samedi 19 juillet 2008

الجيل الجديد

في الخدمة الجديدة ( إيه زدت بدّلت مالخدمة مرّة أخرى ربّي يهدي) تعرّفت على واحد دزيري...الرّاجل هذا لا يزّي ياسر ناس ملاح و أفضالو ع العباد في الدّشرة هاذي النّاس الكل تحكي بيها لا يزّي في حياتو ما عمل شي كيما الأخرين...جا في السّبعينات للمقاطعة هاذي إلّي عادة ما يجيوهاش الفرنكوفون و زيد ما يجيها حد أصلا على خاطر حتّى توّا و بالبوم إلّي عرفتّو مبعّد البترول و باقي خلا و قفار... و قعد لهنا...و كان من الجّماعة الأوّلانين إلّي عملو نقابة متاع الخدّامة متاع الكوجينات و ما تابعها...أمّا بين قوسين محلاها النّقابة كي تبدى خدّام عادي...إبداع...الرّاحة إجباريّة...الخلاص الدّوبل...السّوايع إخدم قد ما تحب...السّوايع الزّايدة دوبل...الشّربة تنجّم تطيّبها في 5 سوايع...ديجا يلزمك ساعة باش تعمل الحكايات متاع السّيكوريتي و الرّيق من قواندوات إل أوراق تعمّرهم...و ما يلزمكش تزرب ياسر لين تولّي الخدمة تضحّك...بون كي تبدى إنتي جيرون تولّي تفدّد أمّا خدّام سعادة صافي...الحاصيلو السّيّد هذا موسوعة و دار برشا و جرّب برشا و القعدة معاه عسل....خرج من دزاير ملّي خرجت منها فرنسا و ما رجعش... عاد كلّ مرّة نحكي معاه نبهت في الحماس متاعو وبالرّغم إلّي عمرو فوق السّتّين و أنا عمري ما يجيش شطرو نلقى روحي ديما هايج عليّ و أنا ديما نميّع في القضيّة...كان حكى ع العروبة تلقاه يحكي بقلب و رب...ع النقابة لقشة مالسّما باش يهبطها...الشريكة يحبّها تقول متاعو... و أنا بدّلت خمسة عروفات السّنا بركا...يحكي ع المسلمين إلّي يخدمو معانا و يحب يعاونهم...تقول يقربولو...يتبّع آش صاير في لبنان و العراق و ملتزم بالقضايا متاع العالم الكل...و حق كل الشعوب في تحقيق المصير (هاني ولّيت نحكي كي الأخبار) أمّا بالرّسمي تبارك الله عليه ... آه و زادة يخدم في ثناش ساعة في النّهار و ساعات ثلطّاش. سبعة أيّام على سبعة أيّام ...إلّي أنا في شطر عمرو نروّح كي الدّينار بودورو...البارح رقدت و أنا نجاوب عالكومنتارات...الحاصيلو اليوم شدّني في جيلكم ماكمش مسؤولين و ما عندكم حتّى طرف إلتزام و أخطى راسي و أضرب...الحقّ ع البلاصة سكّتني ما نجّمتش نجاوب.., و زيد هو بلبلة متاع حديث و ما يتشدّش...و هو بالرّسمي الجيل متاعهم في العالم الكل عمل برشا حاجات نحنا توّا تضهرلنا عاديّة أمّا كان ترجع لوقتهم تلقاها صعيبة ياسر أمّا وصلو باش بدّلوها...عاد توّا تذكّرت أرتيكل قريتو هاك العام يحكي ع البابي بومر و الجيل متاعهم كيفاش بالرّغم مالحاجات إلّي عملوهم كي تجي تشوف مبعّد ثلاثين سنة و إلّا أربعين تلقى فرق بعيد ياسر بين إلّي كانو يتوقّعو باش يوصلولو و إلّي يعيشو فيه اليوم...الكلام هذا باش نمرجو بيه غدوة و أحنا نحضّرو في الشّربة متاع الخمسة سوايع و آهوباش نحكيهولكم و كان هزّني النّوم ليّا و ليكم ربّي























عاد الجّماعة كانو يحلمو بالسّلام و االمحبّة اليوم عنّا هذا و هذا























كانو يحلمو بالنّيرفانا اليوم عنّا هاذي























كانو يحلمو بالحرّيّة الجنسيّة اليوم عنّا هاذي و هذا























كانو يحلمو بروحانيّات مختلفة اليوم عنّا هذا و هذا























كانو يحلمو بالإنسان المثالي اليوم عنّا هذا























كانو يحلمو بالمساوات بين البشريّة الكل اليوم عنّا هذا























كانو يحلمو بمجتمع الرّاحة ولّا الشّيخات (سوسييتي دو لوازير) اليوم عنّا أمّا إسمها هكّا























