة للمستعمرين إلّي بدرجات متفاتة عمرهم ما إمّنو إلّي الدّيموقراطيّة ممكنة مع الشّعب هذا و إلى نخب الإستقلال و إلّي من بعّدها إلّي كمّلت عطاتو تبرير لقلّة إهتمامو بالشّأن العام و المصلحة العامّة و خلّاتو يزيد يتيقّن إلّي هو عندو الحق كي يحتقر الأنظمة بجميع أنواعها و يحطّها الكل في فرد حكّة و يواصل في عدم ثيقتو في السّلط الكل حتّى لو كانت ديموقراطيّة.
هيّا آهي كيما تقول إنتي مقدّمة ماهو زعام نحنا في الطّاولة و الكراسي الباقي نكمّلوه كي يسهّل ربّي

5 commentaires:

Sosso a dit…

ayya kammel y3achek enti sraft sraft 5ater ta7liliek 7lou wpertient (behiya ta7lil) zindna 5aterni j'ai besoin de chkoun ysammi elli n7ess fih (mani 5ouk !)

eddou3aji a dit…

7adher ya bacha :) fi a9reb wa9t :)

Anonyme a dit…
Ce commentaire a été supprimé par un administrateur du blog.
Sosso a dit…

Quelle courage monsieur l'anonyme en tout cas aucun besoin de nous dire qui est respectable et qui l'est pas pour connaître BTB on peut lire directement son blog et se faire notre propre opinion men ghir wissaya wsa77it 3al sabba

eddou3aji a dit…

يا أنونيم حكايتك ما عندها حتّى علاقة بالتّدوينة اللّهم إلّي هي مشرولة و الأسماء و الحياة الشّخصيّة متاع المدوّنين ما تعنينيش و لذا كان عندك مشكلة مع مدون برّا أحكي معاه و قيلني من حكاياتك الفارغة