قالّو الصّومال !!!

قالّك الصّوماليّين فتّقوهم من بعضهم الباطّوّات إلّي متعدّين من شيرتهم... و آهم كل مرّة طالبين مليارات و يفرّقو في الفلوس ع الشّعب الفقير....و لله كي سمعت تغشّشت ....برجوليّة برجوليّة ما عجبتنيش الحكاية....تي هاذي متاعنا السّاعة...تغيض !!!! تي أحنا في دمّنا البيعات هاذيّة و كان ثمّة شعب يلزمو يتقرصن و إيبيراتي راهو أحنا

تي هو حتّى حمايةً لتراثنا و عاداتنا نورمالمون نبداو نحنا الأوّلانين و ما نخلّيو حدّ يخدم في القلم هذا ما غير ما يشاورنا....قالّو الصّومال...تي متاعنا الشّي هذا و حتّى كي تشوف في شجرة العايلة متاعك كان ما لقيتش قرصان راك باش تلقى قاطع طريق في الصّحرا....عيب و الله عيب تي هاذي من إخّر الحاجات إلّي قعدنا نبهبرو بيهم ع الأمم و عنّا فيهم كيفاش يقولو هوما متاع الأخبار الكفاءة و الإمتياز...و زيد توّا وقتو...الله أعلم بينا الإسّونس بأربعطاش ميا... و درا قدّاش من باطّو باش يفغّم بالمازوط متعدّي قدّامنا... تي ماهو ناخذو باينا...هي كي تجي تشوف حتّى مشكلة الحرقة و البطالة تتحلّ...إنتي في بلاصة هاك الوليّدات داخلين للبحر هكّاكة موش عارفين على رواحهم و ما عندهم حتّى برنامج...رانيهم و علّمّهم كيفاش يسقطو ع الباطوات تو تشوف... إلّي ما يجيبو العجب...تو تولّي قطايع المارينز تتباع بدينار في الحفصيّة و حد ما يشريهم

تي شي يفدّد حتّى هاذي باش ينحّيوهالنا و عينينا تخزر...تي شوف إنتي حتّى العِرق يجبد كل حاجة إسمها بيراتاج تلقانا الأولانين فيها...هذاكة إن دلّ على شيء فإنّه يدلّ على ولد الفار يطلع حفّار...النّطرة ما عنّا ما خاصّنا...شبينا؟؟؟ جرّب حطّ تاليفونك ع التابلو دو بور...كان عندك تاليفون

و الله تغيض... أنا وجعتني...آش عندهم زايد علينا الصّوماليّين...أنا كان جا بيدّي من غدوة نبدى نكوّن في المفرخة باش يبداو يخدمو على رواحهم...و ما نفهم شي...أسرح جيب عشاك.... تكوين باهي و من بعّد إقسمهم مجموعات صغار....كلّ شلّة حطّلها قرصان كبير يحكم فيها... و سيّبهم يعومو بحرهم...و باش ما يعملونّاش العار إلّي تشدّ أهوكة نقولولو قول دزيري و إلّا مغربي

هي أبنّ حاجة في الحكاية إلّي إنتي كلّ شلّة باش تحط عليها قرصان كبير و لهنا إنّجّمو نعملو كي الأنقليز...قبل كانو يشدّو الشباب الواصل إلّي يبدا عايث في لندرة فسادًا و يبعثوه مع البحريّة...أهوكة كان مات يولّي بطل و شرف للعايلة متاعو إلّي هو مات في سبيل الوطن...و كان قعد حي أهوكة عايث فيها فسادًا بعيد ع العينين و حدّ ما راه و كي يرجع من بعّد مدّة لا يزّي يبدا رايض لا يزّي يبدا عندو خبرة و وهرة بما أنّو قعد حيّ و هذا موش ساهل...عاد نحنا كلّ شلّة متاع حرّاقة و إلّا قراصنة نحطّو معاها شابّ من عايلة بورجوازيّة مخمّجها في تونس و نسيّبوهم يسرحو كان ماتو أهوكة أبطال و كان قعدو حيّين و روّحو بحويجة من بعّد مدّة أهوكة باهي....و نحنا داخلين في الرّبح خارجين مالخسارة.
و الله سامباتيك الحكاية و نضربو برشا عصافر بحجرة...قالّو الصّومال..نبزة خايبة هاذي...أكهو شويّة آخر يقلّك إيريتريا ولّات تعمل في اللّبلابي و إلّا أثيوبيا تصنع في الشّواشي...شي يفدّد

!!!