كانو يحلمو بتنحية الحدود بين البلدان اليوم عنّا هاذي























هذا في العالم و عنّا نحنا























كانو يحلمو بالوحدة العربيّة اليوم عنّا هاذي























كانو يحلمو بتحرير فلسطين اليوم عنّا هذا























كانو يحلمو بحرّيّة التعبيراليوم عنّا هاذي و هاذي























كانو يحلمو بالدّيموقراطيّة اليوم عنّا هذا و هذا























كانو يحلمو بأوديوفيزويال قوي و بعيد ع الشعبويّة اليوم عنا هاذي و هاذي و هاذي و هاذي

نعرفو باش يجبدلي وذني غدوة أمّا نورمال ع الجّو و برّا

12 commentaires:

khayati a dit…

toujours percutant comme d'hab...

Stupeur a dit…

el mochkla win, hana mazelna ne7lmou! :-(

Bel Malwene a dit…

هههههههه ... حلوة يا دوعاجي
أما عندك الحق كي تقول تنجم ترقد و أنتي تكتب في التدوينة ... خاطر هالكمشة شبه إذاعات الي حطيتهم فالأخر موش يرقدو الكلب على خريتو برك ... هذوما ينجمو يستعملوهم فالجــراحة في عوض البنج ... ههههه

eddou3aji a dit…

@ khayati: Merci beaucoup.
@stupeur : sa77a likom 3alla9al
te7lmou ou mazzeltou te7lmou emmella ech n9oul 3al generation
mta3na...kochmaratte mechirette el kol :((...
belmalwene : i7alli ayyamek,
9talni ennoum mouch kif ennass elli ettarri fi 7zameha fel
3roussette :)))

البرباش a dit…

@ الدوعاجي: و اللي فاتك أغرب، قاللك سي بالملوان عقاب السهرية حفلها بالغناء، يعني حزام و قرجومة اللي يقوللك

HNANI a dit…

إييييه ن يا دعاجي، كنا نحلمو و كنا نحلمو حتى لين قتلنا الواقع و ما بقالنا غير الذكريات

titof a dit…

المشكلة موش في الاحلام
المشكلة انا حلمنا و مخدمناش قعدنا كان نحلمو
ونرفعو في الشعارات

eddou3aji a dit…

@ barbeche :
إسمع يا سيدي، وين كان مخبّي هذا الكل ههههه اللهم صلّي ع النّبي عليه...ملّا بالملوان آش يطلع منّو ههههه إنشالله فارحين ديما و العقبة للّي ماذابيه و مازّال

@ hnani :
ما عملتوش إلّي حلمتو بيه الكل أمّا عملتو برشا حاجات ... أنا حسب رايي الّي عملتوه موش ساهل و ديجا حتّى باش نستحفضو عليه يلزمو برشا خدمة...أمّا حبّيت نسيّب ركاكتي ع الرّاجل و برّا ههههه

@titof :

أهلا بحامي الحمى و الدّين هههههه، و الله آش باش نقلّك هو أنا نحكي على جيل معيّن في العالم الكل موش كان أحنا... كانو يتصوّرو باش يبدّلو العالم و يولّي جنّة...ثمّة حاجات بدّلوها و حاجات لا....أمّا سينون عندك الحق أحنا نحلمو برشا و برشا منّا ما يخدموش.

Hnani a dit…

المشكل متاع جيلي هو أنو الحوايج إلّى حقّقنى منها شوية قاعدين انشوفو فيهاامهدّدة بالذوبان.. والقيم الإنسانية المغروسة فينا ما عادش عنها بقعة في الوقت متاع العولمة هذا
حتى المفاهيم ولاوا يعملولها مؤتمرات باش يبدلوها حسب المصلحة و الوضع الحالي
المشكل هو كونو ولّينا انحسو برواحنا ناس غرباء على هالعالم المادى ولّى كل شيء فيه يتشرى بالفلوس
حيّرتلي مواجعي يا دعاجي يا ولدي الله يهديك

eddou3aji a dit…

@ hnani: كيفاش غرباء عاد هانا بحذاكم ههههه ربّي يهديني

Anonymous a dit…

دوعاجي
نعرف اما توة جيت امخر اما ميسالش هاى تفرقت الحضبة احسن
اي سيدي نقولو حق الشعوب في تقرير المصير
باهي
ظاهر فيك تبدى ماكش مركز مع الاخبار
:))

eddou3aji a dit…

@ anonyme :
هههههههه قلت الحق خاطيني بيعة الأخبار هاذي...هيّا يعطيك الصّحّة هاك أنونيم ناس ملاح....ما ثمّاش منهم برشا هههههه