samedi 29 novembre 2008

Take it easy يا عزيزي

هو راهو و برّة عملو جمعيّة؟؟ موش عيب...تصير في أحسن العايلات...شنوّة المشكل؟؟ إلّي يحبّ يدخل يتفضّل و إلّي مايحبّش موش لازم...و الحياة حلوة...أنا رايي في الجمعيّات و النّقابات واضح و صريح...ماهاأّه...معناها لا هاذي لا الجّايّة لا إلّي مبعّدها... هو حتّى حدّ ما طلبني في رايي أمّا شبيني آش ناقصني حتّى أنا نحب نحكي على المجلس التّأسيسي الأوّل للثّورة التّدوينيّة الجماهيريّة الشّعبيّة العظمى و ندخل للتّاريخ من الباب الكبير.

أنا تضهرلي مشكلة التّخنتيب هذا و إلّا التّدوين بما أنّو ولّا ميدان و إلّا قطاع كامل...و واقفة عليه شطر البلاد تستنّى في العسل من إحّم إحّم... التّخنتيب هذا فيه برشا يخنتبو و شويّة يقراو...معناها إلّي يخنتبو هوما بيدهم يقراو و ساعات لا... ما يقراوش جملة...يخنتبو بركا...أنا ساعات نشكّ إلّي ثمّة عباد ما تقراش حتّى إلّي تكتب فيه هيّ و هذا يفسّر علاش موش مفهوم
الحاصل موش هاذي الحكاية...إستنّى فين وصلت...إيه...عاد الجّماعة إلّي تكتب من بعّد مدّة تتنبز إلّي ما ثمّاش برشا عباد تقرا و إلّا العباد إلّي تقرا ما جات شي...و إلّا ما هيش مركّزة معاهم... و إلّا حكاياتها ما تهمّش حتّى حدّ...و هذا معقول...واحد يتنبز أمّا التّخنتيب يقعد تخنتيب..معناها كانك كاتب راك كاتب و تزيد تحلّ مخنتبة باش تسجّل حضورك ع الواب و تعمل السّينرجي مع البلايص الأخرين إلّي موجود فيهم و كانك صحافي كيف كيف...ماكش باش تولّي صحافي إب مخنتبة أمّا مخنتبة تنجّم تعاونك كانك موسيقي ماكش باش تخدم كان في المخنتبة متاعك يلزمك زادة تخدم شويّة مهرجانات و عرابن كونشي تموت بالشّرّ...و كانك سياسي...ليّا و ليك ربّي ما عندي ما نعملّك أمّا مخنتبة زادة ما عندها ما تعملّك وحّدها...و أنا باش نقدّم إقتراح بما أنّو المشكلة الكلّ في قلّة القرّاء و نحنا مانحبّوش الجّماعة تجيها حالة إحباط و ماكم تعرفو الوقت هذا متاع العام هو وقت الدّيبريسيون و نعاونو بعضنا...موش كيف حسين ديراكت طيّحلهم المورال الجّماعة الكلّ و كان يدبرمو توّا؟؟ و إلّا مانعرفش أنا تجرالهم حاجة ؟؟؟و ترصّيلنا في حل و أربط
أنا نقول بما أنّو ثمّة خمسميا قاعدين يخنتبو و ثمّة ثلاثة و إلّا أربعة قاعدين يقراو...نولّيو نعاونو بعضنا...أهوكة الخمسميا نقسمو بعضنا و ميتين و خمسين يخنتبو بالأيّام الفرديّة و ميتين و خمسين يخنتبو بالأيّام الزّوجيّة... و إلّي يخنتبو في الأيّام الزّوجيّة يقراو في الأيّام الفرديّة و إلّي يخنتبو في الأيّام الفرديّة يقراو في الأيّام الزّوجيّة...و هكّاكة حتّى حدّ ما ياخو في خاطرو و النّاس الكلّ يقراوولهم النّاس الكلّ و إلّي باش يخدم أديب في المخنتبة متاعو يخدم على روحو و إلّي باش يخدم صحافي في المخنتبة متاعو يخدم و إلّي باش يعمل سياسة أمورو و آش مدخّلنا فيه...ثمّة حتّى إلّي قد ما حاول باش يحجبوه و طفّاوه..تي ماهو نعاونو بعضناعالأقلّ و أهوكة نمشيو نقراولو ثمّاشي ما ينوب عليه ربّي بحجب و إلّا مانعرفش حتّى طريحة في المركز متاع الحومة...تي خير من بلاش
الحاصل أهوكة أنا هاذي الفكرة متاعي و ماكم تعرفو شنيّة الدّنيا هي؟؟؟ تي ماهي ماخذة بالخاطر...أ هوكة نقراو لبعضنا و مرّة عندي و مرّة عندك ...و إلّي يحكي على سبب إنقراض الدّيناصورات و إنتي الموضوع ما يهمّكش برشا إي شبيه!! إمشيلو و طلّ عليه و خلّيلو كومونتار كان لزم ..الدّنيا الكلّ ماخذة بالخاطر...هكّاكة نلقاو بعضنا مادام ما ثمّة شكون يقرا و نحنا محسوب أصحاب كار واحد و إلّي يضرّك يضرّني...هكّاكة القطاع / ربّي يتولّاكم في هالكلمة ههههه/ ملّا قطاع / يتفرهد و يدور الدّولاب و من هنا إل عام ألفين و عشرين وقتها يولّي ثمّة أورديناتور و كونيكسيون محترمة في كل دار يولّي القطاع يُعبِر.

