القرضة

كلمة اليوم هي القرضة و هي كلمة ممتازة كيما باش نشوفو على خاطرها تفرهد ع القلب و تعبّر على يأس بوه كلب تجاه بعض الأفراد إلّي يبالغو في البهامة.
الكلمة هاذي ماهيش كيما يتبادر للأذهان المؤنّث متاع قرض... و ماهيش جايّة من إسم شيخنا الجليل يوسف القرضاوي رحمه الله و أ سكنه فسيح جنانه...و للّي ما يعرفوش هذا شيخ عاش في القرون الوسطى و كان فقيه بالرّغم إلّي أفكارو كانت تتحسب متزمّتة شويّة بالنّسبة للوقت هاذاكة.... الحاصل بالرّغم من التّشابه في الحروف و في المعنى ما نتصوّرش إلّي الكلمة جايّة من إسمو. يمكن إسمو جاي مالكلمة على خاطر الكلمة قديمة ياسر و جايّة من القرضة متاع الكوجينة و إلّا متاع الجزّار

الشّيخ يوسف القرضة أوي أوي

.
القرضة هي أداة مهمّة ياسر في عمليّة القصّان و هي الشّيء إلّي تحطّو تحت الحاجة إلّي باش تقصّها باش ما تجرحش الطّاولة و إلّا غيرها.... و القرضة تتميّز بصلابتها و عدم تأثرها بالعوامل الخارجيّة...مثلا ساطور أو سكّينة ما يعملولها شي. و بحكم تجربتي في الخدمة و التّجارب العلميّة إلّي أجريتهم ع القرضة بجميع أنواعها إلّي باش نجيوهم من بعّد إنّجّم نأكّدلكم إلّي في تسعة و تسعين في الميا من الحالات القرضة ما ينفع فيها شي.
من بعّد هالتّفسير الموجز لأصل كلمة قرضة نجيو للكلمة هي بيدها...القرضة هو الإنسان إلّي ما يفهم شي...تحطّوشي مع عشرين نابغة مدّة ثلاثين عام ثمّة أفكار عندو ماهيش باش تتبدّل و ثمّة حاجات عمرو ماهو باش يفهمهم.... و لهنا يلزمنا نوضّحو الفرق مع البهيم...لأنّو البهيم أذكى شويّة مالقرضة و في بعض الدّراسات يقلّك إلّي هو أذكى ببرشا...البهيم هو العبد البطيء الفهم معناها كان توسّع معاه بالك باش يمرجك أمّا تنجّم في الإخّر توصّلّو معلومات أساسيّة و هو ما يعبّرو عليه إخواننا العرب بالبلادة الذّهنيّة.... تنجّم تقول قليل فهم و بشويّة بيداغوجي تنجّم تعلّمو حاجات خفاف.... في حين أنّو القرضة ما ينفعش معاه البيداغوجيا و إلّا غيرها من الوسائل المستعملة في تعليم البشر...القرضة يرفض أي تعامل مع العالم الخارجي و يرفض أي فكرة حتّى لوكان واضحة و ساهلة...لهنا تتذكّرو القرضة متاع الكوجينة و هذاكة علاش يستعملوها باش يقصّو عليها...على خاطرها ما يفيد فيها شي... كيفاش نتعرّفو عالقرضة؟؟ أسهل طريقة هي الأجوبة متاعو إلّي تدلّك على أنّو ما فهم شي... مثلًا يا قرضة كي تبزّع زيت في بلاصة نظّفها....أه....معناها الجواب واضح متاع واحد مافهم شي... و لهنا المرّة لولى تنجّم تقول إلّي هو بهيم و إلّا قليل فهم أمّا كي تعملّو تفسير معمّق كيفاش يلزمو ينظّف و علاش الزّيت في القاعة موش باهي و شنيّة النّتائج إلّي يمكن تصير مالشّي هذا و من غدوة تلقى نفس الحكاية فإنّو السّيّد هذا هو ما يعبّرو عليه بالقرضة.
كيفاش يتمّ التّعامل مع القرضة؟؟؟ كيما القرضة متاع الكوجينة يلزمك تعرف حدودو... ما يلزمش تطلب منّو أكثر من طاقتو... على خاطر تضييع وقت و يلزمك تخلّيه هكّاكة و نزيدكم زيادة يلزمك تحاول ما تعرّضوش إل برشا أفكار في نفس الوقت على خاطرو كيف القرضة متاع الكوجينة يشدّ كان الميكروبات... هذاكة علاش يلزمك ديما تغسلها هو زادة يلزمك إذا واتات الصّدف و تعاملت معاه يلزمك تخلّيه كيما هو...إذا صادف و حصّل حاجة في مخّو راهي باش تكون ضارّة و تعمل كان المشاكل و ينجّم يعدّيها بسهولة للعباد إلّي دايرة بيه...لذا الحذر واجب في التّعامل مع القرضة
بحكم التّطوّر التّكنولوجي ولّات ثمّة برشا أنواع ثمّة القرضة البلاستيك إلّي تجي في ألوان زاهية و منظرها ما يوحيش بالتّسطيكة متاعها... لكنّها ما تقلّش تسطيكة على القرضة اللّوح... على خاطر القرضة ما يهمّش مستواه الثّقافي و إلّا الإجتماعي بما أنّو ما يتأثّرش أصلاً بالمحيط متاعو...

القرضة اللّوح هي القرضة القديمة و الميزة متاعها إلّي هي ظاهرة قرضة ماللّوّل و تعطيك الفرصة

إلّي إنتي ما تضيّعش وقتك معاه و إلّا معاها

.
في الختام نزيد نأكّد على بلاغة الكلمة هاذي و قدّاش تعبّر على الشّعور باليأس و الإحباط في التّعامل مع العباد ذوي العقليّات الخصوصيّة...شو ماحلاها : "تي شهالقرضة هاذا؟؟؟"