lundi 5 avril 2010

راحة موت الحضارات

بمناسبة غلق بعض البروفيلات متاع بعض الأصدقاء الإفتراضيين و إلّي بالرغم ما نعرفهمش أمّا ربّيت عليهم الكبدة عملت طلّة على بعض المجموعات إلّي عالفايسبوك و إكتشفت برشا حاجات ما كنتش نعرفها
أوّل حاجة ثمّة برشا عباد عندهم مشاكل نفسيّة عميقة و عميقة جدّا و يلزمهم يشوفو حل لحياتهم مادام بونطوات و حالة حليلة على خاطر بلوغ و إلّا بروفيل فايس بوك...إنشالله لاباس...راهو موش الناس الكل كيف كيف ...كان واحد لقيتو أضمر منّك و إلّا عندو القبول أكثر منّك و إلّا عندو ما يحكي و إلّا متثقّف أكثر منّك موش معناها راك إنتي كِخّة و ما تصلح لشي...تنجّم تكون إنتي تلعب البيس خير منّو و إلّا أشبّ منّو... تنجّم تكون كِخّة زادة و كيف خنفوس الخرى لا يتّاكل لا يتلعب بيه و هذايا الأقرب للواقع و هذاكة علاش مكنك العصب و مالقيت بيها وين و شدّيت عبدتو و المعبود ربّي أمّا مالإخّر ماكش باش تولّي خير منّو...الله غالب هذيكة هي الدنيا تقعد عمرك كامل ما تخرّجش جملة تنفع و ما تسلّكها كان بالتّبلعيط و الكذب.
ثاني حاجة بالرّغم إلّي كنت متشائم فيما يخصّ كي الحفرة الكلبة إلّي تتعاركو عليها حتّى كان جا فيها شويّة بترول عالأقل.... فإنّو من بعّد ماقريت شويّة حوارات متاع شباب اليوم بدّلت رايي و ولّيت متفائل...عملت نظريّة جديدة كيما متاع هذاكة متاع صراع الحضارات تخلّيني نقول إلّي أمورنا باش تولّي سانك سانك في القريب العاجل من هنا إل عشرين سنا و باش نرتاحو من هالعباد إلّي تحكي بإسم ربّي و بإسم العروبة و بإسم البلاد.... هو مالأول العدد متاع المتخلفين ذهنيّا يفجع و يخلّيك تخمّم تحرق جد بوه الباسبور...هيّا تعرف كيفاش تو نكمّل النظريّة نهار آخر على خاطرها حاجة لوكس و مانحبش نبلفطها... توّا ضاهرتلي حاجة لوكس يمكن تطلع من بعّد حكاية حولة و وقتها نورمال نرجعو نقعدو و نستنّاو اللّطخة.

6 commentaires:

Moghrama a dit…

Yerham fommek ya Dou3aji , farhedtli 3ala 9albi comme dab:)

Anonymous a dit…

الذراع الاعلامي لصفحة مقاومة الحشرات على الفيس بوك

صفحة المبيد الحشري الفايسبوكي رغم طابعها التهكمي والفكاهي تمثل صفعة فايسبوكية قوية ضد دعاة الالحاد والتطبيع والتنصير والشذوذ الجنسي الذي بدت عليهم أثار الرعب والارتباك والحيرة بعد أن تم غلق حساباتهم المريبة بفضل عزم وذكاء وارادة شباب من خيرة شباب تونس.

كفاكم بكاءا وعويلا أيها المشبوهون فالمسألة ليست مسألة تكفير ولا حرية رأي ولا مسألة تسامح إنها قضية إعتداء على الثوابت الوطنية التونسية وارجعوا الى 60 حساب التي تم اغلاقه لتأكدوا من كلامي

ART.ticuler a dit…

شكرا دوعاجي يا باهي على البوست أما كان على النظرية موش لازم منها إلي قلتو يزي :-)

Big Trap Boy a dit…

تعجبني يا الدوعا كيف تفهم كل شي وحدك وحدك

شويّة عباد وبرررررشة أمراض وعقد نفسية، والمشكلة أنها بمرور الوقت في عوض تبرى زادت استفحلت

Big Trap Boy a dit…

هههه، شوف الشلاكة هاو عمل ذراع إعلامي في البلوغوسفير بعد ما كان هو بيدو بعبوص إعلامي فيها ههههههههه

تقعّد شرّ وهف يهزّك إنت والشلايك الإخوانجية أصحابك، إنّ الطيور على أشكالها تقع

eddou3aji a dit…

@ moghrama :
عيشك مغرمة :)
@ anonyme :
خيرة شباب تونس؟ اللطف على وُخَيْ ههههه
و داركم في بالهم؟؟
@ art :
لا لا أرتيكولي المرّة هاذي مُصرّ إلحاحًا ههههه هي بيناتنا كي طلع عليها النهار طلعت نظريّة حولة أمّا باقي مُصرّ

@ BTB :
ياسر كثّرولها هذا باز راهو عندو تصاور من الأرتيكلوات متاعك و يبات ليل كامل يرمي عليهم في السكاكن ههههههه بسيكوبات ...شفتها ذراع! هههههه ياسر يقتل بطابعه التهكمي و الفكاهي هههههه