هيّا سيدي حلّو اللّعب و خلّي إلّي يحبّ يعمل حاجة يعملها و يزّيو بلا تطييح مورال



10 commentaires:

ART.ticuler a dit…

ههههه يا دوعاجي يا أبلد بليد ..هههه : أنا ساعات نشكّ إلّي ثمّة عباد ما تقراش حتّى إلّي تكتب فيه هيّ هههههه
قتلتني بالضحك.... مازلت كيف كتبت تدوينة جديدة عنوانها :أجمل ما قيل في المدونات و اسمك موجود فيها..

WALLADA a dit…

أنا عمري ما طيّحت معاك القدر لكن سامحني باش نقولّك اليوم ظهرت بليد ياسر هههههههههههه قتلتني بالضحك الطلعة متاع تقسيم التدوين على الأيّام الفرديّة و الزوجيّة
اللّه يتولاّك

khanouff a dit…

ya bliiiiiiiiiiiiiiiiiiiiiiiiide :))
Très beau ce que tu as mis, léger et profond à la fois, fortement humoristique et sérieux aussi, et enfin, même si j'éprouve beaucoup de peine à lire le dialectale arabe j'ai pris un plaisir à te lire et à beaucoup sourire, alors merci beaucoup que des "Dou3ajji" comme toi la blogosphère aura des milliers.
Bon dimanche :)

