فكرة لتونس/غناية

هاذي إخر فكرة باش تجود بيها قريحتي الفذّة من بعّد مدّة من التّخمين و الإستنباط و اللّيالي الطّويلة و أنا نخمّم و عاطي ماعندي باش نساهم في الحوار مع الشّباب و إنّبّه عليكم الفكرة ماهيش كاتوليكيّة برشا و بالمناسبة ماهيش إسلاميّة و لا يهوديّة و ماهيش باش تجي عالمضّاغة متاع المصلّين و إلّي يقراو ماركس قبل ما يرقدو باش يقعدو ثوريّين و إلّي يسمعو حماة الحمى في الإجتماعات. الفكرة شعبيّة ياسر عند الشباب و تحلّلهم مشاكلهم الإقتصاديّة و الإجتماعيّة و حتّى السّياسيّة يا بو قلب تخلّيهم يعيشو في دولة ديموقراطيّة فيها قانون و مؤسّسات يا عيني... الحلّ هذا إنهزامي و جبان و ما يعجبش النّاس إلّي عندهم خمسين سنة يحبّو في الوطن في البوزيسيونات الكلّ و بقوّة جهدهم لين مرّضوه بالعذر و ما يعجبش تشي قيفارا...قالّو كان نقدّم تبّعوني و كان ناقف دزّوني و كان نوخّر أقتلوني...هاك طلعت توخّر و قتلوك ... و ما يعجبش كينيدي إلّي قال ما تسئلش شنوّة بلادك تنجّم تعملّك أمّا إسئل شنوّة إنتي تنجّم تعمل لبلادك... عيّشو دجي إف أهوكة عملت في الإخّر.
الحاصل المساهمة الأخيرة في الحوار متاع الشباب على خاطر ريحتو بدات تفوح و زدت تأكّدت من صحّة كلام شباب تونس إلّي نعرفو و إلّي ما عندوش أورديناتور باش يشارك و إلّي عندو نظرة إستشرافيّة للمستقبل بالكريز الإخّرة...باش تكون في شكل غناية و طلعو ناس قبل أقوى مالتّشي و من كينيدي كي قالو: الوحش و لا الأذى

Boomp3.com