dimanche 18 avril 2010

Please, tell me about your childhood

لو كان جيت نديدتي و مالحومة *** حكاية صغري حلوّة و قمقومة

ما تفهمشي
نهجي و المكتب و المارشي
كسكروت التّن و فيه الطّرشي
من هذا الكل كبرت محرومة
كونشي نعدّي ليالي و مانكملّشي
حكايات صغري بنينة ومفهومة

لو كان جيت نديدتي و مالحومة *** حكاية صغري حلوّة و قمقومة

بيستي البيّوضيّة
و الللاش و الرّيڤة المستويّة
شبر و حارة و زيد حترف شويّة
نو كيكس نو مانطا لليوما
و نروّح نخبّي في إيديّا
كان يراوهم ليلتي ماهي مشومة


لو كان جيت نديدتي و مالحومة *** حكاية صغري حلوّة و قمقومة

و الزربوط
صعيب عليك يدور بالخيوط
يم و كتّة تسيّب المربوط
نخيّر يقصّولي الكرومة
و لا نشوفو سنّتو عالحيوط
و جهامتو في الرمل مردومة

لو كان جيت نديدتي و مالحومة *** حكاية صغري حلوّة و قمقومة

كي الناس
شدّة و غمّيضة و لاباس
طابع سكر في الكاياس
و قدّاش الحلّيلة مظلومة
بالمسّة و إلّا حكّة الراس
حيلة و البيعة مغمومة

لو كان جيت نديدتي و مالحومة *** حكاية صغري حلوّة و قمقومة


عصافر الجنّة
و ڤولّة سيكس منّا و منّا
شيلافورمي الكورة عنّا
سوايع لانفكّو لا أحنا لا هوما
إلّا ما تتسطّح باش تتهنّى
و ترجع في إثنين مقسومة

لو كان جيت نديدتي و مالحومة *** حكاية صغري حلوّة و قمقومة


شويّة فلوس
باقي الكلافز و المعدنوس
شيكلي بودورو و عنڤر الكبوس
تقول عليك شريت بيّومة
و تروّح ترخف في المكبوس
موش كيف جيل الوييي هاذوما

لو كان جيت نديدتي و مالحومة *** حكاية صغري حلوّة و قمقومة

??تعرف العركة
طيّح سيّب و فيه البركة
ألافون عود حطب و فركة
و منڤلة في الڤرجومة
غالب مغلوب الفايدة في الحركة
يزّي لا تباتلي تحلم مصدومة


لو كان جيت نديدتي و مالحومة *** حكاية صغري حلوّة و قمقومة


قعد كلام
سوليتيكو و نحّول و الحجّام
و ڤازوزة سيدر في الحمّام
خير من سيزار في روما
كلّو كلاه البهيم كون مام
و غدوة جدّد كانك مغرومة

5 commentaires:

ferrrrr a dit…

الللاش و الرّيڤة

ما زلت تتفكرهم ههههههه

eddou3aji a dit…

أب أب!! أول حاجة جات البالي هههههه أما مالقيتهاش بالأنڤلي ههههه

Anonymous a dit…

hahahahaha

magnifique

Big Trap Boy a dit…

ممتازة يا الدوعا، أما نسيت لعبة التّصاور إلّي ينفخوا عليهم والفوشيك متاع العيد
:))))

eddou3aji a dit…

برجوليّة قلقت في الإخر و هزني النوم هههههه أمّا مازّالو برشا كيما الشّتكّة و تحجير الأنبايب متاع البلديّة و تحجير القطاطس الحاصل تحجير كل شي... هيّا يضهرلي ما كمّلتش خير ههههه