يا خاين يا مجرم بكرهك

عندي مدّة نحب نحكي في موضوع التّخوين و الطّابور و قاعد نتحكحك كيف إلّي شادّو مانك و كل مرّة نبطّل مرّة قلّة وقت و مرّة على خاطر الجّو مكهرب و كان نقول كلمة تو ترصّي في حلّ و أربط و في أغلب الوقت على خاطر نعرف إلّي زايد والحكايات هاذي عندها كيفاش يتعاملو معاها العباد و ما دوا الفم الأبخر كان السّواك الحارّ.دوا الفم الأبخر كان سواك الحار يعني إلّي التّخوين و المؤامرة كسلاح سياسي و إلّا فكري يرمي إلى الحطّ من قيمة الآخر هو سلاح شعبوي عالإخّر و الرّدّ عليه عند النّاس إلّي تعرف يكون بأفكار شعبويّة و كان ثمّة حاجة بركة باهية في الشّعبويّة راهي إلّي هي ما عندهاش قاع... يعني يهبطو تزيد تهبط و ذراعك يا علّاف.

لكن يقعد في صورة ما ثمّة شكون على نيّتو داخل في مواضيع متاع التّخوين و المؤامرة هكّاكة و مازّال ثمّة مجال باش يتحكى معاه و ماهوش يستعمل في الفكرة متاع التّخوين كسلاح إقصاء و إلّا دفاعا على أفكار مهما تكون شريفة. على خاطر الأفكار و المشاريع إلّي تحتاج لسلاح التّخوين و المؤامرة حاجتين يا هي فيها مشكل تخبّي فيه يا السّيّد إلّي يدافع عليها ماهوش مؤهّل للدّفاع عليها.

الموضوع هذا أنا مغروم بيه و كنت حكيت عليه قبل يا وحدي وحدي هكّاكة لا طاح لا دزّوه يا تفاعلا مع بعض الأحداث... و مازّلّت باش نحكي عليه على خاطرني واحد مالنّاس مقتنع إلّي أكبر ضرر يسبّبو الإستعمار للشّعوب هي هاك الخوف مالبرّاني و إلّا الإعجاب الشديد بالبرّاني و الحذر الشّديد تجاه العباد الكل. و هذا ينطبق عالشعوب إلّي عرفت الإستعمار الكل... و حتّى إذا كان إنّجّمو نقولو إلّي هو شعور إنساني عادي فإنّو يكون مبالغ فيه عند الشّعوب ذات التّاريخ الإستعماري. و بالطّبيعة الشعور هذا يزيد يكبر في أوقات الأزمات و المحن و بما أنّنا ديما في أزمة و ديما في محنة فهو هذاكة.

نظريّة المؤامرة و وجود حاجات ما نعرفوهاش مخبّينهم علينا و ثمّة عباد من لحمنا و دمّنا يخدمو في أهداف أخرى ماهيش عند العرب بركة موجودة في برشا بلايص أخرين و في أوقات أخرى زادة. و الحق متاع ربّي تمخوج و تجيب حكايات تنجّم تطبّقهم على حاجات تاريخيّة صارو و على حاجات قاعدين يصيرو. مثلا الماصونيين الأحرار إلّي هو المثال المفضل متاعنا و كيفاش اليهود باش يسيطرو على العالم و البروتوكولات متاع صهيون و هذايا كان ثمّة بروف في الصّادقيّة مغروم ياسر بيهم الحكايات و يضهرلي وحدو وحدو طلّع ع القليلة زوز أجيال مهلوسين من الماصونيين. لحدّ لهنا الأفكار هاذي تقول إنتي بريئة و ما عندها باش تضر و معلومات شكون يعرف تطلع صحيحة. لكن ثمّة مشكلتين لهنا. المشكلة الأولى تهويل صورة العدو و إلّا الآخر إلّي إنتي تقاوم فيه و إلّا تنافس فيه و تطييح الما في ركايب المواطنين متاعك. منافس مجهول مسيطر ع العالم و يحوس بيناتنا. تي سايي إتّخذنا و ما عادش فيها المشكلة الثانية هي ربط العباد و أفكارها بها التّنظيمات الخفيّة هاذي...و بما أنّها سرّيّة فما نعرفش كيفاش يفيقو بيهم و كيفاش ثمّة عباد تعرف مثلا و هوما قاعدين في الصّبّاغين إلّي بورڤيبة و جمال الأفغاني كانو فران ماصون. هذا بخلاف اليهودي الزّوّالي في الحفصيّة يولّي جزء من مؤامرة عالميّة عند بسطاء العقل

.نسيت إلّي ثمّة مشكل ثالث في الحكايات هاذي إلّي هي تبسيط فضيع للمشاكل و الحكايات إلّي دايرة بينا...تولّي أي حاجة تصير تلقالها تفسير أحول في وسط المؤامرة...أهوكة ماغير ما تكسّر راسك و ما غير ما تلوّج لا إقتصاديا و لا سياسيا ولا إجتماعيّا ثمّة منظّمات سرّيّة يكمبصولنا.

