The Audacity of Hope

اليوم يلزمك تكون أعمى و إلّا أطرش و إلّا متخلّف ذهنيًّا باش ما تسمعش بالخبر متاع أوباما ولّى رئيس متاع الولايات المتّحّدة الأمريكيّة و هو حتّى كان تبدى أعمى و إلّا أطرش و إلّا متخلّف ذهنيًّا باش تسمع يلزمك تبدى أعمى و أطرش و متخلّف ذهنيًّا الثلاثة مع بعضهم باش ما تسمعش و في الحالة هاذي ما نظنّش إلّي الخبر يهمّك برشا و أصلًا في اللّحظة هاذي ماكش تقرى في الشّي إلّي قاعد أنا نكتب فيه توّا و بالتّالي مانيش قاعد نحكي معاك.

اليوم مالصّباح في أعماق غابات التّوندرا وإلّا غابات البورّيّال و أنا نسمع في صيحات الفرح من عند العباد يا هذا إفريقي يو براذر وي وان يا هذا عربي إرتحنا مالكلب الآخر يا كندي فرنساوي تاللومون كيوت لو أوباما و غيرو عاد بديت نعمل في إحتمالات خياليّة كان جا أوباما ترشّح في تونس في إنتخابات حرّة و نزيهة...إيه نعرف قلنا إحتمالات خياليّة موش بالرّسمي نحكي...زعمة يربح؟؟؟ النّاس الكلّ تحبّو توّا و يعجبهم أمّا كان نحطّو نفس الأفكار متاعو و نقدّموهم للشّعب التّونسي الكريم زعمة ينتخبوه؟؟؟ أوّل حاجة إتصوّر مهاجر إفريقي من كينيا جا كمّل قرايتو في تونس و خذا الجنسيّة التّونسيّة ماغير ما يكون كوّارجي و إلّا أرملة متاع رئيس فلسطيني سابق...نعرف صعيب أمّا تصوّرو ميسالش و من بعّد جاب صغير و الصّغير هذاكة قرّاي و عطاوه البورس على خاطر يستحقّها بالرّغم إلّي لونو غامق شويّة و ما عندوش معارف...ميسالش تصوّر...بلاش فلوس التّصوّر...و من بعّد ماغير ما نطوّلوها و هي قصيرة لقى روحو في إنتخابات ضدّ واحد تونسي حرّ أبًا عن جدّ و بشلاغمو...آآآه عندهم قيمتهم الشّلاغم راهم ما تحقروهمش....و زيد السّيّد هذا حارب فرنسا و مناضل قديم...الحاصل أوباما عندو أفكار تقدّميّة كي تقارنو بالسّيّد الآخر مثلاً هو مع زواج المثليّين بالعربي الهوموساكسوال و يميل أكثر للحرّيّات الفرديّة و بالعربي ليبيرالي عالأجناب لهنا ثمّة شويّة تبسيط على خاطر ماعينيش باش نقعد نفصّل في مواقف الرّاجل بالواحد لأسباب ما تخصّني كان أنا...تبسيط على خاطر أوباما ماهوش تقدّمي و إلّا ليبيرالي برشا كيما نستخايل أمّا أبرك من السّيّد الآخر و هو كان جا هكّاكة ما يربحش و لهنا ليبيرالي موش إقتصاديًّا أمّا إجتماعيًّا و فكريًّا قال الرّاجل...الحاصل السّيّد هذا في إنتخابات حرّة و نزيهة في تونس نتصوّرو يجيب عشرة في الميا من الأصوات هذا كان ما ولّاش مسخرة في الجرايد و التّلفزة و هزّ دبشو و مشى إل كينيا و إلّا لهونولولو. بالرّغم إلّي أفكارو بالنّسبة للوقت هذا برشا ناس تنجّم تسمّيها رجعيّة و قديمة كيما رايو في الإعدام و إلّا في التّجسّس على تاليفونات العباد...لكن عنّا نحنا من فكرة زواج المثليّين مسكين مشات فيه و في الحشّاشة شكون مازّال باش يسمعو...عاد من بعّد هالطّريّح إحتمالات خياليّة جيت نخمّم علاش أوباما يعجبنا في أمريكيا و ما يعجبناش كان جا عنّا؟ و هاذي ماهيش حكاية عمّار و لا عمّار بو الزّور حتّى كان نبداو وحّدنا ما ننتخبوهش؟ الأفكار متاع الحرّيّة الفرديّة و المساواة في الحقوق و الواجبات و غيرو ما نحبّوهاش إل توّة...أنا في الإخّر إستنتجت إلّي نحنا ياسر ناس ملاح نحبّو الخير إل غيرنا وموش مشكل أحنا إلّي جا يززّينا... أمريكيا باهيلها كي تبدى بروغراسيست و تبدّل في العقليّة متاعها أمّا نحنا اللّطف علينا شبينا آش ناقصنا هانا هكّة ماحلانا ماحلانا قالّو المساواة في الميراث بين الرّاجل و المرى و إلّا مجلّة حقوق و حرّيّات محيّنة و مواكبة للعصر.

تي هيّا دبّرو ريوسكم...و آش مدخّلني في هالمداخل أنا... بالنّسبة ليّا أنا الرّبح متاع أوباما فيه زوز حاجات مهمّين أوّل وحدة الرّمز

متاع واحد أسمر رئيس أمريكيا... و هذا بالطّبيعة واضح بالرّغم إلّي هو ميتيس و زيد ولد مهاجر جديد و السّمر في أمريكيا الشّماليّة عندهم نوع من الرّاسيزم ضدّ السّمر المهاجرين الجّدد... قوّة السّمبول هذابالنّسبة ليّا إلّي السّيّد هذا مهاجر... من بعّد ما كان المثال الأعلى متاع المهاجر هو المافيا و إلّا يحلّ مشروع اليوم ينجّم هاك الطّفل الصّغير المولود البرّة يكون عندو مثال متاع رئيس. الحاجة الثانية هي رجوع الأفكار متاع التّحرّر و التّقدّم في أقوى دولة في العالم و الرّجوع بقوّة و الحزب الدّيموقراطي معروف إلّي هو الحزب متاع الأقلّيّات و يدافع ع الحرّيّات الفرديّة أكثر من آش إسمو الآخر متاع بوش و الرّجوع بقوّة على خاطر المرّة هاذي ثمّة شويّة حماس و النّفحة رجعت للعباد باش تهتمّ بالسّياسة...إنشالله هاذي البداية و تطلع الحكاية تعدي على خاطر العالم حالتو مكربة بإنتشار

الأفكار الرّجعيّة و المحافظة الأعوام الإخّرة من أوروبا لشمال أمريكيا و غيرهم.

مارتان لوثر كينغ و برشا عباد أخرين اليوم خلطو لشويّة من الحاجات إلّي حبّوهم و ثمّة مثل هايل يعجبني برشا في الحكايات هاذي

يقلّك

مايعجبك في الزّمان كان طولو