lundi 4 août 2008

تحب تخدم؟؟؟

خدمة خلاصها محترم من غير ما نحسبو الفلوس إلّي تنجّم تعملهم ع اللّيمين و ع اللّيسار إنتي و العايلة
السّكنى و ما تابعها و الما و الضّو بلاش
قريبة من العاصمة و عندك منحة نقل و فواتير دو فونكسيون
مسمار في حيط و معدّل طول الكونتراطو ثلاثين سنة
فواياجات خالصين إلى بعض الدّول الشّقيقة و الصّديقة
عرفك ما عنبالوش بيك جملة و قد ما تعفس فيه قد ما يزيد يحبّك تقعد يتغشّش مرّة كل عشرة سنين أمّا تنجّم تبرولو فيسع
تنجّم تختار الجّماعة إلّي تحبّهم يخدمو معاك
المؤهّلات و الشّروط
ميدان الدّراسة موش مهمّ ياسر من المحبّذ تكون محامي و إلّا عندك ديبلوم في الإلكترونيك
تكون قادر تسكن ع البحر و تفرح بالضّيفان من جنسيّات مختلفة و توسّع بالك معاهم
تكون قادر على قراءة نصّ موش طويل برشا ساعة ساعة وموش بالضرورة تكون إنتي كاتبو
تكون فوطوجينيك و تصويرتك قادرة باش تتأقلم و تظهر عاديّة في كلّ بلاصة من الشّركات الكبار حتّى لحانوت الحجّام
تكون مسلم و تونسي و بوك تونسي و عزيزك تونسي
يلزمك تكون مقتنع إلّي إنتي هو الوحيد إلّي تنجّم تخدم الخدمة هاذي و تكون عندك قدرة على اللّعب على برشا أحبال في وقت واحد و التّعمير و التّكمبين و دزّان البيدق و تكون سبّورة كحلة و متيقّن إلّي إنتي أحسن واحد في العالم و العباد الأخرين قرودة و ما فاهمين شي و كان تسيّبهم وحّدهم يضيعو بالطّبيعة إذا توفّر فيك الشّرط متاع الجنسيّة التّونسيّة فإنّو المؤهّلات هاذي باش تكون راضعها في الحليب
تنجّم تقول جمل كيما نفتخر بعروبتنا و إسلامنا و إنتمائنا للمغرب العربي و كيما الشرعيّة الدّوليّة و كيما دولة القانون و المؤسّسات ماغير ما تطّرشق بالضّحك
و أخيرا وليس آخرا يلزم تكون عندك قدرة رهيبة على تحمّل دعا الشّرّ
إذا توفّرت فيك الشّروط هاذي ماذابيك تبعث المطلب متاعك فيسع فيسع على خاطر عنّا نقص فادح في العباد إلّي كيفك علشان
ماليش غيرك....


15 commentaires:

Hnani a dit…

يا دوعاجي ، أشنيا هالخدمة راك هبّلتني و كان تعمل مزيّة تتوسّطلي فيها
حاجة وحدة ما عنديش هي كوني مانيش فوتوجينيك وزيد أنا مرا موش راجل
مايسالش زعما اتكون مرا في هالخدكمة؟ ثبّتلي يعيّش ولدي و قلي

eddou3aji a dit…

ماثمّاش حتّى شي يمنع باش تكون مرا أمّا ما صارتش قبل هههه فين باش نلقاو خير منّك تو نكلّمو العرف و إنشالله يفيق على روحو ههههه

WALLADA a dit…

يا دوعاجي
نسيتْ حاجة ، باش تصلح لهاالخدمة يلزمك تعرف تعَدِّلْ الكالكـُولاتـْرِيسْ متاعِك باش قدْ ما تطلع و تهبط في الحسابات ديما تعطيك 99،99 في الميا

3amrouch a dit…

هناني
هو راهو ممكن راو تشدها الخدمة اش كان عليه كلها دبلومات فلاحة ،حجامة كلها تقضي ياخي مارغريت تاتشر ولا هيلاري خير منا
دوعاجي
مبخلتني كان حكاية صبيغة الشعر...لازم زعمة في خدمتك نصبغو شعرنا ؟؟؟؟حقيقة مانجمش ههههه
ولادة
تهنا هكاكة في الحسابات قوين هو قالك هاالمرة باش يعملو تخفيض على العيينن وبرة

tunisianblogger a dit…

Ya wledi ehchmou!!! lolllllllllllllll :-) tawwa hedha klem yetkal!!! ??? El khedma hedhy melli estkallet lebled ma khedmouha ken zouz mennes!!!!

Kallem allahomma3afina mahich ma3moula lennes el kol!!! Yethesbou 3la swebe3 lidin elli fi terikh lebled el kollou ynajmouha!!!

