lundi 31 mars 2008

شريان شبوك

اليوم في الصّباح قمت نحب نعمل مشكل شاري الشّبوك...الله غالب ساعات واحد يقوم لا طاح لا دزّوه يحبّ يسبّ و يلعن و يبدى يلوّج في واحد و إلّا حاجة ينحَيلو جدَ والدين أصلو باش يتفرهد.

تي أكهو عاد أشكون...القمّة العربيّة؟...تي برّا باللّه شوف حاجة أخرى ألعب بيها....قالّو قمّة عربيّة..آش فيها ما يتسبّ؟؟؟ تي أهوكة سعدها مكبوب من عند ربّي...يرزيكم فيها هي والقمّة المغاربيّة و القمّة الإفريقيّة...و قمّة دول عدم الإنحياز زادة...تي في بلاصة كلّ واحد يسخّف وحدو يقومو يلمّو بعضهم و يسخّفو مع بعضهم...نقومشي نسبّ فيهم يولّيو يبكيو و ترصّيلي نرضّي فيهم و راكم باهين و لغتكم العربيّة سليمة و ثريّة و زدتو في الخمسين سنة إلّي تعدّاو أثريتوها باستنباطكم لمعاني جديدة في مواضيع الشّكر و الإعتذار و التّنديد ...آه في الحكايات هذي تبارك الله عليكم لا محالة هو في الشّارع عنّا المعاني هوما بيدهم نسمّيوهم التّرهدين و التّبهنيس و التّخرنين أمّا ميسالش قد ما تبدى اللّوغة ثريّة قد ما يحلى ضربانها...الحاصيلو ما فيكم ما يتسبّ...
أنا حسب رايي إلّي موش متواضع بالكل كان تردّوها كيف قمّة الفرنكوفونيّة خير...تولّيو تحكيو كان عاللّوغة و الثّقافة وتسيّب عليكم مالهداري الفارغة متاع المصير المشترك و باش نحرّرو فلسطين...تي ما فتّقها من بعضها كان انتوما فلسطين...و انتوما أي فرخ دوب ما يشمّ صنانو يولّي يحبّ يحرّرها ...حتّى كانو مولود في نواق الشّطّ يولّي يعرف القدس زنقة زنقة...و يبدى يستنبط في الحلول تقولش عليه يعرف المشاكل متاع غزّة الكل و ما عندوش مشاكل في موريطانيا....كلّ عشرة سنين تطلعولهم بفكرة الفلسطينيّين باش تزيدو تبيلكوهم...آهو الوحدة بين مصر و سوريا هي إلّي باش تريقللكم أموركم...آهو اليسار الثّوري هو الحلّ....آهو صدّام حسين هو إلّي باش يفوّر إسرائيل... آهو إيجاو تو نكلّمولكم أمريكيا و إسرائيل...آهو الإسلام السّنّي هو الحلّ...لا هيّا تره جرّبو الشّيعي....تي كان جاو أفكاركم
باهين راهم مشاو في موريطانيا...و إلّا راهو فيكم واحد مشارك في القمم متاع النّاس الواصلة كيما الجي 7 و إلّا 9 ....
باهي آشكون آخر يتسبّ...خلّيني نسبّ في بلادي خير لا يعدّيوني في البارابول و يكتبو ماللّوطة اللّيبيرالي البيّوع...قالّك الهويّة التّونسيّة
يالندرا قرطاجينيّة و إلّا عربيّة إسلاميّة؟؟؟؟ هاذوما السّؤالات متاع شعب مستعمر على قاعدة صحيحة....يرزيكم فيهم الزّوز...قلتها قبيلة هاذي أمّا في الإعادة إفادة..هو لا محالة ثمّة وحدة ترزينا فيها عندها مدّة والأخرى آهي تطلّع في الرّوح عندها زوز و إلّا ثلاثة قرون....توّا ثمّة واحد عندو 5000 سنة حضارة يجي باش يحدّد هويّتو يقوم يختار بين حضارة ماتت و شبعت موت و بين كلمتين ينجّمو يعنيو مليون حاجة......علاش السّؤال معمول هكّا؟ زعمة بالرّسمي هاذوكم هوما الحاجتين إلَي لقيناهم باش نحدّدو هالهويّة...و علاش الزّوز الأخّرين مربوطين ببعضهم...باش إلّي ما خطفش مع جماعة العروبة يخطف مع جماعة الإسلام؟؟...بالله تصوّر تهبط للشّارع تسإل: خويا باللّه شنيّة هويّتك قرطاجينيّة و إلّا عربيّة إسلاميّة؟؟ السّاعة شطر العباد تسمع هويّة تﭭطّع . ...يقلّك رافل و إلّا كمبيوتر....و شكون باش يقلّك مانيش عربي و مسلم...حاجة واضحة و ما تستحقّش طاولة وكراسي...أنا هويّتي قرطاجينيّة بالله كيفاش؟؟ من أنا ناحية؟؟ مالبو؟؟ مالأمّ؟ مالعمّة؟؟ و إلّا أنا هويّتي كتونسي عربيّة مسلمة؟؟ عربيّة مسلمة عربيّة اللّوغة؟ عربيّة الحضارة؟ عربيّة العرق؟ مسلمة؟؟ الدّين؟؟ مسلمة الحضارة؟؟
توّا هاذي تشكشيكة بوها كلب...زيدها العولمة و ردّة الفعل متاع شعب عقّدو الإستعمار بما فيهم الإستعمار العربي...إيه ماهو حتّى كان أحنا
الكلّ عرب البلاد ما كانتش فارغة كي جينا... ما فيها باس كان نقولو ساعة ساعة راهو ثمّة أمازيغ زادة و مازّالو ثمّة...و ثمّة من العباد إلّي باش تتقلّق من الكلام هذا أصلها أمازيغي و إلّا عندها عرق أمازيغي و عددهم أكثر ملّي يتصوّرو...و إلّا هاك المثل متاع ما ينكر في أصلو كان الكلب نتذكّروه كان كيف واحد يسبّ العرب... هاذي حكاية العرق العربي حسب رايي إلّي موش متواضع بلكل..إنّحّيوها عالدّخلة على خاطر ما تنجّمش تكون الهويّة متاع تونس مبنيّة على العروبة كدم و عرق و إلّي عندو شكّ يمشي يعمل تاست أ دي إن....باهي اللّوغة...آش معناها هويّتي نربطها بلوغة توّا الأغلبيّة تحكي بالدّارجة و الدّارجة فيها لهجات و أناهي العربيّة إلّي تحكيو عليها متاع الجزيرة العربيّة و إلّا متاع مصر...و كيفاش نعملو مع التّوانسة البكاكش...باهي الهويّة من ناحية الرّموز الثّقافيّة و الحضارة و اللّا وعي الثّقافي و غيرو مالتّروميز....إيه تروميز...على خاطر إلّي يحبّ يحكي ع الحكايات هاذم ما يجيش يقارن العروبة والإسلام في مخّ التّونسي إب آثار قرطاج... قارنو بتأثير المتوسّط و قارن بالمعتقدات الوثنيّة إلّي مازالت موجودة إل توّا و اليهوديّة و المسيحيّة...أمّا جوجمة كان باش تفركس على الكوازي هاذوما في هويّة عندها 5000 سنة .... تكويرة صغيرة بين قرطاج و العروبة و الإسلام أسهل ببرشا....الإسلام و العروبة مكوّن من مكوّنات الهويّة التّونسيّة أمّا ماهوش أساسي...على خاطر الهويّة التّونسيّة تتكوّن من عشرة ملاين نظرة إل تونس كلّ واحد عندو تونس متاعو و إلّي باش يبدى يخرم و يحبّ يردّها على كيفو باش يتعب ياسر ....على خاطر تعبو قبلو ياسر و ما فهمو شي من جماعة علّيسة لجماعة عقبة لين قالو
إذا كنت في المغرب**** فلا تستغرب
و إذا رأيت الحمار يطير**** فقل إنّ الله على كل شيء قدير

