الفايدة في الهنا

كل يوم نزيد نفيق إلّي أمثالنا الشّعبيّة قويّين ياسر و إلّي نحنا غير العكس و برّا كونشي فلسفة الأنوار بكلّها ما تجي شي قدّام إلّي قالوه ناس قبل... توّا لا روشارش دي بونور هي البحث عن السّعادة و إلّا الهنا كي تجي تترجمها بالدّارجة تجي الهنا على خاطر كي واحد

يعرّس الڤورّة يتمنّاولو البونور نحنا نتمنّاولو الهنا

.
لا روشارش دي بونور و ليبيرتي و ريسبونسابيليتي و حالة حليلة و ديدرو و روسو و فولتار يكتبو و عاملين هرجة و ثورة فرنسيّة و عباد ميّتة / اللطف عليكم و لا يشويني فيكم/ هذا الكل باش يقلّك الفايدة في الهنا

.
إذا تلقى هناك في ثلاثين يوم صيام و عشرين ركعة تراويح و قيام ليل كل ليلة صحّة لخويا وإلّا لأختي و إذا تلقاه في حويرة بيرّة تنفخ بيها كبدتك صحّة لخويا وإلّا لأختي كذلك... أمّا ما تنساش من حقّك و من مسؤوليتك باش تكون متهنّي و شايخ و كلّ واحد و شيختو باش تجي... مالإخّر، قمّة الهنا / موش الهنا الدولي و إلّا الأنترناسيونال بالرّغم حتّى هو فيه ما يشيّخ/ عندك إنتي قمّة الڤينية عندي أنا.... و أنا كأنا ماني مسؤول كان على هنايا و سعادتي و موش سعادتك، / ساعات نضحّي و نحبّ نهنّي و نسعد بعض المحظوظات أمّا هذيكة حكاية أخرى/ لذا رمضانكم مبروك و يحييكم لأمثالو و الفايدة في الهنا.