mardi 14 octobre 2008

صلاة الشّيشة

الجّبدة الأولى ليك إنتي
كيتشي مانيتو
السّيّد متاع الدّنيا
باش تقبل صلاتي
الجّبدة الثّانية
ليك إنتيميسوكوميك أوكمي
الأمّ الأرض
باش تقبل تحيّاتي
ولعة الشّيشة، لوح الجّبّاد
الرّيش إلّي مزيّنها
الإنسان إلّي يتكيّف فيها
الأرض، النّبات، الحيوانات، و العباد
إسمعنا الكلّ يا مانيتو
خواتنا الكبار الحيوانات
يعرفو قوانينك بالغريزة
أمّا حبّيت الإنسان يلوّج عليها و يلقاها وحدو و على طول حياتو
فرّقت قدراتك على خواتنا الكبار
عطيت للبيزون القوّة
و للسّنجاب الرّقعة الصّحيحة
و للبطّة الشّجاعة
الإنسان خلقتو ضعيف، عريان و رزين
أمّا هديتلو أعظم معطى الحلم
الحلم باش يعرفك و ما يضيعش
إمّالا ورّيني الثّنيّة،
حلّي عينيّ
و ديريجي فلاشاتي
باش ناكل و نقدّم في حياتي
هاذي صلاة متاع ناتيف من أمريكيا الشّماليّة... تتصلّى بالكالومي إلّي يشبّه للشّيشة أمّا بلاش ماء و يبداو يحرّكو فيه للجهات الأربعة...هذا آش شدّيت منها على خاطر الأنقلي متاعي تاعب و الشّيشة قويّة شويّة...باش ما نظلموش العباد...هوما شيشتهم متاع الصّلاة مافيهاش ممنوعات أمّا فرحو بينا قبل بشيش أخرين ما نعرفش آش فيهم... بين قوسين الشّيشة متاع الصّلاة مقدّسة و يستحفظو عليها مليح.... ماهيش متاع تفدليك تقول إنتي سجّادة و إلّا صليب... من بعّد قعدنا نهرّو على الدّنيا و الكريز إلّي عاملة بعمايلها في العالم و طاحو يسبّو في الوايت مان إلّي هو الرّاجل الأبيض بالشّويّة مالأوّل على خاطر أنا زادة عندهم أبيض...كلّ ماهو برّاني عندهم أبيض حتّى كي يبدى لونو أزرق...عاد كي لقاوني نسبّ أكثر منهم و طلعت مانيش أبيض ياسر تحلّو و عطاو ماعندهم.... قالو كان الرّاجل الأبيض ما ينحّيش الطّمع و ما يصفّيش قلبو راهو باش يبيلكنا و نحنا نستاهلو على خاطر نسينا الحاجات الباهية إلّي عنّا و سلّمنا في رواحنا و خرّجنا الخايب الكل...أمّا موش مشكل الباهي و الخايب في كلّ بلاصة و الحاجة الحلوّة في الوقت الصّعيب إلّي هو يظهّر النّاس على حقيقتها... الفجعة ما تدومش برشا و تصفّي الباهي مالخايب..حبّيت نقلّهم إلّي عنّا نفس الفكرة في بلادنا و نعبّرو عليها بزوز أمثال قويّين ياسر هوما : الرّبّ واحد و العالم في ززوة و إلّا شطر الميا خمسين أمّا ما لقيتهمش بالأنقلي...الحاصيلو تعدّى الوقت معاهم تقولشي ساعة ناس ضامرين و ماهمش مقطوعين ع العالم كيما نتصوّرو...فيهم المهندس و فيهم القاري أمّا يرجعو ديما للغابة يطلّو.. صحيح الأغلبيّة لا قراية لا صنعة أمّا هذيكة حكاية أخرى...مالحكايات إلّي حكاوهملنا أسطورة قديمة على كيفاش النّسر ولّى نسر
قالّك كي الدّنيا مازّالت كي بدات و كلّ شي مازّال جديد الحيوانات كانو يتكلّمو و العيشة كانت هانية على خاطر مافيهاش عباد...العباد بالرّغم إلّي فيهم حاجات باهية يقعدو بلبازة....يا سيدي وقتها دوب ما بدات الدّنيا النّسر ما كانش بوهرتو إلّي نعرفوها توّا و قوّتو...كان معروف بالكلام...النّهار الكل و هو يحكي...ما يسكتش...من كثر ما يحكي الحيوانات الأخرين ما ينجّموش يقول معاه حتّى كلمة...عاد في الإخّر ولّاو مطفّينو و ما يدوروش بساحتو...و قول فاق هو...شي..ماهو ما يسمعش...ديما يحكي و ما عنبالوش بيهم. في الوقت هاذاكة النّسر ما كانش ينجّم يطير عالي ياسر...أهوكه ينقز من شجرة إل شجرة و ياكل في الفرازط و الحشيش...الحاصل ما كانش قوي و ما كانش مزيان و ما كانش محبوب.
نهار جاه الغراب قالّو راهو الذّيب ساقو مضروبة و ما ينجّمش يصطاد و راهو جيعان ياسرالنّسر قالّو ما فيباليش شبيه ما قالّيش عاد الغراب جهل عليه وقتها و قالّو تي شبيك ياخي، الذّيب قالّك أمّا إنتي وقتها لاهي تحكي...أنواع العصافر الكل حكاتلك، الدّبّ و الغزالة حكاولك أمّا إنتي ما تنجّم تسمع كان صوتك
من بعّد التّسخسيخة متاع الغراب النّسر قلبو وجعو و غاضتّو روحو دار و قال إيه و كيفاش باش نعاونو الذّيب أنا نعرف نصطاد كان الخنافس و هو ما ياكلهمش...الغراب هزّو و حطّو و قالّو بطّل الهدرة... وقتها تسكت تو تسمع الجّواب.أكهو عاد النّسر سكّر جلغتو و بدا يسمع ...أوّل مرّة في حياتو يسمع...سمع برشا حاجات ما كانش يعرفهم...و زاد سمع ياخي سمع صوت الرّيح...كي سمعو دار قابلو و حلّ جناحاتو...الرّيح هزّو و طلع الفوق...طلع الفوق و عجبتّو الحكاية...ما عادش التّنقيز من شجرة إل شجرة يساعدو..هو صيّاد قويّ...هبط ع الحوتة إصطادها و هزّها للذّيب...و من وقتها النّسر ما عادش يستحقّ يتكلّم برشا...هو ماعادش يستحقّ يتكلّم من أصلو...شبيك راهو نسر!!! وهرة و قوّة و ناموس.. علاش الكلام؟ يكفي باش يحلّ جناحاتو و يطير فوق السّحاب باش العالم الكلّ يبدا يخزرلو و يصلّي ع النّبي.

