mercredi 20 août 2008

الإجماع

هالمدّة إلّي عدّيتها نقرى في البلوغوسفار حتّى لين ولّات هي و التّليفونات و الإم إس إن مصادرالأخبار الوحيدين إلّي عندي على تونس... قبل كنت نقرى لابراس في البيرو ساعات و بالطّبيعة كيما تعرفو لابراس ما تخلّيكش تعيش مع الأخبار كان إنّجّمو نسمّيو الشي إلّي تكتب فيه أخبار...عاد السّتّة شهرالإخّرانين أوّل مرّة في سبعة سنين نرجع شويّة في جو يشبّه ياسر للمجتمع التّونسي... يشبّه على خاطر ثمّة برشا عباد و برشا حاجات و برشا أفكار و برشا بلادة و ركاكة من تونس ماهيش موجودة جملة و إلّا موجودة بالشّويّة عالنّات...أمّا بلّي يكون تقعد ديما خير ماللّابراس و غيرها...آه بين قوسين من المدوّنات الأوّلانين إلّي قريتهم مدوّنة خيل و ليل إنشالله سي علي يبدّل رايو و يرجع يكتب فيسع على خاطر البلوغوسفار ماهيش كيف كيف بلاش النّقشات متاعو...مانيش قوي في الكلام متاع خسارة عظيمة للمدوّنات إلخ ... أمّا إلّي نعرفو إلّي هي خسارة عظيمة ليّ أنا...نسكّرو القوسين
...عاد يا مرحوم الوالدين ملّي رجعت إل مجتمع شبه جربوعي (جميع الحقوق محفوظة للبي تي بي)...و زيد ماعادش نخدم في بيرو و العلاقات متاعي ولّات منحصرة في الدّبوبة و الغربان و ناس تِتّكْرِم بالأنجليزيّة...و زيد على هذا توّا عواشر و الرّايت مايت و الرّاس تحت الزّاورة...ثمة حكاية فقت بيها مؤخّرا...هي حكاية قريتها في ماتيار هاك العام في البسيكولوجي دي جروب علم نفس المجموعات تقول إنتي...شوف ربّي القراية طلعت تصلح ساعات...ثمّة حكاية إسمها القرار بالإجماع و إلّا بريز دو ديسيزيون أفاك كونسونسوس...هو كي تجي تشوف في القراية هي حاجة باهية معناها كي يبدى ثمّة جماعة يحبّو ياخذو قرار يقعدو يحكيو عليه مديدة و ياخذو بخاطر النّاس الكل و ما يتعدّى القرار إلّا ما النّاس الكلّ تبدى متفاهمة عليه...معناها نوع مالقرارت المشتركة أمّا ماهوش كيما القرارات إلّي تتّاخذ بالأغلبيّة و إلّي عندو خمسين في الميا مع واحد هي إلّي يقرّر و موش زادة قرار من طرف واحد...هذا نوع متاع خدمة يمشي في التّصرّف و في السّياسة و يتسمّى ديموقراطي بالرّغم ملّي جماعة الدّيموقراطيّة القحّة يقولو عليه إلّي هو موش كيف النّوع متاعهم إلّي نورمالمون نشدّو نمزبلو بعضنا قدّام العباد و تهرّسني و نهرّسك و من بعّد إلّي يجيب خمسين في الميا مع واحد هذاكة إلّي عندو الحقّ...مثلا في اليابان و حسب ما يقولو ثمّة حزب واحد ديما يربح أمّا تتسمّى ديموقراطيّة على خاطرو مجتمع متاع كونسونسوس و ما عندهمش في سبرهم العناد و صحّة الرّقعة متاع القِورّة...يغسلو صابونهم بين بعضهم و الفكرة إلّي تخرج هذيكا ياخذو بيها خاطر الجّماعة الكل...ثمّة زادة شويّة بلدان أسكندينافيّة مجلس النّوّاب متاعهم كاينّو في جربوعستان ما يوصل القانون قدّامو إلّا ما يكونو تفاهمو عليه النّاس الكل و عادة يتعدّى...هذا الكلّ ما يخصّناش في الحكاية الحولة إلّي باش نحكيها على تونس...بركا قاعد نراجع في دروسي شكون يعرف ع الدّنيا غدوة يتسمّم واحد في الكوجينة ترصّيلي نخدم في بيرو نبيع في الرّيح للمراكب...الحاصيلو ثمّة مجموعات تختار و إلّا طبيعتها تخلّيها تختار طريقة الإجماع باش تعيش حياتها...في تونس كي نجي نشوف المجتمع متاعنا تلقاه يمشي بثقافة الإجماع...يقول القايل كيفاش تي نحنا أصلا ما عنّاش مشاركة في القرار ملّي نبداو صغار في العايلة و إلّا في الحومة...لا هذا صحيح ماناش كيما الجابون و إلّا فنلندا نحنا لمّينا الحاجات الخايبة الكلّ في حكاية الإجماع هاذي... هيّا شدّ عندك أوّل حاجة القعدان هكّاكة...