samedi 17 mars 2012

الحمد لله

طرف الدّين إلّي نكسابو **** و لو كان ماهوشي برشا
بعيد عالنفاق واحزابو **** لربّي خالص ما فيه غشّة
يجيرني ماللّهماڤ و احبابو **** يبيعو في السما باللقشة
"ثمنا قليلا" بيها جابو**** كرسي و حريم و ركشة
و زادو باعو الوطن و ترابو ****لأمير كبيرة طحشه
ماذابيهم يبدّلو الدرابو ****و مازالو يرميو في الدهشة


في مافات قلنا كليمة **** تفلڤيط عالحالة القحشة
في عهد التنمية المستديمة**** مع العميان كنّا عمشة
ماهيشي عملة عظيمة **** و إلّي خير منّا بالكمشة
يجيك اليوم البلا و طلّابو**** و يزيدو يرميو الدهشة


لا عملنا حوبارة و افلام**** لا عالبيّوعة واحد شرشا
لا عملنا خرجة و اعلام ****لا سناجق و أمور مفرفشة
لا طلبنا منصب لا وسام ****لا مشينا شاركنا في ورشة
يجيوك مفرخ الفايسبوك و كلابو**** و اعرافهم رامين الدهشة

لا نتبع لا نسمع آش قالو ****عالدوني وذني طرشة
لا طالب شهرة لا والو ****لاني نستنّى في فرشة
صانع جوّي كي الكانالو**** نسرح نلقى ما نتعشّى
نخلّيلكم دعا الشر و دولابو**** ماغير ما ترميو الدهشة
هيا صلي عالنّبي و اصحابو **** نعرفك عينك ياسر حرشة

10 commentaires:

Bachbouch a dit…

وحدك في النقش يا ددو *** و ستليك ما كيفو برشة
كنا بالصوابع نتعدو *** و ربي يحفضها عشرة

eddou3aji a dit…

هههههه هاهي ستيلك باهي

bacchus a dit…

رائعة..برافو

ولد الرجال a dit…

هههههههههههه

بعيد عالنفاق واحزابو **** لربّي خالص ما فيه غشّة

eddou3aji a dit…

Merci bacchus :)

eddou3aji a dit…

هههههههه مرحباً بيك يا ولد الرجال

chipie chpipa a dit…

extra BRAVO

Squizocube a dit…

و زادو باعو الوطن و ترابو ****لأمير كبيرة طحشه
ماذابيهم يبدّلو الدرابو ****و مازالو يرميو في الدهشة

+1

eddou3aji a dit…

Merci :)

eddou3aji a dit…

Merci :)