jeudi 10 avril 2008

فكرة لتونس/ أفكار أمنيّة

المرّة هذي موش أفكار فكرة واحدة... بالله العدد متاع رجال الأمن تنجّموشي تنقّصو فيه... علاش في كل رونبوان عنّا بوليس و إلّا زوز... إيه و بالرّسمي عدد الرّونبوانات بالله زادة كان تنجّمو تنقّصوا فيهم
كان تعجبكم فكرتي بالله خلّيونّا الجّماعة إلّي عندهم نجمة و إنت طالع و ردّوهم يحوّسو الكل بكراهب... تي شنوّة بوليس واقف في رونبوان و على ساقيه ؟؟ فاش يعمل؟؟ و كانكم على الخبزة إلّي باش تنحّيوهالو ما تخافوش عليهم... حسب إلّي ريتو الجّماعة ينطّرو الفرنك مالحيط... عندهم حسّ إقتصادي مرهف ياسر... تو يتصرّفو في مشروع متاع مطبعة لليوميّات و إلّا أيّ حاجة مثلا مطعم سرفيس أو فولون
ـ بالله عيّش خويا كسكروت و قازوزة
ـ تحب معاهم يوميّة الزّوز إب دينار
ـ لا شكرًا
ـ إمّالا دينار و خمسة ميا... واصل للزّميل في الشّبّاك الثّاني و راكي ع اليمين....إلّي مبعدو
باللّه تصوّر يولّي عندك كان جماعة نجمة وإنت طالع تولّي مدلّلهم و يخلصو مليح و إلّي يجي يمدّلو خمسة دينارات في وسط البرمي يضربو بيهم... و زيد بما أنّهم شويّا ما عادش يهمّهم فيك عندك بطاقة تعريف و إلّا لا و إلّا فين ماشي.... و يتلهاو بالسّرّاق الحقّانين....صحيح الكاسة متاع الدّولة باش تتضرّر من قلّة الخطايا أمّا انّجّمو نغلّيو في الخطايا... يا سيدي إلّي يحرق الضّو خطيّة اب خمسة ميات دينار...يولّي واحد قبل ما يحرق يخمّم عشرة مرّات...خاصّة أنّو السّيّد إلّي باش يوقّفو موش باش يرضى إب ثلاثين دينار و إلّا بميا بما أنّو يخلص مليح... آهي فكرة ممتازة و فيها برشا من فلوسنا انّجّمو نوفّروهم شكون يعرف على الدّنيا... انّجّمو نستحقّوهم... حتّى في التّنمية الجهويّة

3 commentaires:

Bel Malwene a dit…

هايلة الفكرة يا دوعاجي !!! وإنت صرفت صرفت ... مذبينا ينقصولنا فرد مرة في حكاية الجيش هذي ... يردهولنا بروفيسيونال يرتاحو و يرتحونا من مشاكل الرافل و مشتقاته ... ه

Sosso a dit…

Wallahi il fikra kima yqoulou limsara moch battala, éma manitsawwarch li7wikem mte3na ytabbaqha kima qoltha enti.
Netsawrou il sera capable de la privatisée.
ma3netha momken ya3mel il rond poinet des concession yikrihom à des privés whouma ynattrou frankhom bma3rfithom. et là on verra ennjoum pas sur liktef mais fil qayla

eddou3aji a dit…

@ bemalwène : hayel yesser mwafa9, 7atta éna :)) ahawka fekra tjib fekra :)))

@ sosso : :))) ma3néha kol rond point ou el tarifa mta3ou. ou thamma service à la clientèle twalli te5tar errond point ellli ta7ra9 fih edhaw fih boulissiyya merf9ine :))