كي يبدا مجتمع مستانس بالإجماع و النّاس الكل بازقين في إفّام بعضهم صعيب برشا باش تبدّل أيّ حاجة و شكون رابح في الحكاية ؟ النّاس إلّي عاجبها الوضع و تحبّو يقعد هكّاكة...النّاس هاذومة يقلّك مادام ثمّة شكون معارض التّبديل ما نبدّلوش و ديما يلقاو و إلّا يصنعو شكون ما يحبّش يبدّل و يقعدلهم الجو كيما يحبّوه هوما و بما أنّو المجتمع شايخ بثقافة الإجماع و يحب الماخذة بالخاطر ما يقلّقوش ياسر... مانبدّلو إلّا مانتفاهمو النّاس الكل كيفاش باش نبدّلو... و هذاية صعيب ياسر كي تبدى ثمّة ناس نيّتها مقعمزة و ما تحب شي يتبدّل...مثال بسيط و إلّا خلّي موش لازم لوّجو الحاجات إلّي النّاس الكل تحبّها تتبدّل و ما تبدّلتش و موش لازم تمشيو بعيد ياسر أبداو من جاركم إلّي عمل عَوْو ْ عالمادّة و بنى عليها سور و النّاس الكل ولّات تهبط تمشي ع الكيّاس و تخرنن أمّا نورمال و يكفي واحد بركا في الحومة يقول عشرة و الماخذة بالخاطر باهية النّاس الكل تقول الله يبارك و يقعدو يوتوتو مبعّد
عندك ثاني حاجة يخلّي الفرد و إلّا الأقلّيّة إلّي تعارض برشا قرارات الأغلبيّة مكروهة مالباقي على خاطر ديما تقلّق فيهم...بما أنّهم النّاس الكل متفاهمين و ثمّة واحد مرّاجة ديما يقوللهم لا مناش متفاهمين يولّيو يكرهوه...و لهنا ساعات ينجّم يكون عندهم الحقّ و هو معدة و مررلهم عيشتهم بمانيش موافق أمّا ثقافة الإجماع تخلّيه في موقف معقّد منّو هو عندو الحق في الماخذة بالخاطر كيف النّاس الكل و منّو مكروه على خاطر قاعد يعطّل في مصالح الجّماعة و إلّا موش متفاهم معاهم و هذا يخلّي للمجموعة زوز حلول الحلّ الأوّل تجيبو للثّنيّة بالإقناع و إلّا بالمشطة و الحلّ الثّاني تهجّجوو بالرّغم في بعض الأحيان ينجّم يكون عندو الحقّ و كان تصير مقارعة الحجّة بالحجّة كان ينجّم يقنع منهم جماعة أمّا بما أنّو ديما مبلبزها و ثقافة الإجماع تخلّيه يعطّل المجموعة حدّ ماعاد يسمعو...مثال بسيط و إلّا خلّي موش لازم أخطانا مالمشاكل...ناقصين هوما
الحاجة الثالثة و الأهمّ...و الله ما نعرف علاش الأهم...يمكن على خاطرها الإخّرة...ثقافة الإجماع تخلّي النّاس يتفاهمو ساعات على حاجة حتّّى واحد منهم ماهو مقتنع بيها...كيفاش؟؟ كل واحد يعمل فكرة في مخّو على المجموعة آش تحب تسمع...كي يقولو آش قولك في الحكاية الفلانيّة؟ يعطيهم الجواب إلّي يتصوّرهم الكل باش يجاوبوه... وكل واحد في الإخّر يقول نفس الحكاية و ساعات حتّى واحد ماهو مقتنع بيها...مثلا نحكيو بجدّنا كي الكلّنا نحبّو أبو القاسم الشّابّي...من الإبتدائي يسألونا شكون الشّاعر المفضّل متاعك؟؟ أبو القاسم الشّابّي... ثمّة شكون يعجبو بالحق أمّا خمسين في الميا مالتّوانسة يعرفو كان إذا الشّعب يوما أراد الحياة و ثلاثين في الميا يقلّك هو كتب حماة الحمى و كي يسألوه يقلّك أحسن شاعر و إلّا نحكيو بجدّنا توّا كي الكلّنا مع حرّيّة المرأة هكّا كي يبدى تونسي في التّلفزة و إلّا في قعدة مخلّطة يبدى يشوط أمّا برّا للقهوة تو تسمع لين تشيخ في غلّاو علينا الخبز و كان شدّت دارها خير و السّميد و الدّار أمّا المجموعة تخلّيه يقوللها آش يتصوّر هو تحبّها تسمع...و هذاية تنجّمو تسمّيوه نفاق و إلّا كذب أمّا مادامنا ديما نلوّجو ع الإجماع بالطّرق الكل بما فيها العنف و الماخذة بالخاطر و التّبرويل هذيّة النّتيجة الوحيدة إلّي إنّجّمو نوصلولها...و هاذي مانعرفش طبيعة و إلّا حاجة تنجّم تتبدّل.

