mardi 2 décembre 2008

عالم مهبول

نهار إثنين و عشرين نوفمبر نهار مهمّ برشا في حياة جون لينون بما أنّو من بعّد أربعة و أربعين سنة تشوشيط في جهنّم سلّكها و سامحتّو الكنيسة...و نورمالمون طلع للجنّة و هو يتسمّى سلّكها على خاطر جاليليو ضرب ثلاثميات سنة يا بو قلب قبل ما يسامحوه و يمشي يتشعلع في جنّة الخلد... الحاصل هو المشكل الكل إلّي هو قال إلّي البيتلز معروفين أكثر من عيسى و البابا حسّها الحكاية و ماعجبتّوش و قامت القيامة اليوم قالّك نسامحوه على خاطرو طفل صغير و هربت بيه كي تشهر... أنا نتصوّرو كان جا حيّ راهو سمّعهم وسخ وذنيهم... و يمكن هذاكة علاش ستنّاو لين تأكّدو إلّي هو مات على قاعدة صحيحة
من جهة أخرى ( أهوكة كي الأخبار باش ما تقولوش هكّاكة و برّا) قالّك الشّناوة متّهمين أكسال روز إلّي يحبّ يتزعّم العالم و إلّي هو جزء من مؤامرة غربيّة للسّيطرة ع العالم بإستعمال الدّيموقراطيّة كطعم... يا سلام... وبالطّبيعة حجبوه ع الشّناوة على خاطرو اللّطف ينجّم يردّهم خونة و عملاء للغرب...و الله أنا نقترح نضمّو الصّين لجامعة الدّول العربيّة مع فينيزويلا كان شافيز نجح باش يولّي رئيس مدى الحياة هكّاكة الغرب ينجّم يعمل المؤامرة الكلّ فرد بلاصة ما يقعدش يتآمر عليهم كل واحد وحدو و يضيّع التّركيز و زيد هوما مايغيروش من بعضهم... شبيه اليوم لاهي يتآمر على فينيزويلا و ما تآمرش علينا حتّى شويّة.... و شبيه هوما باعثلهم أكسل روز و نحنا بعثلنا رسّام كاريكاتور موش معروف....و هكّاكة النّاس تشيخ بحكاية المؤامرة
الفاتيكان خايف من مغنّي مات عندو فوق العشرين سنة و الحزب الشّيوعي الصّيني خايف من غناية... كيف ما يقولو ناس قبل
المجراب تهمزو مرافقو

Chinese Democracy - Guns N Roses

5 commentaires:

brastos a dit…

ـ" على هذه الارض ما يستحقّ الحياة : ....... وخوف الطّغاة من الاغنيات ........."ـ

عمّك محمود درويش شامم الحكاية من بكري يا دوعاجي هههه

HNANI a dit…

التدوينة حاطتها في ملف موش بالعني، وانت كل شيء تعمل فيه بالعاني يا دوعاجي
و علاش اتحب اتجيبلنا الشبوهات؟ أحنا لاباس علينا و خلّينا رايضين توا على الأقل
أيا تصبح على خير

eddou3aji a dit…

@ brastos:
يخافو من كل شي....عندو الحق عمّ محمود درويش...عاد كان ما فهمش هو
شكون باش يفهم؟

@ hnani
و الله موش بالعاني يا هناني...خاطيني ههههه شنوّة الشّبهات؟؟؟ ما فهمتش

Bachbouch a dit…

إزّح!! وانا كنت معمّل باش نقابلو جون لينون ... هاو ترزينا فيه يا دوعاجي يا خويا ههههههه نشالّه ما يسامحوشي مادونا بركا, ولا تو الواحد يكرّز برّسمي ههههههه

eddou3aji a dit…

ههههههه مزمّرة كان باش يسامحو مادونا و الشّلّة الكل.... واحد يبدى يصلّي من توّا ثمّاشي مايخلط على بليّصة فيراج ههههه