7 commentaires:

Der Kameltreiber, Ladeeni ولد الصحرا a dit…

كالعاة, خدمة مقدودة

بالفعل مسألة الهوية التونسية مسألة معقدة جدا و لا يمكن خزلها في كلمة أو اثنتين


بالنسبة لجماهلة اللي يحكو على اللوغة: إمالا الأمريكان و الكنديين إنجليز على الحساب هذا, و و النمساويين و السويسريين ألمان؟

HNANI a dit…

صباح الخير, إيييه فرّغتلي قلبي بكتيبة هالمقال إلّي مانجمش نكتب كيفو. يرحم والديك في هالصباح..وزيد فمّة حاجة أخري عندنا التوانسة كل جماعةإتقلّك إلّي هي عندها سجرة من بقعة: الجزيرة العربية، الأتراك ،الشرق، ويبداو يحكيو علي أساس هوما أولاد البلاد و كيف إتقوللهم إلّي إنت بربري إولّيو يقحرولك و هالحكاية هاذي عندها أبعاد كبيرة ...

و للحديث بقية

eddou3aji a dit…

@ ولد الصّحرا :
يعيّش خويا يا ولد الصّحرا، علاش ما نّجموش نسيّبو كل واحد على روحو يشوفها كيما يحبّ، يحبّوا بالسّيف يرجّعوها تابعة الباب العالي بالرّغم إلّي هو ما ثمّاش باب عالي توّا :)))

@ hnani:
يا هناني ربّي يفضّلك :)) إنت تقول ما خير من هكّا ببرشا...مرحبا بالشّجر الكلّ ....و الحقّار يموت ذليل
:)

eddou3aji a dit…

@ arabika:
شاهي نقلّك إلّي على خاطرك تو نعمل عشرة عركات في النّهار:))) أمّا دراكيفاش....ملّي لقيت الكومنتار هذا ما عادش عيني في شريان الشبوك
:)))

Anonyme a dit…

ما احلى ديرب الصغر توحشتني

alawasem a dit…

شكرا

alawasem a dit…

احصل الان على مظلات متحركة للسيارات باقل الاسعار فقط تعرف على العديد من تصميمات القرميد الازرق المستخدم فى كثير من المبانى مع توافر القرميد الاحمر بمواد عالية الجودة كما نعمل على تصميم بيوت شعر ملكية تواصل معنا الان لتتعرف على العديد من الخدمات