mercredi 29 juillet 2009

ننتخب أمّا شكون؟؟؟

اليوم من بعّد ما جاتني دعوة ع الفايس بوك لمجموعة "باش نمشي ننتخب في الإنتخابات الجايّة"...قبلت بما أنّي ماعنديش برشا صحاب و نخاف لا الكعبات إلّي عندي يتنبزو و يطفّيوني و زيد شكون يعرف يهبط عليّ قنصل و إلّا سفير يجي يهزّني بالسّيف بالرّغم هوني يصعب شويّة أقرب قنصليّة بعيدة قريب خمسة آلاف كيلومتر أمّا شكون يعرف عالبلاوات...عاد قلت أنا صرفت صرفت نكمّل نعمل طلّة عالأحزاب الموجودة و نشوف روحي في صورة ما دڤّني ربّي و جيت في تونس في الفترة متاع الإنتخابات شكون ننتخب... حلّيت الصّفحة متاع ويكيبيديا فيها تصنيف متاع الأحزاب و بديت نتفرّج بالواحد بالواحد...بالله واحد يقلّي راهم ماعادش موجودين الأحزاب هاذم و راهي الباج قديمة ياسر...شنوّة حزب البعث؟؟؟ الوحدويّون النّاصريّون؟؟ الحاصل نتمنّى إلّي يطلعو ماثمّاش عباد منظّمة روحها في أحزاب هكّة...راني مع حرّيّة الإجتماع و التّنظيم أمّا جوست عليهم هوما... حشمة و عيب...تي بالكشي ما حلّوش التّلفزة من عام ثلاثة و سبعين واحد يتعدّى يكلّمهم كان عندهم مقرّ و يقلّهم: السّلام راهو صدّام مات و عبد النّاصر زادة الدّوام لله و الأسد ماهو طلع دكتاتور السّاقط...إيه و الله كيما نحكيلك يا حاجّ وراهو العبا د في بالها بالحكايات هاذي على خاطر ثمّة إختراع جديد مكسّر الدّنيا عندو يجي أربعين سنا إسمو التّلفزة و الله يا حاج و تنجّم تتفرّج بيه على أخبار البرّة زادة.
نفهم واحد مالشعب الكريم يقرى في الشّروق و يتفرّج في الجزيرة كي يحبّ صدّام و إلّا غيرو أمّا هاذم ناس حالّين حزب معناها للوصول للحكم و يقلّي بعث في تونس صعيبة على مخّي. ما عجبوكمش الأحزاب إلّي في العالم الكل... إلّي نجحوا في اليابان و في كندا و إلّا في البلدان السّكندينافيّة جيت كان إل أتعس تجارب في العالم إلّي من بعّد خمسين سنا وصّلو بلدانهم يا لحرب يا لبرشا فقر و صفر ديموقراطيّة و تحبّ تعمل كيفهم... يا حاجّ إيجا نفسّرلك شفت في الكورة الجمعيّة الرّابحة هي إلّي تبدى فرحانة و الخاسر يبدى تشوف فيه هكّة حزين...هكّاكة زادة في الدّنيا التّجارب إلّي باهين و طلعو يقضيو تلقى ناسهم شايخين و متفرهدين و إلّي ما مشاوش تلقى ناسهم حزانى...واضح هكّة حاج ؟؟؟
.هاذم الأحزاب إلّي ماكانش في بالي إلّي مازّالو محلولين إل توّة...وجاتني صدمة الحق كي ريتهم...أمّا نورمال ربّي يحبّس علينا العقل و الدّين.
الإتحاد الديموقراطي الوحدوي نفس الحكاية أمّا عالأقل واحد ينجّم يفيّقهم فيسع فيسع و يحطّلهم كومونتار و إلّا يبعثلهم لينك لأيّ موقع متاع أخبار على خاطر عندهم بلوغ. شوفو الجملة هاذي يا بو ڤلب ما يكتبها كان واحد محربش و إلّا مزروب " الاتحاد الديمقراطي الوحدوي ينطلق من قناعة مفادها أن العروبة والإسلام خطان متلازمان لا ينفصلان وعليه فهو يناضل من أجل إرساء دولة ديمقراطية ذات دين وضد الدولة الدينية"
المعترف بيهم الأخرين شي ما يفرّحشي... أنواع متاع أحزاب مازّالت موجودة كان في تونس و في فرانسا...ديكور متاع جوراسيك بارك على حالو... ما تسمع كان كلمتين العدالة الإجتماعيّة و الهويّة العربيّة الإسلاميّة... حتّى اللّعبة ع الدّود و شيْ موش جايبين رواحهم. حزب شيوعي إسمو التّجديد !!! ميا في الميا يفدلكو!!!
؟؟؟
إلّي موش معترف بيهم خلّي عزاها سكات...بالرّغم موش بعاد برشا على الأخرين كيف كيف العدالة الإجتماعيّة و الهويّة العربيّة الإسلاميّة أمّا أكثر جو. الجّماعة ماخذة راحتها و أبدعو الحقّ.... تخرّج ديناصورات كيما النّهضة و حزب العمّال الشّيوعي ..هذا حتّى الإسم ما بدّلوش... بصحّة رقعة شيوعي.... توّة هاذم الكل كي نهار حبّو يتلمّو سمّاو رواحهم هيئة الحرّيّات...زعمة موش على خاطر هذيكة الحاجة إلّي ناقصتنا و هاذيكة الأولوية توّة و الباقي الكل كلام عبّينا منّو شكاير و ما جاب شي.
ماهو عنّا حزب زعمة زعمة ليبيرال أهوكة في إسمو سوسيال زادة.. عالعينين ... كيفاش عيب ما عنّاش في سبرنا و زيد ما يطلع كان حاططها متاع الهوية في تعريفو. حزب ليبيرال عنّا / و زيد معترف بيه/ ليبيرال: الحرّيّات و الحقوق هوما القيم الأولانين متاعو قبل كل شي... و معترف بيه مع كل ما لكلمة معترف بيه من معنى...سبحان ربّي آش يخلق
ظاهر شنوّة الحاجة إلّي مازّلنا ما جرّبناهاش و ع الدّزّة هاذي ماناش باش نجرّبوها بما أنّو عنّا كان الدّيناصورات...بالله شنيّة البديل عالمي للتّنمية تي عندك تنمية من أصلو باش تلقالها بديل. ما خص المشنوق كان ماكلة الحلوى.
في اللّيستة ثمّة كان زوز عجبوني خسارة تنحّاو الحزب الحر الدستوري و الحزب الحر الدستوري الجديد...حزب كي يبدا فيه كلمة الحر
يبدا موهّر و واضح و الباقي الكلّ دقّان حناك
.
كي كان إستعمار، اللّعبة كانت واضحة ع الحرّيّة من بعّد خلبزوها هويّة على عدالة إجتماعيّة على حزب الخضر / هذا كان ترجع للّوغة متاع بكري يطلع إسم خايب ياسر ههههه مضار التّرجمة الحرفيّة/ على رهانات المرحلة على تنمية شاملة. لين نسينا أهمّ حاجة تلمّينا على خاطرها الحرّيّة.

