الرَّوّامََه

الرَّوّامََه بتشديد الرّاء و فتحها و تشديد الواو و فتحها و فتح الميم و تسكين الهاء، جنّبنا الله و إيّاكم مجادلة السّفهاء و عقم الفقهاء و تمجليغ البلداء و نظريّة النّشوء و الإرتقاء و الكحّة و الوباء، بجاه جميع الأنبياء، و الصّالحين من الأولياء،و أعاذنا و إيّاكم من تهمة الغباء، اللّتي تنزل كالقضاء ، في هذه الأيّام ا لغبراء، و آخر هذا الدّعاء أن الحمد لله ربّ العالمين و الصّلاة و السّلام على أشرف المرسلين...قول آمين....يا ولدي قول لا ترصّيلك في سين و جيم و يحطّوك متصوّر مع هدى سلطان و إلّا إندرا ش إسمها و من بعّد تطلع فيك إشاعة قاعد مع بوش و إلّا ليفني و يعدّيوك في الجزيرة و تحتك باند حمرا مكتوب عليها غبيّ.
الحاصل أنا آهو قتلك و إنتي دليلك ملك
عاد كلمة اليوم الرّوّامة يضهرلي عندها أصل عربي رام الشي أي طلبه كيما يقلّك و ذلك غاية المرام يا للنّي ...عاد في الدّارجة عنّا روّمو كي تروّم الشيء هو يولّي يطلبك و الله أعلم
نقولو مثلاً روّم الكوبة...معناها الكوبة هي ماعينهاش باش تتحلّ يمكن على خاطر المفتاح غالط و إلّا ماهوش مفتاح جملة يولّي القطعي هوني يحاول يستعمل أسلوب التّرويم إلّي ياخو وقت كبير و يحاول يروّم الكوبة باش تتحلّ و إلّ واحد يروّم في قطّوس و إلّا كلب و إلّا علّوش باش يولّي يرومو...يعني يروّض فيه و لهنا الحيوان يولّي يطلب المروّم متاعو...الرّوّامة كلمة أخرى تتطبّق على العباد يقلّك فلان عمل إل فلتان الرّوّامة أي دخّلو مالباب خرّجو مالخوخة و ريّضو و ملّي كان طالبو ولّى مطلوب...
مثلا كي تبدى تسال واحد فلوس تمشيلو في يوم من الأيّام عاقد العزم على إسترجاع مستحقّاتك ملّيما ملّيما...تدخل كلمتين خوات ماكش باش تسمعهم من عندو و تصيح و تعيّط و عامل مجهودك... فإذا بيك من بعّد ربع ساعة خارج و إنتي زدت سلّفتو فلوس.... قول كيفاش ؟؟؟ هذاكة عملّك الرّوّامة.
بالطّبيعة ثمّة ناس معطيلهم في الميدان هذا و موش إلّي يجي ينجّم يعمل روّامة مطابقة للمواصفات العالميّة و ذات جودة عالية...مثلا تعرّفت على واحد مؤخّرا ياخو في الكونتراتوات في ميدان النّجارة يجي للخدّامة ما يخلّصهمش و السّلعة كريدي و المزمّر يسالو هاك الحسبة لكن دوب مايجي واحد يحكي معاه يدخّلو منّا يخرّجو منّا وفى يخرج فرحان يقلّو توّا الفلوس باش نمدّهملك غدوة و إلّا اليوم شنوّة الفرق ماهو أنا نريڨل بيهم أموري و إنتي آش باش تعمل بيهم باش تحطهم في البانكة تي ربا و همّ أزرق ترضى تدخّل لأولادك فلوس حرام و الله البارح بركا أنا و فلان جبدناك يسلّم عليك حقّا عندو هاك الطّفل ولدو تبارك الله عليه ناشط مازّال كي عمل خمسة سنين و الأولاد شنيّة أمورهم... تي شو كيفاش
إيجاني الجّمعة الجّايّة نعطيك الفلوس الكل مع بعضها و معاها طاولة للمدام...تي صلّي عالنّبي و الله كادو و ما ناخو من عندك حتّى فرنك يعجبكشي زادة إنتي عاد متاعنا....إلخ إلخ
السّيّد هذا مبدع في عملان الرّوّامة أنا واحد مالنّاس وقت يبدا يحكيلي نقلّو نعرف روحي مقتنع ألف في الميا بالكلام إلّي قاعد تحكيلي فيه توّا أمّا نعرف روحي من غدوة باش نفيق بيك عمتلي الرّوّامة لذا خلّيني منّك.
و عملان الرّوّامة ماهوش إختصاص تونسي بحت الأمم الأخرى زادة عندهم ما يقولو في رواحهم. عرفي القديم ندخل أنا ويّاه إل دار. الكليون يبدا يصيح آنا تأمينات الكلكم سرّاقة و ماعنديش نشري من عندكم و راكم تضيّعو في وقتكم و تضيّعولي في وقتي...أنا نقول هالعملة الكلبة هاذي كارنا نمشيو و عرفي يبدالو في الرّوّامة في ظرف ربع ساعة السّيّد يبدا يصحّح في الشّاك و يقلّو إنتي هو إلّي نلوّج عليك. يبدالو البارح كنت نمد في شاك إل مرا راجلها توفّى في الحومة الأخرى في عمرك هكّة و الله حالتهم حليلة و فينهم صغارك يقراو؟؟ أنا عندي ثلاثة برجوليّة تبارك الله عليها دارك موش نورمال و الكرهبة آنا موديل إيجا نقلّك هاذاكة أحسن موديل خرّجتّو الدّار هاذيكة و النّيفو دي في هذا ينجّمو يستحفضو عليه صغارك كان تصيرلك حاجة تي كيفاش ماهو يلزمك تحسبها إيجا نورّيك...الرّوّامة.
معناها واحد موش مقتنع بحكاية و إلّا الحكاية ما تهمّوش جملة و إحساسا تجي تعملّو الرّوّامة الحكاية تولّي تضهرلو مقنعة عالإخّر و يمشي معاك موش تقنع على خاطر فهمك آش تحكي أمّا الرّوّامة إلّي عملتهالو بلبزتلو محاسيسو و ما ينجّم يقول كان إيه الله يبارك.
في التّلفزة كل يوم مع الثّمانية يعملو الرّوّامة للشعب الكلّ و حتّى إلّي يتفرّج في الجزيرة عندو روّامة من نوع آخر و إلّي يتفرّج في الرّوامة يعملولو الرّوّامة على حكاية أخرى و إلّي قعدلو شويّة شاهد عقل يعملولو الرّوّامة بالجرايد من غدوة الصّباح. و هكّاكة لين تسمع كان الله يبارك...و إلّي ما تنفعش معاه الرّوّامه ثمّة الرّومي.
هاذي كلمة اليوم و تنجّمو تحاولو تطبّقوها في الدّنيا و تشوفو شكون قاعد يعمللكم في الرّوّامة... و كان صعبت عليكم الحكاية ميسالش الرّوّامة باهية ترتّحك من مشاكل التّخمام و تكسير الرّاس.
خير ما نختم به أن نتوجه إلى الله جل وعلا سائلين إياه أن يكثر بين عباده المؤمنين من " الذين يستمعون القول فيتبعون أحسنه أولئك الذين هداهم الله وأولئك هم أولو الألباب " و نسأله أن يجعل ما نخط بأقلامنا مكتوباًا في صحائف حسناتنا يوم نلقاه.
تمت بحمد الله