الفايسبوك لا يرفّلوك

إلّي حافل و إلّي جافل *** و إلّي سخنت عليه القايلة

إلّي خايف راكش عالرّافل *** و إلّي ڤلڤ و نصبتو مايلة

عالفايسبوك يمرجوك

فلان يقرى و فلان يقرّي *** و فلان مسكين يقراو عليه

فلانة ترقّات و فلانة تعرّي *** و فلانة تحبّو و تمعس فيه

يقتل بروفيلك يا عزلوك

لاخر مشا و مازّال مارجعشي *** و لاخر عمل كسكروت هريسة

هذايا شاهي و ما سلعشي *** و آش إسمو متوحّش البسيسة

بستاتوساتهم يمهمشوك

ثمّة إلّي يجي يهنّي *** و ثمّة إلّي النّهار الكلّ يغنّي

ثمّة متاع شوفو مازينّي *** و ثمّة حتّى متاع إيجا أخطبني

تمشيشي ماتقولش مبروك

كل يوم يلزمك زيارة *** بالزّازة و إلّا سكريتو

هذا لايْكا و هذا شارا *** و لاخر ضيّع بريكيتو

قلّي إنتي علاش جابوك

ما نحكيلكشي على ريق المعيز *** الكلّهم ذكيّين و متربّين

قال شنيّة آهو كويز *** منين ليك براس بوك منين

راني نعرف نيفوك

ناس النهار الكل تشاري *** تقول تخدم في هوليوود

و ناس تجبد أصعب الهداري *** ناسين اللّعبة عالدّود

تجي تفيّقهم يمزبلوك

إذا وا حد عندو صاحبو *** و قالوها ناس قبل

لا يشاركو لا يناسبو *** نكمّل حويجة للمثل

و لا يزيدو عالفايسبوك