mercredi 12 mars 2008

الحزّة الجّوينيّة...على أسس علميّة

نبداو بتعريف المصطلحات...إلّي هي أوّل حاجة في أيّ حكاية "جدّيّة"...باش العباد تعرفك فاش قاعد تحكي...و ما تستنتجش هي آش تحب ... اللّهمّ إلّا إذا نحبّوا نخلّيوهم على عماهم باش مبعّد نقولو لا موش هذا إلّي قصدتو و إنتوما ما فهمتونيش

تعريف المصطلحات : الحزّة الجّوينيّة وتعرف أيضا في بعض الدّراسات الجادّة بالحزّة الباجيّة وهي نوع من الحزّة (نوع من التّدخّلات
لفضّ النّزاعات) الغير المحايدة معناها تبدى تقول يا جماعة صليو على النّبيّ و راكم وخيّان وتبدى تضرب في واحد من أطراف النّزاع بالبونية و تمدّ للطّرف الآخر بطرا (نوع من الأسلحة البيضاء) و إلّا لام (شفرة حادّة
الحزّة الجّوينيّة ممارسة سياسيّة معروفة في الأحياء الشعبيّة و في العلاقات الدّوليّة...عاد موضوع السّاعة كيفيّة إستغلال الحزّة الجوينيّة في النقاشات...توّا كيف تبدى المواطنين العاديّين يحكيوا ع العلماندراشنيّة... ونجي نعمل تدخّل مهما كانت فكرتي و نعطيه صبغة علميّة ( و إلّا بورشادة و إلّا الواعر)...حاجة هايلة ياسر... ونحنا في حالة التّمهميش متاعنا مستحقّين للأفكار الكلّ..أمّا إذا الحكاية علميّة معناها محايدة وموضوعيّة على قدرالإمكان، تبدى من نوع الحزّة الجّوينيّة ماذا بينا إنّحّيوا منها الصّبغة العلميّة و نخرّجوها كرأي متاع مواطن عاديّ...وتولّي معناها نقاش آراء...على خاطر التّنظير في العلوم السّياسيّة (و في كلّ العلوم الإنسانيّة) أصلاً فيه إشكاليّة متاع موضوعيّة...و هذا موضوع ساهل أمّا يتقال بلوغة صعيبة هكّا باش زعمة إنتي نعملو شويّة إستعراض عضلات و نبرّروا السّنوات إلّي هرّينا فيهم سراولنا على مقاعد الدّراسة...هو معناها التّنظير في العلوم الإنسانيّة فيه مشكلة مربوطة بيه تقول إنتي متاع محايدة...خلّي عاد كيف تبدى الحكاية على الدّين و على العلمانيّة في تونس...و تبدى الحكاية سخونة و فيها أبعاد سياسيّة مصيريّة و مستعجلة...عاد إلّي يجي يقلّي صلّيو ع النّبي و راكم وخيّان و راهم ماهمش بهايم ياسر و يلزمكم تقراوا حساب الأوضاع في المنطقة و تعرفوا إلّي أحنا ديننا موش كيف الأديان الأخرين...و يقلّي هانا نتناااا.....ااا.....قشوا...نقلّوا هذا تعريف الحزّة الجوينيّة
ما نتصوّرش إلّي الموضوع فيه سوء نيّة...و أطراف النّقاش تعمل في السّياسة...أمّا هاذي بيت صابون و الزّلق فيها برشا...و كلّ واحد يلزمو يكون مسؤول على الكلام إلّي يقول فيه...و ما يجيش يكبّ سعد واحد من المتنازلين و يقلّوا قاعد نعمل في تحليل سياسي...يا خويا هو موضوع متاع مشروع مجتمع و مشروع دولة و تجي تقول كيفاش آرائك السّياسيّة تأثّر ع النّقاش...بالطّبيعة...واحد ليبرال (ما شبّها الكلمة بالفرانسي و إلّا بالأنقليزية تذكّرك بالحرّيّة و المبادرة الفرديّة و ما أخيبها بالعربي تذكّرك بالعمالة و الخيانة) باش يحامي على الحرّيّة الفرديّة و بالتّالي العلمابليّة...واحد إشتراكي ( كيف كيف بالسّوري تفكّرك بالمساواة في الحظوظ و بالعربي في التّعاضديّات) باش يحامي على الدّولة و دورها المحايد في المجال الدّيني و بالتّالي على العلماهيّة...واحد محافظ (هاذي بالعكس ماخيبها بالسّوري تذكّرك بالتّراجع على المكتسبات و ماحلاها بالعربي تذكّرك بالعادات و التّقاليد) باش يحامي على الخصوصيّات متاع المجتمع و بالتّالي باش يكون ضد العلكانيّة...إلخ...إلخ...و واحد محلّل سياسي يعمل تحليل للّي قاعد يصير ماغير يبدى ينظّر و يعطي في أعداد للعباد...معناها يلاحظ...
نتناقشوا أمّا النّقاش ما بين واحد يقلّك على أفكارو و برنامجو و واحد مايقلّكش على حتّى شي وواحد يقلّك قاعد نحلّل يضهرلي غيرعادل...معناها واحد يعمل في السّياسة ومتحمّل مسؤوليّتو و واحد يعمل في السّياسة و موش متحمّل مسؤوليّتو و واحد يعمل في السّياسة و يقلّك قاعد نحلّل....
هو أنا قلت ما نتصوّرش إلّي ثمّة سوء نيّة وبلحق المحلّل يحب يحلّل أمّا، اللّه غالب الموضوعيّة تحضرو تغيب، و المناقش إلّي متحمّل مسؤوليّتو يعطي في رأيو السّياسي كمواطن يعبّر على رؤيتو للمجتمع و الدّولة، والمناقش إلّي موش متحمّل مسؤوليّتو كيف كيف يعبّر على رؤيتو أمّا مسكين رؤيتو مازّالت ماهيش واضحة و ما ثمّة حتّى قائد رأي محترم نظّرلها إلى حد الآن....
على خاطر كان ثمّة شكون في بالو إلّي هو قاعد يعمل في البوليتيك لهنا ...سامحني فيه قاعد يحرث في البحر
هيّا سيدي آهو حمّه غنّى:)...بالرّغم إلّي حمّه يؤمن، في الحكايات هاذي و في الحكايات هاذي بركا، بالقاعدة القمقومة إلّي تقول
إذا لقيت أعمى زيد كِبُّو........ماكش باش تكون أرحِم مِنْ رَبُّو

