عالم مهبول

نهار إثنين و عشرين نوفمبر نهار مهمّ برشا في حياة جون لينون بما أنّو من بعّد أربعة و أربعين سنة تشوشيط في جهنّم سلّكها و سامحتّو الكنيسة...و نورمالمون طلع للجنّة و هو يتسمّى سلّكها على خاطر جاليليو ضرب ثلاثميات سنة يا بو قلب قبل ما يسامحوه و يمشي يتشعلع في جنّة الخلد... الحاصل هو المشكل الكل إلّي هو قال إلّي البيتلز معروفين أكثر من عيسى و البابا حسّها الحكاية و ماعجبتّوش و قامت القيامة اليوم قالّك نسامحوه على خاطرو طفل صغير و هربت بيه كي تشهر... أنا نتصوّرو كان جا حيّ راهو سمّعهم وسخ وذنيهم... و يمكن هذاكة علاش ستنّاو لين تأكّدو إلّي هو مات على قاعدة صحيحة

من جهة أخرى ( أهوكة كي الأخبار باش ما تقولوش هكّاكة و برّا) قالّك الشّناوة متّهمين أكسال روز إلّي يحبّ يتزعّم العالم و إلّي هو جزء من مؤامرة غربيّة للسّيطرة ع العالم بإستعمال الدّيموقراطيّة كطعم... يا سلام... وبالطّبيعة حجبوه ع الشّناوة على خاطرو اللّطف ينجّم يردّهم خونة و عملاء للغرب...و الله أنا نقترح نضمّو الصّين لجامعة الدّول العربيّة مع فينيزويلا كان شافيز نجح باش يولّي رئيس مدى الحياة هكّاكة الغرب ينجّم يعمل المؤامرة الكلّ فرد بلاصة ما يقعدش يتآمر عليهم كل واحد وحدو و يضيّع التّركيز و زيد هوما مايغيروش من بعضهم... شبيه اليوم لاهي يتآمر على فينيزويلا و ما تآمرش علينا حتّى شويّة.... و شبيه هوما باعثلهم أكسل روز و نحنا بعثلنا رسّام كاريكاتور موش معروف....و هكّاكة النّاس تشيخ بحكاية المؤامرة

الفاتيكان خايف من مغنّي مات عندو فوق العشرين سنة و الحزب الشّيوعي الصّيني خايف من غناية... كيف ما يقولو ناس قبل

المجراب تهمزو مرافقو