5 commentaires:

3lulu a dit…

تدوينة طيّارة يا دوعاجي آما ولّاه سكّان البلاد الحقّانين يسخفوا مسكّرين عليهم كان خرجوا ضيّعوا هويّتهم و إمتيازاتهم وكان قعدوا في المحميّات البطالة و البيران تستنّى فيهم و كيفما كتب عليهم برنار أسّنوي, هذا شعب فلسفتو في الطّبيعة عميقة أما إحتكاكو بالقلقميش, يعني الوايت مان قتل فيهم برشى حاجات

weld houma 3arbi a dit…

الله الله عليك يا دوعاجي

brastos a dit…

اسّع اهلا بيك يا دوعاجي .. بعد هالغيبه
محلاها صلاتهم .. و المعاني اللي تضمّنتها
بربّي يقبلونيش
..هههههه...
اما تقلّهمش راو ابيض...ههههه
بالجد انا صادف و شفت الـ: ـ
powwow
الموسيقى التقليدية متاعهم
مميّزه برشه
برافو على هالتدوينه الباهية

Anonymous a dit…

Se3di b weldi! b3eth-tou ya9ra mchè lel gheba, wè wella ye7ki ken 3lè bizon, ecureuil, terre, plantes, batta chouje3a....
barra sali m3ehom :)
tbarkalah hahahahahaha

eddou3aji a dit…

@ alaeddine :
عيّشك يا علاء. عندك الحق عملو فيهم مساكن. و الله توّا هاهم بداو يطالبو بحقوقهم أكثر و عندهم محامين أمّا بلحق ثمّة حاجات ماعادش ينجّمو يعوّضوهم.

@ weld houma 3arbi:
ربّي يعزّك ياخويا

@ brastos :
أهلا براستوس. شيخة معاهم الجماعة
ههههه متأكّد إلّي يقبلوك ههههه جو هاك البوو ووو حتّى أنا حضرت إل واحد الصّيف هذا... أيّامات هايلين

@ anonyme :
:) ti ahawka 3ajjaw