mardi 5 mai 2009

عجّة بالمخّ

من بعّد عام و نصف تشرّد في الغابة إكتشفت إكتشاف عظيم و إلّي يتمثّل في أنّي عندي مخ مستهوش...يظهرلي سبقتكم بالحديث و هذا شي ينجّم يفرّح بعض المتخلّفين ذهنيًّا إلّي بالرّغم من تواضعي الشّديد نوصل نتضرب في روحي و يمشي في بالي إلّي أنا نابغة كيف نشوفهم فاش قاعدين يخلوضو.. جاب ربّي الواحد ساعات يتعرّف على عباد و إلّا يقرى حاجة تفهّمو إلّي هو زادة متخلّف ذهنيّا قدّام
ناس أخرى

عاد المخّ هذايا يظهرلي عندي من قبل أمّا نظرا للظّروف المحيطة بيّ في المدّة إلّي تعدّات ولّيت نعرف إلّي هو موجود.... يلزمني نستعرف قبل كلّ شي إلّي أنا عندي نظريّتي الخاصّة في تخمامي...معناها الطّريقة إلّي نخمّم بيها ديجا حاولت ندرسها على قاعدة صحيحة و طلّعت نظريّة صحيحة ميا في الميا...بالطّبيعة ما نتصوّرش ثمّة شكون باش يجي يناقشني فيها بما أنّي أكثر واحد ينجّم يفهم في أمور مخّي
.
النّظريّة هاذي متناقضة مع نظريّات علم النّفس التّحليلي (متاع التّحليل هههه) العلوم الإنسانيّة الأخرى و تقول إلّي عندي زوز أمخاخ نستعملهم باش نخمّم...باش مانشمّتش الأعادي و يقولو عليّ مهبول برّا نسمّيوهم زوز طرق متاع تخمام...الأوّل المخّ المصعصع إلّي تكوّن في ثلاثة و عشرين سنة عالم ثالث و باش ما نمشيوش بعيد و نبداو نطلّعو في الما للصّعدة مالضّربة الأولى نوضّح إلّي هو موش خايب ياسر و فيه حاجات محترمة ياسر.... هو متكوّن في الأكثر مالعادات و التّقاليد التّحيّل عالقوانين و تخديم المخ بالمعنيين الباهي و
الخايب
.
المخ الثّاني هو المخ متاع السّلوك الحضاري و يتكوّن مالتّربية و الخلطة و المبادئ المزيانة متاع الكتب و النّفاق الإجتماعي. و هو أوّل مرّة حلّبت بوجودو نهارت إلّي حطّيت حزام الأمان و أنا نسوق في تونس
.
و اليوم زدتهم المخ المستهوش إلّي يتميّز عالأخرين بالوضوح متاعو و بدائيّتو الموش نورمال
.
هو كي تجي تشوف الثّلاثة أمخاخ هاذومة المستهوش و المصعصع و الحضاري فيهم الباهي و الخايب و كي تجي تخمّم باز باش تستعمل واحد منهم. بالأخص إذا كانك كبرت في العالم الثّالث و تكوّن عندك المخ المصعصع على خاطر ثمّة عباد محرومة من هالنّوع الممتاز إلّي عندو وسائل قويّة في إستنباط الأفكار الحولة و الأفكار إلّي تهزّللحبس و الأفكار الأوريجينال
.
مثلا كي عرفك ينرفزك المخ الحضاري يقلّك أضحكلو و برّا إشكي بيه للنّقابة و المخّ المصعصع يقلّك أضحكلو و أعملّو مينة مع عرفو و دوّر عليه الخدّامة الكلّ و أعملو بيه شكاية جماعيّة محرقسة للنّقابة و المخ المستهوش يقلّك إستنّاه يطبّس عالفور أو مايعبّر عليه بالفرن في العربيّة القحّة و دزّو
.
كي تعرضك طفلة قطعة المخ الحضاري يقلّك تعرّف عليها و إكتشف الشّخصيّة متاعها شنوّة اللّون المفضّل متاعك؟ الأكلة المفضلة؟ شنوة آخر كتاب قريتو؟ و من بعّد إستدعاها بكل شفافيّة و إلّي فيه الخير يسهّل فيه ربّي. المخ المصعصع يرميلك جمل من نوع إيجا بحذايا عندي حكاية مزيانة باش نحكيهالك وإلّا تي سيّب المربوط و إلّا تقتل بالدّكّ و لهنا المخّ المصعصع عندو طاقات رهيبة في إستنباط الحكايات الفارغة. المخ المستهوش يسإلك لازم تحكي معاها و إلّا يسإلك لازم تشاورها .

