vendredi 31 octobre 2008

جالغ

اليوم باش نبدا روبريك جديدة إسمها كلمة اليوم. و هي روبريك سيريو شويّة تعنى بالألفاظ إلّي موش لاقية حظها في لوغتنا المزيانة و التّحفونة. باش نعمل مجهودي و كان ثمّة إضافات زيدوهم في التّعاليق و كان ما ثمّاش ما تزيدوهومش في التّعاليق.
الجالغ كيما تنجّمو تشوفو جايّة من جلغة إلّي هي كلمة تعني الفمّ أمّا بطريقة فيها شويّة مبالغة معناها التّأكيد على بشاعة الفمّ هذايا مثلا كي باش تقول سكّر فمّك صحيح بليدة الكلمة أمّا ما تأدّيش المعنى تولّي تقول سكّر جلغتك إلّي هي توضّح للسّيّد إلّي قاعد تخاطب فيه إلّي هو ماعندوش فمّ كي العباد لكن عندو جلغة معناها فمّ يخرّج في كلام ماسط أو بالأحرى منطق عادم. كيما يقولو الفرنسيس فارم تا بوش و كي يحبّو يقوّيو يقولو فارم تا قول. و من المرادفات للجّلغة نلقاو المطبق و الكشخة إنشالله نحكيو عليهم في نهار آخر كان كتب على خاطرهم ماهمش مرادفات بالضّبط تلقى الكشخة مربوطة بالضحك و من هنا تلقاها مربوطة شويّة بالبلاهة في حين المطبق تلقاه فيه المعنى متاع الشراسة عافانا و عافاكم الله و بالتّالي تلقاه مربوط بالتّجودير و قلّة الإحساس. لكن في الإخّر تلقاهم الكل يعنيو الفمّ و إنت كيفاش تستعمل فمّك كان تستعملو بتغفيص فإنّو يتسمّى جلغة و كان تستعملو ببلاهة و إلّا ما تستعملوش جملة
فإنّو يتسمّى كشخة و كان تستعملو بتجودير فإنّو...شنوّة.؟؟ يعطيكم الصّحّة مطبق
.
عاد نرجعو لكلمة اليوم الجّالغ هي وصلنا في ما سبق إلّي الجّلغة هي الفمّ الواسع العريض شكليّا و هي زادة الفمّ إلّي مولاه يغفّص ياسر. معناها مالادروا كيما يقولو الفرنسيس و إلّا عندو زوز يدين يسار كيما نقولو أحنا. بالدّارجة غفّاص. يجي يقول صحّة يقول صدّاف. الجّالغ هو النّوع متاع العباد إلّي كي يبدى معاك تبدى يدّك على قلبك يزرفشي بكلمة و إلّا يقولشي حاجة موش في بلاصتها على خاطر الجّالغ ينجّم يزلعها في كلّ بلاصة في جامع أو في مدرسة و إلّا في قهوة. تو نرجعو في نهار مالنّهارات إل كلمة يزلع إلّي هي زادة مليئة بالمعاني و عندها برشا تفاسير. عاد الجّالغ إضافة إلى قدرتو العجيبة على الزّلعان عندو كلام ماسط ياسر موش بمعنى قبيح لأنّو القبيح هو إلّي يستعمل الكلام البذئ أو الكلام البذيل كيف ما كان يقول النّاصر القهواجي يذكرو بالخير. و يستعملو عن قصد و بإلحاح لكن الجّالغ موش بالضّرورة يستعمل الكلام البذيء بالعكس في أغلب الأحيان كلامو يكون عادي و ما فيهش حتّى طياح عالمعايير الأخلاقيّة الجاري بيها العمل أمّا شنوّة...الجّالغ كان ثمّة كلمة بركا ما يلزمهاش تتقال في الوقت هذاكة و إلّا في البلاصة هذيكا و إلّا للعبد هذاكة فإنّو كون مهنّي الجّالغ باش يقولها...لهنا نفهمو إلّي الجالغ ما يقصدش باش يجرح العباد لكن عندو حاجة في مخّو إلّي بالسّوري يقولولها الإنيبيسيون...هذيكا... كي تجي مثلا باش تقول إل واحد آش يهمّك و من بعّد تبطّل و إلّا تجي باش تسإل واحد في الشّارع ما تعرفوش و من بعّد تبطّل...الجّالغ ماعندوش منها...لذا فإنّو المعروف من قديم الزّمان الجّالغ تبعد النّاس على خلطتو و ما تقعدش معاه إتّقاءً للمواقف المحرجة إلّي ينجّم يحطّك فيها...هو في قديم الزّمان الجّالغ ماكانش يعيش برشا حيث دوب ما يحلّ جلغتو يشربها سيف و إلّا رمح و إلّا فلاش و ساعات حتّى كفّ باهي.... معناها معدّل العمر عند الجّالغ في قديم الزّمان كان بين السّبعة سنين و الخمسطاش سنة...توّا بما أنّو الجّالغ معدّل العمر متاعو زاد نظرًا للتّقدّم في المجال الطّبّي و زيد حقوق الإنسان و غيرو كثرت الجّلغ و حسب آخر الإحصائيّات على كلّ ثلاثة أفّام مأخوذين بالزّهر لازم باش يطلع واحد منهم جلغة
.أحسن طريقة باش نفسّرو بيها كلمة الجالغ هي التّالية. أيّ واحد منّا في حياتو سبق و تجولغ و عادة النّاس العاديّة تقعد تتذكّر التّجوليغة متاعها... بالطّبيعة على خاطر ردّة الفعل متاع العباد باش تكون خايبة و أي واحد عندو همّة يقعد يتذكّرها و زيد في اللّحظة إلّي خرجت فيها الكلمة تبدى تندم و تحسّ إلّي إنتي زلعتها....هذيكا هي وقتها تحسّ إلّي إنتي عندك جلغة موش فمّ...الجّالغ هو إلّي الحالة هاذي تتكرّر معاه ديما لين يولّي ماعادش يحسّ...مثلاً الجالغ في بلاصة ما يقول صحّة يقول صدّاف و مثلا باش يقلّك شكرا يقلّك موش بمزيّتك راهو و هو لهنا أيّ واحد ماهوش جالغ يقول شكرا على خاطر الكلام بلاش و لكن الجالغ عندو جاذبيّة للكلام الماسط
ثمّة مثل يقول ياعمّ الفرطاس أعطيني حويرة أنزاص...قالّو على جوابك الطّيّب أتو نختارهولك فيّالي لهنا يضهرلي عنّا مثال واضح على واحد جالغ معناها صحيح إلّي هو الرّاجل فرطاس أمّا زايد تقول فيها الكلمة مثلاً واحد قبيح يقولها صحيح أمّا كي يبدى يتعارك مع السّيّد موش يقضي من عندو... هذاية تفسير معمّق إل كلمة جالغ إلّي واحد مالنّاس تضهرلي تأدّي المعنى بصفة غريبة في بعض الحالات إلّي ما تفهمش فيها علاش العبد هذاكة قال الكلمة هذيكة و المشكلة في الجّالغ حسب تجربتي المتواضعة إلّي مافيهش دوا بما أنّو موش مسيطر على جلغتو على عكس القبيح إلّي بشويّة خلطة مع العباد و خبرة ينجّم يتصلّح...أكهو هذا بالنّسبة لكلمة جالغ و كان مبعّد هذا الكلّ مافهمتش معناها راك زكيم...عاود ورايا زكيم...إنشالله نفسّروها مرّة أخرى.

