Take it easy يا عزيزي

هو راهو و برّة عملو جمعيّة؟؟ موش عيب...تصير في أحسن العايلات...شنوّة المشكل؟؟ إلّي يحبّ يدخل يتفضّل و إلّي مايحبّش موش لازم...و الحياة حلوة...أنا رايي في الجمعيّات و النّقابات واضح و صريح...ماهاأّه...معناها لا هاذي لا الجّايّة لا إلّي مبعّدها... هو حتّى حدّ ما طلبني في رايي أمّا شبيني آش ناقصني حتّى أنا نحب نحكي على المجلس التّأسيسي الأوّل للثّورة التّدوينيّة الجماهيريّة الشّعبيّة العظمى و ندخل للتّاريخ من الباب الكبير.

أنا تضهرلي مشكلة التّخنتيب هذا و إلّا التّدوين بما أنّو ولّا ميدان و إلّا قطاع كامل...و واقفة عليه شطر البلاد تستنّى في العسل من إحّم إحّم... التّخنتيب هذا فيه برشا يخنتبو و شويّة يقراو...معناها إلّي يخنتبو هوما بيدهم يقراو و ساعات لا... ما يقراوش جملة...يخنتبو بركا...أنا ساعات نشكّ إلّي ثمّة عباد ما تقراش حتّى إلّي تكتب فيه هيّ و هذا يفسّر علاش موش مفهوم

الحاصل موش هاذي الحكاية...إستنّى فين وصلت...إيه...عاد الجّماعة إلّي تكتب من بعّد مدّة تتنبز إلّي ما ثمّاش برشا عباد تقرا و إلّا العباد إلّي تقرا ما جات شي...و إلّا ما هيش مركّزة معاهم... و إلّا حكاياتها ما تهمّش حتّى حدّ...و هذا معقول...واحد يتنبز أمّا التّخنتيب يقعد تخنتيب..معناها كانك كاتب راك كاتب و تزيد تحلّ مخنتبة باش تسجّل حضورك ع الواب و تعمل السّينرجي مع البلايص الأخرين إلّي موجود فيهم و كانك صحافي كيف كيف...ماكش باش تولّي صحافي إب مخنتبة أمّا مخنتبة تنجّم تعاونك كانك موسيقي ماكش باش تخدم كان في المخنتبة متاعك يلزمك زادة تخدم شويّة مهرجانات و عرابن كونشي تموت بالشّرّ...و كانك سياسي...ليّا و ليك ربّي ما عندي ما نعملّك أمّا مخنتبة زادة ما عندها ما تعملّك وحّدها...و أنا باش نقدّم إقتراح بما أنّو المشكلة الكلّ في قلّة القرّاء و نحنا مانحبّوش الجّماعة تجيها حالة إحباط و ماكم تعرفو الوقت هذا متاع العام هو وقت الدّيبريسيون و نعاونو بعضنا...موش كيف حسين ديراكت طيّحلهم المورال الجّماعة الكلّ و كان يدبرمو توّا؟؟ و إلّا مانعرفش أنا تجرالهم حاجة ؟؟؟و ترصّيلنا في حل و أربط

أنا نقول بما أنّو ثمّة خمسميا قاعدين يخنتبو و ثمّة ثلاثة و إلّا أربعة قاعدين يقراو...نولّيو نعاونو بعضنا...أهوكة الخمسميا نقسمو بعضنا و ميتين و خمسين يخنتبو بالأيّام الفرديّة و ميتين و خمسين يخنتبو بالأيّام الزّوجيّة... و إلّي يخنتبو في الأيّام الزّوجيّة يقراو في الأيّام الفرديّة و إلّي يخنتبو في الأيّام الفرديّة يقراو في الأيّام الزّوجيّة...و هكّاكة حتّى حدّ ما ياخو في خاطرو و النّاس الكلّ يقراوولهم النّاس الكلّ و إلّي باش يخدم أديب في المخنتبة متاعو يخدم على روحو و إلّي باش يخدم صحافي في المخنتبة متاعو يخدم و إلّي باش يعمل سياسة أمورو و آش مدخّلنا فيه...ثمّة حتّى إلّي قد ما حاول باش يحجبوه و طفّاوه..تي ماهو نعاونو بعضناعالأقلّ و أهوكة نمشيو نقراولو ثمّاشي ما ينوب عليه ربّي بحجب و إلّا مانعرفش حتّى طريحة في المركز متاع الحومة...تي خير من بلاش

الحاصل أهوكة أنا هاذي الفكرة متاعي و ماكم تعرفو شنيّة الدّنيا هي؟؟؟ تي ماهي ماخذة بالخاطر...أ هوكة نقراو لبعضنا و مرّة عندي و مرّة عندك ...و إلّي يحكي على سبب إنقراض الدّيناصورات و إنتي الموضوع ما يهمّكش برشا إي شبيه!! إمشيلو و طلّ عليه و خلّيلو كومونتار كان لزم ..الدّنيا الكلّ ماخذة بالخاطر...هكّاكة نلقاو بعضنا مادام ما ثمّة شكون يقرا و نحنا محسوب أصحاب كار واحد و إلّي يضرّك يضرّني...هكّاكة القطاع / ربّي يتولّاكم في هالكلمة ههههه/ ملّا قطاع / يتفرهد و يدور الدّولاب و من هنا إل عام ألفين و عشرين وقتها يولّي ثمّة أورديناتور و كونيكسيون محترمة في كل دار يولّي القطاع يُعبِر.

هيّا سيدي حلّو اللّعب و خلّي إلّي يحبّ يعمل حاجة يعملها و يزّيو بلا تطييح مورال