كي يبدا واحد شاريلك الشّبوك المخ الحضاري يبدا يحب يناقش و يفضّها و كان لحمت ماذابيه يسلّها و إلّا يكلّم الحاكم ههههه مازّال ما قنعنيش بالخطوة متاع الحاكم حتّى السّلوك الحضاري عندو حدود المخ المصعصع يبدا خايف من غدرة و يلوّج في الحجر في حين المخ المستهوش يتعطل تماما و يقعد يحسب كان في المسافة إلّي تفصلو على أقرب جداق
.
كي تجي باش تلوّح كاغط في الشّارع الحضاري يعترض المخ المصعصع يلوّج أقرب تركينة و المخ المستهوش يحب يكعبرو و يضرب بيه أقرب مواطن
.
كي تجي باش تاكل المخ الحضاري يقلّك أغسل يديك قبل و المخ المصعصع يقلّك سمّي باسم الله و المخ المستهوش يقلّك كان تسمع كلامهم الزّوز تجيني جلطة
.
كي تسمع تحثريب متاع حيوان مجهول في الليل المخ الحضاري يقلّك أفصع و خبّر الأخرين و المستهوش يقلّك أفصع و أعمل تدميقة و المصعصع يقلّك إستنّى شويّة و خوذ تصويرة حطّها عالفايسبوك
.
كي نلقى فكرة ما تعجبنيش الحضاري يقول أي واحد عندو الحق يعبّر و المصعصع يقلّي كي تلقى واحد راكب على فركة قلّو مبروك الحصان و المستهوش يقلّي ثمّة ما يتمشمش نقلو لا يقلّي مازعمك في تضييع الوقت
.
هو كي تولّي حكاية أفكار المستهوش يفدّ و يقلق و يبدا يتثاوب...في حالة بركا يركّز وقتها تبدى حكاية تهدّد ماكلتو و إلّا شربو و إلّا حياتو... مثلا كي ولّات فيها فيروس الحلّوف ولّى يقترح باش نغسل يديّ عشرين مرّة في النّهار... الحضاري ولّا يخمّم في إستهلاك الماء و المصعصع قالّك إذا عطاك العاطي لا تشاطي لا تباطي
.هيّا الحضاري يقلّكم ماحلاكم ماحلاكم و المصعصع يقلّكم أنّستو و المستهوش يقلّكم ماوسع بالكم
Je n'ai pas peur de la route
Faudrait voir, faut qu'on y goûte
Des méandres au creux des reins
Et tout ira bien
Le vent l'emportera
Ton message à la grande ourse
Et la trajectoire de la course
A l'instantané de velours
Même s'il ne sert à rien
Le vent l'emportera
Tout disparaîtra
Le vent nous portera
La caresse et la mitraille
Cette plaie qui nous tiraille
Le palais des autres jours
D'hier et demain
Le vent les portera
Génétique en bandoulière
Des chromosomes dans l'atmosphère
Des taxis pour les galaxies
Et mon tapis volant lui
Le vent l'emportera
Tout disparaîtra
Le vent nous portera
Ce parfum de nos années mortes
Ceux qui peuvent frapper à ta porte
Infinité de destin
en pose un, qu'est-ce qu'on en retient?
Le vent l'emportera
Pendant que la marée monte
Et que chacun refait ses comptes
J'emmène au creux de mon ombre
Des poussières de toi
Le vent les portera
Tout disparaîtra
Le vent nous portera.



Le vent lemportera - Noir Désir

9 commentaires:

لاعب النرد a dit…

قوية...المستهوش كان تبعه تولي حياتك كيف حياة هومر سمبسون...ـ

Sosso a dit…

Donc el3ejja belmo5 hiya al7all?

ART.ticuler a dit…

Bravo do3aji!

eddou3aji a dit…

@ la3eb ennard :
عيّشك لاعب النّرد...و الله واحد يرتاح من برشا جوجمة كان يولّي كي هومر هههههه

@sosso:
وينو المشكل السّاعة باش نلقاو الحلّ ؟؟؟ هههههه و إلّا برّا ميسالش أهوكة عجّة بالمخ على ما ياتي ههههه

@ art :
أهلا بالتّونسي ههههه رو مرحبا

@ haddare :
أبهرتني ياسر لوجيك هههههههه سبحانو إلّي حرّم عليك الحشيش

Anonymous a dit…

asma3 ya logique, ya weld Louis Montassier et Scoubidou, ya weld hammouda 7layyba w zouzou peaudouce, continuez votre cirque, c'est normal, vous etes habitués aux cadeaux, allah ghalebn vous êtes nostalgiques des permutations des journées (un certain 2001-2002) et des magouilles chiboubiennes et même anté chiboubiennes et post chiboubiennes.

Sosso a dit…

c'est vrai comme j'ai dit 7all ça laisser entendre moshkel mais en fait je parlais de la gestion des trois cerveaux 7allaha 3ejja belmo5

eddou3aji a dit…

@ هدّار

تي شنيّة تحب تحلّي نقاش ع الكورة بالسّيف؟ تو كي نتفاضى نعملّك درس على تاريخ المكشّخة باش تعرف تاريخ بلادك و ماعادش تتعلّط على حكايات ما تفهمش فيها....من هنا إل وقتها آهو حتّى حدّ ما سمعك لهنا ههههه نورمال تقعد بيناتنا هههه أمّا تمشيشي تعاودها مع ناس أخرين و إلّا في قعدة صحيحة ؟؟ على خاطر يضحكو عليك و يقرّدوك ههههههه

@ sosso :
:))) Tres bonne idee a la manierede la pzza 4 fromage. Au moins qu'ils servent a quelque chose. peut-on utiliser un pied comme 4 eme cerveau ??? Il y en a qui l'utilise pour penser :)))

Sosso a dit…

Pourquoi pas twalli 3ejjet mo5 bel kroo3;-)

eddou3aji a dit…

leklem ezzayed la ya 9lil el fahm :)) Normal haddar fahmek
th9il :))
ou ba9i fi itar 9illet el fahm
mta3ek ne3lmek elli el post hadha ma3andou 7atta 3ale9a bel koura... ahawka el post elli 9ablou ya7ki
3alkoura ya sel3a :))