21 commentaires:

brastos a dit…

هههههههه
يا دوعاجي
اش خليتلنا باش نقولو معاك
ههههههههههه
حلوّة ياسر حكاية الجاذبية متاع الجالغ للكلام الخايب
هههه
.. حبيت نزيد حاجة..انّو الجالغ ما يفكّرش بمخّو..
يفكّر بجلغتو
هههههه

Sosso a dit…

nawwratni, menna wghad mesh nwalli nosber 3ala barcha nes 5ater jwelegh (c'est ça le pluriel ?)tout simplement (wenzid ndawwar lseni sab3a marrat 3assab3a mte3 essona la netjouligh ).

ولد بيرسا a dit…

أقرب مرادف لكلمة جالغ هو: جلطام
و الأمثلة عديدة و متعدّدة متاع الجّلطامة و الجّوالغ على البلوقوسفار
و الجّلغة في الأصل هي فمّ البهيم (على حسب ما نتذكّر طبعا)؛
و من ثراء اللّهجة التونسيّة، أنّو مثلا كيما قلت خويا الدّوعاجي، كشخة و جلغة عندهم حسب التقريب فرد معنى، لكن كاشخ و جالغ عندهم معاني بعيدة على بعضهم
الجالغ هو الّي يحلّ فمّو باش يتجلطم (أو يحلّ علينا قمّة، و هو مرادف شباب زادا ، ماهوش دوني بالكلّ)؛
و الكاشخ هو الّي يحلّ فمّو بالبهتة .... معناها الكاشخ هو الباهت
و تقال خاصّة وقتلّي الواحد يبهت في حاجة شافها، مثلا طفلة مزيانة ياسر و الاّ واحد يحكيلك حكاية بيدونة ياسر
و لهنا باش نفتح قوسين خاطر تفكّرت نكتة، متاع هاك الّي ديما باهت، نهار قام يلقى روحو موش باهت ياخي بهتْ .....هي هي هي هي هي
حاسيلو

