jeudi 4 septembre 2008

أهل الشّقاق و النّفاق

من جملة السّاكنين في الغابة عنّا ما يقارب الميا مسلمين...عاد بالرّغم الشّاف يهودي ألماني أمّا زدنا طوّلنا في وقت العشا باش الجّماعة تنجّم تشقّ فطرها و وحلت في راسي كيما العادة أمّا نورمال تجي في نص ساعة زايدة و أهوكا نساهمو في تلاقح الحضارات...عاد الثّلاثة إلّي وحلت في روسنا الكرفي متاع شقّان الفطر أنا و واحد دزيري و واحد لبناني... و الكلّها جراير الشّاف اليهودي مغروم بحقوق الأقلّيّات و الدّزيري هكّاكة ناس ملاح و أنا راس الهمّ دادة عيشة...برّا يجعلو إل ربّي... نورمال واحد يوسّع بالو... و أهوكا تبديل ريتم شويّا حريرة على شويّة فتّوشة... أمّا برجوليّة قدّاشنا مخلبزين..أوّل حاجة الميا يمكن فيهم عشرين يصومو.... كي تبدا تحكي معاهم على في تونس عنّا مجلّة الأحوال الشخصيّة و إلّا ما عنّاش وزارة الأوقاف يبداو يقحرولك على جنب و في رمضان الكلّهم عندهم دوا يشربو فيه و مرضى... ما يزّيش هكّاكة و يزيد يجي يشدّ الصّف مع النّاس الكلّ في وقت العشا العادي و يعاود يرجع مع شقّان الفطر و يزيد يهزّ معاه السّحور... تي يا قرضة كي إنتي فاطر علاش تجي مع النّاس الصّايمين... الحاصيلو هاذم إلّي كانو يسألو فيّ شبيك ما تجيش للجمعة و شبيك تعاشر في الكفّار و في رمضان الكلّهم عندهم مرض العطعط... ماعليناش... إلّي صايمين و يخدمو في الكوجينة من هنا إل إخّر رمضان باش نقرجم واحد منهم كان حبّ ربّي... هوما من عند ربّي يتلعوكو في الإفطار حاشا صلّاحهم إلّي هوما زوز مالنّاس...تقول هالعالم الثّالث ما ينجّموش يخدمو كي العباد...يبدا عمرو عشرين و يبدا في آهو ظهري آهو ساقي نحب نمشي نرتاح.... في الصّيام ما تحكيش... تقول عامل عليّ مزيّة كي جا يخدم... الحاصيلو تقول نافسة و إلّا واحد عندو كونسار في السّتاد ترمينال.... و يزيد يغمزني و يقلّي ماك تعرف...يعرّف العود في عينك...مانعرفش...صحّة ليهم عندهم نقابة و النّاس هوني عاملة قاوق لحكاية حقوق الأقلّيّات... كان جا بيدي راني و إلّا خلّيني ساكت خير...الحاصل عملو العار...الآخر جاني قالّي كيفاش تشوي في الحلّوف في رمضان...إيه تو نخلّيو العباد للشّرّ في رمضان...و توّا بالله ما فهمتش شنيّة ها حكاية الحلّوف إلّي شدّو كان فيها تلقاه يعمل في الموبيقات الكلّ و مبلبزها و تجي كان في الحلّوف...في شقّان الفطر اللّحم موش حلال و الكلّها تفشّخ فيه و ما عنبالهاش أمّا يا بوك تدور ريحة الحلّوف تقول حطّيتلهم دوا الفار...ياخي موش محرّمين الزّوز فرد بلاصة و إلّا أنا غالط...الحاصل رمضان هايل السّنا ... الحشيشة و نورمال واحد يشدّ روحو...ريحة الثّلاثة آلاف كوتلات حلّوف مشويّين كلّ يوم و نورمال تستانس...أمّا التّجوبير متاع الهوكش برجوليّة ربّي تستر مافيهش حلّ...الحاجة الباهية إلّي ما كانوش يعرفو إلّي أنا تونسي توّا كي عرفو و شافوني نخدم في شقّان الفطر و نعاون في الجالية المحنونة ولّيت بطل... لا يزّي عربي لا يزّي مسلم عندي الدّوبلي هوما برشا منهم عندهم وحدة منهم ناقصة.... و زيد عندي مفتاح الفريجيدار...و الثلاثة حاجات هاذومة كي تعرف تستعملهم عندهم تأثير كبير ع الشّعوب إلّي تموت ع الفوضى.

