samedi 8 novembre 2008

القرضة





كلمة اليوم هي القرضة و هي كلمة ممتازة كيما باش نشوفو على خاطرها تفرهد ع القلب و تعبّر على يأس بوه كلب تجاه بعض الأفراد إلّي يبالغو في البهامة.
الكلمة هاذي ماهيش كيما يتبادر للأذهان المؤنّث متاع قرض... و ماهيش جايّة من إسم شيخنا الجليل يوسف القرضاوي رحمه الله و أ سكنه فسيح جنانه...و للّي ما يعرفوش هذا شيخ عاش في القرون الوسطى و كان فقيه بالرّغم إلّي أفكارو كانت تتحسب متزمّتة شويّة بالنّسبة للوقت هاذاكة.... الحاصل بالرّغم من التّشابه في الحروف و في المعنى ما نتصوّرش إلّي الكلمة جايّة من إسمو. يمكن إسمو جاي مالكلمة على خاطر الكلمة قديمة ياسر و جايّة من القرضة متاع الكوجينة و إلّا متاع الجزّار



الشّيخ يوسف القرضة أوي أوي


.
القرضة هي أداة مهمّة ياسر في عمليّة القصّان و هي الشّيء إلّي تحطّو تحت الحاجة إلّي باش تقصّها باش ما تجرحش الطّاولة و إلّا غيرها.... و القرضة تتميّز بصلابتها و عدم تأثرها بالعوامل الخارجيّة...مثلا ساطور أو سكّينة ما يعملولها شي. و بحكم تجربتي في الخدمة و التّجارب العلميّة إلّي أجريتهم ع القرضة بجميع أنواعها إلّي باش نجيوهم من بعّد إنّجّم نأكّدلكم إلّي في تسعة و تسعين في الميا من الحالات القرضة ما ينفع فيها شي.
من بعّد هالتّفسير الموجز لأصل كلمة قرضة نجيو للكلمة هي بيدها...القرضة هو الإنسان إلّي ما يفهم شي...تحطّوشي مع عشرين نابغة مدّة ثلاثين عام ثمّة أفكار عندو ماهيش باش تتبدّل و ثمّة حاجات عمرو ماهو باش يفهمهم.... و لهنا يلزمنا نوضّحو الفرق مع البهيم...لأنّو البهيم أذكى شويّة مالقرضة و في بعض الدّراسات يقلّك إلّي هو أذكى ببرشا...البهيم هو العبد البطيء الفهم معناها كان توسّع معاه بالك باش يمرجك أمّا تنجّم في الإخّر توصّلّو معلومات أساسيّة و هو ما يعبّرو عليه إخواننا العرب بالبلادة الذّهنيّة.... تنجّم تقول قليل فهم و بشويّة بيداغوجي تنجّم تعلّمو حاجات خفاف.... في حين أنّو القرضة ما ينفعش معاه البيداغوجيا و إلّا غيرها من الوسائل المستعملة في تعليم البشر...القرضة يرفض أي تعامل مع العالم الخارجي و يرفض أي فكرة حتّى لوكان واضحة و ساهلة...لهنا تتذكّرو القرضة متاع الكوجينة و هذاكة علاش يستعملوها باش يقصّو عليها...على خاطرها ما يفيد فيها شي... كيفاش نتعرّفو عالقرضة؟؟ أسهل طريقة هي الأجوبة متاعو إلّي تدلّك على أنّو ما فهم شي... مثلًا يا قرضة كي تبزّع زيت في بلاصة نظّفها....أه....معناها الجواب واضح متاع واحد مافهم شي... و لهنا المرّة لولى تنجّم تقول إلّي هو بهيم و إلّا قليل فهم أمّا كي تعملّو تفسير معمّق كيفاش يلزمو ينظّف و علاش الزّيت في القاعة موش باهي و شنيّة النّتائج إلّي يمكن تصير مالشّي هذا و من غدوة تلقى نفس الحكاية فإنّو السّيّد هذا هو ما يعبّرو عليه بالقرضة.
كيفاش يتمّ التّعامل مع القرضة؟؟؟ كيما القرضة متاع الكوجينة يلزمك تعرف حدودو... ما يلزمش تطلب منّو أكثر من طاقتو... على خاطر تضييع وقت و يلزمك تخلّيه هكّاكة و نزيدكم زيادة يلزمك تحاول ما تعرّضوش إل برشا أفكار في نفس الوقت على خاطرو كيف القرضة متاع الكوجينة يشدّ كان الميكروبات... هذاكة علاش يلزمك ديما تغسلها هو زادة يلزمك إذا واتات الصّدف و تعاملت معاه يلزمك تخلّيه كيما هو...إذا صادف و حصّل حاجة في مخّو راهي باش تكون ضارّة و تعمل كان المشاكل و ينجّم يعدّيها بسهولة للعباد إلّي دايرة بيه...لذا الحذر واجب في التّعامل مع القرضة
بحكم التّطوّر التّكنولوجي ولّات ثمّة برشا أنواع ثمّة القرضة البلاستيك إلّي تجي في ألوان زاهية و منظرها ما يوحيش بالتّسطيكة متاعها... لكنّها ما تقلّش تسطيكة على القرضة اللّوح... على خاطر القرضة ما يهمّش مستواه الثّقافي و إلّا الإجتماعي بما أنّو ما يتأثّرش أصلاً بالمحيط متاعو...



