يتعلّط

ماحلى ليالي إشبيلية

و صوت الڤيتارة و الوتر

آآآآآنا حبيبتي جميلة

نشكي هواها للقمر

إحم... إحم... عاد كلمة اليوم اليوم و هي بيناتنا هذاكة علاش إسمها كلمة اليوم على خاطرها اليوم مانعرفش كان جيت كتبتها البارح نولّي نقول كلمة اليوم البارح و إلّي هي حاجة ما تجيش بالكل.

عاد كلمة اليوم هي يتعلّط و هو كيما تشوفو فعل على وزن تفعّل معناها الجذر متاعو يجي علط إلّي ما عندي ليها حتّى تفسير لا بالعربي لا بالدّارجة لا بالسّوري...معناها هاذي ما يطلع كان واحد قاعد رايض على روحو و نورمالمون ڤالڤ زادة على خاطر سينون آش لزّو يطلّع في الكلام و شاف واحد يعمل في حاجة موش متاعو و ما يڤدّهاش و غلّب عليه ياخي إستنبطلو الكلمة هاذي باش يبرّد على قلبو.

و فعلا في بعض الحالات ما ثمّة كان الكلمة هاذي تأدّي المعنى و تصوّر محاولة البعض القيام بأعمال لا تتناسب البتّة مع إمكانيّاتهم المحدودة و هذا يخلّيهم تكركيرة قدّام النّاس و يضحّك عليهم خلق ربّي و المعنى هوني يستقيم أكثر كي يكون المتعلّط يعمل في حاجات صعيبة عليه و يزيد فوق هذا يشدّ صحيح و ما يفكّش معناها الكلمة هاذي فيها برشا معاني مخلّطة واحد ما يعرفش حدود إمكانيّاتو و مضروب في روحو شويّة و راسو كاسح و مايفكّش و ما يهداش. أوّل مثل يجيني إل مخّي هو كلب ينبح على طيّارة لهنا واضح إلّي الكلب يتعلط على بدنو و البارتي قويّة ياسر عليه. ينجّم يكون كلب بحر يتزعبن على فكرون زادة لهنا الكلب بحر ما عندو حتّى فكرة قدّاشو بعيد عالتّلفزة.

واضح لهنا إلّي بخلاف بعض العباد إلّي عندهم شويّة تخلف ذهني و شويّة ركاكة و إلّي للأسف عددهم ماشي و يزيد، حالة التّعلّط ع البدن عند العباد العاديّين تكون حالة عابرة على خاطر أنا ما نقلّك و إنتي ما يخفاك ماناش الكلّنا كيف كيف في الدّنيا هاذي معناها واحد تلقاه ينجّم ينڤّز مالثّاني طاق و ما يجرالو شي في حين كان إنتي تتعلّط على بدنك و تعملها تو تمشي ريش نعام. لذا فإنّو العبد العادي في بعض الحالات الله أعلم بيه يحبّ يجرّب حاجات قويّة عليه يا إمّا جهلًا و إلّا غرورًا و يحبّ يعمل حاجات كيما عباد أخرين و ترصّيلو يعاني من بعّد.

باش نزيد نوضّح علاش ماناش كيف كيف / كيف كيف في الحقوق و الواجبات و هاك اللّوغة أمّا موش في الإمكانيّات/ مثلاً ثمّة عباد تبدا مختصّة في حاجة معيّنة و تبدا أمورهم واضحة و مصلّي عالنّبي عليهم يقومو يدخلو في دومانات أخرى فركة و عود حطب و يولّيو يتعلّطو والعياذ بالله.و ثمّة عباد أقلّ إمكانيّات من هكّة و يبداو عسل الدّنيا كي يبداو ساكتين دوب ما يحلّو أفّامهم مساكن يولّيو يتعلطو كيف ما قال درا شكون أقعد ساكت ثمّة بوسيبيليتي تكون بهيم خير ما تتكلّم و يتأكّدو النّاس الكل إلّي إنتي بهيم و ثمّة ما أتعس اللّطف ثمّة شكون حتّى كي يتنفّس يتعلّط على بدنو الله غالب موش معطيلو حتّى باش يكون كائن حي بدائي صعيبة عليه

.
يقول القايل منين واحد يبدا يتعلط؟؟ كلّ واحد و كيفاش مثلا

نانسي عجرم كي تشطح و حتّى كي تغنّي غنايات ساهلة اللّه مصلّي عالنّبي عليها كي تقوم تغنّي في الطّربيّات فإنّها تتعلّط.
الشّيخ كهفان كي يبدا يحكي في الأخلاق و العبادات و السّير فإنّو ماحلاه ماحلاه و كي يقوم يحكيلي على علم الفلك والطب فإنّو يتعلّط.
الكوّارجي كي يبدا يدريبل و يمركي يبدا يعبر كي يولّي يعطي في دروس في الأخلاق فإنّو يتعلّط
هيّا ما عادش بكري عليّ كمّلو اللّيستة وحّدكم
حبيبتي سمرة

زادت جمالها التّاتو الحمرا

فضّة بيرسينغها تلمع في الصّرّة

نشكي هواها للقمر