10 commentaires:

Quareem! a dit…

J'appelle ça Schizophrénie de masse plutôt que "Ejma3" :))

Hnani a dit…

أنا انقول صنيعة موش خليقة

عاشور الناجي a dit…

سيدي علي...... الدوعاجي موش خيل و ليل
:))

الكونسونسيس موش اجماع، هاذاكا اونانيميتي، أما انت تقصد اجماع ضمني أو ثقافة القطيع

و يرحمه بيرم كيف قال مستحيل تخدع طفل صغير أما ما اسهلش انك تخدع الجموع و الجماهير الغفيرة


المشكلة و أننا نذبحوا أي واحد أو خصوصا واحدة تخرج على ها الإجماع المحنون الي أصلا عمره ما كان اجماع


أمي هناني جبت معاك محرم قبل ما تدخل لمدونة الدوعاجي :)))

3amrouch a dit…

دوعاجي
توة في وقتنا هذا قدامنا كان زوز حلول
ياامى ترضى بالواقع بكل مافيه من سلبيات و ظلم و قمع و سلب و نهب و فساد وتولي وقتها تحدث نفسك وتذكرها بقول الشاعر حينما تكون الجهالة نعيماً …. فمن الحماقة أن تكون حكيماً وتولي تدخل في الطاحونة وتعمل كيف الناس الكل وتسكر فمك وفي بعض الاحيان تصفق
ياامى تختار ان تكون من الفئة التي تسعى إلى الإصلاح وتتصدى للرداة والقبح والحرافيش وتوي وقتها تولي انت البرازيت والعنصر المشاغب وسوسة تحفر والناس الكل ضدك.
هو خيار صعيب دوعاجي بين العقل و الجنون ؟
بين أن تكون العاقل الوحيد بين مجانين أو مجنوناً بين العاقلين ؟
وكل واحد يختار طريقو.