القرضة اللّوح هي القرضة القديمة و الميزة متاعها إلّي هي ظاهرة قرضة ماللّوّل و تعطيك الفرصة
إلّي إنتي ما تضيّعش وقتك معاه و إلّا معاها




.
في الختام نزيد نأكّد على بلاغة الكلمة هاذي و قدّاش تعبّر على الشّعور باليأس و الإحباط في التّعامل مع العباد ذوي العقليّات الخصوصيّة...شو ماحلاها : "تي شهالقرضة هاذا؟؟؟"

18 commentaires:

WALLADA a dit…

للإضافة بركة
من مرادفات كلمة قرضة نلقاو زادة صمامة ، صخرة ، كمنترو
و كان تحبّ بالفقهي نقولو أجسام البغال و عقول العصافير

HNANI a dit…

بالتدوينة متاع القرضة و خاصياتها و كيفية استعمالها فهمت إلّى انت طبّاخ عندك خبرة ومعرفة كبيرة بالكوجينا و مكوناتها
نقترح يقع ادراج التدوينة هذه في برنامج تعليم الطبخ

Anonymous a dit…

hahahahahaha ya hnani!!! looooolllll
ena ma 9olt 7etta chay...
Peut etre c une sublimation zedda (iss9att)

ferrrrr a dit…

يا دوعاجي انت ملم بالموضوع و انا ما نسـال كان الاخصائيين، قلي وين تاقع جمهورية القراضي الديمقراطية الشعبية، و شكرا

ART.ticuler a dit…

يا دوعاجي موش كان في الكوجينة ..عندك مثلا الجزار عندو أكبر قرضة واقفة على ثلاثة ساقين وقد ما تاكل ضرب ما يتحرك منها شعرة..
ونزيدك حاجة؟جزار حومتنا خرج في كونجي وكيف رجع لقى القرضة إلي أصلها جذع متع شجرة عملت عروق و طلعت أوراق حمر كيف الدم..
نعم؟ شنوة؟ أنا نكذب؟ برا إسأل القرضاوي هو إلي حكاها الحكاية وقتلي سألوه عن العجز العلمي في القران..هههه

Anonymous a dit…

tet-dhomer si art.ticuler! ma ye7ki 3lè el 3ajz ken el 3ajez!! seyeb 3lik

si dou3eji ma na3refchi mnin jibtha la définition de 9ardha. ena fi beli y9oulouha 3lè ennes illi t9ate3 wè treyech wè 3lè estoukou!! ma 3adech tochreb yesser, controli rou7ek

jma3ett 7izb eddik! haw tbarkallah 3likom fey9inn yesser, l'intelligence t9ater

Sosso a dit…

Hors sujet le blog d'arabbica a été supprimé

Anonymous a dit…

@sasso, el 3a9bè li jme3et 7izb eddik el kol

Anonymous a dit…

@sasso, el 3a9bè li jme3et 7izb eddik el kol

eddou3aji a dit…

@ wallada :
هاذي كمنترو مانعرفهاش... وحدك يا ولّادة هاك غلبتني توّا يلزمك تفسّرلي هههههه
@hnani
عيّشك يا هناني أمّا مازلت نتعلّم في الكوجينة إنشالله ربّي يسهّل

@ ferrrr:
والله يقولو بين زكمستان و بهمانيا و الله أعلم ههههه

@ art.ticuler:
شفتشي يا خويا قدّ ما تضرب و باقي يحبّ الزّيادة ههههه
@ anonyme :
يا سي الرّكيك سكرت معاك سابقًا؟؟؟ ياخي ما عندك ما تعمل مانعرفش أنا جمع الطّوابع البريديّة و إلّا المصارعة الرّومانية برّا جرّب بالكشي تعجبك و أعتقني

@ sasso :
Dommage, j'espere qu'elle reviendra bientot

@ anonyme
لا أنا قاعدلك على قلبك و زيد فاضي شغل و وراس بهامتك لاما نغدّدلك عيشتك يا قرضة هههههه

Sosso a dit…

Tawwa Hakka ya dou3aji, enti zeda tqolli sasso kif si ras ell7am elmajhoul.en fait je n'arrive pas à aller sur le blog de madjerba aussi.

eddou3aji a dit…

sama7ni ya 5ouya... faute de frappe...ti nekteb fi wadh3 enna7la tawwa fi l'arret mta3 el bus :))
desole... c koi cette histoire ??? je ne comprends pas... peut etre un probleme de serveur !!!

Sosso a dit…

weslet el bus?

Sosso a dit…

pas de soucis ct juste pr taquiner pr la faute de frappe, sinon, je ne sais pas ce qui se passe. en fait, c'est vrai que pour Mad ça peut être tout simplement un soucis de serveur, mais c'est pas le cas pour arabbica. elle c'est vraiment une suppression de blog.

eddou3aji a dit…

mazelet toussel a 17h 15...inchallah thamma internet fel bus sinon ech bech i3adiihom 5 heures :))) Pour arabika ahawaka sur le blog de brastos il ya la reponse... C'est elle qui a arrete

Sosso a dit…

Merci mais c'est vrai que ces jours ci ilmajhoulin 3amlin shate7 bate7. On peut tout simplement interdire le comment au jahal, oops majhoulin. 5 heures de route oui c beaucoup. inchallh famma ennet. moi je vais me coucher pour attaquer la semaine comme il faut.

Anonymous a dit…

ya si dou3ejji, anonyme we7ed, le 1er et le 2eme!! en plus inti ta3reff chrabett m3ek 9bal wella lè ...

Wenti ya sassoutta, l3ebt m3ek el bis 9bel, ya ras el basla

alopex a dit…

Yé si l'anonyme... yé 9ardha, ti tjabbed 3ad!!! Arja3 lel recherche mte3ek 3ala el "9ardha... wiii" mte3ek wsayyeb el biss!!