ferrrrr a dit…

ما تتصورشي قداش عندك الحق، هذا في المضمون اما الشكل: ضمار تونسي
signé

HNANI a dit…

كلام يضحّك لكنو في الواقع يوجع القلب
لا شيء في هالبلاد يتعمل عن قناعة و أسس صحيحة، كل شيء بالحسابات و العسّان و توفي بكولني ناكل و شكون يغلب
أنا بديت التدوين باش نحكي حكايات حبيت نحكي فيها، كيف تفريغ قلب لا أكثر و لا أقل... حاجات اتمسني كيف ما تمس التوانسة العاديين الكل...
لا عمري فكّرت باش ننتمي لأي مجموعة مهما كانت، الإنتماء بالنسبة ليا، قيود و قيود ، وأحنا في بلادنا ماناش ناقصيد قيود
عاد التدوين بالنسبة ليا كيف ما واحد يدخل للخلوة باش ينتخب، أنا ندخل للمدونة باش نحكي حكاياتي
بالوقت ، لقيت روحي من غير ما نشعر ننساق في حملات، كيف نهار كذا و نهار كذا، الحقيقة أنا مقتنعة بالمواضيع لكني مانحبّش انقيّد تفكيري بالنهارات... مانحبّش اليوم الوطني لكذا و الشيء.. اتفكّرني في واحد حياتو كاملة ما يقوم بواجبو مع عايلتو كان في المناسبات و بوجود شهود... اتنرفزني الحكاية
فمّا مرّات لاحظت الحزازيات و طرق عقاب مدونة ما، مانيش باش انقلّك كيفاش، ماك تعرف هناني تفهمها و هي طايرة، من عند ربي راهو هههه
و ما كنتش موافقة على الطرق، و كنت مقتنعة إلّى الأمور ماشية للهاوية كيف كل حاجة تونسية ، تبدى بحماس و الشكر و المديح و من بعد العرك و المعروك و في النهاية الذوبان
نتمنى أنو هالمجال متاع التدوين يكذّبلي قناعتي... و العقلية تنضج شويا
أيا يزّيني اتحلّيت في الحديث و يلزمني انقص

eddou3aji a dit…

@ art.ticuler

شكرا أرتيكولي

@Anonyme :

هيّا إمّالا صحّة الحصان ههههه

@ wallada :
خوذ راحتك يا ولّادة ههههه هيّا آش إخترت الأيّام الفرديّة و إلّا الزّوجيّة؟؟ ههههه
@ khanouff:
:))) Merci khanouff... Ca fait plaisir ;)
@ ferrr:
عيّشو الفرررر...زايد معاك

@ hnani
يا هناني وحدك... أحكي قد ما تحب هوني الدّار دارك و الباقي إنتي فرهد على قلبك و فرهدنا معاك و الباقي الكل حكايات فارغة

Bachbouch a dit…

Please don't get a life ( as Houssein asked you too ) and keep writing... Iktib ya dou3aji we cha3lik fi chkoun ya9ra. ken lzim taw nichriw 9orra2 min china :)))

eddou3aji a dit…

@ bachbouch:
Wallahi kifech ghabet 3liyya fekrette el 9orra2 men china :)))) hadhi 7lowwa yesser :))) ou 7atta elli yektbou njibouhom men ghadi zeda :)) itabbe3ou la ligne du parti communiste et yetnadhemou fi jam3eyyette wa77adehom
wa77adehom :)) wallhi 7all lel machakel el kol :)))

Anonymous a dit…

topic81, [url=http://www.chop.edu/forum/user/profile/8207.page]buy klonopin[/url], :-( lem, http://www.chop.edu/forum/user/profile/8207.page buy klonopin *sorry*, [url=http://www.chop.edu/forum/user/profile/8208.page]order xanax 2mg[/url], ;-( tqq, http://www.chop.edu/forum/user/profile/8208.page order xanax 2mg *sorry*, [url=http://forum.cprs.ca/default.aspx?g=posts&m=6]order adipex[/url], ;-( odi, http://forum.cprs.ca/default.aspx?g=posts&m=6 order adipex *sorry*, [url=http://forum.cprs.ca/default.aspx?g=posts&m=7]buy alprazolam without prescription[/url], ;-( oqt, http://forum.cprs.ca/default.aspx?g=posts&m=7 alprazolam no prescription *sorry*, [url=http://forum.cprs.ca/default.aspx?g=posts&m=8]ambien no prescription[/url], :-) mqp, http://forum.cprs.ca/default.aspx?g=posts&m=8 ambien no prescription :-(

Anonyme a dit…

Thiѕ teхt is wοrth everyоne's attention. Where can I find out more?

my blog post - Beleuchtung für schmuck fotostudio