تحب تخدم؟؟؟

خدمة خلاصها محترم من غير ما نحسبو الفلوس إلّي تنجّم تعملهم ع اللّيمين و ع اللّيسار إنتي و العايلة

السّكنى و ما تابعها و الما و الضّو بلاش

قريبة من العاصمة و عندك منحة نقل و فواتير دو فونكسيون

مسمار في حيط و معدّل طول الكونتراطو ثلاثين سنة

فواياجات خالصين إلى بعض الدّول الشّقيقة و الصّديقة

عرفك ما عنبالوش بيك جملة و قد ما تعفس فيه قد ما يزيد يحبّك تقعد يتغشّش مرّة كل عشرة سنين أمّا تنجّم تبرولو فيسع

تنجّم تختار الجّماعة إلّي تحبّهم يخدمو معاك

المؤهّلات و الشّروط

ميدان الدّراسة موش مهمّ ياسر من المحبّذ تكون محامي و إلّا عندك ديبلوم في الإلكترونيك

تكون قادر تسكن ع البحر و تفرح بالضّيفان من جنسيّات مختلفة و توسّع بالك معاهم

تكون قادر على قراءة نصّ موش طويل برشا ساعة ساعة وموش بالضرورة تكون إنتي كاتبو

تكون فوطوجينيك و تصويرتك قادرة باش تتأقلم و تظهر عاديّة في كلّ بلاصة من الشّركات الكبار حتّى لحانوت الحجّام

تكون مسلم و تونسي و بوك تونسي و عزيزك تونسي

يلزمك تكون مقتنع إلّي إنتي هو الوحيد إلّي تنجّم تخدم الخدمة هاذي و تكون عندك قدرة على اللّعب على برشا أحبال في وقت واحد و التّعمير و التّكمبين و دزّان البيدق و تكون سبّورة كحلة و متيقّن إلّي إنتي أحسن واحد في العالم و العباد الأخرين قرودة و ما فاهمين شي و كان تسيّبهم وحّدهم يضيعو بالطّبيعة إذا توفّر فيك الشّرط متاع الجنسيّة التّونسيّة فإنّو المؤهّلات هاذي باش تكون راضعها في الحليب

تنجّم تقول جمل كيما نفتخر بعروبتنا و إسلامنا و إنتمائنا للمغرب العربي و كيما الشرعيّة الدّوليّة و كيما دولة القانون و المؤسّسات ماغير ما تطّرشق بالضّحك

و أخيرا وليس آخرا يلزم تكون عندك قدرة رهيبة على تحمّل دعا الشّرّ

إذا توفّرت فيك الشّروط هاذي ماذابيك تبعث المطلب متاعك فيسع فيسع على خاطر عنّا نقص فادح في العباد إلّي كيفك علشان

ماليش غيرك....