WALLADA a dit…

أنا نرى في ثقافة الأقنعة تفشـَّات ، الكل يعيش بأكثر من قناع في اليوم الواحد ، اللهجة و الشخصيّة و النوايا و العقليّة و النفسيّة الـِّي تتعامل بيهم مع ولدك مثلا موش هوما الي تتعامل بيهم مع مديرك وإلا مع زميلك و إلا مع البوليس في الشارع و إلا مع زوجتك أو أو ...و لكن السؤال الِّي يطرح نفسُه : انت وين في وسط هذا الكل ؟ ويني حقيقتك ؟ و هل أنت راضي على نفسك

HNANI a dit…

الأقنعة تكثر وقت ما يكثر الخوف و انعدام الثقة بالنفس وانتشار الإنتهازية
وراهو التعامل مع الناس الواضحة حتى و لو كان تكونوا ما تتفقوا في شيء أسهل بكثير من التعامل مع الناس المقنعة

eddou3aji a dit…

@ K! :
هو راهو كان تجي تشوف الأمراض النّفسيّة من سكيزو إل بارانوياك و غيرها تلقى برشا مالأعراض متاعها موجودة عنّا أمّا الكلّنا مع بعضنا...الكلّو باهي هههههه

@ hnani:
هي صنيعة أمّا قديمة فينا حتّى ولّات كي الخليقة

@ 3achour :
و الله عندك الحقّ مالقيتهاش بالعربي...يمكن الإجماع الضمني و إلّا التّوافق في الآراء... ما نعرفش أمّا تضهرلي حكاية ثقافة القطيع كلمة قويّة علّي حبّيت نقولو ههههه...بالطّبيعة مالمخاطر متاع مجموعة تخدم ديما بالكونسونسوس هو أنّها معرّضة أكثر من غيرها لحكاية فلسفة القطيع... الحاصل المجموعة تأثّر ع الفرد مهما يكون و الفرد يأثر ع المجموعة ساعات و ماذابيه يحاول يأثّر ماغير ما يذبحوه ههههه

@ 3amrouch :

ثمّة طريق واحد آخر يضهرلي...الفرد ينجّم يأثّر على المجموعة وإلّا الأقلّيّة تنجّم تأثّر ع المجتمع ماغير تصدّي و ماغير ما يضهر مشاغب و سوسة...الطريق هذا صعيب و يلزمو الصبر و التّواضع و معرفة بخاصّيّات المجموعة و إلّا ليدرشيب قويّ

@ wallada :
أي مجموعة في الدّنيا عندها تأثيرها على جماعتها أمّا ثمّة تأثير من تأثير و تقعد حسب رايي مسؤوليّة الفرد باش يلقى روحو وسط هالجّوجمة

Bachbouch a dit…

@Dou3aji
On peur avoir nos differences dans plusieurs domaines et c tres normale et "healthy"... Mais le probleme est quand ces differences deviennent exigants et "shadow" des problemes plus importants pour notre pays et notre peuple qui ne sait plus rien de ce qui se passe autour de lui...
A mon avis, le peuple Tunisien n'a pas de "leader" qui l'inspire et qui peut le guider a travers des problemes ou il ya beaucoup de "contraversy"...
Bourguiba l'etait pour un moment...
Mais bon, si Ali ( khil we lil ) a poste une chanson dans facebook et elle disait:
شعب ساهي ، شعب لاهي، صفقلو يشطح فزّاني...
:)))

Bachbouch a dit…

@k!
Devinette pour toi:
Si tu te mets devant un mirroir, le resultat est... ?
:)))))

eddou3aji a dit…

@ bachbouch :
cha3b lahi ou sahi ou yachta7 fel fazzani :)) inchallah yo93od
yachta7 ou ma idawwerhèche 7ajette o5ra...Pour 7keyette les leader ena yodhehorli yezzi meneha.. Yezzina mel abtal.....ma twasselch la7kéya :)))