مناش خايف؟؟

ماثمّة شيء؟؟تي شنوّة تبدّل؟؟ لا لا تستخايل ما ثمّة شي هي بيدها الحكاية و برّا شطر بنات حومتك تحجّبو عادي نورمال...باش تدبّر فيهم آش يلبسو؟؟ أمورهم...و إلّا الحرّيّة كان في الميني و الهيجة و الدّبر؟؟ لا كلّ شي نورمال و أحنا كيما كنّا...فقنا بشوية حاجات غالطين عنّا نبدّلو فيهم و نتثقفو....إيه و برّا كان يبيع في هاذيكا اللطف آش يقولولها...هي لا محالة ثمّة شكون يقلّك مبعّد النّبي حلال...تي آش علينا فيها....أهوكا ربّي هداه...أمّا خير و إلّا المشاكل....لا إنتي دراشبيك السّاعة النّاس تخرج البرّة تبارك الله يرجعو ربّي هاديهم و يعرفو الدّين على قاعدة... ياخي في تونس عنّا دين نحنا.... حكايتنا فارغة...أهوكا فلان يعيش في أمريكيا... ولّى من جماعة الدّعوة و التّبليغ و مشى للهند باش يعلّم جماعة كيفاش يحجّو... و إلّا الآخر مشى للكندا جا صوفي...اللهم صلّي عالنّبي...وجهو الكلّو نور...آش اسمو تعرفو؟؟ هذاكة ولّى سلفي... تي يا ولدي ما تخافش...نورمال...هذاكم الجّماعة إلّي يعيشو كيف السّلف الصّالح... و آش خصّ كان جينا الكل كيفهم رانا رجعنا قويّين كيما قبل...تي ما تبدّل شي يا ولدي...إنتي دراشبيك...ياخي ولّيت شيوعي؟؟؟ نحنا مسلمين من أوّل الدّنيا...إيه و برّا أربعة أولاد حومتك شدّوهم في سوريا حارقين للعراق باش يحاربو؟؟ عادي جدًّا...هاذوكم رجال ماشين يدافعو على إخوانهم المسلمين...و إلّا حتّى هاذي عيب...نعرفك إنتي حسّيتها كي واحد منهم جابلك كتب باش تقراهم و تثقّف روحك كي شافك تاعب في أمور الدّين.... تي نورمال و برّا موش قاري هذاكة ربّي فاتح عليه و يفهملها بلقدا...ما تحقرش الرّجال هذا كة إلّي تكتك للمشية متاع العراق تبارك الله عليه...توّا بالله شنوّة مخوّفك.. تطلعشي كافر...إمّالا شبيك تهلوس تي بالعكس كارك تفرح.. و برّا الطّفلة فلانة لبست الوحدة الكحلة هذيكا و بطلت القراية...عادي ياولدي...تي نورمال ماعادش تحبّ تسلّم عالرّجال باليد...حاجة عاديّة...آش خير مالحشمة...ثمّا كان كالرّاجل الكبير إلّي عبارة مربّيها كي ما حبّيتش تسلّم عليه باليد ما عجبتّوش الحكاية قالّها : دين والديك لا يجوز... كنت نبدّلّك في الكوش قبل...أمّا سينون عادي آش فيها عيب ما تحبّش تسلّم عليه باليد... و برّا بيناتهم 40 سنا و كي بوها...الشّيطان ديما حاضر.... إنتي حكايتك حكاية...عندك مشكلة مع الدّين...إيه إيه عندك مشكلة...إمّالة علاش تهلوس و يستخايلّك... و برّا إنتي قاعد في القهوة جاك واحد قالّك الآذان إذّن قوم صلّي... ماهو يحبّ يربح فيك ثواب... و برّا ما تعرفوش... و جبدك من يدّك و يلحلح بيك...الحق ما كاركش ضربتو...ما ثمّا حتّى شي تبدّل بالعكس النّاس ربّي هاديها تبارك الله... هكّاكه...وحّدهم وحّدهم...ما تبداش تهلوس ...هوما أحرار.

بالله شكون قال المرّة الأخرى في بوسط إلّي نحنا ماشين في الحيط...شنوّة ماشين في حيط... و زيد ورانا سيمي ريمورك يجري في

الميا و ثمانين و ع اللّيمين هفهوف و ع اليسار هفهوف... و إلّي معانا في الكرهبة جابد علينا لام... أكهو حلّ الرّاديو كاسات و إستنّى اللّطخة.
النّاس تلعب في لعب صحيح و فلوس متلتلة قاعدة تتصرف...و أي واحد يتلكمتو عليه يجيبوه يشطح ليه ليه...حقرناهم ياسر و هوما قاعدين يخدمو في خدمة صحيحة...ماعادش تضحكو عليهم نحنا إلّي نضحّكو..كي الفتاوي إلّي تضحّك و التّكفير ...و تسريب الرّمل و إلّا دراشنوّة أمورو ماشية بلقدا... و مانيش نقصد في واحد هداه ربّي قام يصلّي...هذاية واحد تلكمتو عليه قام هزّ روحو و مشى إل غانا يعلّم فيهم في الدّين...يا بو قلب... غانا؟؟؟...الآخر يحب يمشي للعراق...محاكم شرعيّة تحت الطّاولة....باهيشي توّا؟؟؟ إلّي يبهّت هو تونسي صارف عليه الشعب باش يتعلّم تعليم شبه عادي يتحندر كيف واحد من مالي و إلّا من دجيبوتي قاري في مدرسة إسلاميّة صارفة عليها السّعوديّة...لا نفعت لا قراية لا شي في ستة شهر تقول هزّيت عبد و حطّيت عبد...يولّيلك سلفي باللّحية...و ما همش شويّا...مانعرفش عاد شي يخوّف و إلّا لا أمّا الشّي إلّي ريتو في تونس المرّة الإخّرة و إلّي نرى فيه الأيّامات في إخّر الدّنيا...ديجا البلاد هاذي حكيت عليها بتفدليك على خاطر جيتها عمناول أمّا كي تشوفهم فين وصلو مبعّد عام برجوليّة لن تمرّو صعيبة شويّة ... بون يمكن في البلوغوسفار لن يمرّو:)) أمّا في الدّنيا و البرّة من الجامعات و الملتقيات و النّدوات... في الشارع و مع الزّوّالي و الإنسان العادي عندهم مستقبل باهر... أي شبر متاع حرّيّة ياخذوه و يستغلّوه على قاعدة صحيحة... و الباقي متاع المسلمين يتفرّجو و عاجبهم الحال.... و حتّى كان موش عاجبهم منين الفلوس باش يقاومو... البترول إب آش و ميا ....إسمع اللّطخة.