lundi 14 janvier 2008

ما نْحِبّش نْعرّس

توّا فكّيتوشي عليّ!!! ياسيدي ما عينيش!!! ما نحبّش !!! ما نّجمش!!! ما نقدرش!!!ما....ش!!!
بالله توّا الفاميليا كيف يبداو يخرننوا النّهار الكل في راك ماعادش صغير في وقيّت في نحبوا نفرحوا بيك تنجّم تتفهّم موقفهم و تقول قلبهم عليك و يحبّوا يتهنّاو عليك و آك اللّوغة...
مادموازيل مازّلت كيف تعرّفت عليها وتبدا تغنّيلك على ماخذة و على مستقبل نورمال البنات في العالم الكل يحبّوا يعرّسوا و يستنّاو ملّي تتحل عينيهم في لو برنس شارمون (إمّالا باربي و بلانش ناج علاش عملوهم ماهو باش البنات متاع العالم الكل ينفخولك راسك بهالحكاية)....
صحابك إلّي عمرهم كامل ضد الإرتباط و ضد التّعاقد، دوب ما يطيح على قراقبو ويهز الخبزة قاطو و يمشي يخطب من غدوة يحطلك الديسك متاع الهنا باهي و إلى متى فرش بو بلاصة و سهّلها تسهال و مازّلت كان إنتِ... ميسالش مسكين هو تكعبرتلو و ما يحبّش تتكعبرلو وحدو والرّبطة مع الجماعة خلاعة
أمّا هذا تاكسيست هنداوي تبدا تحكي معاه باش تقصّر الثّنيّة يقوم يقلّك راهو طريقك مسدود مسدود و لكان ما تعرّسش في أقرب وقت باش تقعد عمرك كامل تشهق ما تلحق و ماك باش تعمل شيء في حياتك هاذي قالتلهم أسكتوا توّا ناقصك أنا تفوّل عليّ وتزيد تجبدلي في حكاية سمعتها عشرة مرّات الجمعة هاذي برك...تقولش عليّ نحكي مع عم الطّاهر التّاكسيست كيف يجي يعمل شيشة في القهوة.
توّا العالم الكل ولاّو متفاهمين عالعزّاب من كامل الجنسيّات باش يدخلوهم القفص الذّهبي؟؟؟...حتّى كان جا مسلم نقولو يحبّك تملك نصف دينك و تريض...زعمة الدّار باعثينهولي باش يزيد يمرجني.
ياجماعة...يا جماعة راهو النّاس كانت تعرّس بكري على خاطر كانوا يعيشوا شويّة...معدّل الأعمار في أوائل القرن الفارط ( ملّا أنا وملّا جملة كتبتها :) خلّي نعاودها معدّل الأعمار في أوائل القرن الفارط كان بين الأربعين و الخمسة و أربعين معناها كيف يعرّسوا عمرهم عشرين يعيشوا مع بعضهم كان عشرين سنة ...توّا معدّل الأعمار فوق السّبعين معناها تعرّس عمرك ثلاثين مازّلت باش تعيش مع نفس الإنسان أربعين سنة ....علاش إمّالا النّاس ولّات تطلّق برشا؟؟؟موش على خاطر ناس قبل يحِبّوا أكثر و يعاشروا أكثر ولّا ناس توّا ماهمش قد المسؤوليّة...لا على خاطر قبل كانوا ما يخلطوش باش يقلقوا من بعضهم
و زيد يا سي التّاكسيست ما نعرفش في الهند شنيّة ظروفكم أمّا نحنا ما تكمّل تقرا كان في الخمسة و عشرين وما تلم زوز دورو كان في الثلاثين هذا كانك مزهار و حاذق
و زيد على هذا و دونو نسا توا موش كيف نسا قبل...يقعدو مع النسا الأخرين و يتلهاو بالكوجينة و آش ما جا يرضيهم توا تحبّك شادّلها وجهها و تبشبش بيها و تخرّجها معاك و تدخّلها معاك و تعملو ديزاكتيفيتي مع بعضكم...يا سيدي أنا كان في تونس نحب نلعب الأدواس لين تسكّر القهوة و نحب نكوّر نهار الأحد و نحب نمشي للستاد و هاذوما ديزاكتيفيتي تسمع فيهم وسخ وذنيك وماتنجّمش تشارك فيهم مرتك و كان البرّة من تونس نحب ساكي على ظهري و فين يطيح اللّيل نبات ونحب نخرج عقاب اللّيل نتفرّج في خلق ربّي و أكتيفيتي كيما هاذي منافية لكل أنثى تحب تعرّس وتجيب صغار.
إيّييياه ملّا تفرهيدة...هيّا تبقاو على خير

10 commentaires:

3amrouch a dit…

عيش وتمتع مازلنا صغار قالو عرس وصغار ومسؤلية.
عيش خويا هاني متظامن معاك

loulou a dit…

lol..un post trés sympa d'ailleur tout ton blog malheureusement ke je viens juste de le découvrir...
concernant ce post je suis d'acc avec toi mazzél bekri en plus ne te prends pas trop la tete asma3hom w9oul rabbi ysahhél famméch mayfokkou 3lik...
bravo pour le blog j'y reviendrai certainement.
à bientot.

eddou3aji a dit…

@ 3amrouch :
عيّش خويا،
آهو الكلام إلّي يفرهد عالقلب
...:))
@Loulou:
Merci content que ca te plaise.
j'ai essaye tout les trucs possibles et imaginables...Ils veulent pas lacher...mais c pas si grave que sa :))

adib a dit…

y'a si eddou3agi;) haya chkopulek nkaounou jam3ya: jam3yet el3ozzeb

rahou famma menna barch 3la elblogosphere;)

3amrouch a dit…

adis enna je me porte candidat

eddou3aji a dit…

Hayla fekret el jam3iyya :)
Je participe. Ou na3mlou 9anoune da5ili ouelli i3arress entarredouh :)

moghrama a dit…

bravo si eddou3aji pour le post reès sympa.3ejbetni yasser 7keyet les activités ..wallah ech bech enkollek ,el3ers fih walih mouch elkollou khaeib we tnejjem tel9a mra 3andha ses propres activités we ma 7ebbech echkoun i9alla9ha , hakkaka temchi inti lel 9ahwa we hia lil les activités mte3ha ..ama rahou el3ers sotra bil7ak we tkammel nosf dinek ,( 3ala9all todhmon nsaiif)

eddou3aji a dit…

mar7bé bik moghrama...klemek ma39oul...amma thamma menhom ennessa hadhouma? ken to3rdhek wa7da 9olli :)...ou madhabia éna ennajjem en9alla9ha hia manne7ebbehech t9alla9ni...je suis compliqué?? ah :)

wissal a dit…

si dou3aji, heureusement que tu n'est pas le dernier homme sur terre...
et puis la femme que tu cherches c'est moi, mais je suis déja mariée, en gros c'est finis pour toi, tu dois rester 3azb, tetfarhed 3ala rouhek, w t3ich hyatek, ila an toukarrir ma you5alef hadha!!!
génial ton blog, rabbi yjiblek bent lahlal wlaydi w yostrok, ya3tik essaha;-P

eddou3aji a dit…

Dommage!! Je le savais que j'ai raté ma chance à quelque part :). Merci pour ton passage et pour tes compliments.