9 commentaires:

WALLADA a dit…

وحدك يا دوعاجي

Bachbouch a dit…

@Dou3aji
hahaha! Bon, awel 7aja, fi beli be3thek lil canada tla3etli kif chegevara 3ayech fil ghabet??? :)))
Fakkartni ki kont serveur fi restaurant 3arbi, kenou mes clients kif yjiw, ils demandent anwe3 il wiskey ilkol we ykarzou 3lia kan je les disaient ke la viande n'est pas 7alal!?!??
Cha3b zehi, xha3b lehi :))))

weld houma 3arbi a dit…

حاسيلو زايد معاك يا دوعاجي

julian sark a dit…

essabr

wella normal ched we7ed nharr dagdgou we mouleha rabi !

Bel Malwene a dit…

وحدك يا دوعاجي !!! يتولاك ربي قتلتني بالضحك ... فكرتني فالنفاق الجماعي متاع هالأشكال ... هاك النهار بش نشري كاعبات بربر من كرفور قالي لا ما تدخلش نهار جمعة ممنوع عالمسلمين ... و بجنبو بشوية يبيعو في لحم الحلوف (يضهر فيه الحلوف موش حرام نهار الجمعة) ... ما فهمتش ياخي على شكون يتمنيكو !! ماهو ما تحبش تبيع ما تبيعش جملة مش تعملي نهار الجمعة لا و نهار الأثنين ما نعرش شنوة و كان عندك كارت مش تونسي تدخل ميسالش ... حسيلو خوماضة ...خلي نسكت خير لا نتحل و آش باش يسكتني مبعد

HNANI a dit…

صحة شريبتك، أنا يظهرلي هاك مفتاح الفريجيدار هو الكل في الكل، ولّى جابلك البطولة و الكاس والروح الرياضيةههههه
على كل راك تستاهلهم الكل

3amrouch a dit…

دوعاجي
علاش تمشي لبعيد برشة...ايجا شوف لهموم الجامدة الي عندنا....والسلوك متاعهم
انا ركزت على سلاطة الفتوش ههههه تعرف خوك عندي كعبة "تبولة" ماحصلتش تعلمتهامن عند اللبنانين وزيد نعرف نحضر "الكبانية" بالقلاصون والنعناع والكبار امممممممم ماو قرب وقت شقان الفطر توى بديت نتشهى ههههه تو مرة نحيلك على ولد حومتي"سارق" عاد كيف يمشي يسرق يقلهم انشاء ربي معايا ومنتشدش هههههه

3lulu a dit…

j'ai passé trois ramadan à griller du bacon tous les matins au resto, du coup, cela me coupe l'appétit pour toute la journée, c'était efficace

eddou3aji a dit…

@ wallada :
ربّي يفضّلك يا ولّادة

@ bachbouch
هههههه، إيه هاني في غابة في الكندا و ساعة ساعة نمشي للحضارة ههههههههه إمّالا كيفاش ...الويسكي مذبوح هذاكة .... حلال هههههه دربكلو

@ arabbika :
و الله كان جيت إنّجّم راني إقتصّيت أمّا واقفتّلهم فيها الرّجال هههههههه و زيد نورمال نحنا الأبطال هكّاكة عنّا فازة العفو عند المقدرة هههههه

@ weld houma 3arbi :
ربّي يعزّك يا خويا

@ julian sark
هههههه الصّبر هذاكة هو الحل ههههههه

@ belmalwene :
هههههه القمّة متاع النّفاق و ما ثمّة حتّى ربع لوجيك.... و زيد عندك الحقّ تشريها أمّا كي يشدّوك عندك منها يفكّوهالك ههههههه

@ hnani :
يعيّشك يا هناني... أنا حاجتي كان بالمفتاح البطولة ما حاجتيش بيها ههههههه

@ 3amrouche :
هاك صنايعي...الكبة ذقتها مرّة برجوليّة هايلة هههههه أمّا هوني حدّهم حدّ الفتّوشة و ياسر فيهم هههههه
حلوّة فازة السّارق ههههه موش حاقر روحو بالكلّ هههههه

@ alaeddine ben abdallah :

hahahahaha, l'odeur du bacon le matin c'est tres efficace. Dieu merci je ne fais pas le dejeuner ici :)))