و رغم أنّهم كشخة و جلغة عندهم فرد تركيبة، فانّو الأفعال المنسوبة ليهم مختلفة
معناها:
الكاشخ نقولو عليه: يكشخ
و الجالغ تقولو عليه: يتجولغ
شفتو كيفاش؟؟؟؟

eddou3aji a dit…

@ brastos :
صحيح الجالغ ما يفكّرش بمخّو مانعرفش بالضبط هل يا ترى يفكّر بجلغتو و إلّا بصبع ساقو الكبير و إلّا حاجة أخرى مانّجمش نقولها لهنا أمّا مايفكّرش بمخّو ههههههههه

@ Sosso :
جمع الجّلغة هو جْلَغْ بالنّسبة إل جالغ يضهرلي جالغين أمّا حتّى جوالغ مزيانة. الصّبر و أكهو آش عندك تعمل ههههههه

@ weld byrsa ;
هايل التّحليل متاعك....هيّا تجي نعملو ديكسيونار دارجة/دارجة هههههه....موش نورمال الثّراء في الدّارجة حتّى الجلطام قريبة ياسر إل جالغ أمّا الجلطام فيها شويّة معنى متاع جيبان مشاكل وقتلّي الجالغ كلامو ماسط ماغير سبب واضح و موش بالضّرورة مربوط بالمشاكل. يعطيك الصّحّة على الإضافة الهايلة

Anonymous a dit…

Ton cas est tres grave!! yelzmek tchouf toubib wella temchi t3aress!!
9allou jale5 ...

eddou3aji a dit…

@ anonyme :
Merci de donner une illustration du mot. 7adher rou7ek lel kelma ejjayya bech ta3mleleha illustration. El kelma zekim :)) just be yourself.

ولد بيرسا a dit…

نعملوها امّالا لا؟؟؟
آش عندنا نصنعو؟ الدّارجة راهي ثريّة ياسر .... و ما هوش تفدليك راهو
على خاطر الدّارجة لهجة حيّة، ماهاش خارجة مالكتب. كلّ يوم يتزادولها كلمات جدد و عندك ما تحكي عليها

Anonymous a dit…

Chay ma jibtech fiha!!
selon ce k t'as dit, hedi tatle3 jaltam :)))) et je m'attendais à ton commentaire...
Ça se voit, tekteb wè mo5ek mouch m3ek :P
rak .... fih :P

brastos a dit…

tiens ... en voilà un exemple
امّا شبيه متنكّر عاد
???

Anonymous a dit…

ya si brastos, mtnakker 3lè 5atrou mouch intello ki touensa el kol, surtout jme3ett les blogs ;)

ART.ticuler a dit…

@ dernier anonyme des anonymes:
jme3ett les blogs ne sont pas des intello!la preuve,ils acceptent encore de discuter avec un jaltam en 3D !

eddou3aji a dit…

@ weld byrsa :
Hayya emmela men 7inek :) Kol ma yabda 3andi wa9t taw nzid kelma fel rubrique ou enti zeda a3mel nafs la7keya ou kan lammina 7aja bahia mba33ed modda taw nchoufou kifech na3mlou.

@ anonyme : la ou enti essada9 hadhi jalegh ou rkik ou zid men fou9 mkabbech :))

@ brastos :
jalegh ou metnakker ou lokza :))

@ anonyme :
3ayyechou intello :)) echbih ou barra jahel mouch 3ib rahou tnajjem t9oul esmek :))
@ art.ticuler :
ti sayyeb 3lik mennou ouji3et rass zayda. yebki ellame 3ajjaltame ou yebki la7did 3al blid :)))))

Anonymous a dit…

hahaha themma anonyme we7ed sur ce post :P
ya art.ticuler, hedhi dar dou3ejji :) we dou3ejji ye3jebni 3lè 5atrou metmelle7 mè tor7, ou93ed raydh 3lè rou7ek lè injik lil blog mte3ek wè inmaset-helek :)...

