vendredi 6 septembre 2013

إرادة الحياة

"You can't always get what you want"
Mike Jagger (1969)

تعرف ما عنّاش كلمة تقول الإرادة بالتّونسي، wille، la volonté ، بغيت، أراد، want. نحنا ما يلزموناش عايشين من غيرهم و أمورنا واضحة نحنا ما نريدوش نحنا نحبّوا. نحب ناكل، نحب نروّح، نحب أكهو : الإرادة هذيكة بالقدرة، قدرة ربّي و إلّا wille zur macht... حاجة نيتشويّة عالإخّر.  شعب فيلسوف كلّي بالضبط.  هو يقلّك إذا عطاك العاطي لا تشاطي لا تباطي .... ما تعمل شي حبّوا. حب آش ما عطاك و ماغير ما تحاوز تفهم. كل واحد مغرفتو آش هزّت و القوّة في حب مغرفتك و إلّي هزّتّوا على خاطر هاذي باش تريد مغرفتك و زيد باش تريد آش في وسطها يُصعب شوية ، تي  انتي حتّى تعرف مغرفتك شنيّة مغرفة لوح، مغرفة سكر، لوش، و حتّى تعرفها فين باش تطيح قصعة، شقالة، طنجرة، صحفة، تبسي، فنجان.... الحاصل نيتشة كان جا تونسي راهو نقّص مالكبّي. 
تي آش علينا فيه هو نحنا عنّا زوز نتذكّرهم توّة حكاو عالإرادة هكّة بالمتعنّي عيني عينك :
الأوّل مجهول / عالأقل عندي أنا/ قالّهم : 
ماتضربوشي البنت وجّعتوها....  ما تضربوشي ريدي ما تضربوشي لابسة المجيدي .... و هذا من غير ما نحكيو عليه على خاطروا ديجا ريدو قاعدة تاكل في الخبط و هو قاعد يتغبّن كي الوليّة و هي خايفة من بوها و تبغي الشهاوي.... الحاصل كان حبها كي الناس الكل و جا ماللٌوطى و خطاه من نريدها و هي كان اشتهات كيف أندادها شهوة صبيّة شكون كان يلوم عليها لازم تبغي ؟ ما هو حبّها و حبّوا و لا تريد و لا تبغي كان نيّتك صافية دق الباب و أسمع الجواب أهوكة توّا رصّاتلو في قصر عالي و سلّوم و ما نعرفش شنيّة و شوف و شوف. 
الثّاني أبو القاسم الشابّي كاتب قصيد كامل مسمّيه إرادة الحياة باديه ببيت : إذا الشعب يوما أراد الحياة فلا بد أن يستجيب القدر. البيت إلّي مرجوني بيه العريبة إلّي تقلّوا راهو الإقتصاد تعب يقلّك الشعب متاع الشابي و أراد الحياة ما يفلسش تقلّوا راهو الشعب انتخب مدّبيّة يقلّك إرادة الحياة و القيد ينكسر تقلّوا راهو قنابل و ألغام يقلّك اللّيل ينجلي و انتوما التّوانسة شعب أراد و أبو القاسم الشابي . السّاعة أوّل حاجة الشابي يسأل في الأرض و في الدٌجى و يحكي مع الخريف و الشتا و الرّبيع و ما سألش الشّعب التّونسي. و يضهرلي يعرف إلّي الشعب التّونسي الحكاية هاذي حسمها عندوا مدّة و لا يريد حتّى شي جملة آش خلّاه الشّابّي يبدو قالّهم ليتني حطّاب خلّي نفتّقكم من بعضكم يا أغبياء /  والله قالهالهم موش لعب/ و دايور حتّى هو طلع تونسي على خاطر كي ولّات فيها فاس و أمور متاع جدّ ما عادش يقول أريد ولّى يقول ليتني و تألّمت ثم أسكت آلامي و عملتلكم بوكي نوّار و هاني غضبت و ماشي للغابة مع يأسي و بؤسي و باش نعيش مع العصافر.  الحاصل إلّي أغرب من هذا ما نعرفش شكون ولد الحرام إلّي جا حطّلهم البيت هذا في النشيد الوطني!! شعب ما عندوش كلمة أراد في لوغتو،  و جاد عليه باش يريد إسقاط النظام و باش يريد الحياة .على مراد الله. 
هو عنّا كلمة تقرب للإرادة بالتّونسي و هي ماذابيّ إذا الشعب يوما ماذابيه تو يقلّكم و أكهو. في إنتظار هاك النهار السعيد بدّلونا هالبيت ببيت الشيخ العفريت إلّي يعبّر بأكثر واقعيّة على أمورنا و جوّنا:

أنا ماذابيّ انا ماذابيّ **** نعيش بكيفي في حرّيّة
نحب على طفلة *** نڤابلها ليلة في حفلة
و نشدها عالغفلة*** و نعدّي بيها كيفية

4 commentaires:

brastos a dit…

ما بين فوندو العفريت و فوندوك .. لقيت عندي زنس ارادة باش نعمل كعبات.. فمتلا

eddou3aji a dit…

صحّة صحّة :) تشن تشن في صحة البدن

chipie-chipounette a dit…

اللي كتبتو حكاية والغناية هاذيكا حكاية ورواية :) حتى أنا راكبتلي عليها هالأيامات وسورتو سورتو كيف يقول
نحب على سمرة **** تكون سخونة كيف الجمرة

eddou3aji a dit…

و نعدي ليلة عالڤمرة و حتى حد ما يفطن بيّ