77777777777777777777777

والله و راس معزّتكم عندي و ما عندكم علاش تحلّفوني يا ما عندي حتّى ربع أدنى مشكلة مع نومرو سبعة...عندي كيفو كيف الواحد و إلّا الثنين و إلّا ثلاثة و إلّا غيرو... تي حتّى كي تجي تشوف العالم أجمع يقلّك بورط بونور و ماحلاه و زيد الفاتحة فيها سبعة آيات و إلّي جابولنا الإسلام العبادلة السّبعة و إلّي لحقو بالجّرّة سبعة... نومرو كي النّوامر الأخرين و مذخم الحلّوف هكّا جايّ متهنكر و صدرو عريض و زفالت... ما عندي حتّى مشكلة معاه هو إلّي مارجني...و الله تقولشي تابعة ملّي صغير و هو في جرّتي....الأيّامات متاع الجّمعة قدّاش؟؟ سبعة بالزّهر زعمة؟؟؟ علاش موش ستّة علاش موش ثمانية؟؟ والله عاملين عليّ بالعاني.... عجائب الدّنيا قدّاش ؟؟ سبعة...السّلّم الموسيقي؟؟؟ سبعة.... كي كنت نقرى و ناخو الكار الشّارع إلّي نتعدّى منّو كان إسمو الرّوتيكس أنا كبرت و هو ولّى شارع سبعة... التّلفزة في بلادي قناة سبعة... نومرو الفيكس في دارنا كان صفر واحد أنا كبرت و هو ولّى سبعة واحد...و الله شي يمخوج... كان جيت شكّاك هكّا و حسّاس نقول ثمّة شكون عامل عليّ بالعاني و قاعد يعدّي في وقيّت و شايخ عليّ بالضّحك...

هو ا لشّكبّة كي تتعلّمها أهمّ حاجة السّبوع و إلّا البرميلا و خلّي عاد مالسّبعة الحيّة تي هاذم بركا زوز بونطو....نومرو سبعة في الكورة ديما تلقاه عامل بأعمالو و يقلب في الأطراح من تميم إل جمال الإمام إل زبير بية ( و الله نتزوغب بكلّي كي كتبت بيّة أمّا الله غالب ملزوز) و زيد بيكام كانتونا ....تي هوما حتّى السّماوات يا بو قلب سبعة... و قلّي هكّاكة موش بالعاني... أنا شاكك ثمّة مؤامرة...

قلت يا سيدي بالكشي من تونس الحكاية و ماك تعرف ركاك التّوانسة و هكّا يبداو يقرصو و يدّهم تحتهم و شايخين عليك و دقيقة دقيقتين سبعة و السّابع متاع الطّهور و السّابع متاع النّافسة و السّبوعي و هاك المسبوعة هاذيكة و سبعة سنين عليّ تعدّو و لرقم السّبعة سنغنّي برّا يا سيدي خرجنا باقي هالنّومرو سبعة عابدني و المعبود ربّي... نوامر التّاليفون هنا موش ستّة سبعة...تحلّ التّلفزة...سيفن....سات مارسونار....سات ساموراي..سيفن آب.... اليوم إقتنعت إلّي ثمّة حكاية... قمت يدّي توجع فيّ مشيت للشّاف قتلو ما نخدمش... قالّي ميسالش إيجا عاونّي بالكتيبة....اليوم كتبت الدّات قرابة خمسين مرّة...تقول معاقب....سبعة نوفمبر ألفين و ثمانية....سبعة سبعة سبعة سبعة

Fascinant chiffre 7 - kewego
Fascinant chiffre 7

Keywords: documentaire religion information être humain étude fascinant superstition croyance renseignement ethnologie nombre chiffre 7 numérologie bienfait méfait

Video from videosdefan