10 commentaires:

Tarek a dit…

الشيوعية هي الحل

eddou3aji a dit…

هههههه بالضبط

bent 3ayla a dit…

اشبيك تحقر فيه حزب الخضر؟؟؟ غير راهو كي قدمو المطلب، التاء المربوطة سقطت سهوا، اما هوما يقصدو حزب الخضرة. خاطر حتى الخضرة ماعادش خالطين عليها في الخضراء

نسيت شكون قال ها الفكرة، اما ديما نحطو في العناوين العريضة الحاجات اللي نفتقدوها بش نعوضو. افهم وحدك عاد اش ناقصنا

coeos a dit…

vote pour big brother!

Des partis dans un pays ou les citoyens sont encore des sujets!!! ça frise le ridicule! heureusement que le ridicule ne tue pas ( ou pas encore...)

Big Trap Boy a dit…

فعلا يا الدوعا، المشكل الحقيقي هو أنّهم بكلّهم "عمّي الحاج" وزيد على ما يبدو حكاية التحربيش صحيحة

Sosso a dit…

Ben s'ils mettent le vote via sms je pense que là tu ne pourras plus y échapper.
Pour les partis politiques de la Verte je pense qu'il faut qu'il y ait de la politique d'abord après on parlera de partis

titou a dit…

n importe koi??chni 7keiet el ba3thiin wela el nasiriin elli ltaw ma7allou eltalvsa??!!w 3lech i7ebou sadam 5aterhom yetfarjou 3al jazera???w chbik t7a99ar fl les ideologie w taia7 fihom kima ja??w chkoun elli 5allew bledhom fi fa9r w maje3a?? brjoulia l article heva oumourou te3ba barcha w b3id 3al 79i9a malgres ena men mouteb3inek ..salem

bent 3ayla a dit…

@ soso... ''tout est politique''

Sosso a dit…

@ bent 3yla "tout est politique" où?? il faut la Polis d'abord la Verte maintenant ressemble à tout sauf ça.

Progressive pour une autre tunisie a dit…

فينو الحزب الديمقراطي التقدمي أقوى حزب معارض و مقلق السلطة و فارضة عليه الحصار
شبيك ما حكيتش إلب سوسيال مرشح بن علي
هههههه