12 commentaires:

citoyen a dit…

ذكرني هذا المقال بالتحليل المضوعي الذي قام به الدكتور المختص في الشؤون العربيةحول جمعية أطلقت عن نفسها جمعية الدفاع عن اللائكية فقال أنهم جماعة يعرفهم يريدون السياسة،بالطبع فبما أنه يعرفهم فلا يمكن أتهامه بمحاكم التفتيش.ثم نعت جماعة الحضارة بكلية الآداب بأنهم يكدسون المقالات الصفراء وبانهم دخلاء .وقد أفتى سابقا بان الديمقراطية لم يحن وقتها ولا يمكن الحديث عنها وفيما يظهر أنه حان وقتها لكن بدون العلمانية علما أنه كان قد آخذ عن عبد الوهاب المدب ـ الذي قال عنه الحقيقة لم أشعر بأنني إزاء أكاديمي يستحق الإهتمام ضمن الجدال الجاري بين المختصين ـ بإمكانية اللأئكية بدون ديمقراطية .فيما يظهر أنه حان وقت الديمقراطية أما العلمانية سوف لن نمرلها إلا عبر مقاصد الشريعة عند الشاطبي وذلك بعد محاكمة بورقيبة وإعادة الاعتبار لجامع الزيتونة ليتخرج منه أناس قادرون على القيام بمهمة الإصلاح الديني

eddou3aji a dit…

@ citoyen :
دكتور هايل هذا...يرحم من قرّى و ورّى...إلّي ينرفز هو الطّريقة متاع هيّا نتناقشو أمّا راهو عندي الجواب...إذا الجّماعة إلّي يناقش فيهم...واحد يعمل في السّياسة و واحد دخيل و واحد لا يستحق الإهتمام...نخلّيوه يناقش وحدو و إلّا نجيبولو واحد من برّه يناقشو...كانت عنّا كليبات البترودولار و شيوخ البترودولار و إستثمارات البترودولار و توّا آهم جاو دكاترة البترودولار

M.o.u.l.i.n a dit…

التدوينة هاذي هيّا بيدها حزّة جوينيّة

على خاطر حتّى انتي زادا قاعد "تحلّل" في طاهرة الحزّة الجوينيّة
:)

eddou3aji a dit…

هههههه...صحيح... أهوكا إنشاللّه تكون التّدوينة حافظت على القيمة العلميّة متاعها...ناوي ننشرها في مجلّة مختصّة في الحزّة :))... الموضوعيّة تحضر و تغيب :))

eddou3aji a dit…

@ arabika

تأثير العولمة على الحزّة الجّوينيّة
:
دراسة تجريبيّة
باش نحاول نبعثها إل جوورنال أوف أنترناسيونال حزّة :)

eddou3aji a dit…

@arabika

تو نكتبولو حاجة فيها الرّاي و الرّاي
الآخر :)

hnani a dit…

ههههههههه حلوّة برشا ، أعملت عليها كيف و زيد إتعلّمت مصطلحات جديدة، و فقت بالفرق متاع الكلمات وقت ما تتفال بالعربي و بالسوري . و حـّي المثل ما تلقاش حتي في كتاب الهادي البالغ.

Sosso a dit…

Pourquoi ne pas organise un colloque international sur la 7azza jouiniyya et faire participer les ténors de la 7azza dans le cadre des activités de la 7azza studies foundation, la même fondation qui édite le très sérieux 7azza studies journal. (ton article pourra y être publié et il sera traduit en anglais histoire de faire profiter le plus de chercheurs du domaine;-)

eddou3aji a dit…

@ hnani: هههه...هيّا باهي كيف حصلت المنفعة...و إن شااللّه نولّيو إلكلّنا نحكيو مع بعضنا بلوغة نفهموها...ع الأقلّ كيف واحد يبدى يكبّنّا في سعدنا نفيقوا بيه...ربّي يفضّلك يا هناني


@Sosso: Très bonne idée Sosso :)) et s'il te plait si tu as un tuyeau sur des subventions de hazza foundation, dis moi..Mani
5ouk :))

Sosso a dit…

أخلّيلك قصيّ و عدي والله أكبر
;-)
Dès que je recevrai la moindre info sur les bourses et les aides allouées aux jeunes chercheurs de la 7SF je te tiendrai au courant.

eddou3aji a dit…

ناقصين كان قصي وعدي نحنا تو :))

7sf :))

Tunisien a dit…

Winek y adou3aji?
Ya khouya twe7achnek fi blogna! Tol 3lina! :)