mercredi 18 février 2009

كيما العادة

ما ثمّة شي جديد ...كلّ عام و إلّا كلّ عامين نشوف الحكاية هي بيدها تتبدّل شويّة ع الأجناب أمّا مالإخّر مالإخّر هي بيدها الحكاية. في الطّيّارة من روما إل تونس تقول قاعد في الحومة نفس الوجوه نفس السورفاتمونات نفس المنطق (موش اللّوجيك اللّوغة) بركا زيدها شويّة كلمات طليان و بدّل البلايص...حتّى هو موسم و عيّادي و إلّي منع و سلك في أوراق تلقاه مروّح يعيّد... العباد إلّي قريت معاهم في الإبتدائي و إلّا في الأعوام الأولى متاع الثّانوي على خاطر من بعّد ما ثمّاش برشا منهم كمّلو جيل كامل من النّطّارة و الخلايق و الصّنايعيّة مروّح يعيّد... في ساعة طيّارة تعرف إلّي يلزمك تعرفو و إلّي ما يلزمكش زادة على حوم بالرمو و مشاكل روما و سياسة إيطاليا الخارجيّة و الدّاخلية بتصرّف من أولاد الحومة...الهيئة متاعهم تبدّلت شويّة وهّرو و بياضو و كيما يقولو الخير يطرّي.


في الحومة شي ما تبدّل... نوع الأسلحة البيضاء السّنا شهد نقلة نوعيّة...واحد ضرب الآخر بتورنوفيس في عينو...حتّى اللّامات غلاو؟؟ من بعّد نهارين زوز حرقو كيما العادة لهنا زادة نقلة نوعيّة تلفنو من بعّد أيّامات وصلتو ؟؟ لا هانا في ليبيا...ثنيّة جديدة؟؟؟ نتقابلو في طيّارة روما خمسة سنين أخرين....

الضّو الأحمر مايخدمش..عادي ياخي شكون ياقف فيه من أصلو؟؟ ترافو في الكيّاس... كيما العادة... القهاوي معبّية...زادو حلّو قهاوي جدد...كيما العادة... العباد تسإل علاش البلاد ما تتقدّمش نورمالومون تسإل علاش البلاد ما فلستش؟...،معجزة إقتصادية؟؟ بلاد مبنيّة على راس كلب و إلّا جلد ثور و إلّا مانعرفش أناهو عضو متاع أناهو حيوان...

وقّفوك ثلاثة حاكم في
ثلاثة كيلومتر... عادي...الزّوز الأولانين يحبّو يهرّو و يضيّعو الوقت حتّى هوما عندهم نهارين في السّرفيس و لا سوايع زايدة لا هم يحزنون...ماعندهمش نقابة؟؟ تي و برّا عندهم...الثالث يحبّ يشدّ قضيّة و مكبّش يحبّ يلقى ممنوعات في السّيّارة و يتكلّم في الجهاز و جايب ماعندو...
-آش تخدم؟؟؟
-كوجيني...
-تسيّب في الضّمار؟؟؟
- يا ولدي يهديك...
-شبيك تضحك؟؟ عامل حاجة؟؟؟
-كنت في القهوة...
-تتكيّف برشا إنتي؟؟؟
- لا...إيه
..عشرة سواقر في النّهار...
-حلّ المال...
-اللّه مصلّي عالنّبيّ..
-هيّا السّلام...
تروّح أخلاقك في صبّاطك موش كان مشيت إل كوبا خير؟؟؟ ...تحط الجزيرة تتفرّج في غزّة... يطلعلك الدّم تحبّ تبدا تندب... كيما العادة...تبدّل تلقى نانسي عجرم...و الله زيانت على قبل... واحد يسإل ع القنابل الفوسفوريّة شنيّة؟؟ يتحل مستوجّ في الدّار و تتدخّل ماماتك...النّوويّة ؟؟؟ هذاكة آش إسمو نصر الله عندو منهم...هذاكة راجل الله أحد عليه موش كيف هاك الميعة متاع مصر...
-يامّي راهو نصر الله ماعندوش النّوويّ و إسرائيل هي إلّي عندها...
-و يجدّ عليك إنتي هالكلام اليهود ماعندهم شي...دقّان حنك...
تتفرهد شويّة و تعمل ضحكة باهية...قالّو كوبا
!!

10 commentaires:

ferrrrr a dit…

حلوة ياسر يا دوعاجي

عاشور الناجي a dit…

المصيبة الي تقول فيه حقيقة يا دوعاجي

و ربّي يقدّر الخير و برّه أمّا يا ذنوبي

نص رائع من الأعماق و صادق

Bel Malwene a dit…

ma na3refech nath7ak wala nebki !!! yberek fi trabek ya tounes !!

P.S : tji ltounes w ma t9oulech ya dou3aji !!!! barra sa7a lik !!!

abu arabi a dit…

يالطيف..حتى تفتوفة الكرامة والتحدى اللى متمسكة بيهم مماتك تحبها تتنازل عليهم...وللا انتى حقا تحب تكون عقلانية كيما وليد جنبلاط وسمير جعجع...كلمات مماتك ياسي الدوعاجى تعبر على ارادة مازالت ما ماتتشى وموش باش تموت عند العرب والمسلمين الكل...ورغم تحقيرنا وتمزبيلنا من ابناء جلدتنا العقلانيين اياه نعرفو مليح اللى الاعداء خايفين منا اكثر برشة مللى احنا خايفين منهم...وريرا كى ريرا لى دارنيي

البرباش a dit…

هههههههه... قاللو كوبا

Sosso a dit…

un récit de vacances au pays . C'est animé malgré tout ça te change de la forêt enchantée. Essayed elli qallek 7ell el mal a dû lire ton post sur la forêt.
;-)

3lulu a dit…

كوبا بالرغم المزيريا المدقعة عبادها طيبيين، متثقفين و متربين

ART.ticuler a dit…

yasser 7lowa raghem mrarit el7keya! Bravo!

eddou3aji a dit…

@ ferrrrr:
فرررر يا باهي

@ 3achour :

عيّشو عاشور

@ bel malwane:
و الله مشية مخلبزة يا بالملوان...ما فهمت شي ملّي مشيت لين جيت...نبرمجولها المرّة الجّايّة صديقي

@ abu arabi :
يزّينا عربوش عاد ههههه و الله ما نحب حد يتنازل على حتّى شي...حتّى إنتي ماذابيّا تقعد هكّا

@ barbach:
إلّي ليك ليك و إلّي خاطيك خاطيك ههههه

@ sasso:
موش ضاهر إلّي هو قرا حاجة اللّهمّ المود دومبلوا متاع الجهاز و يمكن لا ههههه

@
3alai:
ههههههه ربّي معاهم

@ art.ticuler:
عيشك أرت...تي فينك؟

Mariouma a dit…

:)
hetheka elli fama :p
c'est haut en couleur pour pas dire autre chose.

mais le sourire de ta maman et sa bonne cuisine, elama fedar et les retrouvailles avec les copains ça n'a pas de prix et ça met souvent du baume au cœur.