samedi 5 janvier 2008

الجيل X

واحد صاحبي المرّة الأخرى قالّي علاش الجًماعة إلّي مولود ين إمبعًد عام ستًين إلكلًهم ما فلح فيهم حد... في أصحابنا و معارفنا إلًي محسوب إلكلهم أندادنا ما نعرفوا حد مسلكها كيف إلًي قعد في تونس كيف إلّي خرج إلبرًة تي هوً حتًى أندادنا مل قورّة كي تجي تقارنهم بالجيل إلًي قبلهم تلقاهم مساكن مضامين



عاد جيت انخمّم أو هاذي حكاية ما تصيرلىش ديما على خاطر التخمام يعمل وجيعة الرًاس وماهوش متاعنا و مؤامرة صهيونيًة باش انسيًبوا إلميادين إلّي نحنا مشهودلنا بيهم في العالم أجمع كيما التقطيع والترييش، العياط ، قلًةالنًظام ونولًيو اللطف علينا كي العلل نقراو في الكتب ولابسين مراياتات ونحبًوا نفهموا كلشيء الطف ياربّي وهو قالها لي واحد متثقف ملبريمة ملًي أنا صغير "علاش تحب تفهم ياخي لازم تفهم إلًي فاهمين تاعبين أقعد هكًاكه خير لك"




إلحاصيلو المرّة هاذي قلتا نخمّم على خاطرعندي بلوغ والعالم الكلًو يتفرّج فيّا... هو كيف تجي تشوف تلقى صاحبي كلامو صحيح و تلقى إلّي الجيل لًي يقولولو
: تاعب في العالم الكل...السًاعة"X"




خامسًا جربوا فينا كل شيء مالسًيريلاك، لسًبادريات غزالة، للأتاري، للياغرت، لإفتح يا سمسم حتًى للتوجيه في الثانوي


تروازيامّون نحنا شويًا على خاطرالتنظيم العائلي واللي قبلنا برشا معناها صعيب باش تجي تنطًر بلاصة في خدمة و إلًا في منصب



أوّلاً و أخيرًا الجماعة إلّي مبعدنا إلّي يقولولهم الجيل إيقراق لايزّي أكثر منّا (مانعرفش بالضبط ياحسّهم برشا يا أكثر منّا) ولايزّي هوايف متاع تكنولوجيا مولودين وفي إيدهم تيليكوموند وبورتابل و سوري




الجًماعة إلًي تولدوا امبعًد الحرب العالميًة الثًانية إلًي يعيًطولهم بابي بومر ..............كانوا شايخين فيها عملوا بعمايلهم والعالم خارج من حرب و يحب يعيش فلوار باور و هات ماك اللّاوي.....هيّا علاش نمشيو لبعيد هات ناخذو واحد مولود عام 50و واحد مولود عام 78كيف حالاتي

وقت إلّي تولدنا هو اخترعولوا التلفزة بالكولور و العالم فيه بوم إكونوميك قوي....و أنا مظاهرات في تونس و السادات صحّح كامب دافيد و كان ما مشيناش لالأرجنتين راهي خلات


وقت إلًي دخلنا للمكتب، هو استقل وعملولوا منظمة عدم الإنحياز....و أنا مظاهرات الخبز و الحرب الباردة ضهرلها باش تسخن


وقت إلّي خذينا السّيزيام، هو خرجت عليه فرنسا من بنزرت و اخترعولوا الميني جوب والقمم متاع الفن كل مرة يخرجولو بطقطوقة....و أنا أمركيا ضربت لبيا و بدات تبسّس للعراق و ثورة إسلامية في السودان و بدات تشد بعضها في الجزائروعبدالوهاب مات


هو عمرو 18، عبد الحليم، برال،براسنس،بتلز إلخ ريفولوسيون سكسيوال،ربيع 68، و من بعد وودستوك، و طلعوا للقمرة....و أنا حكيم، روك فوازين، تو بي ثري، الناس الكل خايفة من السيدا، و سيبوا القمرة والسما و شدّوا سمانا


ما غير ما نكمّل عاد، الحكاية معروفة تي يا بو قلب أوروبا كانت حك راسك و امشي لا صف قدّام السفارة لابلادة و ركاكة، المنزه و المنار كانو اسمهم فج الريح و كرش الغابة و الميترو أرض إب إخ تف تي الحاصيلو يمكن هذاكه علاش الجيل
X
ماسلّكهاش و عالدّزّة هاذي موش باش يسلّكها على خاطر خلط عليه الجيل
Y
وفي العالم الكل الجيل هذا صحيح رقعة و ما يعبر حد

2 commentaires:

FER9AT MOUKAFA7AT ASSRAD a dit…

On dirait nesma3 fi 7keya ba7dha el 7wenet wala fi birou 35 !

eddou3aji a dit…

Ya 7assra :))) birou 35 nsitha hadhi...ou kol 3am ou a7na 7ay
etta7rir :))