Ama 3la dhekr sbighet ech3ar, yekhy kif yabda asla3 wkhayna echnowa lezmou ya3mel? lezma la7keya?

eddou3aji a dit…

@ wallada :
ههههههه بلحق نسيتها حكاية الكالكولاتريس... تابعة ماعون الصّنعة أيّ واحد بروفسيونال يلزمو يجيبها معاه سينون الخدمة ما تمشيش ههههههه

@ 3amrouch :
ههههه هذاكة إلّي مقلّقك إنتي هههه هو راهو ثمّة واحد صبغ و واحد ما صبغش ثمّة حتّى شكون كان لابس شاشيّة ع اللّوّل... نورمال معناها... هيّا أبعث السّي في و ربّي يسهّل ههههههه

@ tunisianblogger:

آهو خلّينا نعاونوهم بالكشي ثمّة مواهب في الخفاء ينجّموها ههههه آهو إعلان و بالكشي نلقاو حويجة نبدّلو بيها الجّو.... و يضهرلي ثمّة واحد أصلع و ما خطفتلوش قبل... توّ فهمت علاش هههههه

Big Trap Boy a dit…

هههه

خويا تقبلو الجنادبة في الخدمة هاذي؟

:p

eddou3aji a dit…

@ big :
ههههههه ما ثمّة شي يمنع أمّا حتّى هاذي زادة عمرها ما صارت ههههه هو راهو كنت باش نحط إلّي يلزم داركم تكون ع البحر و يلزم يكون عندك شويّة زيتون باش تتحصّل ع الخدمة ههههههه أمّا قلت ما غير ما نزيدو نصعّبوها هي هكّا و ما ثمّاش ههههه

Sosso a dit…

Je suis en train de mettre à jour mon cv . Kamel il awsâf est là pour ce job (est ce q'il faut des lettres de recommandations ?). juste un truc qui me chiffonne : si jamais je ne suis pas satisfait ou que la rémunération ne sera plus à la hauteur de mon ambition y a t il des indemnités de départ (stock options etc ..). aussi, si jamais je n'arrive pas au terme des 30 ans minimum (maladie ou autre ) est ce que je peux recommander qq pour me succéder .

Bachbouch a dit…

Si dou3aji!

Ena le francais wel 3arbi mte3i te3ibin. Mon education 3ala 9add-ha. Ama 3andi la fidelity! ki nchid khidma ma 3adesh insayab-ha. Za3ma tetwassatli ya si dou3aji? :D

eddou3aji a dit…

@ Sosso :
depart?? je pense que tu n'es pas fait pour ce travail :)) et en plus "recommander quelqu'un" tu ne peux pas... peut etre imposer... oui mais recommander ce n'est pas possible :))
@ bachbouch :
enti par exemple, tnajjem tab3eth le cv tout de suite :)) we need fidelity...3arbi, francais education normal who cares :))

Sosso a dit…

Ya dou3aji, 5ouk qlouqui barcha akthar melli tetsawwer. En plus je me dis que ce job peut faire bien sur un cv mais ne satisfait pas mon ambition et mes capacités. C'est pourquoi je me dis qu'une fois je serai passé du statut d'apprenti (sane3) à maître artisan (m3allem) je crois au bout d'une bonne 15 d'années, alors à ce moment là je pense que je voudrai avoir un post plus important tout en laissant la place à une personne digne de me succéder. (je ne laisserai pas les choses comme ça non plus ).
Pour recommander qq ti chnou il faut maîtriser le jargon du travail toi tu dis imposer moi je suis recommander lilmasla7a al3amma (tawwa hakka lazem entarjem ti c'est le même lexique que we7da, ou5ouwwa, là c'est du sadaad ra2y wa ro2ya estechrafiyya lilmostaqbal tawjihet ya3ni ;)

Bachbouch a dit…

hahaha. je voulai dire fidelite et pas fidelity... :)

eddou3aji a dit…

@ sosso : :))))) la emmella tu peux recommamder wa domtom dh5ran lel watan mais "laisser ta place a quelqu'un" kol el jam3iyyette el watania mahich mouaf9a ou t7ebbek to93od :)) chbih houa kif d5oul el 7ammam kif 5roujou :)))
@ bachbouch : :) hadhika hia madamek hi fi oumourek wadh7a :)))

sidijmour a dit…

عالسلامة سي الدوعاجي. يعطيك الصحة يا خويا في هذه المدونة. العرض متاعك بصراحة ناقص شرط هام جدا وهم نسخة مطابقة للأصل من مضمون الولادة لم يمض على تسليمه 3 أشهر. بصراحة في البداية مشى في بالي تحكي على منصب رئيس جامعة كرة القدم على خاطر بصراحة الشيء ما يبعدش على بعضو كان في المدة . على كل حال هذه أول مرة نطل عليك في مدونتك ونستني زيارتك يا خويا باش نفرح بيك في مدونتي على العنوان التالي،
sidijmour-tanit.blogspot.com