mardi 26 mai 2009

النّضال الإلكتروني

الحق متاع ربّي ياسر جوجمة... الإيمايل باش يفغّم بالعرائض...عريضة لتحرير المناضل الكونغولي إندراشكون....عريضة لمقاومة التّصحّر في بوتسوانا...عريضة للمحافضة على الجرذ النّيوزيلندي من الإنقراض....عريضة ضد إستقلال الصّحراء الغربيّة ....عريضة مع إستقلال الصّحراء الغربيّة. و زيد الفايسبوك مجموعة ضد الإسلام و مجموعة لغلق مجموعة ضد الإسلام و شوية آخر مجموعة لغلق مجموعة غلق مجموعة ضد الإسلام...مجموعة ضد إتصالات تونس وتونيزيانا و برشا مجموعات أخرين يدخّلو للحبس.
نحب نفهم حاجة بركة ياخي بجدّهم يحكيو؟؟ ثمّة شكون يتخيّل حتّى ربع سوڤوندة إلّي الجرذ النّيوزيلندي يهمّني شويّة و المناضل الكونغولي يستنّى في الكليك متاع السّوري متاعي باش يتحرّر...ثمّة السّيت هذا و السّيت هذا بيناتهم بركة ثمّة قريب الزّوز ملاين عريضة و تنجّم تزيد معاهم عريضتك إنتي بلاش خلّي عاد مالفايسبوك ما تحكيش على كلّ لون يا كريمة. و ثمّة شكون ماخو الحكاية بجدّو و عاطي ماعندو والنّهار الكلّ و هو يكليكي شبيك؟؟ مناضل قد الدّنيا.
المرّة الأخرى نقرى في أرتيكل / إي شبيه ؟ يصير ع الرّجال / هاذم يسمّيوهم مناضلي البانتوفل معناها مناضل راكش في بيت الصّالة لابس بانتوفل و يرضّي في ضميرو في تونس نتصوّرو لابس شلاكة بو صبع على خاطر الحال صيف توّا و نازل على النّضال النّبي مولاك. و إلّا أتعس تلقاه راكش في بيرو / و هذايا نتصوّرو حال الأغلبيّة/ كليماتيزي و في وقت خدمتو و يناضل من أجل عدم إستغلال أموال الدّولة.
السّاعة أوّلا و ليس أخيرا العريضة حتّى في الدّول الدّيموقراطيّة ما تصلح إل حتّى شي إلّا للضغط على المسؤولين كي يشوفو إلّي ثمّة برشا عباد يولّيو يقراو حساب الرّأي العام و بالأخص الإنتخابات الجّايّة... في الدّول الدّيموقراطيّة الأخرين ههههههه برّا ألعب مع أندادك قالّو عريضة ههههه ماعندها حتّى قيمة ....تضييع وقت. ديزولي المناضل الكونغولي السّاعة يضهر سامباتيك أمّا ليّ و ليه ربّي.
سادسًا و ليس أخيرًا، توّا قبل كي كانت بالتّصحاح كان عالأقلّ السّيّد إلّي يدور إنّجّمو نقولو شجاع و مناضل و تنجّم تقدّرو على خاطرو بڤلبو و عاطي ما عندو يدور في القوايل و تشوفو و تعرفو شكون و النّاس بوجوهها... توّا أنونيم و إلّي يصحّحو أنونيم حتّى طرف الشّرعيّة إلّي كانت جايّة مالتّعب و الرّيسك مشات على روحها.
آخرا و ليس أخيرا، الكليك على العريضة صحيح يرتّح الضّمير أمّا ما يوصّل لشي معناها كي نرفض باش نساند العريضة متاعك موش معناها مانيش مقتنع بيها / في أغلب الأحيان نبدا مانيش مقتنع راهو كيف حكاية حماية الفقمة في الكندا/ أمّا مانحبّش نلعب فيها إلّي أنا مناضل يسار كافيار و مهتم بالقضايا متاع العالم وقت إلّي أنا بكلّ صراحة ما يهمّنيش بالقويّ و إلّا زادة مانحبّش نلعب فيها إلّي أنا ندافع ع الرّسول في الفايسبوك في حين إلّي أنا مانّجّمش ندافع حتّى على البورتابل متاعي مالنّطرة.
هو بورڤيبة يرحمو قال مرّة يزرّق لجماعة الدّستور القديم " نددّو و نستنكرو و من بعّد نعملو عريضة نكتبوها بماء العين و نجيو و نقعدو" هذا شي ما يوصّل لوالو هاذ متاعي موش متاع حبيب الأمّة... فما بالك كي تبدا الحكاية ع الأنترنات...لعب ذرّ ولّى.
الحقّ ساعات نعمل كليك أمّا جوست ماخذة في الخاطر... كي يبدى واحد نعرفو و يبدى جايبها سيريو و جادّ عليه إلّي يعمل فيه أمّا بيناتنا كي نرى عريضة نتذكّر الغناية هاذي إلّي يضهرلي مولاها فهم بالضبط لشنوّة تصلح العريضة.
عريضة دزّي جيتك بربّي يا عريضة دزّي
مشيك و جيّك في الأحواز يزّي

الدّمع دمعي و العيون عيوني
نبكي على الأيّام إلّي فاتوني
جيتك بربّي يا عريضة دزّي


شيّع شيّع شيعتهم بالعين شيّع شيّع
روّحت نبكي و الدّموع تفيّع
جيتك بربّي يا عريضة دزّي

لو ما تبغوني ڤسمي على الله
لو ما تبغوني ناكل و نشرب من دموع عيوني
جيتك بربّي يا عريضة دزّي




aridha_Dezzi - Rchid elGafsi

5 commentaires:

MeTaLLisTiC a dit…

انا بيدي النوع هذا من الإسمتمناء النظالي نكرهو برشة، يمكن تقام فكر اعوج و بهامة مستديمة بالانترنات... اما باش تشنعها بطريقة إفتراضية ضد النطرة و السرقة و تجلطيم الحاكم... ما عبندك وين توصل، ديجا انا بيدي حكيت على فازة من النوع هذا قبل..

http://metallistic.blogspot.com/2008/12/blog-post_18.html

Bachbouch a dit…

hahahaha! Ama bourjoulia, na9ra fi post mte3ek wejnebi 7akketni :)))))

Bachbouch a dit…

@arabica
hahaha! si doudi mte3ek yo9ros we yiddou ta7tou :))))

eddou3aji a dit…

@ metallistic :
هايل البوست أهوكة عندك تعليق غادي هههههه
@ bachbouch:
هههههه يا بشبوش هو راهو ساعات نبدا نكتب و أجنابي تحكّ هههههه

@ arabika:
تعرف كان إنتي تتقلق أنا نبطّل الإحتجاج...ينعبو الإحتجاج قدّام وجوه الرّجال ههههههه هاني باش ننضبط و نسيّب الأجناب ههههههه

eddou3aji a dit…

ههههههه يقعد يمشي ما يلعّبوناش هههههههه جوست يحجّم شلاغمو هههههههه