هذيّة حكاية المؤامرة مثلا في أمريكيا ثمّة حكاية متداولة برشا في بعض الأوساط و هي مؤامرة الدّولة لإخفاء دليل وجود الإكسترا تيراستار و هاذم عباد مقتنعين ميا في الميا إلّي ثمّة كائنات فضائية ماعندها ما تعمل في حياتها كان تلصلص علينا مرّة في العشرة سنين أمّا بما أنّو ما ثمّاش دليل فما تطلع كان ثمّة أيادي خفيّة تخبّي في الدّلائل. كيف فكرة بما أنّو نحنا قويّين ياسر و إسرائيل تفشّخ فينا فما تطلع كان ثمّة منظمات خفيّة تعاون فيها و تمقّص فينا كيف زادة بما أنّنا مستحيل يكون ثمّة واحد تونسي ميا في الميا يسب الدّين فما تطلع كان مؤامرة من عباد أخرين قاعدين يدزّو فيه. و غيرو مالأمثلة إلّي تنجّم تكون فيها جانب مالصّحّة أمّا تبسيطها بنظرية مؤامرة حولة يرجع لحاجة من ثلاثة يا فقدان كامل للأدلّة يا الهروب من الواقع يا سوء نيّة لإستغلال بعض بسطاء العقول

.
هو ثمّة كتاب باهي كاتبو واحد مهبول يدور عالأنترنات توّة يمكن عشرة سنين إل تالي....فيه كيفاش العالم الكلّو مؤامرة و إجبد من إيلوميناتي على فران ماصون على كائنات فضائيّة على فرسان التّومبل ماخلّى شي الحاصيلو حتّى الغنا متاع السّبعينات طلع الكلّو غنا شيطاني. الحاصل من بعّد ما تقراه و يفوتك الميترو تبدا تتلفّت وراك و تلوّج على هرتزل و إلّا إي تي.

بالنّسبة للتّخوين فإنّو تاريخ البشريّة و حاضرها معبّي بحكايات الخيانة و العمالة و الطّوابير...القرن هذا بركة يزّي كل هويّة وطنيّة تقريبا تبنات على ظهر خونة... كلّ تيّار سياسي تبنى على ظهر خائن أمّا الواقع بعيد برشا على الصّور الرّومنسيّة هاذي بأبطالها و أشرارها...ثمّة برشة كتب تكتبت على الخيانة كسلاح فكري و الحاجة إلّي تنجّم تخرج بيها من هالمعبوكة إلّي عادة حكاية التّخوين تستعملها التّنظيمات الرّاديكاليّة في الأوقات العاديّة و هدفها هو تقزيم المنافسين و تقريدهم و هذايا موش شويّة لكن تقعد الحكاية أهون من وقت الحرب و إلّا في الأزمات وقتها تولّي جريمة تستحق القتل و الخائن يتقتل. هذايا علاش نبهت كي عباد تقول إلّي أنا قتلو خائن و هو سبّني...بالطّبيعة يسبّك. تي إنتي خرّجت فيه دعوة للقتل. مثلا كان ناخذو حكاية الإسلاموفوبيا مادام مازّلنا فيها... بالله شنيّة يكون شعور العباد إلّي حاطّة شعار لا للإسلاموفوبيا كان نهار واحد يشد يفشّخ واحد آخر على خاطرو ضهرلو إلّي هو عاطي ع الإسلاموفوبي.الحكايات هاذي ممكنة ياسر كيف تعرف الصّدى متاع الأفكار الشّعبويّة هاذي قدّاشو كبير و قدّاش فيسع ما ينتشر عند العباد.

الخائن ما يحترمو حد على خاطرو إنتي عاطيه الأمان و عايش معاه و هو قاعد يحفرلك مع ناس براينيّة معناها أسهل حاجة باش ترتاح من واحد ما تتفاهمش معاه هي تطلّع فيه إنّو خائن. و الكلّنا نعرفو كيفاش الحكاية هاذي مستعملة من طرف حكومات العالم الثالث. و هو حتّى في أمريكيا إستعملوها الحكاية كونتر جماعة زعمة زعمة شيوعيّين و هي الكلّها لعبة سياسيّة حولة. إلّي يلعب اللّعب هذا يلزمو يكون واعي بالخطورة متاع كلام مالنّوع هذا. توّة واحد تجيه في مشكلة في التن بلوغ ينعلبوها أمّا كي تبدا الحكاية في الدّنيا تولّي مشكلة و اللّعب موش بعشانا.

تقول إنتي إمّالا نسيّبو الما عالبطّيخ و نورمال و خلّي إلّي يخون يخون... و الله كان ما عندكشي دليل واضح إلّي السّيّد قاعد يبيع في البلاد لجهة أجنبيّة ماذابيك تسكت... على خاطر كرامة العباد موش لعبة...و حتّى إذا عندك دليل أحول كيف كيف... سبب آخر يخلّي مضرّة الأفكار التّخوينيّة أكثر من منفعتها هاذي كان ضهر عندها منفعة...تقليص الحرّيّات و الحقوق يكفي باش نشوفو آش صار في أمريكيا بعّد حداش سبتمبر و كيفاش الأمريكان الكل خسرو البعض من حقوقهم و حرياتهم باش زعمة زعمة الحكومة المحافظة تلوّج ع الخونة في التراب الأمريكي...كيف كيف في بلادنا وين ثمّة خيانة و تآمر على أمن الدّولة يتقلص هامش الحريات أما بما أنو نحنا عنا برشا خونة فإنّو تبارك الله ديما متقلّص.

هذا هو ما وسع بالي أمّا نقعد مقتنع إلّي الأفكار هاذي ما تتناقشش و إلّي اليوم مقتنع بجدوى صيد السّاحرات و الخونة و المؤامرات موش باش يقتنع في ليلة و ضحاها بالرياض و الهدى / هذا كانو على نيّتو و موش عامل فيلم/ و يقعد أحسن طريقة باش تفضّها معاه يا حقرانو يا مواجهتو بشعبويّة أكبر بالرّغم إلّي ثمّة عباد متقلّقة من هبوط المستوى...ميسالش هاذيكة هي الدّنيا و يكبرو و ينساو.