Wenti ya dou3eji, ma ta3rfouch esmi?? Anonyme, ma 3ijbekchi
Concernant, jaltam, jalegh, mkabech... (zid tawell la liste), in9oulek ena 3zouza wè ma yhemha 9arss...
hak tbarkallah t3elemt hezen el 9ouffa, jdida hedhi...

Ca se voit enness el kol 9al9a (wena zeda), hani inji l'hna bech ndhaye3 chouya wa9t et en meme temps inchouff les intello ettwensa el moutwadh3in (//clin d'oeil à articula...//)

Bel Malwene a dit…

هههههههههه !!! قتلتني بالضحك يا دوعاجي !!! ... و ضهرلي فيك بالعاني جايب هالكمشا أنونيم بيش تزيد تفهّم معنا كلمت جالغ ...هههههههههه

@ Anonyme : (منيش عارف اناهو منهم)
بالله برّا شخّ و أرقد ... و يزي مالتجوليغ الزايد ... و كانك ما فهمتش كلمة "شخّ" ستنى الحلقات الجاية تو يجيك تفسيرها

misscook a dit…

hbel, post tayyara , yfatta9: maw hekka y9oulou fi loughetna walla lahjetna eddarja elhlowa wel 7ayya illi ma matetch we wellet thria ( riche ) yasser!!! ama ya dou3aji ya 5ouya mademek wellit ikhtisassi fil "el klem" rahom y9oulou "iji y9oul sa77a y9oul saddef" bessine mouch bessad!

eddou3aji a dit…

@ anonyme :
يزّيتشي توّا أهفت ريض و سيّب الجّماعة و إلّا ما عادش نجيبك معايا ههههههه
@ bel malwene :
هو و قيل أنونيم واحد أمّا تبارك الله عليه ناشط ههههههه آهو عالأقلّ المرّة هاذي أنونيم صلح إل حاجة و هوما كي خنافس الخ... حاشاك لا يتّاكلو لا يتلعب بيهم هههههه
@ miss cook :
أهلا ميس، عيّشك ع المعلومة متاع السين، أنا حطّيتها حسب التّقريب ضهرتلي في نطقها أقرب للصّاد. شفت خسارة ما قرّاوناش دارجة و عملولها قواعد. تستحقّ لوغتنا أمّا خسارة. و خاطيني السّبسياليزاسيون هههههه تخنتيب و برّة ههههه

Anonymous a dit…

Tbarkallah 3lik ya si dou3eji, 5nefess... dhaher 3ayech fi 5eba... ma yselech taw touslek el 7adhara ... wel 5nafess rahom yousl7ou fi edenia...


Si bel-elwen wella noir et blanc, ech 7ra9 ch3irek... yjib anonymett wella ma yjibech ech 9al9ek inti!?? 5alej wella haj klouf wella 7erza mte3 7amem... Ridh 3lè rou7ek wè ched ton blog 5irlek, wella a7ssenelek barra saffi telfeztek, mella 7ella...

Anonymous a dit…

Wenti ya misscook, wa9tech mech etayebli le plat illi tfehemna 3lih?? :)

misscook a dit…

@anonyme: sara houa inti il anonyme ill jit lkoujinti? awel marra blog mta3 tatib ijih wehed anonyme ...tihak tbarkallah ma mfellet hadd!!
isma3 rahom ykoulou fi lahjetna ettounsia el assila " harza" mouch "herza " hani bech incheddelkom goal ennes elkoll bech ta3rfou ech t9oulou, rahou mouch le3b, rahou tourath loughawi lezem inhafdhou 3lih
@ dou3aji : brabbi hottelna fil barnemej kelemt " gamet "...3ala khater 3andi far3 fi 3ayelti i9ouloulhom dar " elgmati" met9al9in barcha we ihebbou ibaddlou ella9ab mte3hom melli hel kelma elaziza dakhlet 3alina

eddou3aji a dit…

@ Misscook :
:)))) allah ibarek taw nchoufou kelmet gamet el marra ejjayya :))

Anonyme a dit…

Heу! Quісk question that's totally off topic. Do you know how to make your site mobile friendly? My blog looks weird when viewing from my apple iphone. I'm trying tο
finԁ a theme οг plugin that might be able tο fіx this pгοblem.
If уou have аny reсommenԁаtiοns,
pleаse shаre. Thank you!

my webρаgе: Fathers Day Gift Baskets For Sale