الأوتار الحسّاسة

ثمّة أربعة و إلّا خمسة حاجات معروفين يأثّرو على التّونسي برشا و هوما المواضيع إلّي يتحمّسلهم و ما يرشفهاش للّي يمسّهم...هذا معناها من المتعارف عليه على خاطر في الواقع ما نّجموش نعمّمو....أوّل حاجة سوم الخبزة و برجوليّة مانعرفش علاش الخبزة بالذّات يمكن عنّا قلّة خيال في التّصنيف و ما نعرفوه بقري كان بالدّوّارة....الثّانية فلسطين إلّي تقعد أول موضوع متاع هدرزة و حكايات و وقتها الكلّها تولّي شجعان و هو في الإخّر معروف إلّي هو كلام و الفعل يجيبو ربّي إلّا بالطّبيعة كعبات من من رحم ربّي.

الثّالثة و هي الحكاية متاع اليوم المفرخ أي الأطفال بلوغة أخرى و هي موش خاصّيّة متاع التّوانسة بركة أمّا من المتعارف عليه نقولو إلّي نحنا نخافو ياسر على صغارنا و تربيتهم و قرايتهم و إنّحّيو من إفّامنا و نمدّولهم. و إلّي يحبّ يكسب شويّة تعاطف متاع هالشّعب المحنون يجبد وحدة مالحكايات هاذومة و وقتها فجأة حتّى حدّ ما عاد يدور بساحتو و يحكي معاه إذا كان إلّي يقول فيه لوجيك و إلّا قاعد يهز و يسبط وحدو. مانيش باش نكمّل الزّوز وإلّا الثلاثة مواضيع الأخرين لا يولّيو يستعملوهم زادة. جوست ملاحظة إلّي صحيح المواضيع هاذي عندها تأثير خاصّ و برشا عباد إستعملوها و يستعملو فيها و مازّالو باش يستعملوها و تجيب نتائج موش خايبة في إستبلاه العباد أمّا راهو الحكايات هاذي فيهم صنعة و موش النّاس الكل معطيلها في الكار هذا. معناها أهل الإختصاص إلّي من قبل الإستقلال و هوما يدغّفو فينا بيهم هوما يقعدو أكثر وحدين يمتريزيو الرّيق هذا و إلّي قاعدين يتعلّمو في الزّلق في بيت الصّابون نقولولهم ديزولي فقتو إمّخّر و البندير هذا ماعادش يشطّح.

الحكاية متاع المفرخ إلّي نهار نهارين واحد طالعنّا بطلعة آهو المفرخ ضايعين و إلّا مخطوفين ومن بعّد لا ما خطفوهمش أمّا والديهم ما همش يربّيو فيهم بالڤدا و إلّا شبيهم ولّاو بهايم و ماعادش يقراو على رواحهم. و الدّليل شنوّة آهو فيديو مشرولة مالفايسبوك و إلّا مالدّايلي موشيون. لهنا الجواب إلّي يجيني إل مخّي ديراكت هو إتّلهاو في حوايجكم.

باش نكمّلو في الحكاية فازة الأولاد المخطوفين تنجّم تكون تفدليك ماسط و تنجم تكون بفعل فاعل يلوّج على تحسيس العباد بفقدان الأمن و الأمان في البلاد و في الحالتين شوفو ديما كيفاش التّركيز ع المفرخة يعطي نتائج إيجابيّة و يجلب الإهتمام. مانعرفش كان جا قال إلّي هوما يخطفو في العزايز ما نتصوّرش حتّى حد يتّلها بيه. إذا كانو تفدليك فإنّو موش ضامر و إذا كانو بفعل فاعل فإنّو لا يردّ فاس على هراوة و كيف سيدي كيف جوادو.

في حكاية التّربية و الأخلاق و كيفاش الجيل إلّي جاي حالتو حليلة و يقول في الكلام الزّايد والدّليل آه ماهو ثمّة دليل ...فيديو مشرولة عالفايسبوك و إلّا عالدّايلي موشيون...السّاعة ملّي تولدت و أنا نسمع فيها الحكاية متاع الصّغار ماهمش متربّين .... بدات علينا أحنا و من بعّد الجيل إلّي من بعدنا و تو ع الجيل هذا و يضهرلي باش تقعد ديما. و يضهرلي ما تستحقّش فيديو باش تعرف إلّي ثمّة أولاد صغار قاعدين يقولو في الكلام الزّايد إيجا معايا للحومة تو نهزّك لشكون يسمّعك وسخ وذنيك و هو مازّال ما دخلش للمكتب و تو تبدّل نظرتك للطّفولة جملة وحدة... و تولّي إنتي هو إلّي تسخّف موش أصدقائنا الصّغار... هذا ما يعنيش إنّنا نشجّعو الصّغار على الكلام الزّايد إلّي هو من المعروف إلّي ماهوش من الحاجات الباهية إلّي يلزم الصّغار يتعلّموها و موش لازم تعلّمهالهم على خاطر هي من أوّل الحاجات إلّي باش يتعلّموها كي يخرجو للشّارع مالدّمّار و الحالة الحليلة...أمّا بالله بالله ما تجيش تستبلهني و تعدّيلي درس أخلاق و درس علم إجتماع و تقلّي راهو المجتمع متاعنا منحط و ناقص دين هذاكة علاش صغارنا ضاعو في قالب الحنان الفيّاض متاعك و الدّليل فيديو مالفايسبوك. و إذا كان حرقك عليهم الحليب برّا إشكي بوالديه و أعتقني.

أنا واحد مالنّاس تحفّضو غنا السّتاد و إلّا جدول الضّرب و إلّا تبّت يدا أبي لهب حاجة ماتخصّنيش و إلّي عندو شهوة يديرها في عشاه... أمّا تشد تشرّبو و إلّا تفشّخو على خاطر ما يصلّيش و إلّا على خاطر أي سبب آخر نمشي نشكي موش نبدا نسيّب في الرّيق في الفايسبوك.

الدّيسكور موراليزاتور هذا إلّي مكفّن في قالب العطف على الطّفولة و الحنان على فلذات أكباد النّاس فيه برشا تعالي عالعباد و برشا ثقة في النّفس من عند عباد مانعرفوش شنيّة النّتائج متاع طرق التّربية متاعهم هذا إذا ربّاو حاجة سابقا... حتّى نبتة و إلّا حوتة حمرا... لذا ماذابينا كلّ واحد يتلها في المفرخة متاعو و ينفّسنا. وكان تحبّو تحكيو عالمفرخ فينكم وقت إلّي التّعليم العمومي كلاه البهيم و العائلات المتوسّطة و تحت المتوسّطة تبعث في صغارها يقراو في الخاص. آهو علاش واحد يلزمو يتعلم الكلام الزّايد. باش كي يبدا نديدو مالصّغرة يقرا في مدرسة خاصّة فيها الأنفورماتيك و الأنڤلي و غيرو وهو يقرى في مدرسة حكوميّة تاعبة يلقى ما يقول.

هيّا آهي فيديو شوفو هذا مثلا محلاه الطّفل تبارك الله عليه أمّا خسارة والديه جناو عليه باش يعدّي طفولة حزينة ياسر و صحابو باش يضحكو عليه كل دربي و شوف يهزشي لقب قبل ما ياخذ السّيزيام ههههههه ... موش ظلم توّا هذا؟