فكرة لتونس/دعيوة للجنوب الغربي

إذا من قلّة الخير و المعروف باش نحكي على الأفكار لتونس و أنا عايش في بلاد أخرى فإنّو من قلّة الحياء باش نحكي على قفصة و المناجم والمتلوّي و العباد إلّي عايشة تحت الخيم و أنا عايش في بلاد فضّت هالمشاكل من عام خمسين... علاش؟؟ أنا نخدم و كي نبطّل نلقى خدمة أخرى في جمعة.... و الجّماعة إلّي تحكيو عليهم أكثر مالشّطر ما لقاوش حتّى ربع خدمة...أنا نخدم في مينا و ما غير ما نحكيلكم على ظروف العمل أكثرشي من أنترنات موجودة... وهوما حتّى تلفزتهم إلّي يخلّصو فيها بفلوسهم عاملة فيهم... آش باش ينفعهم بوسط فيه كلام

عبّاو منّو شكاير؟؟

لذا النّاس إلّي تقول حاسّين بيكم و متضامنين معاكم ماذا بينا يورّيونا آش انّجّمو نعملو بخلاف التّدوينات المليانة تنظير و مشاعر متدفّقة وفدّة من الوضع إلّي ما عطاوهولوش....على خاطر ما تنجّمش في حالة كيف هذي تكتب بوسط و ترتّح ضميرك و تقول هاني عملت إلّي عليّ... قفصة ماهيش التّيبات و إلّا غزّة و إلّا بغداد...قفصة موجودة في تونس إلّي النّهار الكلّ و نحنا نافخين ريوس بعضنا بلوغة نحبّها و نموت عليها و بلادي و هات من هاك اللّاوي... و من قلّة الحياء نجي نكتب بوسط يقراوه عشرة مالنّاس و نقول هاني ننشر في المعلومة و نمشي نبخّ النّوم من بعّد... و النّاس الله أعلم بيها فين بايتة...

من قلّة الحياء كيف نبدى طبيب و إلّا أستاذ نقعد بطّال و نكلّم معارفي الكل باش ندبّر خدمة في العاصمة و ما نمشيش إل قفصة و من بعد

نكتب بوسط

من قلّة الحياء كيف نبدى انّظّر في علاقات الشّغل و في العمل النّقابي و ما نمشيش إل قفصة نعاون العباد باش ينضمو و يوصّلو مطالبهم و من بعد نكتب بوسط

من قلة الحياء كيف ننسى جيهة مدّة اثنين و خمسين سنة و من بعّد نعمل حوار مع الشّباب

من قلّة الحياء كيف نبدى ما عندي حتّى أدنى فكرة كيفاش انّجم نعاون و نجي نكتب بوسط كيف هذا و نوفاه إب ربّي معاكم يا جماعة الجنوب الغربي