الهوى و الشباب

العملية الكل حسب ما نتذكّر بدات مع آن باريو Anne Parillaud غلاف مجلة بلاي بوي اكتوبر واحد و ثمانين حاجة من ورا العقل حب حياتي الأعظم وقتها كنت نرقد و انا نخمم فيها قصة حب لا يرى الشمس دامت سنوات و تبزّعت فيها هكتولترات ..... دموع. 

و ما كنتش ننساها بالكل.... إلّا كي نوصل للصفحة الوسطانيّة إلّي فيها نجمة الشهر هذاكة في بلاي بوي Kelly  

إلّي مازلت كي اكتشفت اليوم إلّي هي كنديّة و يرحم والديها على خاطر يضهرلي هي فوّلت عليّ في الجيّان هوني. أوّل خيانة في سلسلة الخيانات المتواصلة إلّي باش تتعاقب على أزين نسا في العالم.

ما نعرفش فين طحت بيها المجلّة أمّا يضهرلي طحت بيها مع مجلّات أخرين و أنا انّقّب على كتب قدم في بعض البلايص. أغلب النّاس ديما تحبّ تتخلّص من الكتب متاعها إلّي في العادة ما قراوهمش/ كان جاو قراوهم راني ترزيت في المجلّات/ و أنا وقتها نلم فيها شليلة و مليلة. دايور أغلب الكتب إلّي قريتهم ما نعرفش عنوانهم و إلّا ناقصني البداية متاعهم و إلّا النهاية متاعهم على خاطرهم تبدا حالتهم حليلة. المجلّات الأخرين نسيتهم أمّا هاذي قعدت نتذكّرها على خاطر العملاقة Anne Parillaud <3.

على ذكر الكتب ثمّة بنت المجذوب متاع موسم الهجرة إلى الشمال إلّي بقت مشبوحة حتّى الفجر و ثمّة حميدة متاع زقاق المدق و بعض الروايات التونسية إلّي ما نتذكر منهم كانت اللقطات إلّي موش و لا بد / يمكن على خاطر ما فيهم ما تتذكّر/  جمل كيما  /و ظلّت يداه بين التعاريج فلهثت/ و غيرها أكثر جوّ ، حفّلولي علاقاتي مع أزين نسا في العالم خلال طفولتي البريئة. و قولوا الثقافة خايبة و خاصة أنّوا ثقافتي الموسيقية تكفلت بيها اثنين من حبيباتي eve ruggieri و Raffaella Carra.إييييه برونتو رافاييلا .

الكلهم تنساو في لحظة وقت إلّي تعرّفت علىالموش نورمال ماجدة الرّومي تغنّي في غناية عبد الحليم و انا كل ماقول التوبة يا بوي في روبة بيضة خايبة أمّا الله غالب القلب و ما يريد.

http://youtu.be/4j1ytqG27JA

ماجدة زادة جاها نهار و خلّيتها و شدّت بلاصتها Juliette Binoche في Fatale

إلّي بدورها خلّات بلاصتها إلى Julia Roberts و من ادراك في pretty women

 و في تلك الأثناء و بعدهم و إلا قبلهم جات مادونا و ياسمين متاع alerte a Malibu و إيمان الأثيوبية و ديانا حداد و نجوى كرم و mylene farmer و إلخ إلخ. طول عمرو الواحد يرقد و هو يخمّم في الزّين و العين لين يجي نهار إلّي يهزّك النّوم و انتي تخمّم في العلاقة الجدليّة بين مانعرفش شنيّة و مانعرفش كيفاش و إلّا في الديموقراطية و الإسلام و إلّا في الشط و البحر وقتها تعرف إلّي إنتي كبرت و عزوزت و هز ربّي متاعو و النسا خرجوا من أحلامك. الرجوع لربّي .

الهوى و الشباب و الأمل المنشود٠٠٠ توحي فتبعث الشعر حيا

الهوى و الشباب و الأمل المنشود٠٠٠ ضاعت جميعها من يديا